Read bahnar Jo 34 Bible Online

Jo 34 - bahnar bible

Jo 34

¹Kră Yang khan dơ̆ng kơ Môis thoi âu:

²Khan tơbăt kơ kon pơlei Isơrael bĕ tơdrong 'nâu: Lu iĕm gô mơ̆t iŏk dêh char Kanaan jang sa, hơdral kơ dêh char noh thoi âu.

³Gah gơal hơdral lu iĕm, iŏk đơ̆ng tơmăn glă Yin, rok hơdral char Eđôm. Pơtơm đơ̆ng bơbah đak Dơsĭ 'Boh tơ gah hơlĕch.

⁴Hơdral 'nâu rok dăr kơ kông Akrabim, gah Yin păng tơ'bưh gah gơal Kades Barnêa; đơ̆ng noh truh tơ Hasar Ađar hơloh truh tơ Asmôn;

⁵đơ̆ng Asmôn rok weh gah đak glung Êyiptơ tơ'bưh tơ đak Dơsĭ tih.

⁶Bĕ hơdral gah bơmơ̆t lu iĕm rok đak Dơsĭ Tih.

⁷Hơdral lu iĕm gah yă-nơ̆m: Iŏk đơ̆ng đak Dơsĭ Tih dĭng truh tơ kông Hôr;

⁸iŏk đơ̆ng kông Hôr truh 'bơ̆t trong mơ̆t tơ pơlei Lebô Hamat, dĭng 'bơ̆t Sêđat.

⁹Rok truh tơ gah Siphrôn, hơdral tôch 'bơ̆t Hasar Ênan noh boih hơdral lu iĕm tơ gah yă-nơ̆m.

¹⁰Gah hơlĕch hơdral lu iĕm iŏk đơ̆ng Hasar Ênan truh tơ Sêpham;

¹¹đơ̆ng Sêpham jur truh tơ Ribla tơ gah hơlĕch kơ Ain; đơ̆ng noh jur tơ gah hơlĕch đak Dơsĭ Kinêret.

¹²Na tôch sư, truh jur tơ gah đak Krong Jôrđăn păng tơ'bưh tơ đak Dơsĭ 'Boh. Noh boih hơdral dêh char iĕm, đei hơdral tăp dăr thoi noh.

¹³Môis tơbăt nơ̆r tơtă 'nâu ăn kơ kon pơlei adrĕch Isơrael thoi âu: Noh boih dêh char mă lu iĕm gô hlang lăng iŏk asong băl kiơ̆ thoi nơ̆r Kră Yang đei khan ăn kơ tơsĭn adrĕch păng minh puăt adrĕch Manase.

¹⁴Yua kơ adrĕch kon sâu Rubên, kiơ̆ kơ 'bok sư kơdih păng adrĕch kon sâu Gat, kiơ̆ kơ 'bok sư kơdih, hăm minh puăt adrĕch Manase đei iŏk boih teh jang sa kơ sư kơdih.

¹⁵'Bar adrĕch păng minh puăt adrĕch 'nâu đei iŏk boih teh jang sa oei tơ paih âu gah hơlĕch đak Krong Jôrđăn, tơklă pơlei Jêrikô tơ gah măt 'năr lĕch.

¹⁶Kră Yang khan dơ̆ng kơ Môis thoi âu:

¹⁷'Nâu anăn lu bơngai wă asong teh tơring Êlêasar 'bok soi păng Jôsuê kon drŏ-nglo Nun.

¹⁸Ăn kơ lu iĕm chă rơih minh 'nu kơdră pơgơ̆r đơ̆ng lăm rim adrĕch wă kơ lu sư năm tơgŭm chă asong teh oei jang sa.

¹⁹'Nâu anăn lu sư: Lăm adrĕch Juđa, đei Kalep, kon drŏ-nglo Jêphunê;

²⁰Gah adrĕch kon sâu Simêôn, Sêmuel kon drŏ-nglo Amihut;

²¹gah adrĕch kon sâu Bênjamin, Êlidat kon drŏ-nglo Kislon;

²²đơ̆ng adrĕch kon sâu Đan, minh 'nu yŏng kơdră anăn sư Buki, kon drŏ-nglo Jogli;

²³đơ̆ng adrĕch Manase kon Jôsep, đei minh 'nu yŏng kơdră Haniel kon drŏ-nglo Ephôt;

²⁴đơ̆ng adrĕch Êphraim kon drŏ-nglo Jôsep đei minh 'nu yŏng kơdră Kêmuel kon drŏ-nglo Siptan;

²⁵đơ̆ng adrĕch kon drŏ-nglo Sabulôn đei minh 'nu yŏng kơdră Êlisaphan kon drŏ-nglo Parnak;

²⁶đơ̆ng adrĕch kon drŏ-nglo Isakar đei minh 'nu yŏng kơdră anăn sư Paltiel kon drŏ-nglo Asan;

²⁷đơ̆ng adrĕch kon drŏ-nglo Aser đei minh 'nu yŏng kơdră, anăn sư Ahihut kon drŏ-nglo Sêlômi;

²⁸đơ̆ng adrĕch kon sâu Neptali, đei minh 'nu yŏng kơdră anăn sư Pêdahel kon drŏ-nglo Amihut.

²⁹Lu đe âu boih Kră Yang pơkă athei lu sư klah asong teh jang sa kơ lu kon pơlei adrĕch bơngai Isơrael lăm char Kanaan.