Read bahnar Jo 35 Bible Online

Jo 35 - bahnar bible

Jo 35

¹Kră Yang khan kơ Môis 'bơ̆t lăm thŭng glă char Môap jê̆ đak Krong Jôrđăn tơklă anăp pơlei Jêrikô:

²Tơtă bĕ kơ lu kon sâu adrĕch Isơrael wă kơ lu sư klah asong ăn teh đơ̆ng lu sư đei, kơ lu bơngai Lêwi oei tơ lăm pơlei tih; păng asong ăn hloi teh kơ lu sư tơ tăp dăr kơ pơlei tih noh,

³Bơngai Lêwi lu sư gô đei oei lăm lu pơlei tih; na teh 'nhĕt tăp dăr kơ pơlei tih noh lê̆ kơ khŭl sem dơrong lu sư sa.

⁴Teh mă tăp dăr kơ pơlei tih lu iĕm ăn kơ lu adrĕch adrung bơngai Lêwi noh minh-rơbâu hơgăt tăp dăr, iŏk đơ̆ng dur pơlei truh tơ 'nguaih.

⁵Lei na lu iĕm athei pơtŏ, gah 'nguaih kơ dur pơlei năm tơ gah hơlĕch noh 'bar-rơbâu hơgăt, năm tơ gah gơal 'bar-rơbâu hơgăt, năm tơ gah bơmơ̆t 'bar-rơbâu hơgăt, năm tơ gah yă-nơ̆m kư̆m 'bar-rơbâu hơgăt; lei pơlei tih noh tŏk-bŏk. Noh boih teh 'măn lê̆ kơ lu bơngai adrĕch Lêwi mă oei lăm pơlei tih.

⁶Lu pơlei tih lu iĕm gô asong ăn kơ lu bơngai adrĕch Lêwi, gô đei tơdrâu tŏ pơlei tih wă ôn kơ'nơp mă lu iĕm athei tơ'bôh ăn kơ lu sư, wă kơ lu bơngai mă pơlôch đe kơdâu ôn tơ noh; 'nguaih kơ tơdrâu tŏ pơlei tih noh, lu iĕm athei 'măn lê̆ kơ adrĕch bơngai Lêwi puăn-jĭt 'bar tŏ pơlei.

⁷Đĭ-đăng pơlei tih mă lu iĕm asong ăn kơ lu bơngai adrĕch Lêwi kư̆m asong ăn teh lăm hai, đĭ-đăng đei puăn-jĭt tơhngam tŏ pơlei.

⁸Gah lu pơlei tih lu iĕm wă asong lu bơngai adrĕch Lêwi đơ̆ng teh adrĕch bơngai Isơrael, lu iĕm athei iŏk kiơ̆ kơ adrĕch, adrĕch đei teh lơ 'biơ̆ lu iĕm iŏk đơ̆ng lu sư lơ 'biơ̆, adrĕch đei pơlei tih tŏ sĕt lu iĕm athei iŏk đơ̆ng lu sư tŏ sĕt 'biơ̆; rim kơ adrĕch wă klah asong ăn kơ lu adrĕch bơngai Lêwi noh kiơ̆ kơ tih pơlei đei lơ dah tŏ sĕt.

⁹Klaih kơ noh, Kră Yang khan kơ Môis thoi âu:

¹⁰Khan bĕ kơ adrĕch kon pơlei Isơrael: Mưh iĕm tŏk hlôi kơ đak Krong Jôrđăn wă mơ̆t tơ dêh char Kanaan,

¹¹athei rơih chă kơ iĕm pơlei tih wă pơm pơlei ôn kơ'nơp, anih kơ lu bơngai mă hơch 'bơm pơlôch đe, gơh kơdâu ôn.

¹²Lu pơlei tih noh wă yua pơm pơlei ăn kơ lu bơngai mă đe wă pơlôch kơdâu ôn kơ lu bơngai wă pơlôch 'mong tơiung kơting, wă kơ lu bơngai đe wă pơlôch noh huay kơ lôch dĭng truh tơ năr năm 'bơ̆t anăp khŭl tơpôl sek tơlang.

¹³Thoi noh, lăm lu pơlei tih mă lu iĕm 'măn lê̆ noh, đei tơdrâu tŏ pơlei tih wă ăn kơ lu iĕm ôn.

¹⁴Lu iĕm gô ăn pêng tŏ pơlei tih pah âu đak Krong Jôrđăn păng pơm pêng tŏ pơlei tih lăm char Kanaan; 'nâu mă lu pơlei mă lu iĕm wă kơdâu kơ'nơp.

¹⁵Tơdrâu tŏ pơlei tih 'nâu wă pơm anih ăn kơ lu bơngai Isơrael ôn kơ'nơp, hăm kư̆m ăn kơ lu kon pơlei tơmoi păng lu bơngai mă oei lăm pơlei tih noh, wă kơ lu bơngai bu mă hơch 'bơm pơlôch đe gơh kơ kơdâu ôn tơ noh.

¹⁶Mă-lei dah sư teh đe hăm mam, na lôch hloi, lei bơngai noh jô̆ sư pơlôch bơngai; bơngai mă pơlôch đe noh pơlôch bĕ sư.

