Read bahnar Mar 13 Bible Online

Mar 13 - bahnar bible

Mar 13

¹Lăp Yêsu lĕch đơ̆ng hnam akŭm 'Bok Kei-Dei tơm, đei minh 'nu bơngai pơhrăm păng Sư khan kơ Sư: “Ơ 'Bok Thây, Ih lăng deh, hnam âu đe pơm păng tơmo rŏ dêh iih?”

²Yêsu khan kơ sư: “Ih 'bôh boih hnam akŭm tih âu, mă-lei ning-mônh hnam âu gô pơchah reng 'beng ưh pă đei tơmo ayơ tơklep băl dơ̆ng. Đe gô teh pơchah đĭ.”

³Đơ̆ng rŏng kơ noh Yêsu năm ngôi tơ kông Ôliwơ pah to thong đơ̆ng hnam akŭm tơm ei. Na Pêtrôs, Yakơ, Yôhan, Andrê, lu sư jet Yêsu kơdrô̆ lu sư khan:

⁴“Apinh Ih roi kơ nhôn layơ đe wă pơrăm hnam akŭm 'Bok Kei-Dei to păng wă kơ nhôn băt tơdra liơ tơdrong noh gô truh.”

⁵Yêsu khan kơ lu sư: “Iĕm athei kơchăng kơdih hli kơ đe wă pơhlŭ pơlung iĕm kiơ̆ sư.

⁶Ning-mônh gô đei lơ bơngai truh sư anăn măt Inh khan sư kơdih 'Bok Krist. Kư̆m đei lơ bơngai lui kơ sư pơhlŭ.

⁷Păng iĕm kơtơ̆ng đe tơblah mă jê̆ mă ataih, iĕm 'nĕ kơ hli hŏ. Tơdrong 'noh ưh kơ jor ôh, gô đei 'mơ̆i, mă-lei năr tôch ưh tam mă truh ôh kơplah noh.

⁸Đei dêh âu iung blah dêh to, dêh to iung blah dêh nai. Gô đei teh adrŏ lơ anih tơ âu tơ to. Păng đei tơdrong pơngot rơwĕt. Mă-lei kơplah noh tơdrong gleh truh 'nao wă pơtơm đĕch.

⁹“Păng iĕm athei kơchăng kơdih yua kơ đe gô rôp iĕm jao kơ lu kră sek tơlang. Đe gô tôn teh iĕm tơ lăm hnam akŭm đe Juđê. Đe kư̆m gô anhăk iĕm dơ̆ng 'bơ̆t anăp lu 'bok tih hăm lu 'bok pơtao yua kơ iĕm lui kơ Inh, na iĕm kư̆m gơh ră roi kơ lu sư băt kơ inh.

¹⁰Gô lu bơngai lui kơ Inh bơtho tơdrong 'nao 'lơ̆ng jơ̆p-jang kơ teh đak 'mơ̆i na truh năr tôch.

¹¹Mưh đe rôp iĕm, jao iĕm kơ lu kră sek tơlang, iĕm 'nĕ mah tơchĕng hơdrol kơ tơdrong iĕm wă pơma kơ lu sư noh hŏ, yua kơ đei Yang Bơhngol 'Lơ̆ng tơgŭm iĕm kơplah lăm iĕm wă pơma, ưh kơ sĭ kơ iĕm gơh pơma kơdih ôh.

¹²Kư̆m gô đei 'nhŏng jao oh sư bơngai lui tơ̆p mă đe pơlôch. Kư̆m đei mơ'nah 'bă sư jao kon sư tơ̆p mă đe pơlôch. Kư̆m đei mơ'nah kon sư hil plơ̆ kơ mĕ 'bă sư jao bre sư ăn kơ đe pơlôch.

¹³Đĭ-đăng kơ bơngai gô areh arĕnh kơ iĕm yua kơ iĕm lui kơ Inh. Thoi noh bơngai bu adrin lui kơ Inh truh năr tôch, bơngai 'noh gô klaih.

¹⁴“Ning-mônh iĕm gô 'bôh lu bơngai kơnê̆ wă pơrăm kon bơngai gô truh, lu sư oei tơ anih đe kơ̆m kơ oei. Na bu đŏk lăng hla bơar âu đon sư athei pơwao kơdih. Lu iĕm bơngai mă oei tơ dêh Juđê 'bôh thoi noh iĕm athei jăk tơ kông ataih đơ̆ng lu sư hloi.

¹⁵Bơngai bu ngôi tơ 'ngoaih hnam, 'nĕ pă mơ̆t iŏk tơmam sư tơ hnam dơ̆ng.

¹⁶Bơngai bu oei jang tơ mir, 'nĕ pă brŏk iŏk ao tơnŏ sư tơ hnam.

¹⁷Kơplah ei kơnh, lu bơngai drŏ-kăn akâu kơhioh păng lu bơngai drŏ-kăn tơmŏm kon, lu sư pơmat-tat dêh.

