Read bahnar Mat 27 Bible Online

Mat 27 - bahnar bible

Mat 27

¹Lăp 'brưch hơdah til pơgê đĭ-đăng lu 'bok soi tih păng lu đe kră sek tơlang chă đon wă pơlôch Yêsu.

²Lu sư chô̆ Yêsu năm jao ăn kơ Pilat, bơngai Rôm mă pơgơ̆r dêh Juđê.

³Lăp Juđa bơngai mă plơ̆ plĕch Yêsu, sư băt kơ đe wă pơlôch Yêsu tơpă, na sư mah hmach kơ plơ̆ plĕch Yêsu, na sư năm tơwih ră kơ lu 'bok soi, lu đe kră, pêng-jĭt hlak jên đơ̆ng đe apah noh.

⁴Sư roi kơ lu đe noh khan: “Inh yoch tơpă, inh jao ăn kơ iĕm wă pơlôch bơngai mă ưh kơ đei pơm yoch kiơ.” Lu đe noh khan: “Măk ai ih, nhôn jao ăn kơ ih jên đang boih.”

⁵Na Juđa năm klơ̆m lê̆ jên noh tơ hnam akŭm 'Bok Kei-Dei tơm, brŏk hrek hơlŏng pơlôch akâu sư kơdih.

⁶Lu 'bok soi dônh jên noh păng khan: “Jên âu jên pơda, dah kiơ̆ kơ tơdrong juăt bơ̆n đơ̆ng sơ̆ ưh kơ gơh pơyơ̆r kơ 'Bok Kei-Dei ôh.”

⁷Na lu sư pơđâu băl iŏk jên noh wă răt minh hlak mir, mir 'noh đe anăn mir bơngai man ge. Lu sư răt mir noh wă pơm bơsat 'bŭ lu bơngai mă ưh kơ khŭl lu sư lôch tơ dêh lu sư.

⁸Yua kơ thoi noh na đe anăn mir 'noh mir pơda oei khơ̆ dang ei.

⁹Tơdrong noh 'blep trŏ thoi Jêrêmi khan lê̆ hơdrol sơ̆ thoi âu: “Đe iŏk pêng-jĭt hlak jên đêl lu bơngai Isơrael khan wă răt minh 'nu bơngai.

¹⁰Na đe iŏk jên noh năm răt mir bơngai man ge, kiơ̆ thoi Kră Yang 'Bok Kei-Dei athei pơm thoi noh.”

¹¹Yêsu dơ̆ng 'bơ̆t anăp Pilat, na Pilat jet Sư khan: “Hăm trŏ kơ Ih pơm pơtao đe Juđê?” Yêsu khan: “Trŏ kơ Inh boih.”

¹²Lu 'bok soi tih, lu đe kră sek tơlang jâu Yêsu lơ tơdrong, mă-lei Yêsu ưh kơ tơl.

¹³Na Pilat khan kơ Sư: “Ih hăm kơtơ̆ng dôm tơdrong đe jâu Ih noh?”

¹⁴Mă-lei Yêsu 'nhŏ kơ tơl, na 'bok tih Pilat sơleng kơ đon.

¹⁵Rim đe pơm Giĕng Năm Brih, 'bok tih tơlĕch minh 'nu bơngai đơ̆ng hnam phak, bơngai bu mă kon pơlei wă kơ tơlĕch.

¹⁶Na năr noh trŏ kơ năr đe pơm Giĕng Năm Brih. Đei minh 'nu bơngai anăn sư 'Barra'ba, đe ang jơ̆p tơring, đe tah sư lăm hnam phak.

¹⁷Lăp lu kon pơlei năm akŭm tơ Pilat, na Pilat jet lu sư thoi âu: “Iĕm wă kơ inh tơlĕch bu, 'Barra'ba dah Yêsu mă đe anăn 'Bok Krist?”

¹⁸Pilat băt hơđăl kơ lu 'bok soi tih ơh klai jao wă pơlôch Yêsu noh.

