Read bahnar Mat 12 Bible Online

Mat 12 - bahnar bible

Mat 12

¹Kơplah noh lăp truh năr giĕng đe Juđê mă đe anăn năr Sa'bat, Yêsu păng lu bơngai pơhrăm păng Sư drong mơ̆t tơ mir, lu bơngai pơhrăm păng Sư pơngot na lu sư broch găr 'ba kăp sa ngôi.

²Lu bơngai Pharisi 'bôh thoi noh na khan kơ Yêsu: “Ih lăng, lu bơngai pơhrăm păng Ih pơm ưh kơ trŏ lăm năr pơdơh, năr pơdơh khan jang.”

³Yêsu khan kơ lu bơngai Pharisi: “Iĕm tam biơh đŏk lăng lăm hla bơar tơdrong pơtao Đawit ôh hă? Sơ̆ sư kư̆m pơm ưh kơ trŏ kơ tơdrong juăt mơ̆n, sư păng bôl sư pơngot ưh kơ đei tơmam sa.

⁴Lu sư mơ̆t tơ hnam 'Bok Kei-Dei tơm. Đawit sư ưh kơ pơm 'bok soi ră, mă-lei sư gơh iŏk sa 'bĕng đe pơyơ̆r kơ 'Bok Kei-Dei mơ̆n. 'Bĕng đe pơyơ̆r kơ 'Bok Kei-Dei pôm lu 'bok soi đĕch gơh iŏk sa, mă-lei lu bôl Đawit gơh iŏk sa mơ̆n.

⁵“Bĭ iĕm tam biơh đŏk lăng tơdrong juăt 'Bok Kei-Dei ôh hă? Rim năr pơdơh Sa'bat lu 'bok soi kư̆m pơm ưh kơ trŏ kơ tơdrong juăt thoi iĕm khan 'noh mơ̆n. Rim năr pơdơh Sa'bat lu sư jang tơdrong 'Bok Kei-Dei tơ lăm hnam akŭm tơm. Mă-lei, mă đe 'bôh, ưh kơ đei bu khă khan kơ̆m ôh, yua kơ trŏ kơ tơdrong jang lu sư.

⁶Inh khan kơ iĕm tơpă, tơdrong jang Inh kăl hloh kơ tơdrong jang đe noh jang lăm hnam akŭm.

⁷Lăm sơ̆p hla bơar 'Bok Kei-Dei khan sơ̆ thoi âu: ‘Tơdrong iĕm soi sơmah kơ Inh ưh kơ kăl ôh, Inh wă kơ iĕm 'mêm mơnat dih băl 'noh kăl hloh kơ tơdrong iĕm soi sơmah kơ Inh.’ ” Yêsu khan dơ̆ng: “Dah iĕm hlôh tơdrong noh, lei iĕm ưh kơ đei jô̆ kơ lu bơngai 'lơ̆ng pơm yoch ôh.

⁸Inh Kon Bơngai, Inh gơh tơblang ăn kơ iĕm tơdrong kơ̆m lăm năr pơdơh Sa'bat.”

⁹Yêsu brŏk đơ̆ng noh năm akŭm tơ hnam akŭm lu bơngai Pharisi ei.

¹⁰Lăm hnam akŭm noh đei minh 'nu bơngai ti kue minh pah, na lu sư răp lăng Yêsu hăm ming pơklaih ti sư dah ưh, yua kơ năr noh năr pơdơh Sa'bat. Dah Sư pơklaih lei lu sư wă jô̆ Sư bơngai yoch yua kơ lu sư khan lăm năr pơdơh Sa'bat ưh kơ gơh jang păng ưh kơ gơh pơklaih bơngai jĭ jăn ôh. Na lu sư jet Yêsu khan: “Kiơ̆ tơdrong juăt bơ̆n hăm gơh ming pơklaih đe jĭ jăn lăm năr pơdơh Sa'bat dah ưh?”

¹¹Yêsu khan kơ lu sư: “Dah iĕm đei minh pôm triu huŏng lăm sơlŭng đak kơplah lăm năr pơdơh Sa'bat iĕm jur iŏk sư hloi dah kiơ?

