Read bahnar Mat 14 Bible Online

Mat 14 - bahnar bible

Mat 14

¹Kơplah noh pơtao Hêrôt kơtơ̆ng ang tơdrong mơsêh Yêsu. Pơtao Hêrôt kơplah noh sư pơgơ̆r dêh Galilê.

²Sư khan kơ lu jơ̆ng 'bang sư: “'Noh Yôhan bơngai mă pơm 'batem kơ đe, sư lôch boih na dang ei sư iung arih dơ̆ng. Thoi noh na sư gơh pơm tôm tơdrong mơsêh mơyang.”

³Sơ̆ pơtao Hêrôt wơh đe năm rôp chô̆ Yôhan tah tơ lăm hnam phak, yua kơ minh 'nu duch anăn sư Hêrôđia wă kơ thoi noh. Duch Hêrôđia ei akăn oh pơtao Hêrôt, anăn sư Philip. Mă-lei 'nhŏng sư Hêrôt tơgar iŏk akăn oh sư.

⁴Na Yôhan khan kơ Hêrôt: “Ih tơgar iŏk akăn oh ih ưh kơ trŏ ôh.”

⁵Yua kơ tơdrong noh na pơtao Hêrôt athei đe rôp tah Yôhan lăm hnam phak. Sư wă pơlôch kơplah noh hloi ră mơ̆n mă-lei sư ưh kơ pơ̆n, hli kơ lu kon pơlei pơla Juđê yua kơ lu bơngai Juđê băt kơ Yôhan bơngai pơtruh nơ̆r 'Bok Kei-Dei tơpă.

⁶Lăp trŏ năr đe tơpŭ kơ Hêrôt, đe sa et pơrŏ na kon adruh duch Hêrôđia mơ̆t suang tơ anih đe et sa, na pơtao Hêrôt lăp đon dêh.

⁷Na sư mah khan kơ adruh noh thoi âu: “Dah inh hơlĕnh mă 'Bok Kei-Dei phak inh, ih wă kơ kiơ inh kư̆m ăn.”

⁸Na mĕ sư athei kon sư apinh chơ̆ng kơ̆l Yôhan. Na adruh ei khan kơ pơtao: “Inh wă kơ ih chơ̆ng ăn kơ inh kơ̆l Yôhan 'măn 'bơ̆t pơnhan chhĕr dang ei hloi; bơngai mă pơm 'batem kơ đe, 'noh boih inh wă.”

⁹Lăp pơtao Hêrôt kơtơ̆ng thoi noh sư sơ'ngon dêh. Mă-lei đêl nơ̆r sư pơkă hơdrol mah hiap akâu sư kơdih 'bơ̆t anăp lu bơngai et sa, na sư ưh kơ gơh lê̆ ôh, sư hơloh athei lu linh sư năm chơ̆ng kơ̆l Yôhan tơ hnam phak na ăn kơ adruh noh.

¹¹Na linh ei năm chơ̆ng hloi ako Yôhan 'măn 'bơ̆t pơnhan chhĕr chĕp ba kơ adruh noh. Na adruh noh iŏk năm ăn kơ mĕ sư.

¹²Lu bơngai pơhrăm păng Yôhan năm iŏk akâu sư tung 'bŭ tơ bơsat. Đơ̆ng noh lu sư năm roi kơ Yêsu.

¹³Lăp Yêsu kơtơ̆ng tơdrong 'noh Sư lĕch hloi đơ̆ng hnam năm tơ thŏng-nan wơ̆r năm tơ anih kueng kơdrô̆. Lu pơlei kiơ̆ ei băt kơ Yêsu năm tơ anih noh boih na lu sư lĕch đơ̆ng pơlei noh yak jơ̆ng kiơ̆ Yêsu tơ anih kueng noh.

¹⁴Lăp Yêsu jur đơ̆ng thŏng-nan Sư 'bôh lơ bơngai kiơ̆ Sư na Sư mơnat dêh kơ lu bơngai noh, na Sư pơklaih hloi lu bơngai jĭ jăn.

¹⁵Lăp hiưp kơsơ̆ boih na lu bơngai pơhrăm păng Sư khan kơ Sư thoi âu: “Anih âu kueng chơngue dêh păng kơsơ̆ boih tăm. Ih kuă kơ kiơ athei lu sư năm chă răt kơdih tơmam sa kiơ̆ pơlei jê̆ âu 'biơ̆?”

¹⁶Na Yêsu khan kơ lu sư: “Ưh kơ kăl kơ năm răt tơmam sa tơ pơlei đe ôh, iĕm 'me sư wăi.”