¹⁹Kơplah Pilat oei tơ hnam sek tơlang, na akăn sư athei đe khan kơ klo sư thoi âu: “E 'nĕ pơm kơnê̆ kơ Yêsu hŏ, Sư ưh kơ đei yoch ôh. Inh sơ'ngon dêh yua kơ inh apo 'bôh tơdrong Sư măng hei hlĭch tơpă.”

²⁰Mă-lei lu đe 'bok soi tih păng lu đe kră sek tơlang pơtrŭt lu kon pơlei pơla athei Pilat tơlĕch kơ lu sư pôm 'Barra'ba na pơlôch Yêsu.

²¹Pilat jet lu kon pơlei pơla dơ̆ng: “'Bar 'nu bre âu, iĕm wă kơ inh tơlĕch ăn kơ iĕm bu?” Na lu sư khan: “Nhôn wă kơ 'Barra'ba.”

²²Na Pilat khan: “Tơ̆ng lei, inh wă pơm kiơ kơ Yêsu mă đe anăn 'Bok Krist âu?” Na lu kon pơlei pơla khan: “Pơ̆ng pơlôch Sư tơ 'long pơglang.”

²³Pilat khan kơ lu sư: “Kơlih kơ kiơ iĕm wă pơlôch Sư? Sư pơm tơdrong yoch kiơ?” Lu sư rai pơma re khan: “Pơ̆ng pơlôch Sư tơ 'long pơglang.”

²⁴Pilat pă kĕ pơjah pơjăng thoi yơ boih, yua kơ 'bơ̆r kon pơlei pơla re rai dêh, na Pilat sŏ đak ôp ti sư kơdih 'bơ̆t anăp đe tơpôl păng khan: “Inh ưh kơ wă pơlôch ôh bơngai âu, iĕm đĕch wă pơlôch.”

²⁵Na đĭ-đăng kơ lu kon pơlei pơla ei khan: “Lê̆ 'Bok Kei-Dei phak nhôn păng lu kon nhôn kư̆m bưh yua kơ nhôn pơlôch Sư.”

²⁶Thoi noh boih na Pilat tơlĕch ăn kơ lu sư 'Barra'ba; sư athei lu linh sư teh tach Yêsu păng sơnguĕt păng pơjao kơ lu linh sư pơ̆ng pơlôch Yêsu tơ 'long pơglang.

²⁷Đơ̆ng noh na lu linh Pilat anhăk Yêsu mơ̆t tơ hnam Pilat, akŭm băl đĭ kơ minh grŭp sư tơ noh.

²⁸Lu linh ei plôh ao Yêsu, na pơhrŭk ăn kơ Sư ao tai 'brê pơm thoi pơtao.

²⁹Păng lu sư iŏk tơlei jơla chuă pơm agăl na pơyơ̆l tơ kơ̆l Yêsu. Lu sư iŏk 'long jra ăn kơ Sư chĕp gah 'ma, na lu linh ei pơm sơtơ̆p kŭl-tăng kơkuh pơngiĕl kơ Sư, lu sư khan: “Kơkuh kơ Ih 'Bok Pơtao bơngai Juđê.”

³⁰Lu sư kơsoh pơ'brơh đak hai tơ akâu akar păng iŏk 'long đơ̆ng Sư chĕp noh tôn kơ̆l Sư.

³¹Lu sư che bơle đang boih na plôh ao tai 'brê noh, pơhrŭk ăn ao Sư kơdih dơ̆ng. Đơ̆ng noh lu sư anhăk Yêsu năm pơ̆ng pơlôch tơ 'long pơglang.

³²Đei minh 'nu bơngai anăn sư Simôn đơ̆ng Pơlei Siren. Sư năm brih trong ei na lu linh pơgŏ sư tôi kơ Yêsu 'long pơglang.

³³Lu linh anhăk Yêsu tơ anih đe anăn Gôlgôtha, wă khan anih kơting kơ̆l bơngai lôch.

³⁴Lu sư ăn kơ Yêsu et sik bơlŭ hăm pơgang sơmren. Mă-lei Yêsu chŭm đĕch ưh kơ et ôh.

