Read bahnar Sa 8 Bible Online

Sa 8 - bahnar bible

Sa 8

¹Đei dơ̆ng nơ̆r Kră Yang Tih hloh khan kơ inh thoi âu:

²Kră Yang Tih Hloh khan: “Inh hil gar Siôn hăm tơdrong Inh gar kơtang, đêl inh gar boih sư hăm tơdrong hil mĭl.”

³Kră Yang Tih Hloh khan: “Inh wih dơ̆ng tơ Siôn păng inh gô oei tơ Jêrusalem; Jêrusalem đe gô krao sư pơlei sĭt tơpăt; kông Kră Yang Tih Hloh gô krao kông Rơgoh.”

⁴Kră Yang Tih Hloh khan thoi âu: “Gô oei đei lu 'bok kră yă kră oei tơ rok trong pơlei Jêrusalem, bu bu kư̆m tă kơ chĕp 'long jra ngăl, yua kơ kră boih.

⁵Lu trong tih lăm pơlei gô 'bĕnh kơ lu bơngai drŏ-nglo drŏ-kăn ngôi chơt lăm noh.”

⁶Kră Yang Tih Hloh khan thoi noh: “Lăm lu năr noh mă khan măt lu kon pơlei mă oei arih lăng hlĭch hlăch ră, mă-lei măt inh ưh kơ hlĭch?” Kră Yang Tih Hloh khan thoi noh.

⁷Kră Yang Tih Hloh khan thoi âu: “'Nâu Inh gô dŏng pơklaih kon pơlei Inh đơ̆ng gah hơlĕch gah bơmơ̆t,

⁸păng ba lu sư brŏk, lu sư gô oei tơ lăm Jêrusalem, jing kon pơlei Inh, gah Inh jing Kră Yang 'Bok Kei-Dei lu sư lăm tơdrong sĭt păng tơpăt.”

⁹Kră Yang Tih Hloh khan thoi âu: “Ơ lu iĕm jơ̆ bơngai mă kơtơ̆ng năr 'nâu, kơtơ̆ng dôm lu nơ̆r noh đơ̆ng lu bơngai khan lê̆ adrol lăm năr mă hnam akŭm Kră Yang Tih Hloh đei pơdơ̆ng pơjing boih, na lu iĕm pơm bĕ kơ ti lu iĕm jing pran.

¹⁰Yua kơ tơbăt lê̆ adrol kơ lu năr noh đe ưh kơ apah ôh dôm tơdrong kon bơngai jang lu kon sem dơrong jang; păng yua kơ lu ayăt, na ưh kơ đei tơdrong hiôk rơnŭk kơ lu bơngai lĕch dah lu bơngai mơ̆t; yua kơ Inh đei pơm ăn boih kơ kon bơngai rim 'nu tơblah tơduă hăm lu rông 'bôt sư kơdih.

¹¹Mă-lei dang ei Inh ưh kơ ăn ôh lu bơngai mă oei lăm lu kon pơlei 'nâu thoi adrol.” Kră Yang Tih Hloh khan thoi noh.

¹²“Yua kơ tơ noh gô đei găr adrĕch hiôk-hian; tơm hơmu gô đei plei păng teh gô jing mơ̆r chăt lu tơmam sa, đơ̆ng plĕnh gô đei tŭk jur, Inh gô pơm kơ lu kon pơlei mă oei oei âu gơh yua dôm tơdrong noh.

¹³Ơ hnam Juđa păng hnam Isơrael! Gô đei tơdrong thoi đe hiap iĕm lăm teh đak thoi yơ, na Inh gô dŏng pơklaih lu iĕm păng lu iĕm gô đei tơdrong pŭn hiôk thoi noh. Lu iĕm 'nĕ kơ hli mă-lei ti iĕm athei pran kơtang.”

¹⁴Yua kơ Kră Yang Tih Hloh khan: “Thoi Inh đei ăn tơdrong răm tơ lu iĕm, kơplah lu 'bok yă iĕm pơm tơblĕk Inh, Inh đei pơkă boih wă phak lu iĕm, Inh ưh kơ lê̆ ôh.” Kră Yang Tih Hloh khan thoi noh,

¹⁵“na năr 'nâu kư̆m lei-lăi, Inh pơkă wă pơm 'lơ̆ng kơ pơlei Jêrusalem păng hnam Juđa: Lu iĕm 'nĕ kơ hli!

¹⁶'Nâu tơdrong lu iĕm athei pơm: Athei pơma tơpăt dih băl, arih hiôk chơt hăm rông 'bôt, athei sek tơlang mă tơpăt hơnơ̆ng.

¹⁷'Nĕ chă tơdrong kơnê̆ lăm jơhngơ̆m 'nĕ kơ tơhil hăm lu rông 'bôt; păng 'nĕ kơ pơma hơlĕnh, yua kơ noh jơ̆ tơdrong mă Inh areh.” Kră Yang khan thoi noh.

¹⁸Đơ̆ng noh, đei nơ̆r đơ̆ng Kră Yang Tih Hloh khan kơ inh:

¹⁹Kră Yang Tih Hloh đei khan thoi âu: “Tơdrong ơ̆t kơ sŏng sa lăm khei puăn păng tơdrong ơ̆t kơ sŏng sa lăm khei pơđăm, tơdrong ơ̆t kơ sŏng sa lăm khei tơpơh, tơdrong ơ̆t kơ sŏng sa lăm khei mơjĭt noh gô đei tơdrong chơt hiôk, 'nă hal păng et sa chơt hiôk kơ hnam Juđa. Thoi noh hưch hanh bĕ tơdrong tơpăt păng chơt hiôk.”

²⁰Kră Yang Tih Hloh khan thoi âu: “Gô đei lơ lu kon pơlei păng lu kon pơlei nai mă oei tơ lăm pơlei tih gô truh;

²¹păng gô đei kon pơlei 'nâu năm tơ pơlei nai păng khan thoi âu: ‘Bĕ lu bơ̆n yak mă kuăng, wă kơ apinh tơdrong mơnat đơ̆ng Kră Yang păng chơchă Kră Yang Tih Hloh; inh kư̆m gô năm.’

²²Thoi noh đei lơ kon pơlei păng lu adrĕch adrung lăm teh đak pran kơtang gô năm chă Kră Yang Tih Hloh tơ pơlei Jêrusalem păng apinh tơdrong mơnat đơ̆ng Kră Yang tơ noh.”

²³Kră Yang Tih Hloh khan thoi âu: “Gô đei mơjĭt 'nu đơ̆ng rim nơ̆r pơma păng rim kơ dêh char, rôp kơjăp ao minh 'nu bơngai Juđa păng khan: Ăn kơ nhôn năm hơdai ih, yua kơ nhôn kơtơ̆ng Kră Yang oei hơdai ih.’ ”