Read bahnar Mal 1 Bible Online

Mal 1 - bahnar bible

Mal 1

¹Nơ̆r Kră Yang pơma kơ lu bơngai Isơrael đơ̆ng Malachi chih.

²Kră Yang đei khan: “Inh 'mêm kơ lu iĕm;” păng lu iĕm đei khan: “Ih 'mêm kơ lu nhôn thoi yơ?” Kră Yang khan: “Êsâu hăm trŏ kơ 'nhŏng Jakôp dah ưh?

³Mă-lei Inh 'mêm kơ Jakôp areh kơ Êsâu, Inh pơm ăn kơ lu bri kông sư jing juơ păng jao mŭk tơmam sư ăn kơ lu kŏ bri tơ lăm char 'blach sa.”

⁴Tơdah bơngai Eđôm khan thoi âu: “Lu bơ̆n đe pơrăm đĭ boih, mă-lei lu bơ̆n gô brŏk pơjing dơ̆ng dôm lu anih đêl đe pơrăm,” thoi noh Kră Yang Tih Hloh khan: “Lu sư gô pơdơ̆ng ming, mă-lei Inh gô tơlơ̆ lê̆, dĭng mah đe krao anăn lu sư dêh char kơnê̆ păng jing kon pơlei pơla mă Kră Yang hil areh ling-lang.”

⁵Lu iĕm gô 'bôh tơm măt păng lu iĕm gô khan thoi âu: “Ư-ang kơ Kră Yang Tih Hloh mơ̆n 'nguaih kơ lăm Isơrael!”

⁶“Kon drŏ-nglo kơkuh pơyom kơ 'bă sư, đĭch đam hli yom kơ yŏng tơ'ngla sư. Thoi noh tơdah Inh jing 'Bă iĕm, lei tơdrong lu iĕm kơkuh pơyom kơ Inh? Păng tơdah Inh jing yŏng tơ'ngla, lei lu sư hli yom kơ Inh tơ yơ?” Kră Yang Tih Hloh khan kơ lu sư thoi noh. “Ơ lu 'bok soi pơdê anăn Inh!” Lu iĕm đei khan: “Tơ yơ nhôn đei pơdê anăn Ih?”

⁷“Lu iĕm pơyơ̆r tơmam 'mê̆-'mach tơ gơ'bang soi Inh, đơ̆ng noh lu iĕm khan: ‘Lu nhôn pơm kơnê̆ 'mê̆-'mach kơ Ih tơ yơ?’ Noh mă tơdrong lu sư khan: ‘Gơ'bang Kră Yang trŏ kơ pơdê.’

⁸Kơplah lu iĕm pơyơ̆r tơmam soi păng sem dơrong măt tol, tơdrong noh ưh kơ trŏ krưp dêh tơpă hă? Kơplah iĕm pơyơ̆r tơmam soi hăm sem dơrong jơ̆ng jo dah jĭ, tơdrong ưh kơ trŏ krưp dêh hă? Lu iĕm pơlong pơyơ̆r lăng kơ yŏng tơ'ngla iĕm thoi noh lăng sư hăm lăp đon kơ iĕm ưh?” Kră Yang Tih Hloh khan thoi noh.

⁹“Lu iĕm đei pơm boih tơdrong noh, liơ Sư sơng iŏk minh 'nu lăm lu iĕm? 'Nâu dang ei Inh athei iĕm apinh bĕ tơdrong mơnat đơ̆ng Kră Yang 'Bok Kei-Dei, wă kơ Sư mơnat ăn,” Kră Yang Tih Hloh khan thoi noh.

¹⁰“Hơpơi rŏ kơ đei minh 'nu lăm lu iĕm tang 'măng, wă kơ lu iĕm huay tơ̆k ŭnh tơdrong kơđei tơ kơpal gơ'bang soi Inh,” Kră Yang Tih Hloh khan thoi noh. “Inh ưh kơ đei jơhngơ̆m hiôk lăp đon kơ lu iĕm păng Inh ưh kơ wă đei iŏk minh tơmam soi pơyơ̆r kiơ đơ̆ng ti lu iĕm.

¹¹Iŏk đơ̆ng măt 'năr lĕch truh tơ măt 'năr mơ̆t, yua kơ anăn Inh jing tih tơpă tơ lăm adrĕch adrung kon bơngai. Tơ lăm jơ̆p-jang anih, đe gô pơyơ̆r 'long 'bâu phu păng tơmam soi 'lơ̆ng rơgoh kơ anăn Inh; yua kơ anăn Inh gô jing tih tơpă tơ lăm adrĕch adrung nai.” Kră Yang Tih Hloh khan thoi noh.

¹²Mă-lei lu iĕm pơma kơnê̆ 'mê̆ brư̆ kơ anăn Inh boih khan: “Gơ'bang soi Kră Yang 'mê̆-'mach, tơmam soi kơpal gơ'bang noh trŏ kơ pơjăm.”

¹³Lu iĕm đei khan dơ̆ng thoi âu: “Ô! Tơdrong jang gleh dêh pă băt dang yơ! Na lu iĕm pơdê sư.” Kră Yang Tih Hloh khan thoi noh. “Lu iĕm năm pơyơ̆r tơmam đơ̆ng iĕm tơtông păng lu kon sem dơrong jo, jĭ na mă năm pơyơ̆r kơ Inh. Inh hăm đei iŏk tơmam âu đơ̆ng ti lu iĕm ưh?” Kră Yang khan thoi noh.

¹⁴“Lu bơngai hơlĕnh noh trŏ kơ hil mĭl păng hiap tơpă, lăm khŭl sem dơrong noh đei kon tơno 'lơ̆ng, mă-lei lu sư pơkă wă pơyơ̆r ăn kơ Kră Yang na iŏk kon sem jo jăn pơm tơmam soi. Yua kơ Inh Pơtao tih, anăn Inh trŏ kơ hli yom tơ lăm đĭ adrĕch adrung kon bơngai.” Kră Yang Tih Hloh khan thoi noh.