Read bahnar Hab 3 Bible Online

Hab 3 - bahnar bible

Hab 3

¹Nơ̆r krao khan tơ'nguơ̆ kiơ̆ nơ̆r hơri đơ̆ng Habakuk bơngai khan lê̆ adrol Habakuk.

²Ơ Kră Yang! Inh kơtơ̆ng boih đe roi gah anăn Ih păng tơdrong Ih pơm na inh hli tơrơ. Ơ Kră Yang! Apinh Ih ăn tơdrong jang Ih oei hơnơ̆ng rim khei rim sơnăm lăm teh đak. Apinh Ih bơtho tơ'bôh ăn kơ rim 'nu băt nhen! Kơplah Ih oei hil, apinh Ih 'nĕ kơ hiơt tơdrong mơnat!

³'Bok Kei-Dei truh đơ̆ng Têman, Kră Yang Tơ'ngla 'Lơ̆ng rơgoh truh đơ̆ng kông Pharan. Sêla Tơdrong ư-ang Sư gom đĭ lu tăl plĕnh, Nơ̆r bơnê ư-ang kơ Sư jơ̆p-jang kơ teh đak.

⁴Tơdrong rang mơnhal Sư thoi măt 'năr. Dôm lu chră hơdah lĕch đơ̆ng ti 'ma Sư, Tơdrong mơsêh Sư ôn tơ lăm noh.

⁵Tơdrong jĭ hơbuh răm năm adrol kơ Sư, 'Brơ̆m ŭnh lĕch đơ̆ng jơ̆ng Sư.

⁶Sư iung pơtŏ teh; Sư lăng đĕch pơm kơ lu kon pơlei tơklah tơklang; Lu kông mă oei oei kư̆m hĕch đĭ. Rim lu groi kông oei ling-lang gô drap kơkuh. Dôm lu trong Sư oei oei ling-lang thoi so.

⁷Inh 'bôh anih oei char Kusan đei tơdrong pơmat-tat. Anih hnam char Midian tơdrŏ pơpơ̆.

⁸Ơ Kră Yang hăm trŏ kơ Ih blĕk hil kơ lu đak krong ưh? Tơdrong hil Ih tuh kơ đak glung ưh? Hăm trŏ tơdrong hil Ih blah đak dơsĭ, kơplah Ih hao aseh hao gre aseh Ih năm wă dŏng pơklaih?

⁹Ih iŏk hră đơ̆ng tơpu, trŏ thoi nơ̆r Ih pơkă, nơ̆r pơkă hăm lu adrĕch adrung noh nơ̆r sĭt tơpă. Sêla Ih blah klah asong teh hăm đak glung: Lu kông 'bôh Ih tơtơ̆ rơrĭnh rơrănh.

¹⁰Lu đak glung ro hrĕnh! Kơdâu ôn tơ nai, Hơlŭng jrŭ ôr hơdrăi, kơđĕl dơsĭ yơ̆r ti kơjung thuơ.

¹¹Măt 'năr măt khei dơ̆ng kơtă anih lu sư; Yua kơ đei 'bôh lu 'brơ̆m Ih prah păng rang hơdah đơ̆ng lu đao tơju hơlă Ih, chêr char thoi kơmlat.

¹²Tơdrong hil Ih truh tơ teh, Păng hil mĭl oei pơjuă adrĕch adrung kon bơngai.

¹³Ih iung lĕch pơklaih kon pơlei Ih kơdih, Ih lĕch dŏng pơklaih bơngai mă Ih đei tuh đak rơmă. Ih teh pơrăm kơ̆l bơngai kơnê̆, pơrăm lê̆ hnam sư, Pơm kơ sư akâu hoh đơ̆ng jơ̆ng truh tơ kơ̆l. Sêla

¹⁴Ih iŏk hơlă lu sư 'bet kơ̆l lu linh sư kơdih; lu sư năm thoi hơbŭt wă blah pơrăm inh; Lu sư chhôk hal thoi luăn sa lu bơngai đe sư pơmat oei lăm anih hlơp.

¹⁵Ih hao aseh juă kơpal đak dơsĭ, Hao aseh yak kơpal đak dơsĭ blôk.

¹⁶Inh kơtơ̆ng nơ̆r 'nâu, na akâu jăn inh tơtơ̆, Kơtơ̆ng nơ̆r Sư hơkŭng inh pơpơ̆; Kơting inh thoi bŭk răm, Tơdrong bŭk ôm mơ̆t lăm kơting inh; Păng jơhngơ̆m inh hli tơrơ tơtơ̆ tăr wăr. Yua kơ inh athei ngăn hreh gô năr pơmat truh, Noh jơ̆ năr mă lu đe năm blah teh đak lu nhôn.

¹⁷Mă khan 'long hơra ưh pă pơkao dơ̆ng, Păng tơm hơmu kư̆m ưh pă plei; Tơm 'long ôliwơ kư̆m pă đei plei hmĕt pơm đak rơmă păng kư̆m pă đei chŭn mir ayơ mă oei đei chăt tơmam sa 'ba sŏng; Mă khŭl triu păng đei lăm hơdrong, Sem dơrong rơmo bơbe pă đei lăm war.

¹⁸Inh kư̆m oei chơt hiôk lăm Kră Yang; Chhôk hal Kră Yang 'Bok Kei-Dei Tơ'ngla Dŏng Pơklaih inh.

¹⁹Kră Yang jơ̆ Kră Yang tơdrong pran kơtang inh, Sư pơm ăn kơ jơ̆ng inh yak kơjăp thoi jơ̆ng juei; Sư chông ba inh yak năm lăm kơpal kông groi.