Read bahnar Mat 25 Bible Online

Mat 25 - bahnar bible

Mat 25

¹“Kơplah năr ei kơnh lu bơngai mă khan 'Bok Kei-Dei pơgơ̆r lu sư ră, mă-lei lu sư thoi lĕ kơ mơjĭt 'nu adruh âu, rim 'nu kơ lu sư chĕp ŭnh kơđeng ngăl wă năm ngôi hơpong kơ bơngai 'nao iŏk akăn. Lu sư chang gô bơngai mă 'nao iŏk akăn ei wă truh.

²Lăm lu sư noh đei pơđăm 'nu adruh đĕch kơchăng, pơđăm 'nu adruh ưh.

³Pơđăm 'nu adruh mă ưh kơ kơchăng noh, lu sư chĕp pôm kơđeng, ưh kơ chĕp hiă kơchai đak dâu trôl.

⁴Pơđăm 'nu adruh mă kơchăng noh, lu sư chĕp kơđeng păng chĕp hiă kơchai đak dâu trôl hloi.

⁵Kơplah lu sư chang gô bơngai mă 'nao iŏk akăn ei ưh kơ jah truh tơ lu sư, lu sư tep kơkôi jing tep hiơt hloi.

⁶“Truh tŏk-bŏk măng na đei nơ̆r krao 'bơ̆r re khan: ‘Bơngai mă 'nao iŏk akăn truh boih, năm jah kiơ̆ sư bĕ.’

⁷Na mơjĭt 'nu adruh noh iung đơ̆ng tep hơmet ŭnh kơđeng lu sư.

⁸Pơđăm 'nu adruh mă ưh kơchăng noh apinh pơđăm 'nu adruh mă kơchăng khan: ‘Asong nhôn đak trôl iĕm bĕ, yua kơ kơđeng nhôn wă păt, đak trôl đĭ boih.’

⁹Na lu bôl sư mă kơchăng ei khan: ‘Ưh ôh, dah nhôn asong iĕm, hli kơ nhôn ưh kơ mah păng iĕm kư̆m ưh kơ mah mơ̆n. Iĕm athei năm răt kơdih tơ anih đe mơdro.’

¹⁰Na lu sư năm răt. Kơplah lu sư năm răt na bơngai mă 'nao iŏk akăn truh boih, lu pơđăm 'nu adruh mă kơchăng noh mơ̆t kiơ̆ hloi sư tơ hnam đe pơkong sŏng sa, na đe tang chơkăl hloi 'măng.

¹¹Lăp đơ̆ng rŏng 'biơ̆ kơ noh, lu pơđăm 'nu adruh mă ưh kơ kơchăng hei truh, lu sư pơma 'bơ̆r re khan: ‘Ơ 'bok, pơih kơ nhôn 'măng. Ơ 'bok, pơih kơ nhôn 'măng 'biơ̆ bĕ.’

¹²Mă-lei 'bok mă 'nao iŏk akăn ei khan kơ lu sư: ‘Inh khan kơ iĕm tơpă, inh ưh kơ băt kơ lu iĕm ôh.’ ”

¹³Yêsu pơtih gia tơdrong noh đang boih na Sư khan: “Iĕm athei kơchăng mă tơpă, yua kơ iĕm ưh kơ băt năr ayơ, jơ ayơ Inh wă jur tơ iĕm.”

¹⁴“Lu bơngai mă khan 'Bok Kei-Dei pơgơ̆r sư năr ei kơnh, lu sư thoi bơngai jang kơ yŏng sư, yŏng sư wă năm tơ dêh tơmoi ataih, na sư pơjao ăn kơ lu bơngai jang kơ sư wei-lăng mŭk tơmam sư.

¹⁵Sư ăn kơ lu bơngai jang kơ sư jên gô mơ̆ng kơ lu sư gơh mơdro sa kơdih. Bơngai hơgei kơ mơdro sư ăn lơ 'biơ̆, bơngai ưh kơ gan hơgei sư ăn tŏ sĕt 'biơ̆. Sư ăn kơ bơngai mă mônh pơđăm hlak jên maih, minh hlak jên maih noh lơ tơpă. Sư ăn kơ bơngai mă 'bar, 'bar hlak jên maih. Bơngai mă pêng lăp minh hlak jên maih. Klaih kơ noh yŏng sư năm tơ dêh tơmoi ataih.

¹⁶Bơngai mă iŏk pơđăm hlak jên maih yŏng sư noh, hơloh năm chă mơdro sa hloi, đei lơi kơ sư pơđăm hlak jên maih dơ̆ng.

