Read bahnar Mi 7 Bible Online

Mi 7 - bahnar bible

Mi 7

¹Răm-'băm tơpă kơ inh! Yua kơ ih thoi plei bơyan phang đe phĕ iŏk boih. Thoi plei hơmu đe chă dônh pơpôi đêl đe phĕ boih, ưh kơ đei minh hơie hơmu ayơ wă sa, plei hơra blŭng-a mă jơhngơ̆m inh hơpơi wă kư̆m ưh kơ đei.

²Bơngai hli yom kơ 'Bok Kei-Dei hiong boih đơ̆ng lăm teh đak âu; ưh pă đei bơngai tơpăt lăm kon bơngai. Đĭ-đăng lu sư nŏng kơ 'maih chă pham lĕch sĕch huŏng; rim 'nu iŏk hơnhuăl dăng lua 'nhŏng oh kơdih.

³Ti lu sư hrăn nŏng kơ pơm kơnê̆. Yŏng pơgơ̆r chă apinh mŭk tơmam, 'bok sek tơlang kư̆m hrăn chă sa pơgâm, gah bơngai pran kơtang 'maih pơm kơnê̆ kiơ̆ kơ jơhngơ̆m kơdih; thoi noh na lu sư pơđâu hơdai.

⁴Bơngai pơm 'lơ̆ng hloh lăm lu sư thoi jơla bơmrôm, lu bơngai tơpăt hloh kư̆m kơnê̆ hloh kơ dur jơla. Tơdrong lu bơngai gak ih roi năr phak ih truh boih, dang ei tơdrong hơwơ̆l hơwang lu sư truh boih.

⁵'Nĕ kơ lui kơ bơngai jê̆ iĕm păng kư̆m 'nĕ gan lui gơnang kơ buăl juăt iĕm; athei kơchăng tơdrong ih wă pơma hăm bơngai drŏ-kăn 'bơ̆t kơtơh ih.

⁶Yua kơ kon drŏ-nglo pơm kơnê̆ kơ 'bă sư, kon drŏ-kăn hil blah mĕ sư, mŏ mai ayăt hăm tơnei drŏ-kăn sư. Păng bơngai ayăt lu sư noh jơ̆ lăm hnam dơnŏ lu sư kơdih.

⁷Mă-lei gah inh, inh gô lăng Kră Yang, chang gô 'Bok Kei-Dei Tơ'ngla dŏng pơklaih inh; 'Bok Kei-Dei Kră Yang gô mơ̆ng nơ̆r inh.

⁸Ơ lu ayăt kơ inh, 'nĕ mah chhôk kơ inh dêh mă khan inh pơ̆k huŏng boih; kư̆m gô iung dơ̆ng; mă khan inh tơoei lăm anih măng mu, 'Bok Kei-Dei gô pơchrang kơ inh hơdah.

⁹Inh pŭ iŏk tơdrong Kră Yang hil yua kơ inh đei pơm yoch boih hăm sư, dĭng truh tơ Sư tơgŭm inh dơ̆ng, sek tơlang tơdrong tơpăt inh, Sư gô chông ba inh truh tơ tơdrong hơdah păng inh gô 'bôh tơdrong tơpăt Sư.

¹⁰Lu ayăt kơ inh gô 'bôh tơdrong na lu sư gô mơlâu, sư noh bơngai mă khan kơ inh thoi âu: Tơ yơ Kră Yang 'Bok Kei-Dei ih? Inh gô hiôk măt 'bôh tơdrong truh kơ sư, na 'nâu lu sư đe gô pơjuă bơhlơ̆r thoi teh rơpŭk rok trong.

¹¹Gô đei lăm năr ei kơnh dur iĕm đe gô man pơdơ̆ng ming, lăm năr noh tơdrong pơkă khan gô pơih rai să.

¹²Lăm năr noh đe gô năm truh tơ iĕm, đơ̆ng Asiri păng đơ̆ng pơlei tih Êyiptơ, đơ̆ng char Êyiptơ truh tơ krong tih Ơphrat, đơ̆ng dơsĭ âu truh tơ dơsĭ to, đơ̆ng kông âu truh tơ kông to.

¹³Mă-lei teh âu gô lê̆ bri juơ yua kơ đe gô pơm 'mong tơwih kơ tơdrong đêl lu kon pơlei oei lăm noh pơm kơnê̆.

¹⁴Iŏk 'long jra 'Bok Kei-Dei mơnat kơ bơngai Isơrael wei bĕ kon triu ih, wă khan khŭl triu sem dơrong ih lu oei minh drô̆ lăm bri kông Katmen; ăn bĕ kơ lu sư sa 'nhĕt lăm char Basan păng Gileat, kư̆m thoi ki sơ̆.

¹⁵Inh gô pơdah ăn kơ lu sư dôm tơdrong hlĭch chrơp, kư̆m thoi lu năr mă iĕm lĕch đơ̆ng teh đak Êyiptơ.

¹⁶Lu kon bơngai lăm teh đak 'bôh tơdrong noh, gô mơlâu kơ tơdrong pran kơtang lu sư; lu sư gô oei hreh ưh kơ pơ̆n pơma păng đon lu sư jing klĭk.

¹⁷Lu sư gô liah 'mui teh thoi 'bih păng hli tơrơ lĕch đơ̆ng lăm trôm teh lu sư thoi lu sem brem mơmŏ kơpal teh; lu sư gô hli tơrơ na lu sư wih tơ Kră Yang 'Bok Kei-Dei lu bơ̆n, yua kơ ih na lu sư hli tơrơ.

¹⁸Hăm đei bu jing 'Bok Kei-Dei thoi Ih, huay kơ jô̆ yo kơ tơdrong kơnê̆ đe păng huay kơ 'blŏk tơdrong glăi đơ̆ng kon pơlei mă oei oei lăm pơlei Ih, Ih huay kơ oei blĕk khŏm khŏm, yua kơ Ih iŏk tơdrong 'mêm mơnat na hiôk chơt.

¹⁹Sư kư̆m gô oei 'mêm mơnat kơ bơ̆n, kơtĭt lê̆ tơdrong yoch kơnê̆ lu nhôn tơ ala jơ̆ng Ih; păng klơ̆m hŭt lê̆ tơdrong yoch lu nhôn, tơ lăm đak dơsĭ jrŭ sŭng.

²⁰Ih gô pơm 'long tơpăt tơ'bôh kơ Jakôp păng 'mêm mơnat kơ Abraham, noh boih mă tơdrong Ih đei pơkăm pơkă hăm lu 'bok yă lu nhôn đơ̆ng năr sơ̆ ki sơ̆ kach.