Read bahnar Jo 7 Bible Online

Jo 7 - bahnar bible

Jo 7

¹Kơplah Môis pơdơ̆ng Bơsŭn Anih Akŭm đang boih, tuh đak rơmă păng 'măn lê̆ pha Bơsŭn Anih Akŭm dôm lu tơmam yua lăm noh, tuh đak rơmă tơ chơnang soi păng đĭ-đăng tơmam yua lăm chơnang soi noh đang boih,

²na đĭ-đăng lu kơdră lăm adrĕch Isơrael, wă khan lu yŏng pơyơ̆r adrĕch adrung mă lu đe chih jô̆ boih năm ba tơmam pơyơ̆r lu sư.

³Thoi noh lu kră pơgơ̆r năm ba tơmam lu sư pơyơ̆r noh 'bơ̆t anăp Kră Yang, tơdrâu tŏ gre đei tơmam gom lê̆ păng mơjĭt-'bar tŏ rơmo dăm, wă khan rim kơ 'bar 'nu kră pơgơ̆r adrĕch sư pơyơ̆r minh pôm gre păng rim 'nu kră pơgơ̆r pơyơ̆r minh pôm rơmo dăm. Lu sư pơyơ̆r tơmam noh 'bơ̆t anăp Bơsŭn Anih Akŭm.

⁴Kră Yang khan kơ Môis thoi âu:

⁵Iŏk bĕ đĭ-đăng lu tơmam pơyơ̆r đơ̆ng lu đe âu wă yua lăm Bơsŭn Anih Akŭm. Păng jao ăn bĕ kơ lu bơngai adrĕch Lêwi, kiơ̆ kơ tơdrong jang rim 'nu lu sư.

⁶Thoi noh, Môis iŏk đĭ lu gre păng lu rơmo dăm, pơjao ăn kơ lu bơngai Lêwi.

⁷Sư pơjao ăn kơ lu kon sâu Gersôn 'bar tŏ gre păng puăn tŏ rơmo dăm, kiơ̆ tơdrong jang lu sư.

⁸Sư pơjao ăn kơ lu kon sâu Mêrari puăn tŏ gre păng tơhngam tŏ rơmo dăm, kiơ̆ kơ tơdrong jang lu sư, đei Ithamar, kon drŏ-nglo Arôn, pơm bơngai pơgơ̆r wei-lăng.

⁹Mă-lei sư ưh kơ pơjao gre hăm rơmo dăm kơ kon sâu Kôhat, yua kơ lu sư jang wei-lăng păng tung tơmam rơgoh tơ kơpal hơngiĕng lu sư.

¹⁰Lăm năr chơnang soi đei tuh đak 'bâu phu lu kră pơgơ̆r pơyơ̆r tơmam lu sư 'bơ̆t anăp chơnang wă pơm giĕng pơyơ̆r.

¹¹Kră Yang khan kơ Môis thoi âu: Lu kră pơgơ̆r athei pơyơ̆r tơmam soi kơ năr wă pơih chơnang soi, bơngai âu năr 'nâu, bơngai noh năr nai, rim năr.

¹²Nahsôn kon drŏ-nglo Aminađap, adrĕch Juđa pơyơ̆r năr blŭng-a adrol kơ pơkeh.

¹³Tơmam sư pơyơ̆r noh minh hlak chhĕr hu trăp sư minh-hrĕng pêng-jĭt seikơl, minh hlak pơnhan hu trăp sư tơpơh-jĭt seikơl, kiơ̆ kơ seikơl lăm anih rơgoh; pơđĭ kơ 'bar hlak noh dan 'bĕnh kơ tơpŭng bơlŭ hăm đak rơmă ôliwơ, wă pơm tơmam soi pơyơ̆r phe 'ba;

¹⁴minh hlak chhĕr maih trăp sư mơjĭt seikơl, dan 'bĕnh kơ pơgang 'bâu phu;

¹⁵minh pôm kon rơmo dăm, minh pôm kon triu tơno, minh pôm triu tơno, truh minh sơnăm wă pơm tơmam soi 'buh;

¹⁶minh pôm bơbe dăm wă pơm tơmam soi huai tơdrong yoch;

¹⁷pơyơ̆r tơmam soi kơ tơdrong 'blŏk bơnê hiôk-hian; 'bar tŏ rơmo dăm, pơđăm tŏ triu tơno, pơđăm tŏ bơbe dăm păng pơđăm tŏ kon triu tơno truh minh sơnăm. Noh tơmam soi pơyơ̆r đơ̆ng Nahsôn, kon drŏ-nglo Aminađap.