¹²Minh kơ̆l bơngai kăl hloh kơ minh pôm triu; thoi noh na tơdrong juăt bơ̆n mă lăm năr pơdơh Sa'bat gơh tơgŭm pơklaih bơngai jĭ jăn.”

¹³Đơ̆ng noh na Yêsu khan kơ bơngai ti kue: “Chro ti ih bĕ.” Na bơngai ti kue ei chro ti sư klaih hloi thoi ti 'lơ̆ng.

¹⁴Lu khŭl Pharisi noh lĕch đơ̆ng hnam akŭm noh năm pơđâu chă tơdrong wă kơ gơh rôp pơlôch Yêsu.

¹⁵Yêsu băt thoi noh Sư lĕch đơ̆ng noh năm tơ nai, đei lơ bơngai kiơ̆ Sư; Sư kư̆m ming pơklaih đĭ-đăng lu bơngai jĭ jăn.

¹⁶Sư khă lu đe noh 'nĕ roi tơbăt anăn Sư kơ đe.

¹⁷Tơdrong noh 'blep trŏ thoi Êsai chih khan lê̆ hơdrol sơ̆ thoi âu:

¹⁸“'Bok Kei-Dei khan: ‘Âu boih đam Inh, Inh rơih iŏk Sư, Inh 'mêm kơ Sư tơpă, Inh lăp đon kơ Sư dêh. Inh gô ăn kơ Sư Yang Bơhngol Inh, Wă bơtho tơbăt ăn kơ đĭ-đăng khŭl bơngai gah tơdrong Inh wă sek tơlang ning-mônh.

¹⁹Mă-lei Sư ưh kơ chă pơjah pơjăng hăm đe, ưh kơ pơma pơret ôh, Kư̆m ưh kơ bơtho đe tơ anih kư̆ kă rok trong dah rok cham kon pơlei wă kơ đe ư-ang kơ Sư ôh.

²⁰Sư bơngai dim khôn dêh. Mă đe lui rơdu dang hla 'long wă jê̆ hơlŭng, Sư ưh kơ phĕ tŭk ôh; Mă đe lui rơdu dang ŭnh kơđeng wă jê̆ păt, Sư kư̆m ưh kơ pĭt tŭk ôh; Sư kư̆ kơ jang truh tơ kon bơngai pơm 'lơ̆ng tơpăt dih băl.

²¹Đĭ-đăng khŭl kon bơngai gơnêh gơnơm sơđơ̆ng kơ Sư tơgŭm.’ ”

²²Kơplah noh đe năm ba tơ Yêsu minh 'nu bơngai măt tol păng sư kư̆m kơmlo yua kơ yang kơnê̆ pơm kơ sư. Na Yêsu pơpuh yang kơnê̆ lĕch đơ̆ng akâu bơngai noh na bơngai noh gơh 'bôh hơdah păng gơh pơma.

²³Lu bơngai tơpôl lăng hlĭch na chă tơkhan dih băl: “Băt 'Bok âu boih kơlĕ, đe khan Sư Kon Sâu 'bok pơtao Đawit đơ̆ng 'Bok Kei-Dei ăn pơm pơtao bơ̆n?”

²⁴Lu bơngai Pharisi kơtơ̆ng thoi noh, lu sư khan: “'Noh đơ̆ng yang Belsêbul yŏng yang kơnê̆ tơgŭm Sư na Sư gơh pơpuh lu yang kơnê̆ noh.”

²⁵Yêsu băt kơ lu sư tơchĕng thoi noh na Sư khan: “Dah minh pôm teh đak tơblah dih băl, teh đak noh gô pơchah hiong tôch. Dah minh pôm pơlei dah minh pôm hnam dơnŏ tơblah dih băl, pơlei dah hnam dơnŏ noh gô hiong hiach.

²⁶Thoi noh dah yŏng pơgơ̆r yang kơnê̆ tơblah tơduă yang kơnê̆, dôm tơdrong sư pơgơ̆r gô hiong tôch.

