Read bahnar Mat 26 Bible Online

Mat 26 - bahnar bible

Mat 26

¹Yêsu bơtho dôm tơdrong 'noh hei đang boih, na Sư khan kơ lu bơngai pơhrăm păng Sư thoi âu:

²“Iĕm băt mơ̆n oei pă 'bar năr truh kơ năr đe pơm Giĕng Năm Brih. Na đe wă rôp jao Inh Kon Bơngai ăn kơ đe pơ̆ng pơlôch tơ 'long pơglang.”

³Năr noh lu 'bok soi tih păng lu kră sek tơlang đe Juđê năm akŭm tơ hnam 'bok soi tơm, anăn 'bok soi tơm noh Kaiphe.

⁴Lu sư pơđâu chă tơdrong gơh rôp tơtông Yêsu na pơlôch.

⁵Lu sư khan: “Kơplah năr giĕng âu bơ̆n 'nĕ kơ pơm tơdrong noh, yua kơ năr giĕng âu kon tơring tơrang truh lơ, hli kơ lu sư blah bơ̆n.”

⁶Yêsu oei tơ hnam Simôn, bơngai mă đêl jĭ chin tơ Pơlei Bethani.

⁷Kơplah lu sư oei sŏng sa đei minh 'nu drŏ-kăn chĕp minh pôm gŏl đak pơgang 'bâu phu đe gĭt tơpă, gŏl noh đe pơm păng tơmo. Na duch noh tuh tơ kơ̆l Yêsu.

⁸Lu bơngai pơhrăm păng Yêsu mơ'nah 'bôh duch noh pơm thoi noh, na lu sư hil kơ duch noh na khan: “Lơliơ duch noh pơhuach kư̆ kă ưh kơ 'mêm kơ đak pơgang sư?

⁹Pơgang 'bâu phu noh kăp jên dêh, lơliơ sư ưh kơ wă tĕch chă jên asong kơ lu bơngai dơnuh hin?”

¹⁰Yêsu băt kơ lu bơngai pơhrăm mơ'nah pơma thoi noh, na Sư khan: “Yua kơ kiơ iĕm ơh kơ tơdrong sư pơm kơ Inh noh? Sư pơm thoi noh trŏ boih.

¹¹Lu bơngai dơnuh hin sư oei păng iĕm ling-lang, gah Inh ưh kơ oei păng iĕm ling-lang ôh.

¹²Sư tuh đak pơgang 'bâu phu tơ akâu Inh hơdrol kơ đe wă 'bŭ Inh, thoi đe juăt kơ pơm hơdrol kơ 'bŭ bơngai lôch.

¹³Inh khan kơ iĕm tơpă, jơ̆p-jang kơ teh đak, lu bơngai bơtho tơdrong 'nao 'lơ̆ng, lu sư gô roi tơdrong duch noh pơm kơ Inh, wă kơ đe ư-ang kơ tơdrong sư pơm.”

¹⁴Đơ̆ng noh đei minh 'nu bơngai anăn sư Juđa Ikariôt, bơngai đơ̆ng mơjĭt-'bar 'nu pơhrăm păng Yêsu, sư năm tơ lu 'bok soi tih.

¹⁵Sư khan: “Dah inh đei rôp ăn kơ iĕm Yêsu, iĕm apah inh dôm yơ?” Na đe noh jô̆ ăn kơ sư jên, pêng-jĭt hlak jên hu so sơ̆.

¹⁶Đơ̆ng kơplah noh hloi Juđa chă tơdrong plơ̆ plĕch Yêsu.

¹⁷Đe juăt kơ pơm giĕng sa 'Bĕng Mi Ưh Kơ Đei 'Buih Pông tơhngam năr. Na năr mă mônh lăm giĕng noh đe kư̆m juăt kơ sa Giĕng Năm Brih. Na trŏ kơ năr noh lu bơngai pơhrăm păng Yêsu năm jet Sư: “Ih wă kơ nhôn hơmet kơ Ih tơmam sa Giĕng Năm Brih tơ yơ?”

