Read bahnar Mar 3 Bible Online

Mar 3 - bahnar bible

Mar 3

¹Yêsu mơ̆t dơ̆ng tơ hnam akŭm 'Bok Kei-Dei. Đei minh 'nu bơngai ti kue minh pah oei lăm hnam akŭm 'Bok Kei-Dei ei.

²Na đe răp lăng Yêsu hăm ming pơklaih sư dah ưh yua kơ năr noh năr pơdơh Sa'bat. Dah Sư pơklaih bơngai ti kue noh, lei đe wă jô̆ kơ Sư bơngai yoch, yua kơ lu sư khan lăm năr pơdơh Sa'bat ưh kơ gơh jang păng ưh kơ gơh pơklaih bơngai jĭ jăn ôh.

³Na Yêsu krao bơngai ti kue ei khan: “Năm tơ âu bĕ, dơ̆ng 'bơ̆t anăp đe tơpôl.”

⁴Yêsu khan kơ lu bơngai ei thoi âu: “Lăm năr pơdơh Sa'bat, kiơ̆ kơ tơdrong juăt bơ̆n athei pơm tơdrong 'lơ̆ng dah tơdrong kơnê̆, tơgŭm mơnat kon bơngai dah pơlôch bơngai?” Mă-lei lu đe ei thĕng, ưh kơ đei bu pơma tơwih kơ Sư.

⁵Na Yêsu hue lăng đĭ-đăng kơ lu sư, Sư hil kơ lu sư. Sư sơ'ngon yua kơ lu sư arăng kơ̆l. Na Sư khan kơ bơngai ti kue: “Chro ti ih bĕ.” Bơngai ti kue ei chro ti sư, na klaih 'lơ̆ng hloi.

⁶Lu đe ei khŭl Pharisi, lu sư lĕch hloi đơ̆ng hnam akŭm ei năm pơđâu tơ lu khŭl đe pơtao Hêrôt chă tơdrong wă kơ gơh rôp pơlôch Yêsu.

⁷Yêsu păng lu bơngai pơhrăm păng Sư năm tơ đak dơsĭ. Đei lơ bơngai tơpă kiơ̆ Sư tơ ei mơ̆n yua kơ đe kơtơ̆ng ang tôm tơdrong Yêsu pơm, na đe năm tơ Sư. Lu bơngai năm tơ Sư ei mơ'nah đơ̆ng dêh Galilê, mơ'nah đơ̆ng dêh Juđê, mơ'nah đơ̆ng Pơlei Jêrusalem, mơ'nah đơ̆ng dêh Idumia, mơ'nah đơ̆ng dêh pah to krong Jôrđăn; kư̆m đei mơ'nah đơ̆ng tơring Tirơ păng đơ̆ng tơring Siđôn.

⁹Na Yêsu athei lu bơngai pơhrăm păng Sư 'măn kơ Sư thŏng-nan jê̆ jih đak wă kơ Sư hao kơpal thŏng-nan ei; dah Sư dơ̆ng tơ kông hli kơ đe hmĕt hmot Sư.

¹⁰Yua kơ Sư ming pơklaih lơ bơngai jĭ boih, na lu bơngai jĭ jăn tơbeng dih băl tơkan năm pel Yêsu.

¹¹Tơ ei kư̆m đei lu bơngai yang mơ̆t sư 'bôh Yêsu, sư 'nap truh tơ teh 'bơ̆t anăp Yêsu păng pơma re 'bơ̆r khan: “Ih boih Kon 'Bok Kei-Dei tơpă.”

¹²Na Yêsu khă sư: “'Nĕ tơbăt anăn Inh kơ đe.”

¹³Yêsu tŏk tơ groi kông na Sư rơih chă lu bơngai mă Sư wă kiơ̆ Sư. Na lu bơngai mă Sư rơih chă ei lĕch kơdih kơdih đơ̆ng bơngai tơpôl năm tơ Sư.

¹⁴Sư rơih mơjĭt-'bar 'nu bơngai wă oei hơdai Sư păng wă kơ Sư chă wơh năm bơtho,

¹⁵păng gơh pơpuh tơlĕch dôm lu yang kơnê̆ mă mơ̆t oei tơ lăm akâu đe.

¹⁶Na âu jô̆ tôm lu anăn mơjĭt-'bar 'nu lu sư: Simôn mă Yêsu anăn Pêtrôs;

¹⁷Yakơ hăm oh sư Yôhan; 'bă bre sư Sêbêđê. Sư anăn dơ̆ng bre 'bar 'nu Bôanet wă khan bre sư dang glaih yua kơ bre sư pơma 'bơ̆r re.

