Read bahnar Mat 16 Bible Online

Mat 16 - bahnar bible

Mat 16

¹Khŭl Pharisi păng khŭl Sađusê năm apinh Yêsu pơm tơdrong mơsêh đơ̆ng plĕnh ti. Lu sư khan wă kơ băt Yêsu đơ̆ng 'Bok Kei-Dei tơpă dah ưh. Mă tơpă sư wă pơlong Yêsu hăm gơh pơm dah ưh.

²Na Yêsu khan kơ lu sư: “Lăp 'năr mơ̆t, iĕm 'bôh hơdah 'năr pơchrang hơmơ̆l 'brê, noh iĕm băt năr dơning 'năr wă tŏ hlăng prăng hiôk.

³Lăp 'năr wă lĕch, iĕm 'bôh 'năr pơchrang 'brê păng đei hơmơ̆l găm, noh iĕm kư̆m băt kơ 'năr wă 'mi. Iĕm kơnăl kơ plĕnh wă 'mi dah prăng ră mă-lei liơ iĕm pơm ưh kơ băt kơ 'Bok Kei-Dei wă pơgơ̆r lu iĕm dang ei?

⁴Jơhnơr iĕm ahrei kơnê̆ dêh, na mă kuă kơ lui kơ 'Bok Kei-Dei. Iĕm pơm pơlong Inh tơ'bôh kơ iĕm tơdrong mơsêh wă kơ iĕm băt Inh đơ̆ng 'Bok Kei-Dei tơpă dah ưh. Mă-lei Inh ưh kơ wă pơm tơdrong mơsêh thoi iĕm apinh noh ôh. Bĭ tơdrong Jôna sư bơngai pơtruh nơ̆r 'Bok Kei-Dei sơ̆, ka luăn sư pêng măng pêng năr, na ning-mônh 'Bok Kei-Dei kư̆m tơ'bôh kơ iĕm tơdrong mơsêh thoi noh mơ̆n, wă kơ iĕm băt Inh đơ̆ng Sư tơpă.” Đang kơ Sư pơma thoi noh Sư năm hloi tơ nai.

⁵Yêsu păng lu bơngai pơhrăm păng Sư tŏk thŏng-nan găn đak dơsĭ Galilê. Truh pah to boih na lu bơngai pơhrăm păng Sư 'blŏk kơ 'bĕng mi lu sư hiơt kơ chĕp.

⁶Yêsu khan kơ lu sư: “Iĕm athei kơchăng weh ataih kơ 'buih pông đe Pharisi păng đe Sađusê.”

⁷Lu bơngai pơhrăm păng Sư ưh kơ hlôh tơdrong Sư pơma na lu sư tơkhan dih băl: “Sư pơma thoi noh băt Sư jô̆ kơ bơ̆n hiơt kơ chĕp 'bĕng mi kơlĕ.”

⁸Yêsu băt kơ lu sư pơma gah tơdrong lu sư hiơt kơ chĕp 'bĕng mi na Yêsu khan: “Lơliơ iĕm lui oei rơdu hơnơ̆ng, Inh pơma tơdrong nai mă iĕm khan Inh jô̆ kơ iĕm hiơt kơ chĕp 'bĕng mi?

⁹Iĕm ưh kơ băt ôh hă Inh gơh pơm 'bĕng mi? Liơ iĕm ưh kơ 'blŏk tơdrong Inh iŏk pơđăm tŏ 'bĕng mi 'me pơđăm-rơbâu 'nu bơngai? Iĕm dônh tah tơ bai rơkah dôm tŏ bai?

¹⁰Iĕm kư̆m ưh kơ 'blŏk ôh hă Inh iŏk tơpơh tŏ 'bĕng mi 'me puăn-rơbâu 'nu bơngai? Iĕm dônh tah tơ bai rơkah dôm tŏ bai?

¹¹Na lơliơ iĕm tơchĕng khan Inh jô̆ kơ iĕm hiơt kơ chĕp 'bĕng mi? Ưh kơ sĭ Inh jô̆ tơdrong noh ôh. Inh athei iĕm kơchăng weh ataih kơ 'buih pông đe Pharisi păng Sađusê.”

¹²Yêsu pơma thoi noh boih na lu sư băt kơ Yêsu ưh kơ athei sư kơchăng kơ 'buih 'bĕng mi pông tơpă ôh. Sư athei kơchăng weh ataih kơ 'bơ̆r đon đe Pharisi păng đe Sađusê bơtho, hli kơ apoh kơ lu sư.

¹³Yêsu năm truh tơ tơring Sêsarê Philip. Sư jet lu bơngai pơhrăm păng Sư khan: “Đe krao anăn Inh Kon Bơngai bu?”