¹⁸Mă-lei iĕm athei krao khan apinh 'Bok Kei-Dei 'nĕ ăn tơdrong noh truh kơplah bơyan 'mi hngach,

¹⁹yua kơ kơplah ei kơnh gô đei tơdrong tơblah tih hloh kơ đơ̆ng năr 'Bok Kei-Dei pơjing plĕnh teh sơ̆ khơ̆ dang ei. Mă-lei đơ̆ng rŏng kơ noh kư̆m huay kơ mah dang noh mơ̆n.

²⁰Dah 'Bok Kei-Dei ưh kơ achơ̆t lê̆ tơdrong tơblah tih noh, ưh kơ đei bu arih ôh. Mă-lei 'Bok Kei-Dei achơ̆t lê̆, yua kơ Sư mơnat kơ lu bơngai mă Sư rơih boih.

²¹“Năr noh dah đe khan kơ iĕm 'Bok Krist tơ âu boih, 'Bok Krist tơ to boih, iĕm 'nĕ kơ lui hŏ,

²²yua kơ năr noh kơnh đei lơ bơngai pơm Krist, đei lơ bơngai khan sư bơngai pơtruh nơ̆r 'Bok Kei-Dei. Lu sư kư̆m gơh pơm tơdrong mơsêh wă kơ lu bơngai mă 'Bok Kei-Dei rơih boih lui kơ lu sư pơhlŭ ră.

²³Mă-lei iĕm athei kơchăng kơdih, yua kơ Inh roi kơ iĕm tôm tơdrong hơdrol boih.

²⁴“Đơ̆ng rŏng kơ tơdrong anat noh boih măt 'năr gô măng mu, măt khei ưh kơ hơdah.

²⁵Sơnglŏng gô huŏng đơ̆ng plĕnh yua kơ 'Bok Kei-Dei gơgŭ.

²⁶Kơplah noh đe gô 'bôh Inh Kon Bơngai 'lơ̆ng rŏ mơsêh mơyang tih-tin jur hăm hơmơ̆l.

²⁷Na Inh wơh lu linh jang 'lơ̆ng Inh jur năm jơ̆p-jang kơ teh đak wă krao anhăk đĭ-đăng lu khŭl bơngai mă Inh rơih iŏk, đơ̆ng gah hơlĕch truh gah bơmơ̆t, đơ̆ng gah yă-nơ̆m truh gah gơal, akŭm đĭ tơ Inh.

²⁸“Na dang ei iĕm mơ̆ng pơtih gia kơ 'long hơra. Lăp iĕm 'bôh dơng sư hơđoh chăt hla, noh iĕm băt kơ wă jê̆ bơyan 'mi boih.

²⁹Na dôm tơdrong Inh roi kơ iĕm noh hei kư̆m lei-lăi. Ning-mônh lăp iĕm 'bôh dôm tơdrong Inh roi noh, iĕm băt Inh Kon Bơngai wă jê̆ jur boih. 'Noh dang lĕ kiơ̆ 'măng dur boih.

³⁰Inh khan kơ iĕm tơpă, jơhnơr noh gô 'bôh tơpă tôm tơdrong Inh roi kơ iĕm noh hei.

³¹Plĕnh teh gô hiong đĭ, mă-lei dôm tơdrong Inh pơma ưh kơ đei layơ hiong tôch ôh, gô 'bôh tơpă.

³²“Năr păng jơ ei ưh kơ đei bu băt. Lu linh jang 'lơ̆ng kơpal plĕnh ti ưh kơ băt. Inh Kon 'Bok Kei-Dei ră, kư̆m hơdai ưh kơ băt mơ̆n. Pôm 'Bă Inh đĕch băt kơ năr ei kơnh.

³³Iĕm athei kơchăng tơdrong lui mă tơpă păng krao khan mă nŏng yua kơ iĕm ưh kơ băt tơdrong ei wă truh layơ.

³⁴Tơdrong ei thoi lĕ kơ minh 'nu bơngai wă năm tơ dêh tơmoi ataih. Hơdrol kơ sư wă yak đơ̆ng hnam, sư pơkă kơ lu đĭch đam sư wei-lăng hnam păng rim 'nu lu sư jang kiơ̆ kơ tơ'ngla sư pơkă păng khan kơ bơngai gak 'măng athei kơchăng.

³⁵Na iĕm athei kơchăng, kơlih kơ iĕm ưh kơ băt tơ'ngla hnam noh wă truh layơ: Til kơsơ̆, dah tŏk-bŏk măng, dah leng gong, dah 'năr lĕch.

³⁶Na iĕm athei kơchăng mă tơpă hli kơ tơ'ngla hnam iĕm truh kơplah iĕm ưh kơ lêng ê kơplah iĕm oei tep.

³⁷Tơdrong Inh khan kơ iĕm âu, Inh khan kơ đĭ-đăng bơngai mơ̆n, ưh kơ sĭ kơdrô̆ iĕm ôh kơchăng.”