Read bahnar Sa 14 Bible Online

Sa 14 - bahnar bible

Sa 14

¹'Nâu, năr Kră Yang truh boih, lu tơmam đơ̆ng lu iĕm tơtông gô klah asong.

²Thoi noh Inh gô akŭm đĭ-đăng dêh char gô tơblah hăm Jêrusalem păng pơlei tih đe gô iŏk, hnam akŭm đe gô tơgar iŏk, đe gô rôp pơgŏ, lăm minh puăt kon pơlei đe rôp pơm bơnă, mă-lei kon pơlei mă oei đei noh đe huay kơ pơrăm đơ̆ng lăm pơlei tih.

³Dang ei, Kră Yang gô năm blah hăm lu dêh char noh, kư̆m thoi sư đei blah boih lăm năr tơblah.

⁴Lăm năr noh; jơ̆ng Sư gô dơ̆ng kơpal kông ôliwơ, kông mă tơklă Jêrusalem gah hơlĕch; păng kông ôliwơ gô pơchah tŏk-bŏk, minh pah gah hơlĕch, minh pah gah bơmơ̆t, dĭng mah jing minh pôm thong jrŭ să; minh puăt kông noh hiŏng tơ gah gơal, minh puăt hiŏng gah yă-nơ̆m.

⁵Lu iĕm gô kơdâu ôn tơ lăm sơlŭng trôm kông, yua kơ sơlŭng noh să truh tơ Atsan, lu iĕm gô kơdâu ôn thoi đe kơdâu đơ̆ng teh tơdrŏ chăl Ôsia, pơtao đe Juđa. Dang ei Kră Yang 'Bok Kei-Dei inh gô truh, đĭ-đăng lu bơngai 'lơ̆ng rơgoh gô truh hơdai ih.

⁶Lăm năr noh ưh pă đei hơdah dơ̆ng, dôm lu chră hơdah gô jing iĕ, ưh kơ đei tơngiĕt dah prĕl jur mơ̆n.

⁷Noh jing minh năr Kră Yang đĕch băt; ưh kơ sĭ kơ'năr dah kơmăng, mă-lei dah kơsơ̆ truh boih gô đei hơdah.

⁸Lăm năr noh đak tơdrong arih gô lĕch ro đơ̆ng pơlei Jêrusalem, minh trong noh ro tơ đak dơsĭ gah hơlĕch, minh trong gô ro tơ dơsĭ gah bơmơ̆t, lăm bơyan 'mi hăm bơyan phang tă kơ đei ngăl.

⁹Kră Yang gô pơm Pơtao jơ̆p kơ teh đak; lăm năr noh, Kră Yang gô jing minh đĕch.

¹⁰Đĭ-đăng jơ̆p kơ teh đak gô jing teh dơhnă, iŏk đơ̆ng Gêba truh tơ Rimôn. Gah gơal kơ pơlei Jêrusalem, pơlei tih âu đe gô hơtŏk sư tơ anih sư, đơ̆ng 'măng jang Bênjamin truh tơ 'măng jang mă blŭng-a păng truh tơ 'măng jang mum, đơ̆ng hnam thôt Hananêl dĭng truh tơ anih pơtao hmĕt đak hơmu pơm sik.

¹¹Lu đe gô oei tơ noh, đe ưh pă hiap sư dơ̆ng, mă-lei Jêrusalem gô oei hiôk-hian.

¹²Đơ̆ng noh, 'nâu mă Kră Yang wă phak lu bơngai mă tơblah hăm Jêrusalem: Sư pơm ăn kơ jơ̆ng rim 'nu lu sư bluch kơplah lu sư oei dang dơ̆ng, klong măt lu sư gô ôm lăm măt, đơ̆ng noh hơpiĕt lu sư gô ôm lăm 'bơ̆r lu sư.

¹³Lăm năr noh, Kră Yang gô ăn tơdrong hli dêh truh tơ lu sư; yua kơ lu sư gô rôp băl ti tơduă lu sư păng ti bơngai âu gô tơblah hăm ti bơngai to.

¹⁴Juđa gô tơblah hăm Jêrusalem păng dôm tơmam đơ̆ng rim kơ dêh char gô pơpôi akŭm đĭ tơ noh; hu maih păng lu ao tai hơ'bơ̆l lơ tơpă.

¹⁵Păng kư̆m đei toi truh tơ lu aseh, lu lăk-đa, aseh bri păng đĭ-đăng lu kon sem dơrong lăm kơđông linh, tă kơ đei toi thoi noh.

¹⁶Đei tơdrong truh kơ đĭ-đăng lu bơngai mă oei đei lăm jơ̆p kơ dêh char gô tŏk blah Jêrusalem, gô tŏk tơ noh rim sơnăm wă kơkuh 'bơ̆t anăp pơtao, noh boih Kră Yang Tih Hloh păng kư̆m năm kơ năr giĕng bơsŭn.

¹⁷Lăm lu adrĕch adrung kon bơngai kơpal teh, lu đe mă ưh kơ đei tŏk tơ pơlei Jêrusalem wă năm kơkuh kơ pơtao, wă khan Kră Yang Tih Hloh, 'mi ưh kơ đei truh tơ lu sư.

¹⁸Tơdah lu adrĕch adrung bơngai Êyiptơ ưh kơ tŏk dah ưh kơ truh tơ noh, na 'mi kư̆m ưh kơ truh tơ lu sư; păng lu sư gô lôch hơbuh 'nâu, noh toi mă Kră Yang yua wă phak lu dêh char mă ưh kơ tŏk tơ pơlei Jêrusalem wă kơkuh năr giĕng bơsŭn.

¹⁹Noh tơdrong phak đe Êyiptơ păng tơdrong phak lu dêh char mă kuă tŏk kơkuh năr giĕng bơsŭn kư̆m thoi noh.

²⁰Lăm năr noh, gô chhơ̆ chư tơ krĕng-nĕng aseh thoi âu: “'LƠ̆NG RƠGOH KƠ KRĂ YANG!” Lu gŏ lăm hnam Kră Yang gô nhen thoi lu pơnhan kơpal gơ'bang soi.

²¹Dôm lu gŏ lăm pơlei Jêrusalem păng lăm Juđa gô jing rơgoh ăn kơ Kră Yang Tih Hloh; wă kơ đĭ-đăng lu bơngai pơyơ̆r tơmam soi kơ Kră Yang truh, iŏk gŏ noh na pai păng lăm năr noh, gô ưh pă đei minh 'nu bơngai Kanaana lăm hnam Kră Yang Tih Hloh.