¹⁷Dah sư yua tơmo chĕp lăm ti sư na teh đe, bơngai mă sư teh hăm tơmo noh lôch, na đe jô̆ sư bơngai pơlôch bơngai; bơngai pơlôch đe noh pơlôch bĕ sư.

¹⁸Kŭm thoi noh, tơdah bơngai bu chĕp 'long teh đe lôch hloi, bơngai noh jô̆ sư pơlôch bơngai; bơngai pơlôch đe noh pơlôch bĕ sư.

¹⁹Lu bơngai iung kơting, gô pơlôch lu bơngai pơlôch đe; layơ lu bơngai wă iung kơting chă 'bôh tơ'bơ̆p lu bơngai mă pơlôch sư athei pơlôch hloi.

²⁰Dah đei bu mă yua kơ klai areh na tơlơ̆ đe, dah pơrơ̆ng klơ̆m hăm tơmam kiơ, yua kơ tơdrong noh na đe lôch;

²¹dah yua kơ blĕk khŏn pơm 'mong na teh tŭr, yua kơ đơ̆ng tơdrong noh na đe lôch, bơngai bu mă pơm thoi noh đe pơlôch sư hloi. Noh jô̆ bơngai pơlôch bơngai; tơdah bơngai iung kơting chă 'bôh bơngai pơlôch đe noh athei pơlôch lê̆ sư.

²²Tơdah ưh kơ đei tơhil băl, oei hiôk băl đĕch, mă-lei đei minh 'nu năm tơlơ̆, dah klơ̆m chaih, tơmam kiơ 'bơm bơngai nai,

²³dah ưh kơ đei ayăt băl ưh kơ đei wă pơrăm băl, kư̆m ưh kơ 'bôh sư na hơch 'bơm tơhuŏng tơmo 'bơm bơngai na sư lôch hloi,

²⁴lei athei sek kiơ̆ tơdrong juăt 'nâu thoi âu. Khŭl tơpôl akŭm athei sek tơlang kơ lu bơngai mă teh đe păng bơngai wă iung kơting:

²⁵Khŭl tơpôl kon pơlei athei dŏng tơgŭm pơklaih lu bơngai mă pơlôch đe đơ̆ng ti lu bơngai wă iung kơting păng athei bơngai noh brŏk tơ pơlei tih ôn kơ'nơp, tơ anih mă sư đei kơdâu ôn akâu; păng bơngai noh athei oei tơ noh hloi dĭng truh tơ năr 'bok soi tơm mă đe đei tuh đak rơmă tơ kơ̆l sư noh lôch 'mơ̆i.

²⁶Mă-lei tơdah bơngai pơlôch bơngai lĕch năm hlôi 'nguaih kơ pơlei tih mă sư đêl kơdâu ôn, anih mă sư đei kơdâu ôn boih,

²⁷păng dah lu bơngai iung kơting, tơ'bơ̆p, pơlôch sư tơ 'nguaih kơ pơlei tih mă sư kơdâu ôn, lei lu bơngai iung kơting, 'mong pham noh huay kơ đei yoch glăi ôh kơ pơlôch bơngai.

²⁸Yua kơ bơngai mă pơlôch bơngai noh athei oei tơ lăm pơlei tih wă ôn akâu noh dĭng truh tơ 'bok soi tơm noh lôch boih, đơ̆ng rŏng kơ 'bok soi lôch boih na bơngai mă pơlôch bơngai noh gơh wih tơ pơlei sư jang sa.

²⁹Mă khan lu iĕm oei tơ dêh char ayơ lu iĕm răk tơdrong juăt 'nâu na sek tơlang tơduă lu iĕm lăm rim jơhnơr lu iĕm.

³⁰Tơdah đei bơngai bu pơlôch bơngai, lu iĕm kư̆ rôp sek kiơ̆ kơ đơ̆ng đe roi khai kơ sư na gơh pơlôch sư; mă-lei dah lăp minh 'nu bơngai đĕch roi, lei ưh tam gơh pơlôch bu ôh.

³¹Lu iĕm 'nĕ kơ iŏk jên đơ̆ng lu bơngai pơlôch đe ăn wă huai tơdrong arih sư mă đe sek trŏ kơ wă pơlôch.

³²Lu iĕm 'nĕ kơ iŏk jên bơngai kơdâu ôn boih lăm pơlei tih ôn kơ'nơp, ăn kơnh sư gơh brŏk wih tơ pơlei sư kơdih adrol kơ 'bok soi tơm lôch.

³³Lu iĕm 'nĕ kơ pơm kơnê̆ 'mê̆-'mach kơ teh iĕm wă oei; yua kơ đơ̆ng pham pơm mơgrĭ kơ teh đak; ưh kơ đei kiơ mă gơh pơm kơ teh rơgoh dơ̆ng dah đei bơngai tuh pham pơlôch đe, lăp minh tơdrong đĕch pơm mơgrĭ kơ teh, mưh ưh kơ pơlôch plơ̆ sư tuh pham lei ưh kơ gơh huai iŏk teh noh ôh.

³⁴Thoi noh, lu iĕm 'nĕ pơm mơgrĭ kơnê̆ 'mê̆ brư̆ kơ teh đak mă lu iĕm wă oei noh, Inh oei; Inh boih Kră Yang oei hơdai lu adrĕch bơngai Isơrael.