¹⁸Lăm năr mă 'bar Nathanel kon drŏ-nglo Suar, yŏng kơdră adrĕch Isakar, pơyơ̆r tơmam soi sư,

¹⁹sư pơyơ̆r minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp sư tơpơh-jĭt seikơl, kiơ̆ kơ seikơl lăm anih rơgoh 'bar hlak noh tă 'bĕnh kơ tơpŭng hrâu hăm đak rơmă ôliwơ, wă yua pơm tơmam soi phe 'ba;

²⁰minh hlak pơnhan maih trăp mơjĭt seikơl, 'bĕnh kơ pơgang 'bâu phu;

²¹minh pôm kon rơmo dăm, minh pôm triu kon tơno, minh pôm triu kon tơno minh sơnăm, yua wă pơm tơmam soi 'buh,

²²minh pôm bơbe tơno yua wă pơm tơmam soi huai tơdrong yoch;

²³păng tơmam soi tơdrong 'blŏk bơnê hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon minh sơnăm. Noh boih mă tơmam soi pơyơ̆r đơ̆ng Nathanel, kon drŏ-nglo Suar.

²⁴Lăm năr mă pêng, truh tơ yŏng kơdră kon sâu adrĕch Sabulôn, noh Êliap kon drŏ-nglo Hêlôn pơyơ̆r tơmam soi.

²⁵Tơmam soi sư minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp tơpơh-jĭt seikơl, kiơ̆ kơ seikơl lăm anih rơgoh; pơđĭ kơ 'bar hlak tă kơ 'bĕnh kơ tơpŭng bơlŭ hăm đak rơmă ôliwơ, wă yua pơm tơmam soi phe 'ba;

²⁶minh hlak pơnhan maih mơjĭt seikơl, 'bĕnh pơgang 'bâu phu;

²⁷minh pôm rơmo dăm, minh pôm triu kon tơno, minh pôm triu kon minh sơnăm, yua wă pơm tơmam soi 'buh;

²⁸minh pôm bơbe tơno yua pơm tơmam soi pơyơ̆r wă huai tơdrong yoch;

²⁹păng gah tơmam soi 'blŏk bơnê kơ tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe dăm păng pơđăm tŏ triu kon tơno truh minh sơnăm. Noh tơmam soi Êliap kon drŏ-nglo Hêlôn.

³⁰Lăm năr mă puăn, truh tơ yŏng kơdră kon sâu Rubên, noh Êlisur kon drŏ-nglo Sêdur, pơyơ̆r tơmam soi

³¹tơmam soi sư noh minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp tơpơh-jĭt seikơl, kiơ̆ kơ seikơl lăm anih rơgoh; pơđĭ kơ 'bar hlak tă kơ 'bĕnh tơpŭng hrâu hăm đak rơmă ôliwơ, yua pơm tơmam soi phe 'ba;

³²minh hlak pơnhan maih trăp mơjĭt seikơl, 'bĕnh kơ pơgang 'bâu phu,

³³minh pôm rơmo dăm, minh pôm triu tơno, minh pôm triu kon tơno truh minh sơnăm, yua pơm tơmam soi 'buh;

³⁴minh pôm bơbe tơno yua pơm tơmam soi pơyơ̆r wă huai tơdrong yoch;

³⁵păng gah tơmam soi tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh tơmam soi đơ̆ng Êlisur, kon drŏ-nglo Sêdur pơyơ̆r.

³⁶Năr mă pơđăm, truh yŏng kơdră kon sâu Simêôn, noh Sêlumiel kon drŏ-nglo Surisadai. Pơyơ̆r tơmam soi.