¹⁸Đơ̆ng noh lu đe Andrê, Philip, 'Barthôlêmi, Mathiơ, Thôm, Yakơ kon Alphê, Thađê, Simôn mă kiơ̆ khŭl đe Sêlôt sơ̆;

¹⁹Juđa Ikariôt bơngai mă plơ̆ plĕch Sư. Klaih kơ noh na Yêsu wih tơ hnam.

²⁰Lơ bơngai năm akŭm dơ̆ng tơ đe Yêsu, na lu sư jing ưh kơ gơh sŏng sa.

²¹Hnam dơnŏ Yêsu kơtơ̆ng ang thoi noh, na lu sư năm wă iŏk Yêsu wă anhăk wih tơ hnam, kơlih kơ đe khan Yêsu Sư wă wơnh.

²²Lu 'bok thây bơtho khôi juăt bơngai Juđê mă jur đơ̆ng Pơlei Jêrusalem lu sư khan: “Yŏng pơgơ̆r lu yang kơnê̆, măt sư Belsêbul, mơ̆t lăm akâu Yêsu boih.” Lu mơ'nah dơ̆ng khan: “Yŏng pơgơ̆r lu yang kơnê̆ tơgŭm Sư na Sư gơh pơpuh lu yang kơnê̆ nai.”

²³Na Yêsu krao lu bơngai mă pơma kơ Sư thoi noh, na Sư pơma pơtih gia kơ lu sư: “Lơliơ yŏng pơgơ̆r yang kơnê̆ mă gơh pơpuh tơduă yang kơnê̆?

²⁴Dah minh pôm teh đak tơblah dih băl, teh đak noh gô pơchah hiong,

²⁵dah minh pôm hnam dơnŏ tơblah dih băl tơduă hnam dơnŏ, hnam dơnŏ noh kư̆m pơchah hiong mơ̆n.

²⁶Thoi noh dah yŏng pơgơ̆r yang kơnê̆ tơblah tơduă yang kơnê̆, lei sư gô hiong tôch.

²⁷“Thoi âu dơ̆ng: Ưh kơ đei bu gơh mơ̆t blah iŏk tơmam bơngai pran dah ưh kơ chô̆ jơ̆ng ti sư hơdrol; đe chô̆ jơ̆ng ti sư hơdrol 'mơ̆i na gơh mơ̆t blah iŏk tơmam sư lăm hnam. Na Inh tơblah hăm yang kơnê̆ kư̆m thoi noh mơ̆n.

²⁸“Inh khan kơ iĕm tơpă, mă dôm tơdrong yoch, mă dôm 'măng pơjăm 'Bok Kei-Dei, dah bơ̆n apinh Sư 'nĕ jô̆ yo, 'Bok Kei-Dei kư̆m huay kơ jô̆ yo ôh, Sư oei tơgŭm pơklaih đĕch.

²⁹Mă-lei dah bu pơjăm Yang Bơhngol 'Lơ̆ng Sư, 'Bok Kei-Dei Sư ưh kơ layơ wă pơklaih bơngai mă pơjăm Yang Bơhngol 'Lơ̆ng Sư 'noh, mă-lei bơngai noh tơdrong yoch oei oei khŏm khŏm ưh kơ đei layơ tôch.”

³⁰Yêsu pơma thoi noh yua kơ lu đe noh pơjăm Yang Bơhngol 'Lơ̆ng mă oei lăm akâu Sư khan yang kơnê̆.

³¹Oh Yêsu hăm mĕ Sư năm tơ Sư. Lu sư dơ̆ng tơ 'ngoaih hnam, na wơh đe năm krao Yêsu.

³²Đei lơ bơngai oei tăp dăr kơ Yêsu, na đe khan kơ Sư: “Mĕ Ih hăm oh Ih dơ̆ng tơ 'ngoaih hnam to, sư chă Ih.”

³³Yêsu khan: “Bu mĕ Inh hăm oh Inh ei?”

³⁴Yêsu hue lăng lu bơngai mă oei tăp dăr kơ Sư ei păng khan: “Lu bơngai kiơ̆ âu dang mĕ Inh păng oh Inh mơ̆n.

³⁵Bu pơm kiơ̆ kơ 'Bok Kei-Dei, bơngai 'noh dang 'nhŏng oh Inh păng mĕ Inh.”