Read bahnar Jo 8 Bible Online

Jo 8 - bahnar bible

Jo 8

¹Kră Yang khan kơ Môis thoi âu:

²Khan bĕ kơ Arôn; kơplah ih pơdơ̆ng ŭnh kơđeng, lei dan tơpơh tŏ ŭnh nhơk pơchrang hơdah tơ gah anăp kơ jơ̆ng ŭnh jrĕnh.

³Arôn pơm kiơ̆ hloi sư dan tơpơh tŏ ŭnh kơđeng wă pơchrang hơdah tơ gah anăp kơ jơ̆ng ŭnh jrĕnh, thoi nơ̆r Kră Yang đei pơkă khan kơ Môis.

⁴Đe pơm jơ̆ng ŭnh jrĕnh păng maih, iŏk đơ̆ng jơ̆ng truh tơ lu pơkao đei hơjơ̆m, thoi noh đe hơjơ̆m pơm kiơ̆ thoi Kră Yang mă pơma tơ'bôh kơ Môis rup.

⁵Kră Yang khan kơ Môis,

⁶rơih iŏk bĕ lu bơngai Lêwi đơ̆ng lăm khŭl bơngai Isơrael păng pơm kơ lu sư rơgoh 'lơ̆ng.

⁷'Nâu boih tơdrong ih athei pơm ăn kơ lu sư rơgoh; iŏk đak rơgoh tơtreh tơ kơpal akâu lu sư wă kơ rơgoh; lu sư athei hơkôih sŏk sop jơ̆p kơ akâu lu sư, pih hơbĕn ao păng hum hơmet akâu kơdih rơgoh.

⁸Đơ̆ng noh lu sư athei rôp minh pôm rơmo dăm hăm tơmam soi phe 'ba tơpŭng bơlŭ hrâu hăm đak rơmă ôliwơ; gah ih athei rôp iŏk minh pôm rơmo dăm plơ̆ng dơ̆ng yua pơm tơmam soi huai tơdrong yoch;

⁹Ih athei pơdah lu bơngai Lêwi âu 'bơ̆t anăp Bơsŭn hăm 'bơ̆t anăp đĭ-đăng lu bơngai Isơrael.

¹⁰Thoi noh, ih athei lu bơngai Lêwi dơ̆ng 'bơ̆t anăp Kră Yang na lu kon pơlei bơngai Isơrael gô dan ti lu sư pel akâu lu bơngai Lêwi.

¹¹Đơ̆ng noh, Arôn gô pơyơ̆r lu bơngai Lêwi 'bơ̆t anăp Kră Yang jing tơmam soi đơ̆ng lăm adrĕch Isơrael pơyơ̆r tơpơng 'ma 'ngiĕo, wă kơ lu sư bơ̆jang kơ Kră Yang.

¹²Đơ̆ng noh lu bơngai Lêwi gô dan ti lu sư kơpal kơ̆l 'bar tŏ rơmo dăm noh, na ih athei pơyơ̆r rơmo âu pơm tơmam soi yua kơ tơdrong yoch păng minh pôm dơ̆ng pơm tơmam soi 'buh ăn kơ Kră Yang wă pơm tơmam soi huai tơdrong yoch ăn kơ lu bơngai Lêwi.

¹³Đơ̆ng rŏng kơ noh ih athei lu bơngai Lêwi dơ̆ng 'bơ̆t anăp Arôn păng lu kon drŏ-nglo sư, na ih pơyơ̆r lu bơngai Lêwi âu thoi tơmam pơyơ̆r tơpơng 'ma 'ngiĕo âu ăn kơ Kră Yang.

¹⁴Thoi noh ih athei rơih 'măn lê̆ lu bơngai Lêwi đơ̆ng lăm lu bơngai Isơrael, lu bơngai noh gô jing gah Inh.

¹⁵Đang kơ dôm tơdrong noh, lu bơngai Lêwi pha gô bơ̆jang lăm Bơsŭn Anih Akŭm. Na ih athei pơm ăn kơ lu sư rơgoh păng pơyơ̆r lu sư thoi tơmam soi pơyơ̆r tơpơng 'ma 'ngiĕo.

¹⁶Yua kơ Inh rơih iŏk lu bơngai Lêwi kơ Inh kơdih, wă tơplih lu kon kơdră bơngai Isơrael.

¹⁷Yua kơ đĭ-đăng kon kơdră mă tơpŭ blŭng-a, mă kon bơngai dah kon sem dơrong kơdră Inh iŏk 'măn lê̆ gah Inh kơdih boih, kơplah lăm năr Inh pơlôch pơrăm lu kon kơdră bơngai Êyiptơ lăm char sư sơ̆.

¹⁸Păng Inh kư̆m rơih iŏk lu bơngai Lêwi tơplih kơ kon kơdră lu bơngai Isơrael.

¹⁹Đơ̆ng lăm lu adrĕch bơngai Isơrael Inh rơih iŏk boih bơngai Lêwi pơjao ăn kơ Arôn păng lu kon drŏ-nglo sư, wă kơ bơ̆jang tơplih tơdrong jang Isơrael lăm Bơsŭn Anih Akŭm, kư̆m pơm soi sơmah wă huai tơdrong yoch ăn kơ lu adrĕch bơngai Isơrael, wă kơ lu sư mă năm jê̆ anih 'lơ̆ng rơgoh, huay kơ đei tơdrong kiơ truh.

²⁰Thoi noh Môis, Arôn păng đĭ-đăng khŭl bơngai Isơrael akŭm hơdai pơm ăn kơ lu bơngai Lêwi kiơ̆ thoi Kră Yang đei pơkă khan kơ Môis; lu bơngai Isơrael pơm hăm lu bơngai Lêwi thoi noh.

²¹Bơngai Lêwi hơmet kơdih akâu 'lơ̆ng rơgoh huay pă yoch păng pih hơbĕn ao lu sư; đơ̆ng noh Arôn pơyơ̆r lu sư thoi tơmam soi drơng tơpơng 'ma 'ngiĕo 'bơ̆t anăp Kră Yang păng pơm tơmam soi huai tơdrong yoch lu sư, wă hơmet ăn kơ lu sư rơgoh.

²²Đơ̆ng rŏng kơ noh, lu bơngai Lêwi mơ̆t jang lăm Bơsŭn Anih Akŭm tơgŭm Arôn păng tơgŭm lu kon drŏ-nglo sư; pơm kơ lu bơngai Lêwi, kiơ̆ trŏ thoi nơ̆r Kră Yang đei pơma pơkă kơ Môis gah lu sư.

²³Kră Yang khan kơ Môis,

²⁴'Nâu tơdrong pơkă gah lu bơngai Lêwi: Iŏk đơ̆ng 'bar-jĭt sơnăm tơ kơpơ̆ng lu sư athei mơ̆t bơ̆jang tơ lăm Bơsŭn Anih Akŭm,

²⁵mă-lei truh tơ pơđăm-jĭt sơnăm lu sư gô pơdơh ưh pă bơ̆jang dơ̆ng.

²⁶Mă-lei kư̆m oei tơgŭm lu 'nhŏng oh lu sư lăm Bơsŭn Anih Akŭm, wă jang wei-lăng dôm lu tơmam mă đei pơjao boih kơ lu sư bơngai Lêwi, mă-lei lu sư ưh pă đei bơ̆jang boih. Ăn kơ ih athei pơm kiơ̆ tơdrong juăt noh kơ bơngai Lêwi kơplah ih pơjao ăn kơ lu sư tơdrong jang.