Read bahnar Jep 3 Bible Online

Jep 3 - bahnar bible

Jep 3

¹Răm-'băm tơpă kơ pơlei 'maih tơblah păng pơlei 'mê̆-'mach, pơm tơdrong kơnê̆ pơjăm pơjuă đe.

²Sư ưh kơ 'maih mơ̆ng đe ôh; ưh kơ wă chu kơ đe teh bơtho; ưh kơ wă gơnang kơ Kră Yang; ưh kơ năm jê̆ Kră Yang 'Bok Kei-Dei.

³Lu kuan tih mă oei pơgơ̆r lu sư thoi dăm-brang hơrum, lu kră sek tơlang lu sư thoi kŏ-so sa pơgoh kơmăng, ưh kơ đei 'măn lê̆ kơ pơgê dơning.

⁴Lu 'bok khan lê̆ adrol tă kơ hơlĕnh pơdăr ngăl; 'bok soi lu sư pơm mơgrĭ kơ anih rơgoh; păng pơm pơhloh kơ tơdrong khôi juăt.

⁵Kră Yang oei tŏk-bŏk sư jơ̆ tơdrong tơpăt, ưh kơ đei pơm kơnê̆, rim pơgê sư pơdah tơdrong tơpăt Sư, tơ hơdah ưh kơ đei layơ ưh. Mă-lei lu bơngai kơnê̆ ưh kơ băt mơlâu.

⁶“Inh đei pơlôch boih lu adrĕch adrung, hnam thôt 'bơ̆t mum pơlei tih lu sư jing juơ tơtŭng. Inh pơm ăn kơchơ lu sư jing juơ rơhiăng, dĭng mah pă đei bu yak năm trong 'nei, pơlei sư pơrăm pơlôch đĭ, ưh pă đei minh 'nu bu păng kư̆m pă đei oei tơ noh.

⁷Inh đei khan boih: ‘Ih athei hli yom kơ Inh đĕch, chu phak bơtho.’ Thoi noh anih sư oei huay kơ hiong tôch đĭ, kiơ̆ thoi Inh pơkă kơ sư. Mă-lei lu sư đơ̆ng hrôih drôih pơm pơrăm lê̆ dôm tơdrong jang sư kơdih.”

⁸Thoi noh, Kră Yang khan: “Lu iĕm athei gô Inh dĭng truh tơ năr Inh gô iung blah rôp; yua kơ Inh wă iŏk akŭm pơpôi đĭ lu kon pơlei păng akŭm đĭ lu dêh char Inh, Inh wă tuh tơdrong hil păng tơdrong blĕk Inh tơ lu sư, yua kơ đơ̆ng ŭnh Inh gar gô luăn sa đĭ teh âu.

⁹Yua kơ Inh wă ăn 'bơ̆r 'lơ̆ng rơgoh kơ kon pơlei pơla, wă kơ đĭ-đăng lu sư tă kơ krao chă Kră Yang ngăl, wă kơ đei minh jơhngơ̆m bơ̆jang kơ Kră Yang.

¹⁰Lu bơngai mă krao chă Inh, wă khan lu kon drŏ-kăn lu bơngai jrok tơklah tơklang tơ pah to đak krong Êthiôpi, gô năm pơm yang pơyơ̆r tơmam soi kơ Inh.

¹¹Lăm năr noh, ih ưh pă đei mơlâu yua kơ đĭ tơdrong yoch ih pơm hăm Inh, noh mă dôm tơdrong yoch ih pơm hăm Inh. Yua kơ dang ei Inh wă pơdrâu iŏk đơ̆ng lu sư dôm lu chơt hiôk păng pơang sư; đơ̆ng noh lu iĕm ưh pă đei pơang tơ kơpal kông rơgoh Inh dơ̆ng.

¹²Inh gô 'măn lê̆ tơ tŏk-bŏk ih oei đei minh adrĕch kon bơngai pơmat-tat, dơnuh hin, lu sư gô băt gơnang kơ Kră Yang.

¹³Lu bơngai Isơrael mă oei đei lu sư ưh pă pơm kơnê̆ boih, ưh pă pơma hơlĕnh, ưh pă đei hơpiĕt hơlĕnh pơdăr lăm 'bơ̆r lu sư boih; yua kơ lu sư gô sŏng sa 'băt păng tep hiôk, ưh pă đei bu tơhli lu sư dơ̆ng.”

¹⁴Ơ kon drŏ-kăn Siôn, hơri bĕ! Ơ adrĕch adrung Isơrael, iŏk chơt hiôk bĕ! Ơ kon adruh Jêrusalem, 'nă hal bĕ.

¹⁵Kră Yang, huay pă sek tơlang ih boih, pơm ăn kơ lu ayăt kơ ih weh ataih đơ̆ng ih; pơtao Isơrael, wă khan Kră Yang, oei tŏk-bŏk ih, ih gô huay pă tơ'bơ̆p tơdrong gleh truh dơ̆ng.

¹⁶Lăm năr noh, đe gô khan kơ pơlei Jêrusalem thoi âu: “Ơ Siôn 'nĕ pă hli, ti ih 'nĕ pă rơdu!

¹⁷Kră Yang 'Bok Kei-Dei ih oei tŏk-bŏk ih; Sư boih mơsêh gô dŏng pơklaih ih. Sư gô chơt hiôk đĭ-đăng yua kơ đơ̆ng ih. Yua kơ tơdrong 'mêm mơnat Sư, Sư gô ĕnh; păng yua kơ đơ̆ng ih, Kră Yang gô hơri chơt hiôk.”

¹⁸“Inh gô akŭm pơpôi lu bơngai ơh sơ'ngon, yua kơ lu sư ưh kơ gơh năm akŭm tih; lu sư adrĕch ih, iŏk tơdrong mơlâu jing pŭ trăp.

¹⁹Âu, lăm kơplah noh, Inh pơlôch lu bơngai mă pơm kơ ih ơh sơ'ngon; Inh gô dŏng pơklaih lu bơngai hơwen hơwo jo jăn, pơpôi lu bơngai mă đe pơpuh tơweh đe teh pơmat, pơm ăn kơ lu iĕm jing đe bơnê păng pơư pơang; wă khan lu bơngai mă đe pơjăm pơjuă lăm teh đak âu.

²⁰Kơplah noh, Inh gô anhăk iĕm brŏk, kơplah lăm năr noh Inh akŭm pơpôi iĕm hơdai, yua kơ Inh gô ăn kơ iĕm đei đe pơư pơang păng đei đe pơyom bơnê tơ lăm rim adrĕch adrung kon bơngai kơpal teh âu, kơplah Inh tơbrŏk lu bơnă 'bơ̆t anăp lu iĕm,” Kră Yang đei khan thoi noh.