Read bahnar Mat 24 Bible Online

Mat 24 - bahnar bible

Mat 24

¹Lăp Yêsu lĕch đơ̆ng hnam akŭm 'Bok Kei-Dei tơm wă năm tơ nai, na lu bơngai pơhrăm păng Sư tơ'bôh kơ Sư tơdrong hnam akŭm tơm noh 'lơ̆ng rŏ.

²Na Yêsu khan kơ lu sư: “Iĕm 'bôh boih hnam akŭm âu 'lơ̆ng rŏ, Inh khan kơ iĕm tơpă, ning-mônh hnam âu gô pơchah reng 'beng ưh pă đei tơmo ayơ tơklep băl dơ̆ng. Đe gô teh pơchah đĭ.”

³Đơ̆ng rŏng kơ noh Yêsu năm ngôi tơ kông Ôliwơ, na lu bơngai pơhrăm păng Sư jet Sư kơdrô̆ khan: “Apinh Ih roi kơ nhôn layơ đe wă pơrăm hnam akŭm 'Bok Kei-Dei to păng đei tơdra liơ wă kơ nhôn kơnăl kơ Ih wă jur tơ teh âu păng kơnăl kơ năr tôch wă truh.”

⁴Yêsu khan kơ lu sư: “Iĕm athei kơchăng kơdih hli kơ đe wă pơhlŭ pơlung iĕm kiơ̆ sư.

⁵Ning-mônh gô đei lơ bơngai truh na lu sư anăn măt Inh khan sư kơdih 'Bok Krist. Đei lơ bơngai lui kơ sư pơhlŭ.

⁶Păng iĕm kơtơ̆ng đe tơblah mă jê̆ mă ataih, iĕm 'nĕ kơ hli hŏ. Tơdrong noh ưh kơ jor ôh, gô đei 'mơ̆i, mă-lei năr tôch ưh tam mă truh ôh kơplah noh.

⁷Đei dêh âu iung blah dêh to, dêh to iung blah dêh nai. Đei teh adrŏ păng tơdrong pơngot rơwĕt lơ tơring âu tơring to.

⁸Mă-lei kơplah noh tơdrong gleh truh 'nao wă pơtơm đĕch.

⁹“Kơplah noh kơnh đe gô rôp iĕm jao kơ đe tôn teh păng pơlôch iĕm. Đĭ-đăng bơngai areh arĕnh kơ iĕm yua kơ iĕm lui kơ Inh.

¹⁰Kơplah noh mơ̆n đei lơ lu bơngai lui achăng lê̆ Inh, lu sư hil areh kơ lu bôl mă oei lui kơ Inh, lu sư rôp lu bôl mă oei lui kơ Inh noh, ăn kơ lu bôl sư mă ưh kơ lui tah tơ lăm hnam phak.

¹¹Kư̆m đei lơ bơngai wă pơhlŭ iĕm, khan sư bơngai pơtruh nơ̆r 'Bok Kei-Dei, đei lơ bơngai lui kơ sư pơhlŭ.

¹²Kơplah noh kon bơngai rai đunh rai kơnê̆ dêh. Lu sư chă pơtuah lu bơngai lui, na lu bơngai lui rai pă gan 'mêm kơ 'Bok Kei-Dei hăm bôl buăl boih.

¹³Mă-lei dah bu adrin lui kơ Inh truh năr tôch, bơngai 'noh gô klaih.

¹⁴Gô lu bơngai lui kơ Inh bơtho tơdrong 'nao 'lơ̆ng 'Bok Kei-Dei wă pơgơ̆r kon bơngai jơ̆p-jang kơ teh đak 'mơ̆i na truh năr tôch.

¹⁵“Ning-mônh iĕm gô 'bôh lu bơngai kơnê̆ wă pơrăm kon bơngai gô truh, lu sư oei tơ anih đe kơ̆m kơ oei. Đaniel bơngai pơtruh nơ̆r 'Bok Kei-Dei sơ̆ sư kư̆m roi tơdrong noh mơ̆n. Na bu đŏk lăng hla bơar âu đon sư athei pơwao kơdih.

¹⁶Lu iĕm bơngai mă oei tơ dêh Juđê 'bôh lu bơngai kơnê̆ wă chă pơlôch pơrăm đe truh, iĕm athei jăk tơ kông ataih đơ̆ng lu sư hloi.

