Read bahnar Mat 5 Bible Online

Mat 5 - bahnar bible

Mat 5

¹Yêsu 'bôh lơ bơngai wă năm tơ Sư, na Sư tŏk tơ kông; truh kơpal kông boih na Sư tơoei wă bơtho đe, lu bơngai pơhrăm păng Sư năm tơ Sư tơ ei.

²Yêsu bơtho lu bơngai ei thoi âu.

³“Pŭn dêh lu bơngai mă băt kăl kơdih kơ 'Bok Kei-Dei tơgŭm sư lui kơjăp, 'Bok Kei-Dei gô pơgơ̆r lu sư.

⁴“Pŭn dêh lu bơngai mă ơh sơ'ngon, 'Bok Kei-Dei wă pơlung lu sư.

⁵“Pŭn dêh lu bơngai mă ưh kơ wă pơang akâu sư kơdih, lu sư gô đei iŏk tơmam 'Bok Kei-Dei pơkă.

⁶“Pŭn dêh lu bơngai 'maih pơm 'lơ̆ng thoi 'Bok Kei-Dei wă, 'Bok Kei-Dei gô ăn kơ sư jing 'lơ̆ng thoi noh.

⁷“Pŭn dêh lu bơngai mă băt mơnat kơ đe, 'Bok Kei-Dei kư̆m mơnat kơ lu sư mơ̆n.

⁸“Pŭn dêh lu bơngai jơhngơ̆m 'lơ̆ng rơgoh, lu sư gô 'bôh 'Bok Kei-Dei.

⁹“Pŭn dêh lu bơngai gơh pơm sơlam kơ đe wă kơ lu sư tơhiôk băl, đe gô jô̆ sư kon 'Bok Kei-Dei.

¹⁰“Pŭn dêh lu bơngai mă đe pơmat sư yua kơ sư pơm 'lơ̆ng thoi 'Bok Kei-Dei wă, bơngai noh 'Bok Kei-Dei gô pơgơ̆r sư ling-lang.

¹¹“Hiôk bĕ lu iĕm, mă đe pơjăm pơjuă iĕm, pơm kơnê̆ kơ iĕm, dah bâu roi 'bơm iĕm tôm tơdrong yua kơ iĕm lui kơ Inh.

¹²'Noh kư̆m thoi đe pơm kơnê̆ kơ lu bơngai pơtruh nơ̆r 'Bok Kei-Dei kră sơ̆ thoi noh mơ̆n. Na dang ei iĕm chhôk ngă 'nă hal bĕ, yua kơ tơ Pơlei 'Lơ̆ng kơnh 'Bok Kei-Dei wă apah iĕm tơpă.

¹³“Iĕm thoi lĕ kơ 'boh bơ̆n tah kơ tơmam sa 'băt 'lơ̆ng, wă kơ lu bơngai ala teh âu 'lơ̆ng 'biơ̆. Mă-lei dah 'boh jing sap, bơ̆n ưh kơ đei kiơ wă pơm kơ 'boh 'băt dơ̆ng. Thoi noh 'boh jing ưh pă yua boih, bơ̆n tuh hŭt lê̆ tơ teh, đe gô juă bơhlơ̆r đĕch.

¹⁴“Lu iĕm thoi lĕ kơ hơdah jơ̆p kơ kon bơngai lăm teh đak, thoi minh pôm pơlei oei kơpal kông ưh kơ đei layơ hlơp.

¹⁵Bơ̆n tơ̆k ŭnh kơđeng wă kơ hơdah, bơ̆n ưh kơ iŏk reo klơ̆p lê̆ ôh. Bơ̆n iŏk ŭnh kơđeng noh tơ'băk tơ jrăng na hơdah jơ̆p kơ bơngai lăm hnam.

¹⁶Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm 'lơ̆ng, na đe bơnê hăm ư-ang kơ 'Bă bơ̆n tơ plĕnh ti.

¹⁷“Iĕm 'nĕ tơchĕng 'bôh Inh truh tơ âu khan Inh wă pơrăm đĭ dôm tơdrong juăt Môis dah tơdrong lu 'bok pơtruh nơ̆r 'Bok Kei-Dei sơ̆. Ưh ôh, Inh truh tơ âu kang wă jang mă tôm mă 'blep tôm tơdrong lu sư bơtho khan sơ̆.

¹⁸Inh khan kơ iĕm tơpă, tơdrong juăt Môis oei oei ling-lang mă truh năr tôch ning-mônh ưh kơ đei hiong minh apăk dah minh nơ̆r ôh.

¹⁹Thoi noh na dah bu tŭk minh apăk dah minh nơ̆r tơdrong juăt iĕ ioch păng sư bơtho đe wă kơ đe tŭk mơ̆n, bơngai 'noh 'Bok Kei-Dei jô̆ sư bơngai iĕ hloh kơ đĭ-đăng lăm lu bơngai lui. Mă-lei dah bu kiơ̆ trŏ kơ tơdrong juăt păng sư bơtho đe wă kơ đe pơm kiơ̆ mă trŏ mơ̆n, bơngai 'noh gơh pơm tih lăm lu bơngai lui.