¹⁸Na Yêsu athei lu sư năm tơ minh 'nu bơngai ei tơ Pơlei Jêrusalem na khan kơ sư thoi âu: “'Bok Thây khan wă jê̆ truh năr Sư boih, na lu nhôn bơngai pơhrăm păng Sư wă hơmet tơmam sa Sư pơrŏ kơ Năr Giĕng Năm Brih tơ hnam ih.”

¹⁹Na lu bơngai pơhrăm păng Sư pơm kiơ̆ thoi Sư pơkă, rai hơmet lê̆ tơmam sŏng sa pơrŏ kơ Năr Giĕng Năm Brih tơ noh.

²⁰Truh adrơ̆m kơsơ̆ 'năr mơ̆t boih, na Yêsu sŏng sa hơdai lu bơngai pơhrăm păng Sư.

²¹Kơplah lu sư oei sŏng sa Yêsu khan: “Inh khan kơ iĕm tơpă, đei minh 'nu lăm lu iĕm dang ei wă plơ̆ plĕch Inh.”

²²Yêsu khan kơ lu sư thoi noh, na lu sư ơh sơ'ngon. Na rim 'nu lu sư kơdih kơdih jet Sư khan: “Hăm trŏ kơ inh?” Mơ'nah dơ̆ng khan: “Inh hă?”

²³Yêsu khan: “Bơngai mă chơ̆m sa 'bĕng mi tơ pơnhan đak 'nhot hơdai păng Inh, bơngai noh boih wă plơ̆ plĕch Inh.

²⁴Inh Kon Bơngai gô lôch 'blep trŏ thoi đe chih roi lê̆ hơdrol lăm sơ̆p hla bơar 'Bok Kei-Dei. Mă-lei mơnat kơ bơngai mă plơ̆ plĕch Inh noh đĕch pŭ tơdrong pơmat, 'lơ̆ng hloh đe dah lê̆ kơ tơpŭ kơ sư sơ̆.”

²⁵Na Juđa bơngai wă plơ̆ plĕch Sư ei khan: “Ơ 'Bok Thây, inh hă?” Yêsu khan: “Trŏ boih, ih wă plơ̆ plĕch Inh.”

²⁶Kơplah lu sư sŏng sa, Yêsu iŏk 'bĕng mi krao khan bơnê kơ 'Bok Kei-Dei na phĕ hloi 'bĕng mi noh asong kơ lu sư păng khan: “Iŏk sa 'bĕng âu bĕ, 'bĕng âu boih akâu Inh.”

²⁷Sư iŏk dơ̆ng minh pôm kơchŏk đak hơmu, krao khan bơnê kơ 'Bok Kei-Dei na ăn kơ lu sư păng khan: “Huch bĕ đĭ-đăng kơ iĕm,

²⁸đak hơmu âu boih pham Inh wă lĕch tang ăn lơ bơngai, na 'Bok Kei-Dei pơklaih tơdrong yoch.

²⁹Inh khan kơ iĕm tơpă, Inh ưh pă huch boih đak hơmu âu tơ̆p mă truh tơ năr 'Bă Inh pơgơ̆r ning-mônh 'mơ̆i, na Inh gô huch đak hơmu 'nao hơdai iĕm.”

³⁰Đang Sư pơma thoi noh boih lu sư hơri minh tơdrong 'Bok Kei-Dei, đơ̆ng noh lĕch năm hloi tơ kông Ôliwơ.

³¹Yêsu roi kơ lu bơngai pơhrăm păng Sư: “Đĭ-đăng kơ iĕm măng kơnh kơdâu achăng lê̆ Inh, yua kơ đei nơ̆r chih roi lê̆ hơdrol boih thoi âu: ‘'Bok Kei-Dei gô pơlôch tơ'ngla wei triu, triu kơdâu tơklah đơ̆ng tơ'ngla Sư.’

³²Mă-lei lăp 'Bok Kei-Dei tơiung arih Inh đơ̆ng lôch, Inh năm tơ dêh Galilê hơdrol kơ iĕm.”