¹⁴Lu sư khan: “Mơ'nah đe krao Ih Yôhan bơngai pơm kơ đe 'batem. Mơ'nah khan Ih Êli, bơngai mă pơtruh nơ̆r 'Bok Kei-Dei sơ̆. Đei bơngai mơ'nah dơ̆ng khan Ih 'bok Jêrêmi mă kư̆m pơtruh nơ̆r 'Bok Kei-Dei sơ̆, mơ'nah khan Ih bơngai nai mă pơtruh nơ̆r 'Bok Kei-Dei sơ̆.”

¹⁵Na Yêsu khan kơ lu sư: “Bĭ iĕm khan Inh bu?”

¹⁶Simôn Pêtrôs khan: “Ih 'Bok Krist, Kon 'Bok Kei-Dei mă arih ling-lang.”

¹⁷Yêsu khan: “Ơ Simôn, kon Yôhan, ih hiôk tơpă. Kon bơngai ưh kơ đei tơbăt kơ ih tơdrong noh ôh. 'Bă Inh mă oei tơ plĕnh ti đĕch tơbăt kơ ih tơdrong noh.

¹⁸Ơ Pêtrôs, Inh wă khan kơ ih, ih thoi lĕ kơ tơmo kŭk; kơpal tơmo kŭk noh boih Inh wă pơm hnam Inh, hnam noh wă khan lu bơngai lui kơ Inh. Na dôm lu yang kơnê̆ ưh kơ kĕ blah lu bơngai lui noh ôh.

¹⁹Inh gô jao kơ ih chĕp khuă 'măng mơ̆t tơ dêh char 'Bok Kei-Dei pơgơ̆r. Thoi noh na mă dôm tơdrong kiơ ih wă kơ đe pơm tơ teh âu, 'Bok Kei-Dei tơ plĕnh ti kư̆m ăn kơ lu sư pơm. Dôm tơdrong kiơ ih khă kuă ăn đe pơm tơ teh âu, 'Bok Kei-Dei tơ plĕnh ti kư̆m khă ưh kơ ăn mơ̆n.”

²⁰Đang Sư pơma thoi noh boih na Sư khă lu bơngai pơhrăm păng Sư kuă ăn roi kơ đe Sư boih 'Bok Krist.

²¹Đơ̆ng năr noh boih Yêsu mă đe anăn 'Bok Krist, Sư roi kơ lu bơngai pơhrăm păng Sư khan: “Inh chu năm tơ Pơlei Jêrusalem, tơ ei kơnh lu đe kră sek tơlang, lu 'bok soi tih păng lu thây bơtho tơdrong juăt đe Juđê gô pơm kơ Inh lơ tơdrong kơnê̆ păng pơlôch hloi Inh. Mă-lei kơtĕch pêng năr đơ̆ng rŏng 'Bok Kei-Dei gô tơiung arih Inh dơ̆ng.”

²²Na Pêtrôs krao Yêsu weh ataih 'biơ̆, sư wă khă Yêsu yua kơ Yêsu pơma thoi noh hei. Pêtrôs khan: “Ơ 'Bok, apinh 'Bok Kei-Dei 'nĕ ăn truh kơ Ih tơdrong 'noh.”

²³Na Yêsu hue lăng tơ Pêtrôs păng khan kơ sư: “Ơ Satan, jăk kơ e mă ataih đơ̆ng âu. Inh wă pơm kiơ̆ kơ 'Bok Kei-Dei mă e pơgăn. E ưh kơ tơchĕng kiơ̆ kơ 'Bok Kei-Dei ôh, e tơchĕng kiơ̆ kơ kon bơngai đĕch.”

²⁴Klaih kơ noh Yêsu khan kơ lu bơngai pơhrăm păng Sư: “Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih 'long pơglang chu lôch yua kơ wă kiơ̆ Inh.

²⁵Bơngai bu ưh kơ chu lôch yua kơ tơdrong Inh, bơngai noh gô lôch hoh hoh đĕch ưh kơ yua kiơ. Bơngai bu chu lôch yua kơ tơdrong Inh, sư 'noh gô arih ling-lang.

²⁶Mă bu mơdrŏng đei tôm mŭk tơmam tơ teh âu, dah sư ưh kơ arih ling-lang, lei truh sư lôch ưh pă đei yua kiơ boih. Mă sư mơdrŏng kư̆m ưh kơ gơh răt tơdrong arih sư ôh.

²⁷Ning-mônh Inh Kon Bơngai gô jur dơ̆ng tơ teh âu hơdai păng linh jang 'lơ̆ng. Năr 'noh kơnh 'Bă Inh ăn kơ Inh mơsêh mơyang tih-tin rŏ sor tơpă. Inh gô sek tơlang kơ rim 'nu bơngai kiơ̆ thoi sư pơm tơ teh âu sơ̆.

²⁸Inh khan kơ iĕm tơpă, đei lăm lu iĕm âu mơ'nah ưh tam mă lôch ôh, lu sư gô 'bôh Inh pơgơ̆r ning-mônh.”