³⁵'Blă kơ noh lu linh pơ̆ng Sư tơ 'long pơglang. Lu linh ei lu sư pơpơn dih băl wă kơ băt bu gơh iŏk ao Yêsu, bu iŏk ao ayơ, bu iŏk ao ayơ. Lu sư asong băl ao Yêsu thoi noh.

³⁶Tôm tơdrong lu sư pơm đang boih, na lu sư tơoei ngôi lăng Yêsu.

³⁷Lu sư chih roi tơ gơ'bang iĕ pơ̆ng tơ kơpal kơ Yêsu khan tơdrong kơnê̆ đe jô̆ kơ Sư pơm thoi âu: “'Bok 'nâu, anăn sư Yêsu, 'Bok Pơtao đe Juđê.”

³⁸Lu sư kư̆m pơ̆ng pơlôch 'bar 'nu bơngai tơtông jê̆ hơdai Yêsu, minh 'nu gah 'ma, minh 'nu gah 'ngiĕo kơ Sư.

³⁹Lu đe mă brŏk năm trong ei tơtreh kơ̆l păng tơhmăi Yêsu khan:

⁴⁰“Hmăi Ih khan wă teng pơrăm hnam akŭm 'Bok Kei-Dei tơm wă pơm plơ̆ng kơtĕch pêng năr. Tơdŏng akâu Ih kơdih wăi. Păng Ih khan Kon 'Bok Kei-Dei, jur kơdih đơ̆ng 'long pơglang wăi.”

⁴¹Lu 'bok soi tih, lu thây bơtho tơdrong juăt đe Juđê păng đĭ lu đe kră sek tơlang kư̆m wang che bơle kơ Sư mơ̆n. Lu sư khan thoi âu:

⁴²“Sư gơh dŏng pơklaih đe, mă-lei Sư ưh kơ gơh dŏng pơklaih akâu Sư kơdih. Thoi Sư khan Sư Pơtao đe Isơrael, Sư athei jur kơdih đơ̆ng 'long pơglang dang ei hloi, na lu bơ̆n lui kơ Sư.

⁴³Sư khan lui kơ 'Bok Kei-Dei gô tơgŭm Sư ling-lang păng Sư khan Sư Kon 'Bok Kei-Dei, na bơ̆n gô lăng hăm 'bôh 'Bok Kei-Dei gô tơgŭm Sư tơpă dah ưh.”

⁴⁴'Bar 'nu bơngai tơtông mă đe pơ̆ng hơdai Yêsu kư̆m hơdai pơjăm Sư thoi noh mơ̆n.

⁴⁵Lăp 'năr dơ̆ng, glĭp măng mu jơ̆p kơ teh đak truh tơ pêng jơ kơsơ̆.

⁴⁶Lăp pêng jơ kơsơ̆ Yêsu pơma 'bơ̆r re khan: “Êli, Êli, lamma sabatthani,” wă khan: “Ơ 'Bok Kei-Dei, ơ 'Bok Kei-Dei, yua kơ kiơ Ih achăng lê̆ Inh?”

⁴⁷Đei lu bơngai oei kiơ̆ ei lu sư kơtơ̆ng Yêsu pơma thoi noh, lu sư ngêh kơ Yêsu krao Êli. Lu sư khan: “Ei Sư krao Êli.”

⁴⁸Na đei minh 'nu bơngai kơdâu iŏk tơmam thoi tơpu dơyĕn, sư tong tơ đak sik 'nhŭ, kiĕn tơ 'long na tơ'mơn ăn kơ Yêsu hrip.

⁴⁹Mă-lei lu bơngai 'bơ̆t ei khan: “Bơ̆n gô lăng 'mơ̆i, hăm 'bôh Êli năm tơjur Sư đơ̆ng 'long pơglang tơpă dah ưh.”

⁵⁰Yêsu ôr pơret dơ̆ng, na pơjao bơhngol Sư kơ 'Bok Kei-Dei kơtĕch jơhngơ̆m hloi.

⁵¹Na che đe chô̆ pơgăn tơ hnam akŭm 'Bok Kei-Dei tơm tơhek chuơ̆ng tŏk-bŏk đơ̆ng kơpal tơ ala hloi. Teh adrŏ mơ'nưt mơ'nat păng tơmo kŭk mah pơchah.