¹⁷Bơngai bu ngôi tơ 'ngoaih hnam 'nĕ pă mơ̆t iŏk tơmam sư tơ lăm hnam dơ̆ng.

¹⁸Bơngai bu oei jang tơ mir, 'nĕ pă brŏk iŏk ao tơnŏ sư tơ hnam.

¹⁹Kơplah ei kơnh lu bơngai drŏ-kăn akâu kơhioh păng lu bơngai drŏ-kăn tơmŏm kon lu sư pơmat-tat dêh.

²⁰Mă-lei iĕm athei krao khan apinh 'Bok Kei-Dei 'nĕ ăn tơdrong noh truh kơplah bơyan 'mi hngach păng kơplah năr pơdơh Sa'bat,

²¹yua kơ năr noh kơnh đei tơdrong anat anot tih hloh kơ đơ̆ng năr 'Bok Kei-Dei pơjing plĕnh teh sơ̆ khơ̆ dang ei. Mă-lei đơ̆ng rŏng kơ noh kư̆m huay kơ mah dang noh mơ̆n.

²²Dah 'Bok Kei-Dei ưh kơ achơ̆t lê̆ tơdrong tơblah tih noh, ưh kơ đei bu arih ôh. Mă-lei 'Bok Kei-Dei achơ̆t lê̆, yua kơ Sư mơnat kơ lu bơngai mă Sư rơih boih.

²³“Năr noh dah đe khan kơ iĕm 'Bok Krist tơ âu boih, 'Bok Krist tơ to boih, iĕm 'nĕ kơ lui hŏ,

²⁴yua kơ năr noh kơnh đei lơ bơngai pơm Krist, đei lơ bơngai khan sư bơngai pơtruh nơ̆r 'Bok Kei-Dei. Lu sư kư̆m gơh pơm tơdrong mơsêh wă kơ lu bơngai mă 'Bok Kei-Dei rơih boih lui kơ lu sư pơhlŭ.

²⁵Iĕm athei kơchăng kơdih, yua kơ Inh roi kơ iĕm tôm tơdrong hơdrol boih.

²⁶Dah đe khan kơ iĕm 'Bok Krist jur boih sư oei tơ bri, iĕm 'nĕ kơ năm chă hŏ; păng dah đe khan 'Bok Krist jur boih sư oei ôn akâu sư tơ hnam đe iĕm 'nĕ kơ lui.

²⁷Năr ei kơnh đĭ-đăng kon bơngai gô 'bôh Inh Kon Bơngai jur thoi kơmlat, chêr 'blêt 'bôh jơ̆p-jang kơ teh đak mă đơ̆ng hơlĕch truh tơ bơmơ̆t.

²⁸“Bơngai lôch tơ yơ, pă jor grơ̆ gô jur sa tơ ei.

²⁹“Đơ̆ng rŏng kơ tơdrong anat noh boih măt 'năr gô măng mu, măt khei ưh kơ hơdah, sơnglŏng gô huŏng đơ̆ng plĕnh.

³⁰Kơplah noh đĭ-đăng kon bơngai ala teh âu nhơ̆m hmoi yua kơ lu sư 'bôh Inh Kon Bơngai 'lơ̆ng rŏ mơsêh mơyang tih-tin jur hăm hơmơ̆l.

³¹Lu linh jang hlôm pơre keng, Inh wơh lu sư jur năm jơ̆p-jang kơ teh đak wă krao anhăk đĭ-đăng lu khŭl bơngai mă Inh rơih iŏk đơ̆ng gah hơlĕch truh gah bơmơ̆t, đơ̆ng gah yă-nơ̆m truh gah gơal akŭm đĭ tơ Inh.

³²“Na dang ei iĕm mơ̆ng pơtih gia kơ 'long hơra. Lăp iĕm 'bôh dơng sư hơđoh chăt hla, noh iĕm băt kơ wă jê̆ bơyan 'mi boih.

³³Na dôm tơdrong Inh roi kơ iĕm noh hei kư̆m lei-lăi. Ning-mônh lăp iĕm 'bôh dôm tơdrong Inh roi kơ iĕm noh, iĕm băt Inh Kon Bơngai wă jê̆ jur boih. 'Noh dang lĕ kiơ̆ 'măng dur boih.

