Read bahnar Mat 15 Bible Online

Mat 15 - bahnar bible

Mat 15

¹Đơ̆ng noh na lu bơngai Pharisi păng lu thây bơtho tơdrong juăt Juđê đơ̆ng Pơlei Jêrusalem năm tơ Yêsu. Lu sư jet Yêsu khan:

²“Yua kơ kiơ lu bơngai pơhrăm păng Ih ưh kơ kiơ̆ tơdrong juăt yă 'bok bơ̆n pơkă sơ̆, lu sư sŏng sa ưh kơ ôp ti?”

³Yêsu khan kơ lu sư: “Bĭ lei iĕm tŭk kơ kiơ tơdrong juăt 'Bok Kei-Dei pơkă jing kiơ̆ tơdrong juăt iĕm kơdih?

⁴'Bok Kei-Dei pơkă thoi âu: ‘Iĕm athei lui yom kơ mĕ 'bă păng dah bơngai bu pơma kơnê̆ kơ mĕ 'bă sư, athei pơlôch tŭk bơngai noh.’

⁵Gah lu iĕm khan: ‘Bơngai bu khan kơ mĕ 'bă sư khan: Mŭk tơmam inh wă 'me sa biĕm ră inh pơyơ̆r kơ 'Bok Kei-Dei đĭ boih,’

⁶na iĕm khan bơngai noh huay pă kăl kơ 'me rong mĕ 'bă sư dơ̆ng. Iĕm pơjing tơdrong juăt kơdih bơtho đe thoi noh na iĕm jing tŭk tơdrong juăt 'Bok Kei-Dei boih.

⁷Ơ lu bơngai 'bơ̆r đak klak ŭnh, Êsai chih nơ̆r 'Bok Kei-Dei khan lê̆ hơdrol sơ̆ thoi âu na 'blep kơ iĕm dang ei tơpă:

⁸‘Lu bơngai âu ư-ang kơ Inh păng 'bơ̆r đĕch, jơhngơ̆m klơm klak sư ataih đơ̆ng Inh.

⁹Lu sư kơkuh kơ Inh ưh kơ yua kiơ. Lu sư bơtho tơdrong ala teh; mă-lei khan tơdrong 'Bok Kei-Dei.’ ”

¹⁰Yêsu krao đĭ-đăng lu bơngai kiơ̆ ei na khan: “Apinh iĕm mơ̆ng Inh 'biơ̆ păng pơwao kơdih:

¹¹Dôm lu tơmam sa kon bơngai sa ưh kơ đei pơm kơ kon bơngai jing yoch ôh, tơdrong pơm yoch noh lĕch đơ̆ng 'bơ̆r kon bơngai na kon bơngai jing yoch.”

¹²Đang Yêsu pơma thoi noh boih na lu bơngai pơhrăm păng Sư năm khan kơ Sư: “Ih hăm băt lu bơngai Pharisi ơh kơ Ih pơma thoi noh hei?”

¹³Na Yêsu pơma pơjuang kơ lu bơngai ei thoi âu: “'Long kiơ 'Bă Inh tơ plĕnh ti ưh kơ đei pơtăm, 'long noh Sư buch tŭk pơđĭ.

¹⁴Na iĕm 'nĕ mah hiơ̆k tơdrong sư ơh noh, yua kơ lu sư bơngai bơtho đe ră mă-lei dang bơngai măt tol. Dah bơngai măt tol chông ba bôl sư măt tol bre sư nơnăm gô huŏng tơ sơlŭng đĕch ưh kơ yua kiơ kơ bre sư ôh.”

¹⁵Pêtrôs khan: “Apinh Ih tơblang kơ nhôn tơdrong Ih pơtih gia noh hei.”

¹⁶Yêsu khan kơ lu sư: “Iĕm kư̆m ưh kơ hlôh ôh hă?

¹⁷Đĭ dôm tơmam sa, bơ̆n sa mơ̆t lăm klak, klaih kơ noh lĕch đĭ.

¹⁸Pôm nơ̆r pơma đĕch, lĕch đơ̆ng jơhngơ̆m đon kon bơngai, na pơm kơ kon bơngai jing yoch.

¹⁹Yua kơ đơ̆ng jơhngơ̆m đon kon bơngai tơchĕng kơnê̆ na jing yoch: Sư pơlôch đe, kơtrŏ hăm akăn đe, sư pơm pơyô kư̆ kă, sư tơtông, sư oei pơma hơlĕnh, sư pơjăm pơjuă đe.

²⁰Tôm tơdrong kơnê̆ noh lĕch đơ̆ng jơhngơ̆m đon kon bơngai na jing yoch. Tơdrong iĕm sŏng sa ưh kơ ôp ti noh ưh kơ đei pơm kơ iĕm yoch ôh.”

²¹Đơ̆ng noh Yêsu năm tơ tơring Pơlei Tirơ hăm Pơlei Siđôn.