¹⁷Lu sư khan: “Bơ̆n đei lăp pơđăm tŏ 'bĕng mi păng 'bar hlak ka, liơ gơh mah?”

¹⁸Yêsu khan: “Iĕm ba kơ Inh tơ âu.”

¹⁹Yêsu athei đĭ-đăng lu bơngai tơpôl ei tơoei kơpal 'nhĕt. Klaih kơ noh Sư iŏk pơđăm tŏ 'bĕng mi păng 'bar hlak ka ei ngoi tơ plĕnh krao khan bơnê kơ 'Bă Sư 'Bok Kei-Dei, na phĕ 'bĕng mi ăn kơ lu bơngai pơhrăm păng Sư chă asong kơ bôl buăl.

²⁰Đĭ-đăng lu bơngai sa 'bĕng mi ei phĭ mah rơkah rơkai boih. Đơ̆ng noh lu bơngai pơhrăm păng Sư chă dônh tah tơ bai mă đơ̆ng đêl lu sư sa rơkah, kư̆m mah oei 'bĕnh kơ mơjĭt-'bar tŏ bai plơ̆ng dơ̆ng.

²¹Lu bơngai mă sŏng sa ei pơđăm-rơbâu 'nu jô̆ gah bơngai drŏ-nglo đĕch, ưh kơ đei jô̆ drŏ-kăn păng hơ'lơ̆p ôh.

²²Klaih kơ noh Yêsu athei lu bơngai pơhrăm păng Sư hao thŏng-nan rai tŏk gô pah to đak dơsĭ Galilê păng Sư athei hloi lu bơngai tơpôl noh brŏk tơ anih hnam lu sư kơdih kơdih.

²³Đơ̆ng noh na Yêsu sơlah đơ̆ng lu bơngai tơpôl noh tŏk tơ kông kơdrô̆ wă krao khan kơ 'Bă Sư. Lăp 'năr mơ̆t măng mơt boih Sư oei tơ noh mơ̆n.

²⁴Gah lu bơngai pơhrăm păng Sư oei wơ̆r thŏng-nan tŏk-bŏk đak dơsĭ. Lu sư wơ̆r anat dêh yua kơ đak poh-yă păng kial tơhlu sơdrơ̆k.

²⁵Lăp tŏk-bŏk leng gong Yêsu jur đơ̆ng kông yak kơpal đak dơsĭ năm tơ lu bơngai pơhrăm păng Sư.

²⁶Lăp lu sư 'bôh Yêsu yak kơpal đak dơsĭ lu sư hli dêh, lu sư khan: “'Noh atâu boih.” Na lu sư ôr tơkĕch.

²⁷Mă-lei Yêsu thar khan kơ lu sư: “Iĕm 'nĕ pă hli, Inh âu lah.”

²⁸Pêtrôs khan kơ Sư: “Ơ 'Bok, tơ̆ng Ih tơpă lei Ih ăn kơ inh gơh yak kơpal đak năm tơ Ih.”

²⁹Na Yêsu khan: “Năm tơ âu wăi.” Na Pêtrôs jur hloi đơ̆ng thŏng-nan yak kơpal đak năm tơ Sư.

³⁰Pêtrôs sư hli kơ kial hơbŭt tih na akâu sư hiŭp hiŭp wă krăm hloi, na sư jah tơtom krao Yêsu khan: “Ơ 'Bok, hiot inh bĕ.”

³¹Yêsu thar tơkan rôp ti păng khan: “Liơ ih lui rơdu dêh, liơ ih ưh kơ lui ngeh kơ Inh?”

³²Klaih kơ noh bre Sư tŏk tơ thŏng-nan kial thĕng hloi ưh pă tơhlu dơ̆ng.

³³Lu bơngai pơhrăm păng Sư oei lăm thŏng-nan sơtơ̆p kŭl-tăng kơkuh kơ Sư păng khan: “Ih Kon 'Bok Kei-Dei tơpă.”

³⁴Lăp lu sư tŏk găn hlôi kơ đak dơsĭ boih, lu sư truh tơ tơring Gênêsaret.

³⁵Đe kơnăl hloi kơ Sư na đe năm chă roi jơ̆p-jang tơring ei athei anhăk ba lu bơngai jĭ jăn năm tơ Yêsu.

³⁶Lu đe ei apinh pel pôm tơdrơi ao Sư đĕch. Bu pel 'bơm tơdrơi ao Sư, klaih hloi kơ jĭ.