³⁴Inh khan kơ iĕm tơpă, jơhnơr noh gô 'bôh tơpă tôm tơdrong Inh roi kơ iĕm noh hei.

³⁵Plĕnh teh gô hiong tôch đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

³⁶“Năr păng jơ ei ưh kơ đei bu băt. Lu linh jang 'lơ̆ng kơpal plĕnh ti ưh kơ băt. Inh Kon 'Bok Kei-Dei ră, kư̆m hơdai ưh kơ băt mơ̆n. Pôm 'Bă Inh đĕch băt kơ năr ei kơnh.

³⁷Na Inh Kon Bơngai gô jur ning-mônh thoi đak lip kơplah jơhnơr Nôê sơ̆.

³⁸Hơdrol kơ đak lip sơ̆, kon bơngai oei sa et pơrŏ tơdrong iŏk klo kăn, tơdrong noh nai dang lĕ kơ năr oei hiôk-hian thoi krô hmă; truh tơ Nôê mơ̆t lăm duk, lu sư kư̆m ưh tam mă băt 'mơ̆i.

³⁹Lu sư ưh kơ kơchăng tơdrong kiơ wă truh kơ lu sư, dĭng đak lơ̆p pơlôch đĭ-đăng lu sư hloi. Na Inh Kon Bơngai gô jur ning-mônh thoi noh mơ̆n.

⁴⁰Kơplah ei kơnh đei 'bar 'nu bơngai drŏ-nglo jang tơ mir, linh jang 'lơ̆ng iŏk anhăk minh 'nu mă lui, minh 'nu ưh kơ lui lê̆ tơ noh.

⁴¹Đei 'bar 'nu bơngai drŏ-kăn oei peh 'ba, linh jang 'lơ̆ng iŏk anhăk minh 'nu mă lui, minh 'nu ưh kơ lui lê̆ tơ noh.

⁴²Thoi noh na iĕm athei kơchăng bĕ, yua kơ iĕm ưh kơ băt layơ Inh mă Kră Yang iĕm wă jur dơ̆ng.

⁴³“Iĕm athei kơchăng hli kơ thoi bơngai âu: Bơngai âu sư ưh kơ kơchăng kơ đe wă tơtông tơmam sư. Lăp đe tơtông tơmam sư boih na sư khan: ‘Ô, ăn dah băt kơ đe wă tơtông tơmam inh măng hei, lei inh kral kơchăng kuă ăn lu sư bŏk tơnăr hnam inh ôh.’

⁴⁴Na iĕm athei kơchăng 'nĕ kơ thoi bơngai noh, hli kơ Inh Kon Bơngai wă jur tơ iĕm dơ̆ng kơplah iĕm ưh kơ lêng ê.

⁴⁵“Bơngai đĭch, sư athei jang tơnăp kiơ̆ thoi yŏng sư pơkă, na yŏng sư lăp đon pơjao ăn kơ sư pơm kai wei-lăng lu buăl sư dơ̆ng na mưh trŏ kơ jơ sŏng sa sư chă asong kơ lu bôl sư tơmam sa.

⁴⁶Lăp yŏng lu sư wih 'bôh bơngai kai mă đêl sư pơjao athei wei-lăng lu đĭch đam sư noh jang kiơ̆ kơ nơ̆r pơkă na sư bơnê, thoi noh na bơngai kai jơhngơ̆m sư hiôk tơpă.

⁴⁷Inh khan kơ iĕm tơpă, yŏng sư gô ăn kơ sư wei-lăng đĭ-đăng mŭk tơmam yŏng sư hloi.

⁴⁸Mă-lei dah bơngai kai noh ưh kơ chu kơ yŏng sư, sư wă tơchĕng kiơ̆ kơ đon sư kơdih, na sư khan: ‘Yŏng inh wă wih mơ̆n oei đunh,’

⁴⁹na sư ngôi hơdai sa et păng lu bơngai suai sik, tôn teh lu buăl sư tăm,

⁵⁰na yŏng sư wih kơplah sư ưh kơ kơchăng, tabơla haih pă tam boih.

⁵¹Yŏng sư gô phak pơlôch sư, ăn kơ sư oei hơdai hăm dôm lu bơngai pơm ưh kơ tơpăt, lê̆ sư nhơ̆m hmoi tơkăp sơnĕnh tơ noh.