²⁰Lu thây bơtho tơdrong juăt đe Juđê păng lu bơngai Juđê mă lui kơ 'Bok Kei-Dei kiơ̆ kơ tơdrong Pharisi, lu sư ưh kơ kiơ̆ tơdrong juăt tơpă ôh. Na Inh khan kơ iĕm tơpă, dah iĕm ưh kơ adrin kiơ̆ tơdrong juăt hloh kơ lu đe noh, lei iĕm ưh kơ gơh mơ̆t tơ dêh char 'Bok Kei-Dei ôh.

²¹“Iĕm kơtơ̆ng boih đe bơtho tơdrong juăt kră sơ̆ khan: ‘Iĕm 'nĕ pơlôch đe,’ ‘dah bơngai bu pơlôch đe bơngai 'noh đe rôp sek tơlang sư.’

²²Na Inh bơtho iĕm dang ei thoi âu: Bơngai bu hil areh kơ 'nhŏng oh sư, bơngai 'noh trŏ kơ đe kư̆m rôp sek tơlang sư mơ̆n; bơngai bu pơjăm pơjuă 'nhŏng oh sư, bơngai 'noh trŏ kơ đe rôp sư tŏk sek tơlang tơ lu 'bok tih; bơngai bu pơjăm pơjuă 'nhŏng oh sư kơtul kơhlôh kơwao, lu bơngai thoi noh trŏ kơ 'Bok Kei-Dei wă phak sư lăm dơnâu ŭnh ning-mônh.

²³Thoi noh na dah iĕm đei tơmam kiơ kiơ wă pơyơ̆r tơ hnam 'Bok Kei-Dei, na iĕm 'blŏk kơ 'nhŏng oh iĕm đei tơdrong ơh kơ iĕm,

²⁴iĕm 'măn lê̆ tơmam lăm noh, lĕch kơdâu năm pơlung sư 'mơ̆i, na mơ̆t pơyơ̆r tơmam iĕm noh.

²⁵“Dah đe năm apinh tơmam đêl iĕm hre kơ đe, na iĕm jah pơđang tơdrong hre noh hloi, 'nĕ kơ gô sư anhăk iĕm tơ 'bok sek tơlang, hli kơ đe gô rôp tah iĕm tơ hnam phak.

²⁶Inh khan kơ iĕm tơpă, đe oei phak iĕm khŏm khŏm 'mơ̆i, tơ̆p iĕm chu duh tôm 'mơ̆i, na đe tơlĕch tơlăi iĕm.

²⁷“Iĕm kơtơ̆ng boih tơdrong juăt đe bơtho khan: ‘Iĕm 'nĕ plah klo kăn đe.’

²⁸Na Inh bơtho iĕm dang ei thoi âu: Bơngai bu 'bôh drŏ-kăn, rŏ kơ ngôi hăm sư, bơngai 'noh yoch boih, bơngai 'noh dang lĕ pơm kư̆ kă hăm drŏ-kăn boih.

²⁹Dah minh pah măt iĕm gah 'ma pơm kơ iĕm yoch, kuek tŭk minh pah măt iĕm noh, na oei pă minh pah măt, 'noh 'lơ̆ng hloh kơ iĕm oei tôm 'bar pah măt, mă-lei wă huŏng pơđĭ hăm akâu tơ lăm dơnâu ŭnh 'Bok Kei-Dei phak.

³⁰Dah minh pah ti iĕm gah 'ma pơm kơ iĕm yoch, chơ̆ng lê̆ minh pah ti iĕm noh, na oei pă minh pah ti, 'noh 'lơ̆ng hloh kơ iĕm oei tôm 'bar pah ti mă-lei wă huŏng pơđĭ hăm akâu tơ lăm dơnâu ŭnh 'Bok Kei-Dei phak.

³¹“Đe đei bơtho sơ̆ thoi âu: ‘Bơngai bu wă achăng akăn sư, sư athei pơm hla bơar mă trŏ 'mơ̆i na gơh achăng.’

³²Na Inh bơtho iĕm dang ei thoi âu: Akăn sư ưh kơ đei pơm yoch kơ sư, mă-lei klo sư achăng tŭk, na akăn sư jing iŏk klo plơ̆ng, na klo kăn mă đơ̆ng rŏng noh kư̆m dang pơm yoch mơ̆n, yua kơ klo sư hơdrol achăng ưh kơ trŏ kơ tơdrong achăng, na 'Bok Kei-Dei oei jô̆ bre sư klo kăn so đĕch. Mă-lei tơdrong yoch lu sư noh, klo sư mă hơdrol pơm kơ lu sư jing yoch đĭ-đăng.

