Read bahnar Mar 1 Bible Online

Mar 1 - bahnar bible

Mar 1

¹Âu boih roi gah tơm hmơm tơdrong 'nao 'lơ̆ng Yêsu Krist, Kon 'Bok Kei-Dei:

²Êsai, bơngai pơtruh nơ̆r 'Bok Kei-Dei sơ̆, sư khan lê̆ hơdrol, na chih lăm sơ̆p hla bơar sư thoi âu: 'Bok Kei-Dei khan: “Âu Inh wơh minh 'nu bơngai pơtruh nơ̆r Inh hơdrol, wă kơ sư hơmet trong kơ Ih.”

³Bơngai ei bơtho tơ char glă thoi âu: “Bơ̆n tơbral kơdih tơdrong yoch wă khan bĕ hơmet trong kơ Kră Yang păng pơm trong Sư mă tơpăt.”

⁴Tơdrong 'noh 'blep tơpă: Yôhan năm pơm 'batem kơ đe tơ char glă chơngue, sư bơtho athei đe tơbral kơdih tơdrong yoch, na iŏk 'batem wă kơ 'Bok Kei-Dei pơklaih yoch sư.

⁵Đĭ-đăng bơngai đơ̆ng dêh Juđê hăm đĭ-đăng bơngai lăm Pơlei Jêrusalem năm tơ Yôhan. Lu sư roi kơ 'Bok Kei-Dei tơdrong yoch lu sư, na Yôhan pơm 'batem kơ lu sư tơ krong Jôrđăn.

⁶Yôhan hrŭk ao tanh păng sŏk aseh lăk-đa păng tah gơ'năm akar tơ bơnei sư. Tơmam sa sư lep păng đak sut bri đĕch.

⁷Sư bơtho đe khan: “Đei minh 'nu bơngai gô truh đơ̆ng rŏng kơ inh, Sư 'Bok tih tơpă. Mă khan Sư athei inh yaih ăn tơlei chơkhŏ Sư đĕch inh kư̆m ưh kơ hơnhŏ 'mơ̆i, inh ưh kơ pơ̆n ngơk lăng Sư ôh.

⁸Inh pơm kơ iĕm 'batem păng đak mă-lei Sư pơm kơ iĕm 'batem hăm Yang Bơhngol 'Lơ̆ng.”

⁹Kơplah noh Yêsu truh đơ̆ng Pơlei Nasaret dêh Galilê, na Yôhan pơm 'batem kơ Sư lăm đak krong Jôrđăn.

¹⁰Lăp Yêsu tŏk đơ̆ng đak, Sư 'bôh hloi plĕnh tơpơih păng Yang Bơhngol 'Lơ̆ng thoi lĕ sem kơtơp jur oei tơ Sư.

¹¹Păng kư̆m đei nơ̆r pơma đơ̆ng plĕnh khan: “Ih boih Kon Inh mă 'mêm kơeng tơpă, Inh lăp đon kơ Ih tôm tơdrong.”

¹²Na Yang Bơhngol 'Lơ̆ng anhăk hloi Yêsu năm tơ char glă chơngue.

¹³Sư oei tơ char glă ei puăn-jĭt năr na yang Satan năm pơhlŭ Sư. Sư oei păng kon sem bri brah đĕch, linh jang 'lơ̆ng đơ̆ng 'Bok Kei-Dei chă awih awăn kơ Sư tơmam sa.

¹⁴Lăp đơ̆ng rŏng kơ đe phak Yôhan, Yêsu năm tơ dêh Galilê chă bơtho đe tơdrong 'nao 'lơ̆ng 'Bok Kei-Dei.

¹⁵Sư khan: “Năr âu trŏ kơ năr 'Bok Kei-Dei wă pơgơ̆r iĕm boih. Iĕm athei tơbral kơdih tôm tơdrong yoch iĕm, na lui kiơ̆ tơdrong 'nao 'lơ̆ng Sư.”

¹⁶Kơplah Sư năm kiơ̆ ter jih đak dơsĭ Galilê Sư 'bôh bre Simôn păng oh sư Andrê oei traih jal chă ka tơ đak dơsĭ, yua kơ bre sư bơngai juăt kơ chă ka ling-lang.

¹⁷Na Yêsu khan kơ bre sư thoi âu: “Bĕ bơ̆n kiơ̆ Inh, na Inh pơchĕp ăn kơ biĕm tơdrong jang chă bơngai lui kơ 'Bok Kei-Dei.”

¹⁸Na bre sư 'blă achăng lê̆ jal bre sư, na kiơ̆ hloi Yêsu.

¹⁹Lu sư yak ataih 'biơ̆ đơ̆ng noh, Sư 'bôh bre Yakơ păng oh sư Yôhan kon Sêbêđê. Bre sư oei hrăk ming jal tơ thŏng-nan.

²⁰Yêsu krao bre sư, na bre sư kiơ̆ hloi Yêsu, lê̆ 'bă sư păng lu bơngai bơ̆jang kơ sư tơ thŏng-nan.

²¹Đơ̆ng noh lu sư năm tơ Pơlei Kapernum. Kơplah năr pơdơh Sa'bat, Yêsu năm akŭm tơ hnam akŭm 'Bok Kei-Dei păng bơtho đe tơ noh.