³⁷Tơmam soi sư pơyơ̆r noh minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp tơpơh-jĭt seikơl, kiơ̆ kơ seikơl lăm anih rơgoh; đĭ kơ 'bar hlak pơnhan noh mong 'bĕnh kơ tơpŭng bơlŭ hăm đak rơmă ôliwơ, yua pơm tơmam soi phe 'ba;

³⁸minh hlak pơnhan maih trăp mơjĭt seikơl, 'bĕnh kơ pơgang 'bâu phu;

³⁹minh pôm kon rơmo dăm, minh pôm triu tơno, minh pôm triu kon tơno truh minh sơnăm, yua wă pơm tơmam soi 'buh;

⁴⁰minh pôm bơbe tơno yua wă pơm tơmam soi huai tơdrong yoch;

⁴¹păng gah tơmam soi pơyơ̆r 'blŏk bơnê kơ tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ triu kon tơno truh minh sơnăm. Noh boih tơmam soi đơ̆ng Sêlumiel, kon drŏ-nglo Surisadai.

⁴²Năr mă tơdrâu, truh tơ yŏng kơdră kon sâu Gat, noh Êliasap, kon drŏ-nglo Đêuel, pơyơ̆r tơmam soi,

⁴³tơmam soi lu sư noh, minh hlak chhĕr trăp minh-hrĕng pêng-jĭt seikơl, minh hlak pơnhan trăp tơpơh-jĭt seikơl, kiơ̆ kơ seikơl lăm anih rơgoh, pơđĭ kơ 'bar hlak pơnhan noh 'bĕnh kơ tơpŭng bơlŭ hrâu hăm đak rơmă ôliwơ, yua wă pơm tơmam soi phe 'ba;

⁴⁴minh hlak pơnhan maih trăp mơjĭt seikơl, 'bĕnh kơ pơgang 'bâu phu;

⁴⁵minh pôm rơmo dăm, minh pôm triu tơno, minh pôm triu kon tơno truh minh sơnăm, yua wă pơm tơmam soi 'buh;

⁴⁶minh pôm bơbe tơno, yua wă pơm tơmam soi huai tơdrong yoch;

⁴⁷păng gah tơmam soi pơyơ̆r kơ tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh boih tơmam soi Êliasap, kon drŏ-nglo Đêuel.

⁴⁸Năr mă tơpơh, truh tơ yŏng kơdră kon sâu Êphraim, noh Êlisama kon drŏ-nglo Amihut. Pơyơ̆r tơmam soi.

⁴⁹Tơmam soi sư pơyơ̆r minh hlak chhĕr hu trăp minh-hrĕng pêng-jĭt seikơl, minh hlak kơthao hu trăp tơpơh-jĭt seikơl, kiơ̆ kơ seikơl lăm anih rơgoh, 'bar hlak pơnhan âu mong 'bĕnh kơ tơpŭng bơlŭ hrâu hăm đak rơmă ôliwơ, yua pơm tơmam soi pơyơ̆r phe 'ba;

⁵⁰minh hlak pơnhan maih trăp mơjĭt seikơl, 'bĕnh kơ pơgang 'bâu phu;

⁵¹minh pôm rơmo dăm, minh pôm triu tơno, minh pôm triu kon tơno truh minh sơnăm yua wă pơm tơmam soi 'buh;

⁵²minh pôm bơbe tơno yua pơm tơmam soi wă huai tơdrong yoch;

⁵³gah tơmam soi 'blŏk bơnê kơ tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ triu kon tơno truh minh sơnăm, pơđăm tŏ bơbe tơno. Noh tơmam soi pơyơ̆r đơ̆ng Êlisama, kon drŏ-nglo Amihut.

⁵⁴Năr mă tơhngam, truh tơ yŏng kơdră kon sâu Manase, noh Gamaliel kon drŏ-nglo Pêdasur; pơyơ̆r tơmam soi,

⁵⁵tơmam soi sư minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp tơpơh-jĭt seikơl, kiơ̆ kơ seikơl anih rơgoh, pơđĭ kơ 'bar hlak pơnhan noh mong 'bĕnh kơ tơpŭng bơlŭ hrâu hăm đak rơmă ôliwơ, yua pơm tơmam soi phe 'ba;

⁵⁶minh hlak pơnhan maih trăp mơjĭt seikơl, 'bĕnh kơ pơgang 'bâu phu;

⁵⁷minh pôm rơmo dăm, minh pôm triu tơno, minh pôm triu kon tơno truh minh sơnăm, yua pơm tơmam soi 'buh;

⁵⁸minh pôm bơbe tơno yua pơm tơmam soi pơyơ̆r huai tơdrong yoch;

⁵⁹Păng tơmam soi gah tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh tơmam soi đơ̆ng Gamaliel, kon drŏ-nglo Pêdasur.