³³“Iĕm kơtơ̆ng boih tơdrong đe bơtho lu khŭl kră sơ̆ thoi âu: ‘Bu pơkă kơ đe mah hiap akâu sư kơ 'Bok Kei-Dei, bơngai noh ưh kơ gơh hơlĕnh, ưh kơ gơh anul ôh, bơngai noh athei pơm 'blep thoi sư pơkă tơpă.’

³⁴Na Inh bơtho iĕm dang ei thoi âu: Dôm tơdrong iĕm pơkă wă kơ đe băt kơ iĕm gô pơm, iĕm 'nĕ pă hiap akâu kơdih kơ 'Bok Kei-Dei dah hiap akâu kơ tơdrong kiơ nai. Thoi noh na iĕm 'nĕ pă pơkă pao anăn plĕnh, yua kơ plĕnh dang tang-dŏ 'Bok Kei-Dei tơoei, noh dang iĕm pơkă pao anăn 'Bok Kei-Dei mơ̆n.

³⁵'Nĕ pă pơkă pao anăn teh yua kơ teh âu dang anih Sư 'măn wă pioh jơ̆ng. 'Nĕ pă pơkă pao anăn Pơlei Jêrusalem, yua kơ pơlei noh jơ̆ pơlei Pơtao tih.

³⁶Iĕm 'nĕ pă pơkă pao kơ̆l iĕm, yua kơ iĕm ưh kơ gơh pơm kơ minh dăng sŏk găm dah kok, 'Bok Kei-Dei đĕch gơh pơm tơdrong noh.

³⁷Iĕm wă pơkă kơ đe tơdrong kiơ kiơ, iĕm athei pơkă mă tơpăt hăm 'bơ̆r hoh đĕch, 'nĕ pă pơkă pao anăn 'Bok Kei-Dei dah tơdrong kiơ kiơ nai. Dah iĕm pơkă kơ đe thoi noh hei, 'noh đơ̆ng yang kơnê̆ pơhlŭ iĕm pơm thoi noh đĕch.

³⁸“Iĕm kơtơ̆ng boih tơdrong đe bơtho thoi âu: ‘Bu pơrăm măt đe, đe pơrăm măt sư mơ̆n; bu pơrăm sơnĕnh đe, đe pơrăm sơnĕnh sư mơ̆n.’

³⁹Thoi noh boih na gah Inh bơtho iĕm thoi âu: Đe pơm kơnê̆ kơ iĕm, iĕm 'nĕ pơm plơ̆ kơ đe; đe tap 'bŏ iĕm gah 'ma, ăn sư tap gah minh dơ̆ng.

⁴⁰Bu kêng iĕm tơ đe kră wă kơ iĕm duh kơ sư minh blah ao, iĕm athei ăn đĭ hloi 'bar blah.

⁴¹Lu linh pơgŏ wă kơ iĕm kiơ̆ tơgŭm sư dang minh kơsô̆, iĕm athei pơhloh truh 'bar kơsô̆.

⁴²Bu apinh tơmam iĕm, iĕm athei asong; bu apinh mơng, iĕm athei ăn 'bônh.

⁴³“Păng iĕm kư̆m kơtơ̆ng boih tơdrong đe bơtho sơ̆ thoi âu: ‘Athei 'mêm kơ bôl juăt, areh kơ bơngai pơm kơnê̆ kơ bơ̆n.’

⁴⁴Mă-lei gah Inh bơtho iĕm thoi âu: Iĕm athei 'mêm mơnat kơ lu bơngai mă pơm kơnê̆ kơ iĕm, krao khan apinh 'Bok Kei-Dei tơgŭm sư,

⁴⁵thoi noh na iĕm gơh jing kon 'Bok Kei-Dei 'Bă bơ̆n tơ plĕnh ti, yua kơ Sư kư̆m 'mêm kơ lu bơngai noh, na Sư ăn măt 'năr pơchrang hơdah kơ đĭ-đăng bơngai, mă bơngai 'lơ̆ng mă bơngai kơnê̆. Sư ăn đak 'mi lei-lăi mơ̆n ưh kơ 'mêm kơ bu wă pơdê bu ôh.

⁴⁶Dah iĕm 'mêm pôm lu bơngai mă 'mêm kơ iĕm đĕch, lei 'Bok Kei-Dei ưh kơ bơnê kơ iĕm ôh. Bĭ lu bơngai pơgŏ iŏk jên thuê̆ kư̆m băt 'mêm kơ bôl sư.

⁴⁷Dah iĕm bôl tơduă lu 'nhŏng oh iĕm đĕch, lei 'Bok Kei-Dei lăng iĕm ưh kơ đei pha kiơ ôh. Lei lu bơngai mă ưh kơ lui kư̆m pơm thoi noh mơ̆n.

⁴⁸Thoi noh na iĕm athei 'mêm kơ đĭ-đăng bơngai kư̆m thoi 'Bă bơ̆n tơ plĕnh ti 'mêm kơ đĭ-đăng bơngai thoi noh mơ̆n.