Read bahnar Jo 36 Bible Online

Jo 36 - bahnar bible

Jo 36

¹Lu yŏng kơdră Gileat, kon drŏ-nglo Makir, sâu Manase, lăm adrĕch adrung kon sâu Jôsep, năm jê̆ păng pơma tơm măt kơ Môis păng lu yŏng kơdră lu bơngai Isơrael,

²thoi âu: Kră Yang đei khan kơ yŏng kơdră inh hlang lăng păng asong ăn boih teh char âu ăn kơ lu adrĕch adrung bơngai Isơrael jang sa păng Kră Yang kư̆m tơtă kơ sư jao ăn teh jang sa đơ̆ng Sêlôpêhat 'nhŏng lu nhôn, ăn kơ lu kon drŏ-kăn sư.

³Lei tơdah lu kon drŏ-kăn sư chă klo bơngai adrĕch nai kơ lăm bơngai Isơrael, teh jang sa lu sư noh đe gô iŏk đơ̆ng adrĕch 'bok lu nhôn păng thim dơ̆ng ăn teh jang sa noh kơ adrĕch klo lu sư, lei đe gô iŏk pơdrâu teh jang sa noh đơ̆ng adrĕch nhôn, mă đei hlang iŏk boih.

⁴Mưh truh tơ sơnăm pơdơh hiôk-hian lu bơngai Isơrael kơplah noh teh jang sa lu sư rai thim đơ̆ng klo lu sư, lei teh sư jang sa noh gô iŏk đơ̆ng teh adrĕch 'bok lu nhôn.

⁵Môis tơtă ăn hloi kơ bơngai Isơrael kiơ̆ thoi Kră Yang đei khan kơ sư thoi âu: Adrĕch kon sâu Jôsep pơma noh trŏ.

⁶'Nâu tơdrong Kră Yang đei khan gah lu kon drŏ-kăn Sêlôpêhat; lu sư wă oei kơ bu mơ̆ng kơ wă, mă-lei kư̆ oei lăm adrĕch adrung 'bok lu sư kơdih.

⁷Thoi ei na lăm adrĕch bơngai Isơrael, teh jang sa ayơ huay kơ hiong đơ̆ng adrĕch âu năm tơ adrĕch nai, yua kơ rim 'nu lăm kon pơlei adrĕch noh gô oei kiơ̆ kơ teh bơ̆n jang sa gah adrĕch 'bok sư kơdih.

⁸Rim 'nu bơngai drŏ-kăn ayơ đei teh jang lăm lu adrĕch Isơrael, na athei oei kơ bơngai bu mă lăm hnam ayơ gah adrĕch adrung 'bok sư kơdih wă kơ rim 'nu lăm lu adrĕch Isơrael đei gơh iŏk teh tơmam jang sa đơ̆ng 'bok sư kơdih.

⁹Thoi noh, wă ưh kơ gơh đei teh jang sa tŏ yơ đơ̆ng adrĕch âu chĕp ba tơ adrĕch nai; mă-lei lăm adrĕch bơngai Isơrael iŏk bơwei teh jang sa kơdih noh.

¹⁰Lu kon drŏ-kăn Sêlôpêhat pơm rok kiơ̆ thoi Kră Yang đei pơkă kơ Môis.

¹¹Yua kơ Mahla, Tirsa, Hogla, Milka păng Nôa kon drŏ-kăn Sêlôpêhat iŏk klo oei kơ tơduă kơtum adrĕch 'bok lu sư kơdih ngăl,

¹²lu sư iŏk klo lăm lu adrĕch kon sâu Manase, kon drŏ-nglo Jôsep păng gah teh jang sa lu sư oei đei lăm adrĕch 'bok lu sư kơdih.

¹³Noh boih nơ̆r đơ̆ng Kră Yang tơtă pơkă kơ Môis khan ăn kơ kon pơlei adrĕch Isơrael, tơ thŭng glă char Môap, jê̆ đak Krong Jôrđăn, tơklă anăp pơlei tih Jêrikô.