Read bahnar Sa 11 Bible Online

Sa 11 - bahnar bible

Sa 11

¹Ơ Liban, pơih bĕ 'măng, wă kơ ŭnh sa pơđĭ 'long dơnơ̆ng ih!

²Ơ 'long hơngo krao ôr bĕ! Yua kơ tơm 'long dơnơ̆ng păk boih, dôm lu tơnơm 'long 'lơ̆ng pơrăm đĭ boih. Ơ tơm 'long kôih tơ Basan, ôr krao bĕ, yua kơ lu bri kơdrơ̆ng kăl đĭ boih.

³Đei nơ̆r ôr nhơ̆m hmoi lu bơngai wei triu! Yua kơ pơrăm đĭ boih tơdrong ư-ang lu sư; đei lu kon dăm-brang grĕnh ôr! Yua kơ tơdrong 'lơ̆ng rŏ Jôrđăn răm đĭ boih.

⁴Kră Yang 'Bok Kei-Dei khan thoi âu: “Ăn bĕ lu triu wă pơlôch pơm 'nhĕm sa 'nhĕt;

⁵lu bơngai răt triu pơlôch đĭ triu pơm 'nhĕm huay kơ jô̆ khan pơm yoch. Lu bơngai mă tĕch lu sư khan: Kră Yang trŏ kơ ư-ang, yua kơ inh mơdrŏng bơih; păng lăm lu bơngai wei triu ưh kơ đei minh 'nu bơngai bu mă 'mêm kơ lu triu.”

⁶Kră Yang khan: “Yua kơ Inh ưh pă 'mêm boih kơ kon bơngai lăm teh âu; mă-lei 'nâu, Inh gô jao rim 'nu bơngai kơ lu rông 'bôt sư kơdih păng lăm ti pơtao lu sư; lu sư gô blah pơjuă teh đak, Inh ưh kơ đei pơklaih lu sư đơ̆ng ti đe noh ôh.”

⁷Thoi noh Inh ăn lu triu đe wă pơlôch sa 'nhĕt, lu triu noh boih pơmat-tat tơpă tơ lăm khŭl triu. Đơ̆ng noh, Inh iŏk 'bar tŏ 'long jra: Minh pôm krao 'long jra 'mêm mơnat, minh pôm krao 'long jra pơgơ̆p păng Inh ăn kơ lu triu chă sa.

⁸Lăp lăm minh khei đĕch Inh pơlôch đĭ pêng 'nu bơngai wei triu; Inh pă kĕ ĕnh hăm lu sư boih păng lu sư kư̆m lei-lăi ưh pă lăp kơ Inh.

⁹Inh khan thoi âu: “Inh ưh pă jing bơngai wei triu lu iĕm boih. Triu ayơ lôch, lôch bĕ; triu ayơ hiong, hiong bĕ. Bê̆ mă triu oei đei tơkăp tơsa băl tơduă, triu âu sa triu noh.”

¹⁰Đơ̆ng noh, inh iŏk 'long jra mă minh krao 'long jra 'mêm mơnat na chơ̆ng hơjăl lê̆, wă pơrăm lê̆ nơ̆r mă đêl Inh đei pơgơ̆p hăm lu kon pơlei.

¹¹Sư pơtôch hloi lăm năr noh; thoi noh đĭ-đăng lăm khŭl triu pơmat-tat tơpă, triu mă mơ̆ng kiơ̆ Inh, băt boih noh nơ̆r đơ̆ng Kră Yang.

¹²Inh khan kơ lu sư thoi âu: “Tơdah iĕm tơchĕng khan trŏ ăn jên apah Inh, dah ưh lei lê̆.” Lu sư kŏng tơmam apah Inh, noh pêng-jĭt tơpei jên hu.

¹³Kră Yang khan kơ inh thoi âu: “Tôi ba tơpei hu noh mă tơmam gĭt sư apah inh na ba kơ bơngai mă hling sư!” Inh iŏk hloi pêng-jĭt tơpei hu noh năm ba hloi kơ bơngai mă hling sư tơ lăm hnam akŭm 'Bok Kei-Dei.

¹⁴Đang kơ noh inh chơ̆ng hơjăl lê̆ 'long jra mă pơgơ̆p noh, wă pơtôch tơdrong pơm 'nhŏng oh bre bơngai Juđa, lăm bơngai Isơrael.

¹⁵Kră Yang khan kơ inh thoi âu: “Iŏk bĕ kơ ih kơdih dôm lu tơmam đơ̆ng lu bơngai wei triu ưh kơ brĕ.

¹⁶Yua kơ âu, Inh gô tơiung ăn minh 'nu bơngai plơ̆ng jing bơngai wei-lăng triu kơpal teh âu. Mă-lei sư ưh kơ hiơ̆k kơ triu ôh, kư̆m ưh kơ chơchă lu triu hiong, ưh kơ wă ming lu triu rơka, ưh kơ wă rong lu triu bek jăng, mă-lei 'buh sa lu triu mă bek 'lơ̆ng noh păng hek lê̆ kơchôp lu sư.

¹⁷Răm-'băm tơpă kơ lu bơngai wei triu ưh kơ brĕ, achăng lê̆ triu lu sư! Iŏk đao 'bet kơkŏng ti sư păng koh măt gah 'ma sư; kơkŏng sư jing jo păng măt sư jing tol.”