²⁷Na lơliơ iĕm khan đơ̆ng yang Belsêbul khŭl yang kơnê̆ ăn kơ Inh gơh pơpuh yang kơnê̆? Lei bĭ buăl iĕm gơh pơpuh yang kơnê̆ noh lu sư gơh đơ̆ng yơ? Đơ̆ng yang noh mơ̆n dah đơ̆ng yơ? Bơ̆n băt kơ đơ̆ng 'Bok Kei-Dei tơgŭm lu sư ngăl. Thoi noh na lu buăl iĕm kư̆m băt kơ iĕm pơma kơ Inh kư̆ kă đĕch.

²⁸Mă tơpă đơ̆ng Yang Bơhngol 'Lơ̆ng 'Bok Kei-Dei ăn kơ Inh, na Inh gơh pơpuh yang kơnê̆. Thoi noh na iĕm 'bôh ră 'Bok Kei-Dei wă pơgơ̆r tơ ala teh âu boih, mă-lei iĕm ưh kơ băt ôh.

²⁹Ưh kơ đei bu gơh mơ̆t tơtông tơmam bơngai pran, dah ưh kơ chô̆ jơ̆ng ti sư hơdrol; đe chô̆ jơ̆ng ti sư hơdrol 'mơ̆i na gơh mơ̆t tơtông tơmam sư lăm hnam. Na Inh tơblah hăm yŏng yang kơnê̆ kư̆m thoi noh mơ̆n.

³⁰“Iĕm kơchăng hŏ, bu ưh kơ wă kiơ̆ Inh, sư dang ayăt kơ Inh; bu ưh kơ pôm đon hăm Inh, sư gô tơklah tơklang.

³¹Thoi noh na Inh khan kơ iĕm thoi âu: Mă dôm tơdrong yoch, mă dôm 'măng pơjăm 'Bok Kei-Dei, dah bơ̆n apinh Sư 'nĕ jô̆ yo, 'Bok Kei-Dei huay kơ jô̆ yo ôh, Sư oei tơgŭm pơklaih đĕch. Mă-lei dah bu pơjăm Yang Bơhngol 'Lơ̆ng Sư, 'Bok Kei-Dei ưh pă wă pơklaih bơngai mă pơjăm Yang Bơhngol 'Lơ̆ng Sư ôh.

³²Bu pơjăm Inh Kon Bơngai, 'Bok Kei-Dei kư̆m huay kơ jô̆ yo kơ sư ôh, Sư oei tơgŭm pơklaih đĕch. Mă-lei dah bu pơjăm Yang Bơhngol 'Lơ̆ng Sư, 'Bok Kei-Dei ưh pă wă pơklaih boih bơngai noh, mă đơ̆ng dang ei truh tơ ning-mônh.

³³“Iĕm băt boih, tơnơm 'lơ̆ng ling-lang pơjing plei 'lơ̆ng. Tơnơm kơnê̆ pơjing plei kơnê̆. Bơ̆n băt kơ 'long 'lơ̆ng dah ưh, bơ̆n lăng plei sư.

³⁴Iĕm âu bơngai dang 'bih, iĕm ưh kơ layơ wă pơma 'lơ̆ng 'biơ̆ tŏ sĕt, yua kơ iĕm bơngai kơnê̆ dêh. Lăm to iĕm tơchĕng thoi yơ, 'bơ̆r iĕm pơma kiơ̆ thoi noh mơ̆n.

³⁵Bơngai 'lơ̆ng, sư đei jơhngơ̆m 'lơ̆ng, sư pơma kiơ̆ 'lơ̆ng. Bơngai kơnê̆, sư đei jơhngơ̆m kơnê̆, sư pơma kiơ̆ kơnê̆.

³⁶Inh khan kơ iĕm tơpă, na mưh truh năr 'Bok Kei-Dei sek tơlang ning-mônh, Sư roi tôm dôm tơdrong 'bơ̆r iĕm pơma kơnê̆.

³⁷Dah 'bơ̆r iĕm pơma 'lơ̆ng, Sư kư̆m jô̆ iĕm bơngai 'lơ̆ng; dah 'bơ̆r iĕm pơma kơnê̆, Sư kư̆m jô̆ iĕm bơngai kơnê̆.”

³⁸Klaih kơ noh lu thây bơtho tơdrong juăt đe Juđê păng lu khŭl Pharisi apinh Yêsu khan: “Ơ 'Bok Thây, nhôn wă kơ 'bôh Ih pơm tơdrong mơsêh 'mơ̆i na nhôn băt kơ Ih bơngai đơ̆ng 'Bok Kei-Dei.”

