Read bahnar Mat 19 Bible Online

Mat 19 - bahnar bible

Mat 19

¹Yêsu pơma tơdrong noh đang boih, na Sư năm đơ̆ng dêh Galilê tơ dêh Juđê pah to krong Jôrđăn.

²Tơ noh đei lơ bơngai kiơ̆ Sư, na Sư chă pơklaih lu bơngai jĭ jăn.

³Đei bơngai Pharisi năm jet pơlong Sư, wă kơ Sư pơma ưh kơ trŏ tơdrong juăt. Lu sư jet thoi âu: “Kiơ̆ tơdrong juăt bơ̆n, bơ̆n achăng akăn tơdrong kiơ kư̆m bưh dah thoi yơ?”

⁴Yêsu khan kơ lu sư: “Iĕm ưh tam mă đŏk lăng ôh hă sơ̆p hla bơar 'Bok Kei-Dei chih khan thoi âu: ‘Blŭng-a sơ̆ 'Bok Kei-Dei pơjing minh 'nu drŏ-nglo, minh 'nu drŏ-kăn.’

⁵‘Yua kơ thoi noh na bơngai drŏ-nglo drŏ-kăn tơklah đơ̆ng mĕ 'bă sư kơdih na oei hơdai, bre sư jing minh sĕch minh akar.’

⁶Bre sư ưh pă thoi 'bar 'nu bơngai boih, bre sư thoi minh 'nu bơngai đĕch. Yua kơ thoi noh na kon bơngai bơ̆n ưh kơ gơh achăng lê̆ akăn sư ôh, yua kơ 'Bok Kei-Dei pơgơ̆p bre sư jing klo kăn boih.”

⁷Lu bơngai Pharisi jet dơ̆ng: “Lơliơ Môis pơkă khan dah pơm hla bơar trŏ gơh achăng?”

⁸Yêsu khan: “'Noh yua kơ yă 'bok iĕm sơ̆ arăng kơ̆l na Môis pơkă khan gơh achăng. Mă tơpă đơ̆ng blŭng-a sơ̆ 'Bok Kei-Dei ưh kơ đei pơkă khan thoi noh ôh.

⁹Yua kơ thoi noh na Inh wă khan kơ iĕm dang ei thoi âu: Bơngai bu achăng lê̆ akăn sư, akăn sư ưh kơ đei pơm pơyô kư̆ kă, na sư iŏk akăn plơ̆ng, bơngai 'noh pơm yoch pơ'brơh kơ akăn sư. Mă-lei dah akăn sư pơm pơyô kư̆ kă kơ klo sư hơdrol, 'noh klo sư gơh achăng. Klo sư mă hơdrol achăng lê̆ akăn sư boih, na dah bơngai nai đơ̆ng rŏng iŏk pơm akăn, bơngai noh kư̆m dang pơm yoch mơ̆n, yua kơ klo sư mă hơdrol achăng kư̆ kă ưh kơ trŏ kơ tơdrong achăng.”

¹⁰Na lu bơngai pơhrăm păng Sư khan: “Bơ̆n băt kơ achăng lê̆ akăn ưh kơ gơh, dah lê̆ kơ iŏk akăn đĕch 'lơ̆ng hloh.”

¹¹Yêsu khan dơ̆ng kơ lu sư: “Đĭ-đăng bơngai ngôi hơdrô̆ kư̆m ưh kơ trŏ ôh. Tơdrong 'noh gô mơ̆ng kơ 'Bok Kei-Dei đĕch.

¹²Đei bơngai mơ'nah ưh kơ wă iŏk akăn, yua kơ sư kơđo đơ̆ng klak mĕ sư tơpŭ sơ̆ ưh kơ gơh pơjing kon. Đei bơngai mơ'nah ưh kơ wă iŏk akăn, yua kơ đơ̆ng tơduă kon bơngai pơm kơ sư thoi noh. Đei bơngai mơ'nah ưh kơ wă iŏk akăn, yua kơ sư wă adrin jang tơdrong 'Bok Kei-Dei; na bu kĕ adrin tơdrong 'noh, adrin bĕ.”

¹³Kơplah ei đe anhăk lu hơ'lơ̆p tơ Yêsu wă kơ Sư pel kơ̆l krao khan kơ 'Bok Kei-Dei apinh Sư wei-lăng lu hơ'lơ̆p, mă-lei lu bơngai pơhrăm păng Sư khă kuă ăn năm tơ Sư.

¹⁴Na Yêsu khan: “Lê̆ lu hơ'lơ̆p năm tơ Inh, 'nĕ pă khă lu sư, yua kơ bơngai bu lui thoi lu hơ'lơ̆p âu lui, bơngai noh 'Bok Kei-Dei pơgơ̆r wei-lăng sư ling-lang.”