²²Đe mơ̆ng chrêu kơ đon, yua kơ dôm nơ̆r Sư bơtho gơh hơgei tơpă, ưh kơ thoi lu thây bơtho tơdrong juăt lu đe Juđê chă bơtho đe.

²³Kơplah ei đei minh 'nu bơngai yang kơnê̆ mơ̆t kư̆m mơ̆t tơ hnam ei. Sư pơma 'bơ̆r re khan:

²⁴“Ơ Yêsu đơ̆ng Pơlei Nasaret, Ih wă pơm kiơ kơ khŭl nhôn? Ih năm tơ âu wă pơrăm khŭl nhôn hă? Inh băt kơ Ih, Ih 'Bok 'Lơ̆ng Tơpăt đơ̆ng 'Bok Kei-Dei.”

²⁵Na Yêsu khă yang kơnê̆ ei thoi âu: “E 'nĕ pă pơma, e jah lĕch đơ̆ng akâu sư âu wăi.”

²⁶Na yang kơnê̆ ei pơm kơ sư pơtơ̆l, pơma pơret, na lĕch jăk hloi đơ̆ng bơngai ei.

²⁷Thoi noh na đĭ-đăng bơngai 'bôh Sư pơm thoi noh, lu sư sơleng kơ đon na sư tơjet dih băl khan: “Sư bơtho tơdrong kiơ âu kih? Sư bơtho tơdrong 'nao dah kiơ, na Sư gơh pơpuh yang kơnê̆, na yang kơnê̆ chu Sư?”

²⁸Đơ̆ng Yêsu pơm thoi noh, na đe kơtơ̆ng ang tơdrong Sư jơ̆p-jang kơ dêh Galilê hloi.

²⁹Yêsu lĕch đơ̆ng hnam akŭm ei năm tơ hnam bre Simôn păng Andrê. Bre Yakơ păng Yôhan kư̆m kiơ̆ Sư mơ̆n.

³⁰Na tơnei Simôn oei păn kơ bơlŏ na đe khan kơ Yêsu.

³¹Yêsu năm jê̆ sư hiot tơiung sư. Kơtă ei sư klaih hloi kơ bơlŏ, na sư chă awih awăn kơ đe Yêsu.

³²Lăp 'năr mơ̆t adrơ̆m kơsơ̆ ei đe năm ba tơ sư dôm lu bơngai jĭ jăn păng lu bơngai yang mơ̆t.

³³Na đĭ-đăng lu bơngai lăm pơlei ei akŭm 'bơ̆t cham hnam Simôn păng Andrê.

³⁴Yêsu pơklaih lơ bơngai jĭ jăn păng pơpuh lu yang kơnê̆ mă mơ̆t lăm bơngai. Sư khă lu yang kơnê̆ pơma tơbăt Sư kơ đe kơlih kơ lu yang ei băt kơ Sư.

³⁵Lăp pơgê hrôih năr đơ̆ng rŏng, Yêsu lĕch hloi đơ̆ng pơlei ei năm tơ anih kueng kơdrô̆, Sư krao khan kơdrô̆ Sư tơ ei.

³⁶Đe Simôn chă Sư.

³⁷Chă Sư 'bôh boih na khan: “Đei lơ bơngai chă Ih.”

³⁸Na Sư khan kơ đe Simôn: “Bĕ bơ̆n năm jơ̆p pơlei kiơ̆ âu wă kơ Inh gơh chă bơtho lu sư, kơlih kơ tơdrong noh na Inh năm tơ âu.”

³⁹Na Sư năm jơ̆p kơ dêh Galilê chă bơtho tơ lu hnam akŭm 'Bok Kei-Dei păng pơpuh lu yang kơnê̆ đơ̆ng lăm akâu bơngai mơ̆n.

⁴⁰Đei minh 'nu bơngai jĭ chin năm apinh Yêsu pơklaih sư. Sư sơtơ̆p kŭl-tăng apinh khan: “Dah Ih wă, Ih gơh pơklaih inh.”

⁴¹Yêsu lăng mơnat kơ bơngai 'noh na chro ti pel bơngai 'noh păng khan: “Inh wă tơpă pơklaih ih, Inh pơklaih ih dang ei.”

⁴²Na bơngai jĭ ei klaih kơtă hloi.

⁴³Yêsu athei sư jah năm tơ 'bok soi păng khă sư hăm nơ̆r tơdrăp:

⁴⁴“Ih 'nĕ chă roi kơ đe hŏ. Dang ei ih klaih boih na ih năm tơ'bôh akâu ih kơ 'bok soi păng soi sơmah kơ 'Bok Kei-Dei kiơ̆ thoi Môis pơkă sơ̆ wă kơ đe băt tơdrong jĭ ih klaih tơpă boih.”

⁴⁵Mă-lei bơngai 'noh lĕch, sư chă roi kơ đe. Mă sư năm tơ yơ yơ kư̆m roi kơ đe tơdrong 'noh mơ̆n. Na Yêsu jing ưh kơ gơh mơ̆t mă pơlei tơ yơ yơ yua kơ kon pơlei pơla chă Sư lơ tơpă. Na Sư oei hơdai hăm lu bơngai pơhrăm păng Sư tơ anih kueng kơdrô̆. Mă-lei jơ̆p tơring tơrang oei năm chă Sư 'mơ̆i.