³⁹Yêsu khan: “Jơhnơr iĕm ahrei kơnê̆ dêh, na mă kuă kơ lui kơ 'Bok Kei-Dei. Iĕm pơm pơlong Inh tơ'bôh kơ iĕm tơdrong mơsêh wă kơ iĕm băt kơ Inh đơ̆ng 'Bok Kei-Dei tơpă dah ưh. Mă-lei Inh ưh kơ wă pơm tơdrong mơsêh thoi iĕm apinh noh ôh. Bĭ tơdrong Jôna sư bơngai pơtruh nơ̆r 'Bok Kei-Dei sơ̆, na ka luăn sư pêng măng pêng năr, noh kư̆m dang pơm tơdrong mơsêh tơ'bôh kơ iĕm boih.

⁴⁰Jôna sơ̆ sư oei lăm klak ka tih pêng măng pêng năr, na Inh Kon Bơngai gô oei lăm trôm teh pêng măng pêng năr kư̆m thoi noh mơ̆n.

⁴¹Truh năr 'Bok Kei-Dei sek tơlang ning-mônh lu kon pơlei Ninêwơ jô̆ kơ lu jơhnơr iĕm dang ei bơngai yoch tih, yua kơ lu sư kơtơ̆ng Jôna bơtho athei tơbral kơdih tơdrong yoch, lu sư tơbral hloi, mă-lei iĕm âu đei bơngai bơtho hơgei hloh kơ Jôna ră pơm kuă kơ tơbral kơdih tơdrong yoch.

⁴²Truh năr 'Bok Kei-Dei sek tơlang ning-mônh kư̆m đei minh 'nu yă pơtao đơ̆ng dêh Sêba wang jô̆ kơ lu jơhnơr iĕm dang ei bơngai yoch, yua kơ sơ̆ sư đơ̆ng dêh ataih kư̆m adrin năm mơ̆ng pơtao Sôlômôn bơtho, mă-lei iĕm âu đei bơngai bơtho hơgei hloh kơ pơtao Sôlômôn bơtho ră pơm kuă kơ tơbral kơdih tơdrong yoch.

⁴³“Pơtih gia yang kơnê̆ lĕch đơ̆ng akâu bơngai, năm tơ char glă, sư chă anih pơdơh ră, sư chă ưh kơ đei.

⁴⁴Na sư tơchĕng khan: ‘Inh brŏk oei tơ bơngai đêl inh oei ki đĕch.’ Lăp sư brŏk, sư 'bôh bơngai đêl sư oei noh thoi hnam đe sơpuih hơmet lê̆ 'lơ̆ng boih mă-lei ưh kơ đei Yang Bơhngol 'Lơ̆ng oei.

⁴⁵Na sư năm chă pơtơm buăl sư tơpơh 'nu mă kơnê̆ hloh kơ sư dơ̆ng mơ̆t oei tơ bơngai noh; na bơngai noh sư jing pơmat hloh kơ minh 'nu yang kơnê̆ mơ̆t ki. Na lu bơngai kơnê̆ jơhnơr ahrei kư̆m thoi noh mơ̆n, yua kơ lu sư ưh kơ wă lui kơ Inh.”

⁴⁶Kơplah Yêsu oei bơtho lu đe ei, na đei oh Sư hăm mĕ Sư dơ̆ng tơ 'ngoaih chă Sư wă pơma dơnuh.

⁴⁷Na đe khan kơ Sư: “Mĕ Ih hăm oh Ih dơ̆ng 'bơ̆t 'ngoaih hnam to chă Ih.”

⁴⁸Yêsu khan: “Bu mĕ Inh hăm oh Inh ei?”

⁴⁹Yêsu tơhlâu tơ'bôh kơ lu bơngai mă kiơ̆ Sư, khan: “Lu bơngai âu dang mĕ Inh, 'nhŏng oh Inh.

⁵⁰Bu pơm kiơ̆ kơ 'Bă Inh mă oei tơ plĕnh ti, bơngai 'noh dang 'nhŏng oh Inh păng mĕ Inh.”