⁵²Lơ 'măng bơsat tơpơih kơdih, 'Bok Kei-Dei ăn kơ lu bơngai mă lui kơ Sư lôch boih iung arih.

⁵³Lu sư lĕch đơ̆ng bơsat; đơ̆ng rŏng kơ Yêsu iung arih đơ̆ng lôch na lu sư mơ̆t tơ Pơlei Jêrusalem, đei lơ bơngai tơ'bơ̆p 'bôh lu sư tơ noh.

⁵⁴'Bok tih linh păng lu linh sư wei Yêsu, lu sư 'bôh teh adrŏ păng dôm tơdrong hlĭch noh, lu sư hli dêh, na lu sư khan: “Sư âu Kon 'Bok Kei-Dei tơpă.”

⁵⁵Kư̆m đei lơ lu drŏ-kăn oei tơ anih đe pơlôch Yêsu noh, lu sư lăng đơ̆ng ataih. Lu drŏ-kăn noh đêl kiơ̆ awih awăn kơ Yêsu đơ̆ng dêh Galilê.

⁵⁶Anăn lu sư mơ'nah: Mari đơ̆ng Pơlei Mađơla, Mari mĕ bre Yakơ hăm Yôsep păng minh 'nu mĕ bre Yakơ hăm Yôhan, 'bă bre sư Sêbêđê.

⁵⁷Đei minh 'nu bơngai mơdrŏng đơ̆ng Pơlei Armơthê, anăn sư Yôsep, sư kư̆m lui kơ Yêsu mơ̆n.

⁵⁸Lăp 'năr kơsơ̆ boih sư năm apinh Pilat wă iŏk 'bŭ atâu Yêsu na Pilat athei lu linh sư ăn kơ Yôsep iŏk 'bŭ atâu Yêsu.

⁵⁹Yôsep iŏk atâu Yêsu ei, lôm păng che 'nao răt.

⁶⁰Na sư năm 'măn atâu Yêsu tơ lăm bơsat tơmo mă sư 'nao pơm hiă kơdih. Sư tơgrŏl minh pôm tơnglơ̆p tơmo tih klơ̆p 'măng bơsat, đang boih na sư brŏk.

⁶¹Mari đơ̆ng Pơlei Mađơla hăm Mari nai, bre sư oei ngôi jê̆ bơsat.

⁶²Năr Yêsu lôch noh, năr đe hơmet tôm tơdrong tơmam wă yua lăm năr pơdơh Sa'bat. Na truh dơning, wă khan năr pơdơh Sa'bat, na lu 'bok soi tih hăm lu bơngai Pharisi năm akŭm păng Pilat.

⁶³Lu sư khan kơ Pilat: “Ơ 'bok, nhôn 'blŏk kơ bơngai hơlĕnh noh hơtai Sư oei arih Sư khan thoi âu: ‘Pêng năr đơ̆ng rŏng kơ Inh lôch, Inh gô iung arih dơ̆ng.’

⁶⁴Yua kơ thoi noh na dang ei apinh ih asong ăn kơ nhôn linh ih năm gak bơsat Sư mă kơjăp kơtĕch pêng năr noh, hli kơ lu bơngai pơhrăm păng Sư pơih tơtông iŏk akâu Yêsu na chă roi kơ đe khan Sư iung arih boih; păng hli kơ lu kon pơlei pơla lui kơ tơdrong lu sư chă roi kơ đe khan Yêsu iung arih noh kơjăp hloh kơ lu sư lui kơ Yêsu oei arih sơ̆.”

⁶⁵Na Pilat khan: “Kư̆m bưh mơ̆n, iĕm khan kơ linh gak 'măng bơsat Sư mă brĕ hŏ.”

⁶⁶Đơ̆ng noh na lu sư anhăk lu linh ei tơ bơsat. Lu sư pik đak 'blit tơ minh dăng hla bơar pơklep kơ 'măng tơmo, kuă ăn đe mơ̆t; păng dah đe mơ̆t lu sư kư̆m băt hloi. Păng pơkă kơ lu linh gak 'măng bơsat noh mă brĕ. Đang boih na lu sư brŏk.