Read bahnar Mi 5 Bible Online

Mi 5 - bahnar bible

Mi 5

¹Ơ Betlehem Eprata, ih jing pơlei iĕ hloh lăm rơbâu pơlei lăm char Juđa, Mă-lei đơ̆ng ih gô tơpŭ ăn kơ inh minh 'nu Kră Yang Sư gô pơgơ̆r lu bơngai Isơrael; Sư đei đơ̆ng tơm hmơm blŭng-a sơ̆ boih, đơ̆ng adrol kơ đĭ-đăng.

²Thoi noh Sư gô jao lu đe noh kơ lu bơngai ayăt kơ Sư dĭng tơ bơngai drŏ-kăn tơpŭ kơ Sư, tơpŭ boih păng lu bơngai Isơrael mă oei oei đơ̆ng lu 'nhŏng oh Sư, lu sư gô wih brŏk tơ kon sâu bơngai Isơrael.

³Sư gô dơ̆ng kơjăp păng gô gơnang kơ tơdrong pran kơtang đơ̆ng Kră Yang hăm tơdrong rŏ hơbŏ anăn Kră Yang 'Bok Kei-Dei Sư kơdih păng wei-lăng khŭl Sư kơdih; păng lu sư gô oei rơnŭk, yua kơ kơplah noh gô pơm tih hloh kơ đĭ-đăng bơngai tôch kơ teh.

⁴Noh Sư boih gô pơm kơ bơ̆n rơnŭk rơnua. Tơdah lu bơngai Asiri wă truh tơ lăm teh đak lu bơ̆n păng pơjuă hnam yang bơ̆n, na lu bơ̆n gô iung tơpơh 'nu bơngai wei-lăng păng tơhngam 'nu kuan pơgơ̆r lu kon pơlei na iung blah plơ̆ lu sư.

⁵Lu sư gô yua đao blah pơrăm dêh Asiri păng lu 'măng jang Nimrôt; păng Sư gô dŏng pơklaih bơ̆n đơ̆ng lu bơngai Asiri, tơdah lu sư mơ̆t lăm teh đak bơ̆n păng teh pơjuă lăm anih noh.

⁶Gah lu bơngai khŭl Jakôp mă oei oei gô oei tŏk-bŏk lăm adrĕch adrung thoi tŭk kiơ̆ pơgê jur đơ̆ng Kră Yang thoi 'mi hngach tuh kơpal 'nhĕt ưh kơ gô đơ̆ng kon bơngai păng kư̆m ưh kơ chang hơmĕng đơ̆ng kon bơngai.

⁷Lu bơngai khŭl Jakôp gô oei tŏk-bŏk lơ teh đak thoi dăm-brang oei tŏk-bŏk lu sem bri păng thoi lu dăm-brang kon oei tŏk-bŏk lu triu, dah lu sư yak năm găn pơjuă pơđep păng kăp hek, ưh kơ đei bu gơh dŏng pơklaih.

⁸Apinh ti Kră Yang iung blah lu bơngai ayăt kơ Ih păng dôm lu bơngai mă areh kơ Ih gô pơlôch đĭ?

⁹Kră Yang khan: Inh gô pơrăm đĭ lu aseh păng lu gre aseh lu iĕm đơ̆ng lăm ti lu iĕm.

¹⁰Inh gô pơrăm đĭ lu pơlei tih lăm char lu iĕm păng Inh gô tơlơ̆ tŭk lê̆ lu kơđông kơjăp lu iĕm.

¹¹Inh gô pơrăm lê̆ tơdrong lu pơjâu tơwir, thoi noh na lu iĕm ưh pă đei pơjâu khan lê̆ adrol dơ̆ng.

¹²Inh gô pơrăm lu rup yang păng lu gơ̆ng soi đêl lu iĕm man. Na lu iĕm ưh pă đei bon kơkuh dơ̆ng.

¹³Inh gô toh hŭt lê̆ rup yang Aserim đơ̆ng lu iĕm. Đơ̆ng noh Inh gô pơrăm lê̆ đĭ dôm lu pơlei tih lu iĕm.

¹⁴Inh gô iung kơting, hil areh păng Inh gô pơm 'mong kơ teh đak mă ưh kơ chu kiơ̆ nơ̆r Inh.

¹⁵Lăm tơdrong hil mĭl tơtŏ, Inh gô pơm tơwih tơdrong yoch kơnê̆ lu kon pơlei kuă kơ chu yom kơ Inh.