Read bahnar Jep 1 Bible Online

Jep 1 - bahnar bible

Jep 1

¹'Nâu boih nơ̆r Kră Yang khan kơ Jêphania, kon drŏ-nglo Kusi, sâu Gêđalia, sâu Amaria, Hesekia. Lăm chăl Jôsia, kon drŏ-nglo Ammôn pơm pơtao đe Juđa:

²“Inh gô pơlôch pơrăm đĭ tơmam kơpal teh,” Kră Yang khan thoi noh.

³“Inh wă pơlôch kon bơngai păng kon sem brem, sem păr păng ka lăm đak dơsĭ, Inh gô tơhuŏng lê̆ lu bơngai pơm kơnê̆; păng Inh gô tơhuŏng lê̆ kon bơngai đơ̆ng kơpal teh.” Kră Yang khan thoi noh.

⁴“Inh gô yơ̆r ti pơm kơ Juđa păng đĭ-đăng kon pơlei oei lăm Jêrusalem; Inh gô tơhiong pơgoh lu yang Baal mă oei oei, dôm lu thây tơm păng 'bok soi lu sư đơ̆ng anih 'nâu.

⁵Inh gô pơlôch lu bơngai kơkuh kơ tơmam kơpal plĕnh tơ bơbŭng hnam; păng lu bơngai đei pơkă pơkăm hăm Kră Yang păng kư̆m đei pơkă pơkăm dơ̆ng hăm lu pơtao lu sư kơdih;

⁶hăm lu bơngai mă weh achăng lê̆ đơ̆ng Kră Yang păng lu bơngai mă ưh kơ chơchă Kră Yang, ưh kơ krao apinh Sư.

⁷Hreh bĕ 'bơ̆t anăp Kră Yang 'Bok Kei-Dei! Yua kơ năr Kră Yang wă jê̆ boih. Kră Yang đei hơmet boih tơmam soi, Sư đei 'măn klah lê̆ pha boih lu bơngai tơmoi mă Sư krao.

⁸Lăm năr soi sơmah kơ Kră Yang, Inh gô phak lu Kuan pơgơ̆r păng lu kon drŏ-nglo pơtao păng đĭ-đăng lu bơngai hrŭk hơbĕn ao tơmoi.

⁹Lăm năr noh, Inh gô phak pơđĭ lu bơngai pơplŏng trong bơlôh 'măng cheng păng lu bơngai pơm tơ'bĕnh tơdrong kư̆ kă păng tơdrong kơnê̆ 'bĕnh-'bang kơ hnam yŏng tơ'ngla sư.”

¹⁰Kră Yang khan: “Năr noh kơnh, gô đei nơ̆r krao ôr đơ̆ng 'măng jang ka, đei nơ̆r nhơ̆m hmoi tơ lăm pơlei tih anih tăl mă 'bar, nơ̆r jơwa re dêh đơ̆ng lu kông groi hơlih.

¹¹Ơ lu kon pơlei mă oei lăm pơlei tih gah ala sŭng, nhơ̆m hmoi bĕ; yua kơ lu bơngai mơdro mơchan pơrăm đĭ boih păng lu bơngai mă chĕp jên hu lôch đĭ boih.

¹²Lăm kơplah noh, Inh gô iŏk ŭnh kơđeng păng ŭnh hơchô̆ nhơk chơchă lăng Jêrusalem, Inh gô phak lu bơngai pơgŏk et tơdrô lăm anih noh, lu sư khan lăm jơhngơ̆m lu sư thoi âu: ‘Kră Yang ưh pă đei tơjur ăn tơdrong pŭn hiôk, kư̆m ưh pă đei wă tuh tơdrong gleh truh.’

¹³Mŭk tơmam lu sư đe gô tơtông iŏk, hnam lu sư jing juơ tơtŭng; lu sư pơm hnam ră mă-lei ưh kơ đei oei; pơtăm tơm hơmu ră mă-lei ưh kơ đei sa plei păng huch đak.

¹⁴“Năr kăl tih Kră Yang jê̆ boih, wă jê̆ boih; sư wă truh tĕnh tơpă. Năr Kră Yang đei nơ̆r re jơwa, jơ noh lu bơngai nuih kơtang gô nhơ̆m ôr ơh sơ'ngon dêh.

¹⁵Năr noh năr tơdrong hil, năr pơmat-tat ơh sơ'ngon, năr noh năr đe pơlôch pơrăm, năr măng mu păng năr ưh kơ đei hơdah năr hơmơ̆l păng tŭk gom,

¹⁶năr đe hlôm tơgiĕp roi tơbăt tơdrong tơblah hăm lu pơlei tih mă đei dur kơjăp păng tơblah hăm lu hnam thôt kơjung mum pơlei tih.

¹⁷Inh gô ba tơdrong gleh truh kơ kon bơngai. Lu sư gô yak nơnăm thoi lu bơngai măt tol, yua kơ lu sư đei pơm yoch hăm Kră Yang; đe gô 'bet lu sư. Pham lu sư lĕch thoi 'mui teh păng sĕch lu sư thoi 'mê̆ mơ̆r.

¹⁸Mă hu dah maih lu sư kư̆m ưh kơ gơh pơklaih lu sư đơ̆ng tơdrong Kră Yang hil mĭl; đĭ-đăng kơ teh gô răm đĭ lăm ŭnh mă Kră Yang hil mĭl, yua kơ Sư pơlôch pơđĭ kon bơngai kơpal teh âu ưh kơ tam kơ băt.”