³³Na Pêtrôs khan kơ Sư: “Mă lu đe âu achăng lê̆ Ih, gah Inh kuă kơ achăng Ih ôh.”

³⁴Yêsu khan kơ Pêtrôs: “Inh khan kơ ih tơpă, măng kơnh boih hơdrol kơ iĕr ŏ, ih gô sơngah kơ Inh pêng 'măng khan ih ưh kơ băt kơ Inh.”

³⁵Mă-lei Pêtrôs khan: “Mă đe wă pơlôch inh hơdai păng Ih, inh kư̆m kuă kơ sơngah ôh.” Đĭ-đăng lu bôl sư kư̆m khan lei-lăi thoi noh mơ̆n.

³⁶Đơ̆ng noh Yêsu năm hơdai hăm lu bơngai pơhrăm păng Sư tơ anih mă đe anăn Gêtsêmanê. Yêsu khan kơ lu sư: “Iĕm oei 'bơ̆t âu, Inh wă năm krao khan tơ to.”

³⁷Yêsu anhăk ba lăp pêng 'nu đĕch truh tơ anih Sư krao khan. Pêtrôs păng 'bar 'nu bre 'nhŏng oh kon Sêbêđê. Yêsu sơ'ngon dêh yua kơ Sư băt kơdih wă đei tơdrong gleh truh.

³⁸Na Sư khan kơ pêng 'nu noh: “Dang ei Inh sơ'ngon dêh dang lĕ kơ wă lôch, na iĕm ngôi 'bơ̆t âu kral kơchăng ngôi hơpong kơ Inh 'biơ̆ hŏ.”

³⁹Yêsu năm ataih 'biơ̆ đơ̆ng lu pêng 'nu noh na Sư 'nap kŭp kơ̆l krao khan kơ 'Bă Sư thoi âu: “Ơ 'Bă, dah gơh, ăn kơ Inh klaih đơ̆ng tơdrong gleh âu. Mă-lei Ih 'nĕ pơm kiơ̆ kơ Inh, pơm kiơ̆ kơ Ih đĕch.”

⁴⁰Đang boih na Sư wih tơ pêng 'nu noh 'bôh lu sư tep, na Sư khan kơ Pêtrôs: “Lơliơ iĕm ưh kơ gơh kral ngôi hơpong kơ Inh hơya minh jơ?

⁴¹Inh wă kơ iĕm kral ngôi hơpong kơ Inh păng wă kơ iĕm krao khan kơdih wă kơ iĕm huay kơ lui kơ yang Satan pơhlŭ. Inh băt kơ jơhngơ̆m đon iĕm wă ră, mă-lei akâu iĕm ưh kơ kĕ.”

⁴²Yêsu năm krao khan mă 'bar Sư khan thoi âu: “Ơ 'Bă, dah Ih wă kơ Inh chu iŏk tơdrong gleh âu tơpă, kư̆m bưh, gô mơ̆ng kơ Ih wă.”

⁴³Đang boih Sư wih tơ lu đe noh 'bôh oei tep lei-lăi yua kơ măt lu sư trăp ưh kơ kĕ kral.

⁴⁴Sư achăng lê̆ lu đe noh năm krao khan mă pêng, Sư krao khan lei-lăi thoi hei.

⁴⁵Krao khan đang boih Sư wih dơ̆ng tơ lu bơngai pơhrăm păng Sư na khan: “Iĕm tep pơdơh 'biơ̆ hă? Dang ei truh jơ đe wă rôp Inh Kon Bơngai jao kơ lu bơngai yoch boih.

⁴⁶Iung bĕ, bơ̆n jah năm tơ lu sư; iĕm lăng to bơngai mă plơ̆ plĕch Inh wă jê̆ truh boih.”