¹⁵Na Yêsu pel kơ̆l krao khan kơ lu bơngai hơ'lơ̆p, klaih kơ noh năm tơ nai.

¹⁶Đei minh 'nu bơngai năm tơ Yêsu jet thoi âu: “Ơ 'Bok Thây, inh pơm tơdrong 'lơ̆ng ayơ wă kơ oei hơdai hăm 'Bok Kei-Dei arih ling-lang?”

¹⁷Yêsu khan kơ sư: “Yua kơ kiơ ih jet Inh wă kơ băt gah tơdrong 'lơ̆ng? Kon bơngai ưh kơ đei bu 'lơ̆ng tơpăt ôh, pôm 'Bok Kei-Dei đĕch 'lơ̆ng tơpăt. Dah ih wă kơ arih ling-lang, lei ih athei pơm kiơ̆ kơ tơdrong 'Bok Kei-Dei pơkă.”

¹⁸Bơngai ei jet: “Tơdrong ayơ?” Yêsu khan: “'Nĕ pơlôch bơngai, 'nĕ pơm pơyô kư̆ kă, 'nĕ chă tơtông mŭk tơmam đe, 'nĕ pơma hơlĕnh,

¹⁹bơ̆n athei lui yom kơ mĕ 'bă, bơ̆n athei 'mêm kơ bôl buăl thoi bơ̆n 'mêm akâu kơdih.”

²⁰Na bơngai tơdăm ei khan: “Dôm tơdrong 'noh inh pơm kiơ̆ boih. Hăm đei tơdrong nai dơ̆ng mă inh ưh tam băt?”

²¹Yêsu khan kơ sư: “Dah ih wă kiơ̆ tôm tơdrong 'Bok Kei-Dei pơkă lei ih athei tĕch đĭ mŭk tơmam ih chă asong kơ lu bơngai dơnuh hin, na kiơ̆ hloi Inh. Thoi noh na ih gô đei mŭk tơmam tơ kơpal plĕnh ti ning-mônh.”

²²Lăp bơngai tơdăm ei kơtơ̆ng thoi noh sư sơ'ngon dêh yua kơ sư mơdrŏng tơpă. Đơ̆ng noh na sư brŏk hloi.

²³Na Yêsu khan kơ lu bơngai pơhrăm păng Sư: “Inh khan kơ iĕm tơpă, lu bơngai mơdrŏng wă mơ̆t tơ dêh char 'Bok Kei-Dei pơgơ̆r anat dêh.

²⁴Inh khan kơ iĕm thoi âu dơ̆ng, aseh lăk-đa mơ̆t bơlôh jrŭm 'bônh 'biơ̆ kơ bơngai mơdrŏng wă mơ̆t tơ dêh char 'Bok Kei-Dei.”

²⁵Lu bơngai pơhrăm păng Sư kơtơ̆ng thoi noh lu sư sơleng kơ đon. Na lu sư jet Yêsu khan: “Lei bu gơh mơ̆t tơ dêh char 'Bok Kei-Dei lĕ?”

²⁶Yêsu lăng lu sư păng khan: “Kon bơngai ưh kơ gơh mơ̆t kơdih tơ dêh char 'Bok Kei-Dei ôh, dah 'Bok Kei-Dei ưh kơ pơklaih yoch sư. 'Bok Kei-Dei pơklaih yoch sư na sư gơh mơ̆t, yua kơ 'Bok Kei-Dei gơh pơm tôm tơdrong.”

²⁷Na Pêtrôs khan kơ Sư: “Lu nhôn âu achăng lê̆ tôm tơdrong yua kơ kiơ̆ Ih, na lu nhôn gô đei kiơ?”

²⁸Yêsu khan: “Inh khan kơ iĕm tơpă, ning-mônh lăp 'Bok Kei-Dei pơjing plĕnh teh 'nao dơ̆ng, Inh Kon Bơngai gô oei kơpal tang-dŏ pơtao 'lơ̆ng rŏ tơpă, na lu iĕm mơjĭt-'bar 'nu kiơ̆ Inh âu, lu iĕm kư̆m gô oei kơpal tang-dŏ pơtao mơ̆n, gô sek tơlang mơjĭt-'bar khŭl bơngai Isơrael.

²⁹Na bu achăng hnam sư, 'nhŏng oh sư, mĕ 'bă sư, kon sư, mir 'ba sư, yua kơ jang tơdrong Inh, bơngai noh gô đei tơmam lơ hloh kơ sư đei sơ̆ păng ning-mônh sư gô arih ling-lang hơdai hăm 'Bok Kei-Dei ưh kơ layơ tôch.

³⁰Kư̆m đei lơ bơngai pơm tih dang ei, ning-mônh sư gô jing iĕ. Kư̆m lơ bơngai jang tơdrong iĕ dang ei, ning-mônh gô jang tơdrong tih.