Read bahnar Mi 1 Bible Online

Mi 1 - bahnar bible

Mi 1

¹Nơ̆r Kră Yang khan kơ Mika bơngai Môresêt lăm chăl Jôtham, Ahas păng Hesekia, lu pơtao dêh char Juđa, tơdrong mă lu sư 'bôh noh trŏ kơ pơlei Samari păng pơlei Jêrusalem.

²Ơ đĭ-đăng kon pơlei, mơ̆ng bĕ! Ơ teh păng đĭ-đăng tơmam mă oei kơpal teh pơgling đon mơ̆ng! Apinh Kră Yang đơ̆ng anih 'lơ̆ng rơgoh Sư. Ăn kơ Kră Yang pơm kơdranh blah lu iĕm.

³Yua kơ âu, Kră Yang lĕch đơ̆ng anih Sư, jur kơpal juă tơ anih kơjung hloh.

⁴Lu kông gô lek hach ala jơ̆ng Sư, lu thŭng thong gô hơđang lek thoi jrĕnh dan jê̆ ŭnh, thoi đak ro jruh kơ kông krang.

⁵Đĭ-đăng tơdrong noh yua kơ đơ̆ng Jakôp pơm yoch păng yua kơ tơdrong yoch adrĕch bơngai Isơrael. Jakôp pơm tơdrong yoch glăi kiơ? Hăm trŏ kơ pơlei Samari? Lu anih kơjung Juđa noh kiơ? Hăm trŏ noh pơlei Jêrusalem?

⁶Thoi noh Inh gô pơm kơ pơlei Samari thoi hla đuih lăm bri, thoi anih mơ̆r đe pơtăm hơmu păng kư̆m gô pơm kơ lu tơmo đơ̆ng noh grŏl pơđĭ tơ lăm thŭng păng gô pơdră dôm hơnă sư tơ 'nguaih.

⁷Đĭ-đăng lu rup man sư gô pơchah đĭ dôm lu tơmam lu sư iŏk sa pơgâm gô soh đĭ lăm ŭnh. Inh gô pơrăm lê̆ đĭ lu rup man lu sư; yua kơ mŭk tơmam lu sư mong 'măn noh đơ̆ng lu sư pơm đi, thoi noh lu sư yua tơmam noh apah ăn kơ lu bơngai pơm đi.

⁸Thoi noh Inh gô nhơ̆m hmoi păng ôr tơngưih, plôh ao năm jơ̆ng hoh. Inh gô ôr krao thoi kŏ bri păng ôr tơngưih pơmat-tat thoi sem bơrơ̆m.

⁹Yua kơ rơka sư ming pă klaih boih. Sư kư̆m năm truh tơ char Juđa, truh boih tơ 'măng jang kon pơlei inh, wă khan truh tơ Jêrusalem.

¹⁰'Nĕ kơ roi tơdrong truh âu pơlei Gat! 'Nĕ kơ nhơ̆m hmoi! Tơ pơlei Bet Leaphra, 'bĭch tơgrŏl bĕ tơ teh rơpŭk.

¹¹Ơ kon pơlei Saphir yak năm hăm akâu hoh păng mơlâu! Kon pơlei Sanan ưh kơ pơ̆n lĕch. Kon pơlei Bet Esen nhơ̆m hmoi, yua kơ đe gô blah iŏk anih sư gơnang.

¹²Kon pơlei Marôt đĭ rơmơ̆n rơmŏ chang gô tơdrong pŭn hiôk, tơdrong gleh đơ̆ng Kră Yang tơjruh boih tơ 'măng jang Jêrusalem.

¹³Ơ kon pơlei Laki, iŏk bĕ aseh hrơ̆t kơdâu năm tơ gre! Noh ih boih tơm pơm ăn kơ adruh Siôn pơm yoch; yua kơ tơdrong yoch Isơrael 'bôh lăm ih.

¹⁴Thoi ei na, ih gô ăn tơmam lăng jơ̆ng ti tơklah băl pơlei Môresêt Gat. Lu kon pơlei Aksip gô hơlĕnh pơdăr kơ lu pơtao Isơrael.

¹⁵Ơ kon pơlei Maresa, Inh gô ba minh 'nu bơngai truh tơ ih wă blah iŏk mŭk tơmam hnam dơnŏ. Tơdrong ư-ang kơ Isơrael gô truh pơlei Ađulam.

¹⁶Inh athei hơkôih lê̆ sŏk ih yuă jing 'ngôch kơ kon sâu mă ih kơeng; hơkôih bĕ kơ̆l 'ngôch thoi sem grơ̆, yua kơ lu kon hơ'lơ̆p gô tơklah đơ̆ng ih lu sư gô pơm bơnă.