⁴⁷Kơplah Yêsu oei pơma 'bôh blư kơ Juđa truh, bơngai mă đơ̆ng lăm mơjĭt-'bar 'nu pơhrăm păng Yêsu. Đei lơ bơngai kiơ̆ sư chĕp tak đao mơ'nah chĕp 'long tơnôn, yua kơ lu 'bok soi tih, lu đe kră sek tơlang đe Juđê wơh lu sư năm rôp Yêsu.

⁴⁸Juđa bơngai mă plơ̆ plĕch Yêsu sư tơbăt ăn kơ lu bơngai mă năm rôp Yêsu thoi âu: “Bơngai mă inh chŭm, bơngai noh boih Yêsu, iĕm rôp hŏ.”

⁴⁹Juđa năm hloi tơ Yêsu păng khan: “Ơ 'Bok Thây, liĕm kâu hiôk-hian kơ bơ̆n.” Na sư chŭm hloi Yêsu kiơ̆ thoi đe Juđê juăt kơ kơkuh băl.

⁵⁰Yêsu khan: “Ơ buăl, pơm bĕ tơdrong ih wă pơm.” Na lu sư tơkan rôp kơjăp Yêsu hloi.

⁵¹'Bơ̆t ei đei minh 'nu bơngai dơ̆ng hơdai Yêsu hloch đao koh kơtĕch hloi hla đon đĭch 'bok soi tơm.

⁵²Na Yêsu khan kơ sư: “Tah lê̆ đao ih tơ anglop bĕ. Bu yua đao, sư gô lôch yua kơ đao mơ̆n.

⁵³Dah Inh wă dang ei Inh gơh apinh 'Bă Inh tơjur tơpơh-jĭt rơbâu 'nu linh jang 'lơ̆ng Sư blah dŏng bơ̆n.

⁵⁴Mă-lei sơ̆p hla bơar 'Bok Kei-Dei khan Inh gô lôch tang kon bơngai, na thoi yơ Inh gơh apinh 'Bă Inh dŏng bơ̆n thoi noh?”

⁵⁵Kơplah noh mơ̆n, Yêsu khan kơ lu bơngai mă năm rôp Sư: “Lơliơ iĕm năm tơ âu chĕp tak đao 'long tơnôn dang lĕ đe rôp bơngai tơtông klĕ? Bĭ rim năr Inh bơtho iĕm tơ lăm hnam akŭm tơm iĕm kuă kơ kiơ kơ rôp Inh tơ noh lĕ?

⁵⁶Mă-lei dôm tơdrong noh 'Bok Kei-Dei ăn wă kơ 'blep kơ tơdrong lu bơngai pơtruh nơ̆r Sư chih roi lê̆ hơdrol tơ sơ̆p hla bơar Sư sơ̆.” Đang Sư pơma thoi noh bru đĭ-đăng lu bơngai pơhrăm păng Sư achăng lê̆ Sư kơdâu jăk tơ nai.

⁵⁷Lu đe mă rôp Yêsu ei anhăk Sư tơ 'bok soi tơm, anăn sư Kaiphe. Lu thây bơtho tơdrong juăt đe Juđê hăm lu đe kră sek tơlang akŭm tơ hnam sư noh.

⁵⁸Pêtrôs kiơ̆ lăng Yêsu đơ̆ng rŏng ataih ataih, truh tơ cham hnam 'bok soi tơm, sư oei ngôi hơdai lu bơngai gak. Sư kiơ̆ mơ̆ng wă kơ băt tơdrong đe pơm kơ Yêsu thoi yơ.

⁵⁹Lu 'bok soi tih păng đĭ-đăng lu kră sek tơlang, lu sư chă bơngai mă gơh hơlĕnh, khan sư 'bôh Yêsu pơm yoch, wă kơ lu sư gơh pơlôch Yêsu.

⁶⁰Đei lơ mơ̆n lu bơngai hơlĕnh jâu tă kơ Sư, mă-lei ưh kơ đei tơdrong gơh pơlôch Sư ôh. Tôch đơ̆ng rŏng đei 'bar 'nu bơngai

⁶¹iung pơma jâu Sư khan: “Bơngai âu Sư khan Sư gơh yuih hnam akŭm 'Bok Kei-Dei tơm, na pơm ming plơ̆ng dơ̆ng kơtĕch pêng năr keh hloi.”

