Read bahnar Hag 2 Bible Online

Hag 2 - bahnar bible

Hag 2

¹Năr 'bar-jĭt puăn khei tơpơh, đei nơ̆r Kră Yang đơ̆ng Hagai bơngai khan lê̆ adrol khan thoi âu:

²“Dang ei athei roi kơ Sôrôbabel kon drŏ-nglo Salathiel, yŏng pơgơ̆r Juđa păng Jôsua kon drŏ-nglo Jêhôsađak 'bok soi tơm păng lu kon pơlei mă oei đei, khan kơ sư thoi âu:

³‘Bơngai bu mă oei oei lăm lu iĕm mă đei 'bôh boih tơdrong ư-ang kơ hnam âu adrol sơ̆ păng dang ei iĕm 'bôh sư thoi yơ? Sư oei 'bơ̆t anăp hăm trŏ thoi răm đĭ?’

⁴Dang ei Kră Yang khan: ‘Ơ Sôrôbabel ih athei nuih kơtang bĕ; ih Jôsua, kon drŏ-nglo Jêhôsađak, 'bok soi tơm, kư̆m athei nuih kơtang Kră Yang khan dơ̆ng: Đĭ-đăng kon pơlei kơpal teh, lu iĕm kư̆m athei nuih kơtang păng bơ̆jang bĕ; yua kơ Inh oei hăm iĕm,’ Kră Yang Tih Hloh khan thoi noh.

⁵‘Nơ̆r pơgơ̆p mă Inh đei pơkă hăm lu iĕm, kơplah iĕm lĕch hloi đơ̆ng dêh char Êyiptơ hăm Yang Bơhngol Inh oei hơdai iĕm. 'Nĕ kơ hli ôh.’

⁶Yua kơ Kră Yang Tih Hloh khan thoi âu: ‘Oei pơma minh wơ̆t, ưh pă đunh dơ̆ng, Inh gô pơm kơ plĕnh păng teh tơdrŏ; đak dơsĭ păng teh gô hrĕng kro.

⁷Inh kơgŭ đĭ-đăng dêh char gô tơdrŏ păng dôm tơdrong hơpơi wă lu dêh char gô truh păng Inh gô pơm 'bĕnh blai kơ hnam âu,’ Kră Yang Tih Hloh khan thoi noh.

⁸‘Hu jơ̆ hu Inh, maih jơ̆ maih Inh, Kră Yang khan thoi noh.

⁹Tơdrong ư-ang kơ hnam đơ̆ng rŏng âu, gô tih hloh kơ ư-ang hnam adrol ki sơ̆, Kră Yang khan thoi noh păng Inh gô ăn tơdrong rơnŭk rơnua lăm anih 'nâu.’ Kră Yang Tih Hloh khan thoi noh.”

¹⁰Năr 'bar-jĭt puăn khei tơsĭn gah sơnăm Đarius đei nơ̆r Kră Yang đơ̆ng Hagai 'bok khan lê̆ adrol khan thoi âu:

¹¹“Kră Yang Tih Hloh khan: ‘Dang ei athei apinh lu 'bok soi gah khôi juăt khan thoi âu:

¹²Tơdah đe 'nŭng 'nhĕm rơgoh lăm mum ao păng kơnhŏng ao sư 'bơm tơ 'bĕng, dah tơmam kiơ mă pai sĭn, đak sik, dah đak rơmă, dah tơmam sa kiơ, na dôm tơmam noh hăm pă rơgoh ưh?’ ” Lu 'bok soi tơl thoi âu. “Ưh.”

¹³Hagai khan dơ̆ng: “Tơdah bu mă 'mê̆-'mach yua kơ pel akâu bơngai lôch na hơtŭt 'bơm dôm tơmam noh, na dôm lu tơmam noh hăm tơ 'bơm hơpoh 'mê̆-'mach ưh?” Lu 'bok soi tơl thoi âu: “Lu tơmam noh gô kơnê̆ 'mê̆-'mach.”

¹⁴Hagai khan thoi âu: “Kră Yang khan kon pơlei 'nâu. ‘Dêh char 'nâu, oei 'bơ̆t anăp Inh kư̆m thoi noh, mă đĭ dôm tơdrong lu sư jang kư̆m lei-lăi tơmam sa sư pơyơ̆r tơ âu kư̆m kơnê̆ 'mê̆-'mach.’

¹⁵Thoi noh dang ei Inh apinh lu iĕm athei tơchĕng bĕ, đơ̆ng âu tơ rŏng. Tơdrong đei truh boih, kơplah tam mă dan tơmo 'nâu kơpal tơmo to pơjing hnam akŭm 'Bok Kei-Dei.

¹⁶Lu iĕm khan yuă 'ba âu minh pôi 'ba trŏ kơ 'bar-jĭt hnŏng, mă-lei lăp mơjĭt hnŏng đĕch păng hmĕt đak tơdrô ngeh tơ pơđăm-jĭt kơthŭng ră mă-lei lăp 'bar-jĭt hnŏng đĕch.

¹⁷Inh ăn boih phang-ang, tơngiĕt 'mi prĕl wă pơrăm lu iĕm, lu tơmam đơ̆ng ti iĕm jang mă-lei iĕm ưh kơ wă wih tơ Inh. Kră Yang khan thoi noh.

¹⁸Dang ei tơchĕng bĕ; đơ̆ng năr 'nâu tơ adrol ki, wă khan iŏk đơ̆ng năr 'bar-jĭt puăn khei tơsĭn đơ̆ng năr man pơjing hơnă hnam akŭm 'Bok Kei-Dei, tơchĕng bĕ kơ tơdrong noh;

¹⁹lu iĕm hăm pă đei găr adrĕch hơmet lê̆ lăm pơk ưh? Mă khan truh tơ tơm hơmu 'long hơra, 'long ôliwơ, 'long gărnăt, kư̆m ưh kơ đei tơm 'long ayơ mă đei plei. Mă-lei iŏk đơ̆ng năr âu inh gô ăn pŭn hiôk kơ iĕm.”

²⁰Đei đơ̆ng nơ̆r Kră Yang khan kơ Hagai wơ̆t mă 'bar, lăm năr 'bar-jĭt puăn lăm khei noh, thoi âu:

²¹“Athei roi kơ Sôrôbabel, kuan pơgơ̆r Juđa, thoi âu: ‘Inh gô kơgŭ plĕnh păng teh.

²²Inh gô blơ̆ lê̆ tang-dŏ pơtao lu dêh char, Inh pơrăm lê̆ tơdrong noh pơgơ̆r lu sư; Inh gô teh tơblơ̆ lê̆ gre păng lu bơngai hao lăm gre noh lu sư gô pơ̆k răm đơ̆ng đao sư kơdih.’ ”

²³Kră Yang Tih Hloh khan: “Ơ Sôrôbabel, kon drŏ-nglo Salathiel lăm năr noh, Inh gô iŏk ih pơm đĭch đam Inh!” Kră Yang khan: “Inh gô pôk ih thoi tơkhiĕn kĭ pơkăm yua kơ Inh đei rơih iŏk ih boih.” Kră Yang Tih Hloh khan thoi noh.