Read bahnar Sa 9 Bible Online

Sa 9 - bahnar bible

Sa 9

¹Tơdrong đơ̆ng âu tơ anăp kơ kon bơngai isơrael Nơ̆r Kră Yang hil kơ char Hadrak, sư gô oei tơ pơlei Đamas. Yua kơ măt bơngai Isơrael păng đĭ-đăng kon bơngai tă kơ lăng tơ Kră Yang ngăl.

²Nơ̆r noh kư̆m pơma kơ Hamat, tơring jê̆ pơlei Đamas, tơ gah Tirơ păng Siđôn, yua kơ lu pơlei noh tih hlôh wao,

³yua kơ tơ Tirơ đei man boih minh pôm kơđông kơjăp kơ sư kơdih păng mong jên hu thoi 'mui teh, maih se thoi rơpŭk rok trong.

⁴'Nâu Kră Yang gô iŏk pơdrâu lê̆ mŭk drăm sư păng gô klơ̆m lê̆ tơdrong mơdrŏng sư tơ lăm đak dơsĭ, na ŭnh sa goh.

⁵Pơlei Askalon gô 'bôh păng hli; Gasa kư̆m 'bôh păng jĭ lăm jơhngơ̆m ưh kơ sŭk; pơlei Ekrôn kư̆m lei-lăi, yua kơ dôm tơdrong sư chang hơmĕng gô hiong tôch; pơtao pơlei Gasa đe gô pơlôch păng pơlei Askalon gô pă đei kon pơlei oei.

⁶Bơngai tơmoi gô oei lăm pơlei Asdôt; Inh gô tơhiong lê̆ tơdrong pơang lu bơngai Philistin.

⁷Mă-lei Inh gô iŏk pham đơ̆ng 'bơ̆r sư păng tơdrong kơnê̆ đơ̆ng lăm hơnĕnh lu sư; lu khŭl sư mă oei đei gô jing khŭl Kră Yang 'Bok Kei-Dei lu bơ̆n, sư kư̆m thoi yŏng kơdră adrĕch Juđa păng Ekrôn thoi bơngai Jêbus.

⁸Inh gô war bơwei tăp dăr kơ hnam Inh, tơblah hăm lu linh, wă ưh kơ đei bu mơ̆t lĕch. Lu bơngai pơgô̆ đe ưh pă đei pơgô̆ boih, yua kơ dang ei măt Inh lăng bơwei sư.

⁹Ơ kon drŏ-kăn Siôn chơt hiôk bĕ đĭ-đăng! Ơ kon drŏ-kăn Jêrusalem, jreo tơkĕch chơt hiôk bĕ! 'Nâu, pơtao lu iĕm truh tơ lu iĕm boih, Sư jơ̆ tơpăt ăn tơdrong dŏng pơklaih, iŏk đon ala hao aseh iĕ, wă khan kon aseh yŏng.

¹⁰Inh gô pơrăm lu gre aseh đơ̆ng Êphraim păng aseh đơ̆ng Jêrusalem; hră mă đe tơblah Inh gô gơ̆ lê̆ păng Sư gô sơkat ăn pŭn hiôk kơ adrĕch kon bơngai; tơdrong mơsêh Sư truh tơ jơ̆p lăm đak dơsĭ âu truh tơ dơsĭ to, đơ̆ng glung tih truh tơ tôch kơ teh đak.

¹¹“Gah ih kư̆m lei-lăi, yua kơ đơ̆ng pham tơdrong Inh pơgơ̆p hăm ih, na Inh gô pơklaih lu bơnă đơ̆ng sơlŭng mă ưh kơ đei đak.

¹²Ơ lu bơngai bơnă mă đei tơdrong gơnang chang gô, brŏk bĕ tơ anih kơjăp, lăm năr âu boih inh khan gô pơm 'mong ăn kơ ih hloh 'bar wơ̆t dơ̆ng.

¹³Inh gô gŭt Juđa thoi hră păng Êphraim jing 'brơ̆m sư; Inh gô pơdrŭt lu kon drŏ-nglo ih, ơ Siôn, tơblah hăm lu kon drŏ-nglo ih, ơ char Grĕk; Inh gô yua lu iĕm thoi đao lu bơngai tơblah.”

¹⁴Dang ei Kră Yang gô tơ'bôh kơ lu sư, 'brơ̆m sư prah thoi kơmlat; Kră Yang gô hlôm keng păng năm hơdai hăm kial hơbŭt gah gơal,

¹⁵Kră Yang Tih Hloh gô tơgŭm dŏng lu sư, lu sư gô pơrăm hăm jei kơplah klơ̆m tơmo, lu sư gô huch suai ôr tơjrông tơjrang đơ̆ng sik hơmu pơm kơ lu sư, lu sư phĭ hrăp thoi pơnhan thoi đe hling tơ lu mum jơ̆ng gơ'bang soi.

¹⁶Lăm năr noh, Kră Yang 'Bok Kei-Dei lu sư gô dŏng pơklaih lu kon pơlei sư thoi lu triu, kư̆m thoi minh tơmo gĭt lăm môk pơtao gô pơchrang kơpal teh.

¹⁷Tơdrong sư pơm 'lơ̆ng rai 'lơ̆ng dêh tơpă! Sik 'ba mi gô pơm ăn kơ lu bơngai tơdăm rai pran păng sik 'nao gô pơm ăn kơ lu adruh hơlai đei pŭn hiôk.