⁶²Thoi noh boih na 'bok soi tơm iung jet Yêsu: “Đe jâu Ih, Ih kuă kơ kiơ kơ pơma?”

⁶³Mă-lei Yêsu oei thĕng ưh kơ đei tơl sư thoi yơ ôh. 'Bok soi tơm jet Sư dơ̆ng: “Đei 'Bok Kei-Dei arih tơpă păng Sư 'bôh tôm tơdrong Ih pơm, na Ih athei roi kơ nhôn mă tơpăt, hăm trŏ kơ Ih 'Bok Krist, Kon 'Bok Kei-Dei tơpă dah ưh?”

⁶⁴Yêsu tơl: “Trŏ boih. Inh khan kơ iĕm tơpă, ning-mônh iĕm gô 'bôh Inh Kon Bơngai oei gah 'ma kơ Kră Yang 'Bok Kei-Dei mơsêh tih-tin na đơ̆ng noh jur đơ̆ng plĕnh hăm hơmơ̆l.”

⁶⁵'Bok soi tơm kơtơ̆ng Yêsu pơma thoi noh boih, na sư hek hloi ao sư kơdih yua kơ sư ơh tơpă. Na sư khan: “Bơ̆n mah kăl kơ kiơ chă bơngai nai wă jâu Sư dơ̆ng? Iĕm kơtơ̆ng boih Sư pơma thoi noh hei, Sư pơma blông kơ 'Bok Kei-Dei dêh.

⁶⁶Na iĕm tơchĕng lăng bơ̆n wă pơm kiơ kơ bơngai âu?” Lu bôl sư khan: “Bơngai âu trŏ kơ pơlôch.”

⁶⁷Lu đe ei chă kơsoh pơ'brơh đak hai tơ muh măt Sư, tŭr Sư, mơ'nah tap Sư,

⁶⁸pơma che bơle khan: “Ơ 'Bok Krist, Ih mơsêh, Ih mơyang na dang ei roi lăng kơ nhôn bu tŭr Ih.”

⁶⁹Pêtrôs oei ngôi 'bơ̆t cham hnam, đei minh 'nu drŏ-kăn đĭch đam 'bok soi tơm năm tơ sư păng khan: “Ih kư̆m bơngai oei hơdai Yêsu đơ̆ng dêh Galilê mơ̆n.”

⁷⁰Mă-lei Pêtrôs sơngah 'bơ̆t anăp lu đe ei khan: “Inh ưh kơ băt ih wă khan kiơ.”

⁷¹Na Pêtrôs lĕch đơ̆ng noh ngôi kiơ̆ trong 'măng tơm, đei minh 'nu bơngai drŏ-kăn nai 'bôh sư na khan kơ lu bôl sư kiơ̆ ei: “Bơngai âu oei hơdai Yêsu đơ̆ng Pơlei Nasaret mơ̆n.”

⁷²Mă-lei Pêtrôs oei sơngah khan: “Inh khan kơ iĕm tơpă, inh ưh kơ băt kơ Sư ôh.”

⁷³Lăp đunh 'biơ̆ kơ noh lu bơngai oei kiơ̆ ei năm tơ Pêtrôs păng khan: “Ih khŭl lu sư tơpă na ih pơma lei-lăi thoi lu sư.”

⁷⁴Na Pêtrôs sơngah hiap akâu sư kơdih khan: “Inh ưh kơ băt tơpă bơngai mă iĕm khan noh.” Đang sư pơma thoi noh lêk kơ iĕr ŏ hloi.

⁷⁵Pêtrôs 'blŏk hơdơ̆r hloi kơ tơdrong Yêsu khan kơ sư khan: “Hơdrol kơ iĕr ŏ, ih gô sơngah kơ Inh pêng 'măng.” Thoi noh na sư lĕch hmoi ơh kơdih sư.