⁶⁰Năr mă tơsĭn, truh tơ yŏng kơdră kon sâu Bênjamin noh Abidan kon drŏ-nglo Gideôni. Pơyơ̆r tơmam soi.

⁶¹Tơmam soi sư pơyơ̆r minh hlak chhĕr hu trăp minh-hrĕng pêng-jĭt seikơl, minh hlak pơnhan tơpơh-jĭt seikơl, kiơ̆ kơ seikơl anih 'lơ̆ng rơgoh, pơđĭ kơ 'bar hlak pơnhan noh mong 'bĕnh kơ tơpŭng bơlŭ hrâu hăm đak rơmă ôliwơ yua pơm tơmam soi pơyơ̆r phe 'ba;

⁶²minh hlak pơnhan maih trăp mơjĭt seikơl, 'bĕnh kơ pơgang 'bâu phu,

⁶³minh pôm rơmo dăm, minh pôm triu tơno, minh pôm triu kon tơno truh minh sơnăm yua pơm tơmam soi 'buh;

⁶⁴minh pôm bơbe tơno yua pơm tơmam soi huai tơdrong yoch;

⁶⁵păng tơmam soi 'blŏk bơnê gah tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh tơmam soi đơ̆ng Abidan, kon drŏ-nglo Gideôni.

⁶⁶Năr mă mơjĭt truh tơ yŏng kơdră Đan, noh Ahiser kon drŏ-nglo Amisadai pơyơ̆r tơmam soi,

⁶⁷tơmam soi sư minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp tơpơh-jĭt seikơl, kiơ̆ kơ seikơl anih rơgoh, pơđĭ kơ 'bar hlak mong 'bĕnh kơ tơpŭng bơlŭ hrâu hăm đak rơmă ôliwơ, yua pơm tơmam soi phe 'ba;

⁶⁸minh hlak pơnhan maih trăp mơjĭt seikơl, 'bĕnh kơ pơgang 'bâu phu;

⁶⁹minh pôm rơmo dăm, minh pôm triu tơno, minh pôm triu kon tơno truh minh sơnăm, yua pơm tơmam soi 'buh;

⁷⁰minh pôm bơbe tơno yua pơm tơmam soi huai tơdrong yoch;

⁷¹păng tơmam soi 'blŏk bơnê tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh boih tơmam soi pơyơ̆r đơ̆ng Ahiser, kon drŏ-nglo Amisadai.

⁷²Năr mă mơjĭt-mônh, truh tơ yŏng kơdră kon sâu Aser, noh Pagiel kon drŏ-nglo Ôkran. Pơyơ̆r tơmam soi.

⁷³Tơmam soi sư pơyơ̆r minh hlak chhĕr hu trăp minh-hrĕng pêng-jĭt seikơl, minh hlak pơnhan hu trăp tơpơh-jĭt seikơl, kiơ̆ kơ seikơl anih rơgoh, pơđĭ kơ 'bar hlak mong 'bĕnh kơ tơpŭng bơlŭ hrâu hăm đak rơmă ôliwơ, yua pơm tơmam soi phe 'ba;

⁷⁴minh hlak pơnhan maih trăp mơjĭt seikơl, 'bĕnh kơ pơgang 'bâu phu;

⁷⁵minh pôm rơmo dăm, minh pôm triu tơno, minh pôm triu kon tơno truh minh sơnăm, yua pơm tơmam soi 'buh;

⁷⁶minh pôm bơbe tơno yua pơm tơmam soi wă huai tơdrong yoch;

⁷⁷păng gah tơmam soi pơyơ̆r tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh tơmam soi pơyơ̆r đơ̆ng Pagiel, kon drŏ-nglo Ôkran.

