Read bahnar Mat 17 Bible Online

Mat 17 - bahnar bible

Mat 17

¹Tơdrâu năr đơ̆ng rŏng kơ năr noh, Yêsu anhăk pêng 'nu bơngai pơhrăm păng Sư, anăn lu sư Pêtrôs, Yakơ, Yôhan oh Yakơ, lu sư tŏk tơ kông kơjung kơdrô̆ lu sư.

²Na Yêsu tơwir akâu Sư kơdih 'bơ̆t anăp lu đe pêng 'nu noh, muh măt Sư, ao Sư, rang hơdah dang măt 'năr.

³Đơ̆ng noh 'bôh blư kơ Môis hăm Êli jur pơma dơnuh hăm Yêsu.

⁴Na Pêtrôs khan kơ Yêsu: “Ơ 'Bok, bơ̆n oei tơ âu hiôk dêh. Lê̆ kơ inh pơm kơ bơ̆n pêng tŏ bơsŭn; minh pôm pơm kơ Ih, minh pôm pơm kơ Môis, minh pôm pơm kơ Êli.”

⁵Kơplah Pêtrôs oei pơma thoi noh 'bôh glĭp kơ hơmơ̆l kok rang hơdah jur gom lu sư. Păng đei nơ̆r 'Bok Kei-Dei pơma đơ̆ng lăm hơmơ̆l noh khan: “Sư âu Kon Inh mă 'mêm kơeng tơpă, Inh lăp đon kơ Sư dêh. Na iĕm ling-lang athei chu yom kơ Sư.”

⁶Lăp lu bơngai pơhrăm păng Sư kơtơ̆ng nơ̆r pơma thoi noh jơhngơ̆m lu sư hli dêh, lu sư 'nap kŭp kơ̆l tơ teh.

⁷Yêsu năm tơiung lu sư păng khan: “Iung bĕ, huay kơ hli ôh.”

⁸Lu đe noh ngoi lăng jua ưh pă 'bôh bu dơ̆ng hơdai hăm Sư dơ̆ng, pă minh 'nu Sư đĕch oei 'bơ̆t noh.

⁹Klaih kơ noh na lu sư jur đơ̆ng kông noh na Yêsu khă lu sư thoi âu: “Iĕm 'nĕ chă roi kơ đe hŏ dôm tơdrong iĕm 'bôh hei đơ̆ng dang ei truh Inh Kon Bơngai iung arih đơ̆ng lôch ning-mônh.”

¹⁰Na lu sư jet Yêsu khan: “Lơliơ lu thây bơtho tơdrong juăt đe Juđê khan Êli jur hơdrol kơ 'Bok Krist?”

¹¹Na Yêsu khan: “Trŏ boih Êli jur hơdrol kơ Krist yua kơ sư bơngai hơmet ming tôm tơdrong hơdrol.

¹²Inh khan kơ iĕm tơpă, Êli truh boih, mă-lei đe ưh kơ kơnăl kơ sư, đe pơm kơnê̆ kơ sư kiơ̆ gô mơ̆ng kơ đe wă. Na đơ̆ng âu tơ dơning dơmônh đe kư̆m pơm kơnê̆ kơ Inh Kon Bơngai thoi noh mơ̆n.”

¹³Thoi noh na lu bơngai pơhrăm păng Sư băt kơ Êli noh, wă khan Yôhan, bơngai mă pơm kơ đe 'batem.

¹⁴Yêsu păng pêng 'nu bơngai pơhrăm păng Sư noh brŏk tơ lu bơngai tơpôl. Tơ ei đei minh 'nu bơngai năm sơtơ̆p kŭl-tăng 'bơ̆t anăp Sư păng khan:

¹⁵“Ơ 'Bok, apinh Ih mơnat 'biơ̆ kơ kon inh sư bơngai hơwing, yang kơnê̆ nŏng kơ glơ̆m sư, phŏ pơ̆k tơ ŭnh phŏ pơ̆k tơ đak pơmat-tat măng năr.

¹⁶Inh năm apinh ră boih tơ lu bơngai pơhrăm păng Ih, mă-lei lu sư ưh kơ gơh pơklaih.”