¹⁷Bơngai mă iŏk 'bar hlak jên maih yŏng sư noh, kư̆m pơm lei-lăi, đei lơi kơ sư 'bar hlak jên maih dơ̆ng.

¹⁸Bơngai mă iŏk minh hlak jên maih yŏng sư noh, sư hơloh năm sir 'bŭ ôn tơ sơlŭng.

¹⁹“Đơ̆ng rŏng kơ noh đunh tơpă, na yŏng lu sư brŏk lăng lu sư mơdro sa hăm đei lơi ưh.

²⁰Bơngai mă iŏk pơđăm hlak jên maih yŏng sư noh, năm pơdrĕo kơ yŏng sư khan: ‘Ơ 'bok, sơ̆ inh iŏk pơđăm hlak jên ih, inh năm mơdro sa đei lơi pơđăm hlak, dang ei jing mơjĭt hlak, inh ăn pơđĭ hloi kơ ih.’

²¹Na yŏng sư khan: ‘Ơ dăm, ih jang kơ inh 'lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang 'lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.’

²²Bơngai mă iŏk 'bar hlak jên yŏng sư noh kư̆m pơma lei-lăi khan: ‘Ơ 'bok, sơ̆ inh iŏk 'bar hlak jên ih, inh năm mơdro sa đei lơi 'bar hlak dơ̆ng, inh ăn pơđĭ hloi kơ ih.’

²³Na yŏng sư khan: ‘Ơ dăm, ih jang kơ inh 'lơ̆ng tơpă, ih ưh kơ lê̆ ôh dôm tơdrong jang inh. Yua kơ ih jang 'lơ̆ng, na mă khan tơdrong jang ih iĕ, inh gô ăn kơ ih jang tơdrong tih hloh dơ̆ng. Na dang ei bĕ ba oei hơdai hiôk chơt hăm inh yŏng ih.’

²⁴“Bơngai mă iŏk minh hlak jên yŏng sư noh, kư̆m hơdai năm khan mơ̆n, sư khan: ‘Ơ 'bok, inh băt kơ ih bơngai wă pơgŏ nhôn, na ih athei nhôn năm mơdro ăn kơ ih, wă kơ ih iŏk đĕch thoi đe pơtăm 'ba, ih gô wă kĕch iŏk kơdih.

²⁵Yua kơ thoi noh na inh sir 'bŭ jên noh tơ sơlŭng, inh hli kơ hiong kơ inh mơdro sa. Na dang ei he âu iŏk pơdrĕo kơdih bĕ jên ih sơ̆.’

²⁶Na yŏng sư khan: ‘Ơ dăm, ih bơngai kơchu păng alah tăm, ih jô̆ kơ inh iŏk jên iĕm mơdro sa thoi bơngai kĕch iŏk 'ba đêl đe pơtăm hă?

²⁷Lei ih kuă kơ kiơ ăn kơ đe mơng, wă kơ ih đei lơi? Mưh inh năm iŏk na ih pơdrĕo jên mă inh ăn kơ ih păng jên mă ih đei lơi.’

²⁸‘Thoi noh na yŏng lu sư athei lu bơngai jang kơ sư iŏk jên đơ̆ng bơngai kơchu noh, ăn kơ bơngai mă đei mơjĭt hlak. Sư khan:

²⁹‘Kon bơngai bơ̆n mưh jang pơnam, sư đei tơmam lơ, Kră Yang mơnat ăn pơthim tơmam kơ sư rai lơ rơkah rơkai. Bơngai mă alah, tơmam ưh kơ đei lơ, rai hiong huach đơ̆ng sư tăm.

³⁰Na dang ei iĕm hiŏng hơtat bơngai mă ưh kơ yua âu tơ anih 'ngoaih măng mu, lê̆ sư nhơ̆m hmoi tơkăp sơnĕnh tơ noh.’

³¹“Năr ei kơnh Inh Kon Bơngai mơsêh tih-tin 'lơ̆ng rŏ jur tơ teh âu hơdai păng lu linh jang 'lơ̆ng, Inh gô oei kơpal tang-dŏ pơtao 'lơ̆ng rŏ.

³²Năr ei kơnh đĭ-đăng rim khŭl kon bơngai akŭm 'bơ̆t anăp Inh, na Inh gô klah asong lu sư jing 'bar khŭl, kư̆m thoi bơngai wei triu klah asong triu păng bơbe sư 'bar khŭl.

³³Lu bơngai mă thoi triu noh, wă khan bơngai 'lơ̆ng, Inh gô ăn kơ lu sư oei gah 'ma kơ Inh; lu bơngai mă thoi bơbe, wă khan bơngai kơnê̆, Inh gô ăn kơ lu sư oei gah 'ngiĕo kơ Inh.