⁷⁸Năr mă mơjĭt-'bar, truh tơ yŏng kơdră kon sâu Neptali, noh Ahira, kon drŏ-nglo Ênan. Pơyơ̆r tơmam soi.

⁷⁹Tơmam soi sư pơyơ̆r minh hlak chhĕr trăp minh-hrĕng pêng-jĭt seikơl, minh hlak pơnhan trăp tơpơh-jĭt seikơl, kiơ̆ kơ seikơl lăm anih rơgoh, pơđĭ kơ 'bar hlak pơnhan mong 'bĕnh kơ tơpŭng bơlŭ hrâu hăm đak rơmă ôliwơ, yua pơm tơmam soi pơyơ̆r phe 'ba;

⁸⁰minh hlak pơnhan maih trăp mơjĭt seikơl, 'bĕnh kơ pơgang 'bâu phu;

⁸¹minh pôm rơmo dăm, minh pôm triu tơno, minh pôm triu kon tơno truh minh sơnăm, yua pơm tơmam soi 'buh;

⁸²minh pôm bơbe tơno yua pơm tơmam soi pơyơ̆r huai tơdrong yoch;

⁸³păng gah tơmam soi 'blŏk bơnê pơyơ̆r tơdrong hiôk-hian, 'bar tŏ rơmo dăm, pơđăm tŏ triu tơno, pơđăm tŏ bơbe tơno păng pơđăm tŏ triu kon tơno truh minh sơnăm. Noh tơmam soi pơyơ̆r đơ̆ng Ahira, kon drŏ-nglo Ênan.

⁸⁴Noh boih tơmam soi pơyơ̆r đơ̆ng lu yŏng kơdră adrĕch bơngai Isơrael lăm năr pơm giĕng pơyơ̆r pơkeh pơyơ̆r chơnang soi, kơplah lăm năr đe tuh đak rơmă kơ chơnang soi: Mơjĭt-'bar hlak chhĕr hu, mơjĭt-'bar hlak pơnhan hu, mơjĭt-'bar hlak pơnhan maih;

⁸⁵minh hlak chhĕr hu trăp sư minh-hrĕng pêng-jĭt seikơl păng minh hlak pơnhan trăp sư tơpơh-jĭt seikơl. Jô̆ akŭm đĭ chhĕr hu păng pơnhan hu noh đei 'bar-rơbâu puăn-hrĕng seikơl, kiơ̆ kơ seikơl lăm anih rơgoh.

⁸⁶Mơjĭt hlak pơnhan maih 'bĕnh kơ pơgang 'bâu phu, lăm minh hlak trăp mơjĭt seikơl, kiơ̆ kơ seikơl anih rơgoh; jô̆ akŭm đĭ-đăng maih trăp sư minh-hrĕng 'bar-jĭt seikơl,

⁸⁷jô̆ đĭ-đăng sem dơrong pơm tơmam soi 'buh đei mơjĭt-'bar tŏ rơmo dăm păng mơjĭt-'bar tŏ triu tơno, mơjĭt-'bar tŏ triu kon tơno truh minh sơnăm, hơdai hăm lu tơmam soi phe 'ba păng mơjĭt tŏ bơbe tơno yua pơm tơmam soi huai tơdrong yoch.

⁸⁸Jô̆ đĭ rơmo dăm yua pơm tơmam soi 'blŏk hơdơ̆r kơ tơdrong hiôk-hian đei 'bar-jĭt puăn tŏ păng tơdrâu-jĭt tŏ triu tơno, tơdrâu-jĭt bơbe tơno, tơdrâu-jĭt bơbe kon tơno truh minh sơnăm. Noh boih tơmam soi pơyơ̆r lăm năr pơih pơyơ̆r chơnang soi, đang kơ chơnang soi đei tuh đak rơmă boih.

⁸⁹Kơplah Môis mơ̆t tơ lăm Bơsŭn Anih Akŭm wă pơma dơnuh hăm Kră Yang, na sư kơtơ̆ng nơ̆r pơma hăm sư đơ̆ng lăm Tơnglơ̆p Mơnat ăn dan kơpal Hom tơdrong Roi Tơbăt, tŏk-bŏk sơlam kơ 'bar tŏ chêrubim; Kră Yang pơma dơnuh hăm sư.