Read bahnar Jo 9 Bible Online

Jo 9 - bahnar bible

Jo 9

¹Kră Yang pơma hăm Môis tơ char glă Sinai: Lăm khei mă mônh, sơnăm mă 'bar, đang kơ lu sư lĕch đơ̆ng dêh char Êyiptơ.

²Bơngai Isơrael athei răk 'blŏk kơ năr giĕng Năm Brih mă đei pơkă lê̆ boih.

³Lu iĕm athei răk 'blŏk hơdơ̆r kơ năr giĕng Năm Brih, noh năr mơjĭt-puăn lăm khei 'nâu, gah kơsơ̆ măng; lu iĕm athei pơm kiơ̆ đĭ-đăng tơdrong mă đei pơkă păng khôi juăt gah năr giĕng noh.

⁴Thoi noh Môis athei lu bơngai Isơrael răk 'blŏk hơdơ̆r kơ năr giĕng Năm Brih.

⁵Lu bơngai Isơrael pơm 'blŏk hơdơ̆r kơ năr giĕng Năm Brih lăm khei mônh, năr mơjĭt-puăn, gah kơsơ̆ măng, tơ char glă Sinai, pơm kiơ̆ dôm tơdrong thoi Kră Yang đei khan pơkă kơ Môis.

⁶Mă-lei đei lu mơ'nah ưh kơ gơh kơ năm năr pơm giĕng Năm Brih yua kơ lu sư hơtŭt 'bơm kơ akâu bơngai lôch, lu sư năm 'bơ̆t anăp Môis hăm Arôn,

⁷lu sư khan kơ Môis thoi âu: Lu nhôn đĭ kơnê̆ 'mê̆-'mach yua kơ 'bơm akâu lu bơngai lôch, yua kơ kiơ đe khă ưh kơ ăn lu nhôn pơyơ̆r tơmam soi kơ Kră Yang kiơ̆ thoi tơdrong juăt mă đei pơkă sơ̆?

⁸Môis tơl: Gô 'mơ̆i iĕm athei gô inh krao apinh Kră Yang wă kơ băt Sư bơtho pơkă thoi yơ gah lu iĕm.

⁹Kră Yang khan kơ Môis thoi âu:

¹⁰Ih athei khan kơ lu bơngai Isơrael: Tơdah đei minh 'nu lăm lu iĕm dah lăm kon sâu lu iĕm pơm mơgrĭ 'mê̆-'mach yua kơ akâu atâu bơngai lôch, dah oei năm tơ ataih, na kư̆m athei 'blŏk hơdơ̆r kơ năr giĕng Năm Brih Kră Yang.

¹¹Dôm lu bơngai noh athei pơm giĕng Năm Brih âu lăm năr mơjĭt-puăn khei 'bar, gah kơsơ̆ măng, sa 'bĕng ưh kơ đei 'buih pông hăm hla 'nhot tăng,

¹²sa pơđĭ ưh kơ đei 'măn kiơ tŏ sĕt truh tơ năr dơning păng kư̆m ưh kơ gơ̆ minh pôm kơting mơ̆n; athei wei răk kiơ̆ kơ tơdrong juăt giĕng Năm Brih noh.

¹³Mă-lei bơngai bu rơgoh păng ưh kơ đei năm tơ ataih, tơdah ưh kơ đei 'blŏk hơdơ̆r ôh kơ năr giĕng Năm Brih, đe gô puh tơweh lê̆ sư đơ̆ng kon pơlei pơla sư; yua kơ bơngai noh ưh kơ đei pơyơ̆r tơmam soi kơ Kră Yang kiơ̆ thoi đei pơkă lê̆ năr boih, sư gô pŭ yoch kơdih.

¹⁴Tơdah đei lu bơngai tơmoi oei hơdai hăm lu iĕm 'blŏk hơdơ̆r 'maih wă pơm giĕng Năm Brih Kră Yang, sư athei kiơ̆ tơdrong tơtă păng khôi juăt gah giĕng Năm Brih. Kŭm đei minh tơdrong juăt kơ lu iĕm bơngai tơmoi păng bơngai kơtă mă tơpŭ lăm dêh char âu.

¹⁵Lăm năr đei pơdơ̆ng tơiung Bơsŭn Anih Akŭm đei hơmơ̆l gom Bơsŭn noh, Bơsŭn Tơdrong Tơbăt; đơ̆ng drơ̆m kơsơ̆ đei ŭnh kơpal Bơsŭn Anih Akŭm dĭng truh pơgê dơning.

¹⁶Đei thoi noh ling-lang; kơ'năr đei hơmơ̆l gom Bơsŭn Anih Akŭm păng kơmăng hơmơ̆l noh thoi ŭnh.

¹⁷Mưh khan hơmơ̆l noh đông weh tơ nai đơ̆ng bơsŭn, lu kon pơlei Isơrael yak năm tơ lăm anih ayơ mă hơmơ̆l dơ̆ng, na kon pơlei Isơrael oei tơ noh pơdơ̆ng Bơsŭn.

¹⁸Lu bơngai Isơrael yak năm kiơ̆ kơ nơ̆r Kră Yang tơtă păng kư̆m oei pơdơ̆ng Bơsŭn kư̆m kiơ̆ kơ nơ̆r Kră Yang. Kư̆ mơ̆ng kơ hơmơ̆l gom Bơsŭn Anih Akŭm dang yơ, kon pơlei bơngai Isơrael oei tơ noh dang noh.

¹⁹Mưh hơmơ̆l oei gom Bơsŭn Anih Akŭm noh đunh dang yơ, kon pơlei bơngai Isơrael kiơ̆ kơ nơ̆r Kră Yang tơtă, ưh kơ đei yak năm tơ nai.

²⁰Mă-lei mưh hơmơ̆l gom Bơsŭn Anih Akŭm lăm tŏ sĕt năr đĕch, na kon pơlei bơngai Isơrael kư̆ chu kiơ̆ kơ nơ̆r Kră Yang tơtă oei pơdơ̆ng Bơsŭn dah yak năm tơ nai.

²¹Tơdah hơmơ̆l gom Bơsŭn Anih Akŭm noh đơ̆ng kơsơ̆ truh pơgê păng dah pơgê dơning hơmơ̆l noh đông weh, na lu sư yak; mă kơ'năr dah kơmăng mơ̆ng kơ hơmơ̆l đông weh, na lu sư yak năm.

²²Hơmơ̆l gom hnam akŭm 'bar năr, dah minh khei, dah đunh hloh, kon pơlei bơngai Isơrael kư̆ kơ oei, ưh kơ yak weh; mă-lei mưh khan hơmơ̆l đông weh, na lu sư yak năm.

²³Kon pơlei Isơrael oei pơdơ̆ng Bơsŭn dah yak năm mơ̆ng kơ Kră Yang tơtă; lu sư oei jang pơm kiơ̆ kơ Kră Yang tơtă ăn kơ Môis.