Read bahnar Sa 12 Bible Online

Sa 12 - bahnar bible

Sa 12

¹Pŭ iŏk trăp nơ̆r Kră Yang pơma kơ pơlei Jêrusalem. Kră Yang Tơ'ngla pơjing kơ plĕnh păng teh păng ăn tơdrong arih tơ lăm kon bơngai bơ̆n, đei khan thoi âu:

²“'Nâu, Inh gô pơm ăn kơ pơlei Jêrusalem jing minh pôm kơchŏk pơm kơ kon pơlei mă oei tăp dăr kơ sư; păng tơdah đe wang Jêrusalem boih, kư̆m gô đei tơdrong truh kơ Juđa.

³Kŭm gô đei tơdrong truh hloi lăm năr noh Inh gô pơm ăn kơ Jêrusalem thoi tơmo, trăp kơ rim adrĕch adrung kon bơngai. Na dôm lu bơngai mă tung sư đei tơdrong jĭ dêh; păng đĭ dôm lu dêh char kơpal teh âu gô blah sư.”

⁴Kră Yang khan: “Lăm năr noh, Inh gô druh teh rim kơ lu aseh wă kơ lu sư kơdâu hli tơrơ, dôm lu bơngai hao aseh noh gô nhen thoi wơnh; Inh gô bơyar măt Inh lăng tơ Juđa păng Inh gô teh rim aseh lu kon tơring jing măt tol.

⁵Dang ei đei lu kră pơgơ̆r char Juđa pơma lăm jơhngơ̆m lu sư khan: Lu kon pơlei oei tơ Jêrusalem jing tơdrong pran kơtang inh, Kră Yang Tih Hloh, noh boih Kră Yang 'Bok Kei-Dei lu sư.

⁶Lăm năr noh, Inh gô pơm ăn kơ yŏng pơgơ̆r Juđa thoi gŏ blôk lăm tơnuh đei 'long ŭnh khơ̆ng păng kư̆m thoi pla ŭnh khơ̆ng đơ̆ng hơchô̆ hơnong 'ba lu sư soh sa pơđĭ tơ gah 'ma hăm tơ gah 'ngiĕo, lu sư gô soh pơđĭ lu kon pơlei mă oei tăp dăr kơ lu sư; păng kon pơlei Jêrusalem oei đei anih kơ lu sư kơdih kơtă dơnơ̆ng, wă khan pơlei Jêrusalem.”

⁷Kră Yang adrol hloh gô dŏng pơklaih dôm lu kơđông Juđa, wă kơ đei tơdrong ư-ang kơ hnam Đawit păng tơdrong ư-ang kơ pơlei Jêrusalem, huay kơ ư-ang hloh Juđa.

⁸Lăm năr noh, Kră Yang boih Tơ'ngla dŏng tơgŭm kon pơlei oei lăm Jêrusalem păng lăm năr noh lu bơngai mă tơrăn hloh gô pran thoi Đawit, hnam Đawit gô nhen thoi Kră Yang 'Bok Kei-Dei, gô thoi linh jang 'lơ̆ng Kră Yang oei 'bơ̆t anăp lu sư.

⁹“Lăm năr noh Inh gô chă pơrăm đĭ-đăng pơlei, dêh char ayơ mă blah Jêrusalem.”

¹⁰“Inh gô tuh Yang Bơhngol tơdrong pŭn hiôk păng tơdrong krao apinh kơ hnam Đawit păng kơ lu kon pơlei Jêrusalem; lu sư gô lăng tơ Inh jơ̆ Kră Yang mă đêl lu sư 'bet boih; păng lu sư gô nhơ̆m hmoi, nhơ̆m hmoi thoi 'mêm kơ kon dăm lôch, lu sư gô oei lăm tơdrong chhŭr nuih, thoi lu bơngai mă đei tơdrong chhŭr nuih ơh sơ'ngon yua kơ kon kơdră lu sư hiong.

¹¹Lăm năr noh, gô đei tơdrong nhơ̆m hmoi tih dêh tơ pơlei Jêrusalem, kư̆m thoi đe nhơ̆m hmoi tih dêh sơ̆ tơ dêh Hadat Rimmôn oei tơ lăm tơmăn glă Mêgiđô,

¹²lăm teh âu gô nhơ̆m hmoi, rim adrĕch lu sư kơdih kơdih: Adrĕch adrung hnam Đawit klah pha, lu akăn sư klah pha; adrĕch adrung Nathan klah pha, lu akăn lu sư kư̆m lê̆ pha;

¹³Adrĕch Lêwi kư̆m klah pha, akăn lu sư kư̆m klah pha;

¹⁴na dôm lu adrĕch mă oei đei, rim adrĕch klah pha păng akăn lu sư kư̆m klah pha.”