¹⁷Na Yêsu khan: “Ơ lu iĕm mă oei lui rơdu hơnơ̆ng kư̆m oei pơm yoch, iĕm wă kơ Inh oei hơdai iĕm đunh dang yơ 'mơ̆i na iĕm lui kơjăp? Iĕm wă kơ Inh gleh dang yơ 'mơ̆i na iĕm gơh pơklaih đe?” Na Yêsu khan kơ bơngai ei: “Năm ba kon ih tơ âu năm”

¹⁸Đơ̆ng noh na Yêsu pơpuh yang kơnê̆ lĕch đơ̆ng akâu bơngai 'lơ̆p noh. Yang kơnê̆ lĕch jăk hloi ưh pă pơm kơ bơngai 'lơ̆p noh pơ̆k dơ̆ng.

¹⁹Na lu bơngai pơhrăm păng Yêsu jet Yêsu kơdrô̆ khan: “Yua kơ kiơ nhôn ưh kơ gơh pơpuh yang kơnê̆?”

²⁰Yêsu khan: “'Noh yua kơ tơdrong lui iĕm oei rơdu iĕ. Inh khan kơ iĕm tơpă, mă khan tơdrong lui iĕm rơdu iĕ tŏ găr sơ'bei dah sư rai wơ̆ thoi găr sơ'bei chăt kơjung lei iĕm gơh pơm tôm tơdrong nai hai. Pơtih gia iĕm sơkat kơ kông âu khan thoi âu: Ơ kông, hiŏng jăk kơdih tơ nai, na sư hiŏng hloi kơdih tơ nai.”

²¹Na gah tơdrong yang kơnê̆ thoi âu, dah bơ̆n ưh kơ krao khan kơ Kră Yang 'Bok Kei-Dei hơdrol păng ưh kơ ơ̆t kơ por, mă bơ̆n pơpuh lap đĕch, sư ưh kơ chu kơdâu ôh.

²²Kơplah lu sư brŏk akŭm tơ dêh Galilê Yêsu roi dơ̆ng tơdrong Sư wă lôch: “Đe gô rôp pơjao Inh Kon Bơngai tơ ti kon bơngai tơ ala teh âu.

²³Lu đe ei boih pơlôch Inh, mă-lei kơtĕch pêng năr đơ̆ng rŏng Inh iung arih dơ̆ng.” Lu bơngai pơhrăm păng Sư kơtơ̆ng Sư khan thoi noh, lu sư sơ'ngon dêh.

²⁴Lăp lu sư truh tơ Pơlei Kapernum, lu bơngai ra iŏk jên thuê̆ jet Pêtrôs khan: “Thoi yơ, 'bok thây ih hăm wă ăn thuê̆?”

²⁵Pêtrôs khan: “Sư ăn mơ̆n” Lăp Pêtrôs mơ̆t tơ hnam Yêsu thar jet hloi: “Ơ Simôn, lu 'bok pơtao iŏk thuê̆ đơ̆ng bu? Sư iŏk đơ̆ng lu kon sư, dah đơ̆ng bơngai nai?”

²⁶Na Pêtrôs khan kơ Sư: “Lu sư iŏk thuê̆ đơ̆ng bơngai nai.” Yêsu khan kơ Pêtrôs: “'Noh bơ̆n băt kơ 'bok pơtao kuă ăn kon sư duh thuê̆, bơ̆n kư̆m ưh kơ duh ôh, yua kơ bơ̆n kon pơtao 'Bok Kei-Dei.

²⁷Mă-lei ba ưh kơ wă pơkăl kơ lu bơngai iŏk thuê̆ ôh, ba athei duh pơyom. Na dang ei ih năm wah kơ ba ka tơ đak dơsĭ bĕ. Ih 'bôh ka mă kăp wah hơdrol ih iŏk pŏ 'bơ̆r sư hŏ, lăm 'bơ̆r sư noh đei minh hlak jên. Jên noh lăp tôm hloi kơ ba ăn thuê̆. Na ih iŏk jên noh ăn kơ lu bơngai mă iŏk thuê̆, khan kơ lu sư ba ăn tôm boih.”