²²Đei minh 'nu drŏ-kăn bơngai Kanaan đơ̆ng tơring kiơ̆ ei năm tơ Yêsu apinh thoi âu: “Ơ 'Bok, Ih kon sâu Đawit mă 'Bok Kei-Dei wơh wă pơm pơtao kon bơngai. Dang ei inh apinh Ih mơnat kơ inh năm pơklaih kon adruh inh yang kơnê̆ mơ̆t, sư pơmat măng năr.”

²³Mă-lei Yêsu ưh kơ tơl sư. Na lu bơngai pơhrăm păng Sư khan kơ Sư thoi âu: “Apinh Ih jah tơgŭm sư, na sư jah brŏk, sư kiơ̆ bơ̆n nŏng kơ pơma 'bơ̆r re.”

²⁴Yêsu khan: “Liơ, 'Bok Kei-Dei wơh Inh wă kơ Inh tơgŭm lu bơngai Isơrael, yua kơ lu bơngai Isơrael thoi triu jrok trong, na iĕm khan wă kơ Inh tơgŭm sư?”

²⁵Na bơngai drŏ-kăn ei kơkuh 'nap 'bơ̆t anăp Sư păng khan: “Ơ 'Bok, apinh Ih mơnat tơgŭm inh 'biơ̆ bĕ.”

²⁶Yêsu khan: “Lu bơngai Isơrael dang kon Inh, dah Inh tơgŭm ih bơngai tơmoi, lei dang Inh klơ̆m tŭk tơmam sa kon Inh ăn kơ kŏ sa.”

²⁷Bơngai drŏ-kăn ei khan: “Ơ 'Bok, trŏ boih, mă-lei inh wă kơ Ih tơgŭm inh 'biơ̆, yua kơ phŏ phŏ inh kư̆m 'bôh kŏ năm alep sa đêl kon hơ'lơ̆p sa asĭ.”

²⁸Sư pơma trŏ thoi noh, na Yêsu khan: “Ơ yă, ih lui kơjăp tơpă. Tơdrong ih apinh noh gô đei kơ ih.” Kơplah noh kon adruh sư klaih hloi.

²⁹Đơ̆ng noh Yêsu năm tơ jih đak dơsĭ Galilê, đang ngôi kiơ̆ jih đak noh Sư tŏk tơ kông tơoei pơdơh ngôi 'biơ̆.

³⁰Mă-lei kư̆m đei lơ bơngai năm chă Sư anhăk lu bơngai kue jo, mơ'nah măt tol, mơ'nah kơmlo, lơlap lơlang bơngai jĭ jăn nai. Lu sư tơ'bĭch pơdă 'bơ̆t anăp Yêsu, na Yêsu tơgŭm pơklaih đĭ dôm lu bơngai jĭ jăn noh.

³¹Lu bơngai tơpôl ei 'bôh tơdrong noh hlĭch tơpă: Bơngai kơmlo mah gơh pơma, bơngai kue jo kư̆m klaih 'lơ̆ng, bơngai măt tol gơh 'bôh hơdah, na lu sư ư-ang kơ Kră Yang 'Bok Kei-Dei bơngai Isơrael juăt kơkuh đơ̆ng sơ̆.

³²Yêsu krao lu bơngai pơhrăm păng Sư na khan: “Inh mơnat kơ lu bơngai tơpôl âu dêh, oei hơdai bơ̆n pêng năr boih tơmam sa lu sư đĭ pă đei boih. Dah bơ̆n tơwih lu sư brŏk klak hoh Inh hli kơ lu sư rơmơ̆n rok trong.”

³³Lu bơngai pơhrăm păng Sư khan: “Thoi yơ bơ̆n gơh đei tơmam sa 'me lu sư yua kơ anih kueng chơngue thoi âu?”

³⁴Na Yêsu jet lu sư: “Iĕm đei dôm tŏ 'bĕng mi? Chĕp ba ăn kơ Inh tơ âu.” Lu sư khan: “Lăp tơpơh tŏ păng 'bar pêng găr ka.”

³⁵Yêsu athei lu bơngai tơpôl ei tơoei tơ teh.

³⁶Yêsu iŏk tơpơh tŏ 'bĕng mi păng 'bar pêng găr ka noh, krao khan bơnê kơ 'Bă Sư 'Bok Kei-Dei, phĕ hloi 'bĕng mi păng ka noh ăn kơ lu bơngai pơhrăm păng Sư chă asong kơ lu bơngai tơpôl ei.

³⁷Đĭ-đăng lu bơngai sŏng sa 'bĕng mi păng ka ei phĭ mah rơkah rơkai boih, na lu sư dônh tah tơ bai 'bĕnh tơpơh tŏ bai 'bĕng mi păng ka rơkah.

³⁸Lu bơngai mă sŏng sa ei puăn-rơbâu 'nu jô̆ gah drŏ-nglo đĕch, ưh kơ đei jô̆ drŏ-kăn păng hơ'lơ̆p ôh.

³⁹Đang lu sư sa phĭ boih na Yêsu athei lu bơngai tơpôl ei brŏk tơ hnam lu sư kơdih kơdih, na Yêsu tŏk thŏng-nan năm tơ tơring Magadan.