³⁴Na Inh pơm Pơtao pơgơ̆r lu sư, Inh khan kơ lu bơngai mă oei gah 'ma kơ Inh thoi âu: ‘'Bă Inh ăn kơ iĕm hiôk tơpă, năm mơ̆t oei tơ dêh Sư bĕ, Sư hơmet kơ iĕm anih đơ̆ng Sư pơjing plĕnh teh sơ̆ boih.

³⁵Sơ̆ Inh pơngot, iĕm 'me Inh; sơ̆ Inh ol kơ đak, iĕm asong nhă; Inh bơngai tơmoi, iĕm sơng iŏk oei tơ hnam iĕm.

³⁶Inh ưh kơ đei hơbĕn ao, iĕm tơgŭm; Inh jĭ jăn, iĕm ngôi hơpong; đe tah Inh tơ hnam phak, iĕm kư̆m năm ngôi.’

³⁷“Na lu bơngai 'lơ̆ng tơpăt ei khan: ‘Ơ Kră Yang, layơ nhôn 'bôh Ih pơngot Ih khan nhôn 'me Ih? Layơ nhôn 'bôh Ih ol kơ đak, Ih khan nhôn asong Ih nhă?

³⁸Layơ nhôn 'bôh Ih bơngai tơmoi, na Ih khan nhôn sơng iŏk Ih oei tơ hnam nhôn? Layơ nhôn 'bôh Ih kơ'bah kơ hơbĕn ao, na Ih khan nhôn tơgŭm Ih?

³⁹Layơ nhôn 'bôh Ih jĭ jăn păng đe tah Ih tơ hnam phak, na Ih khan nhôn năm hơpong tơ Ih?’

⁴⁰Na Inh bơngai mă pơm Pơtao iĕm gô khan kơ iĕm thoi âu: ‘Inh khan kơ iĕm tơpă, yua kơ iĕm băt tơgŭm mơnat kơ lu 'nhŏng oh Inh âu mă iĕ hloh kơ lu iĕm đe sơ̆, tơdrong iĕm pơm noh dang iĕm tơgŭm Inh mơ̆n.’

⁴¹“Klaih kơ noh Inh pơma kơ lu bơngai mă oei gah 'ngiĕo kơ Inh dơ̆ng thoi âu: ‘Dang ei 'Bok Kei-Dei wă phak iĕm boih, iĕm jah weh đơ̆ng âu kơdâu năm tơ dơnâu ŭnh to bĕ. Ŭnh noh ưh kơ layơ păt, ŭnh noh 'Bok Kei-Dei hơmet ăn kơ yang Satan păng đĭ-đăng kơ lu linh jang kơ sư năm oei tơ lăm dơnâu ŭnh noh.

⁴²Sơ̆ Inh pơngot, iĕm ưh kơ 'me Inh; sơ̆ Inh ol kơ đak, iĕm kuă asong nhă.

⁴³Inh bơngai tơmoi, iĕm kuă kơ sơng iŏk; Inh kơ'bah kơ hơbĕn ao, iĕm kuă kơ tơgŭm; Inh jĭ jăn păng đe tah Inh tơ hnam phak, iĕm kư̆m kuă kơ năm ngôi.’

⁴⁴Kơplah noh lu sư kư̆m pơma dŏng kơdih khan: ‘Ơ Kră Yang, layơ nhôn 'bôh Ih pơngot, layơ nhôn 'bôh Ih ol kơ đak, dah bơngai tơmoi, dah kơ'bah kơ hơbĕn ao, dah jĭ jăn păng Ih khan đe tah Ih tơ hnam phak mă nhôn ưh kơ năm ngôi păng tơgŭm?’

⁴⁵Na Inh gô khan kơ lu sư: ‘Inh khan kơ iĕm tơpă, yua kơ sơ̆ iĕm ưh kơ tơgŭm mơnat kơ lu 'nhŏng oh Inh âu, lu sư bơngai iĕ hloh kơ iĕm, noh dang iĕm ưh kơ tơgŭm Inh mơ̆n.’

⁴⁶Đơ̆ng noh 'Bok Kei-Dei phak lu sư tơ dơnâu ŭnh ling-lang ưh kơ layơ păt. Gah lu bơngai lui kơ 'Bok Kei-Dei 'lơ̆ng tơpăt, lu sư tŏk oei hơdai hăm 'Bok Kei-Dei ling-lang kư̆m ưh kơ layơ tôch.”