Read bahnar Mar 4 Bible Online

Mar 4 - bahnar bible

Mar 4

¹Yêsu bơtho tơ jih đak dơsĭ Galilê dơ̆ng. Đei lơ bơngai tơpă akŭm tăp dăr kơ Sư na Sư tŏk oei kơpal thŏng-nan tơ đak. Lu bơngai lơ ei oei tơ jih đak.

²Sư bơtho lơ tơdrong hăm nơ̆r pơtih gia. Sư bơtho khan thoi âu:

³“Mơ̆ng bĕ bre. Đei minh 'nu bơngai năm rei adrĕch 'ba.

⁴Lăp sư rei, đei găr mơ'nah huŏng tơ trong, na sem jur choh sa.

⁵Kư̆m đei mơ'nah huŏng kơpal tơmo trêl ưh kơ gan đei teh lơ. Ưh kơ đunh sư kư̆m chăt mơ̆n mă teh ưh kơ mah.

⁶Lăp 'năr tŏ boih sư jô jing lôch hloi yua kơ rơh sư chăt ưh kơ jrŭ.

⁷Kư̆m đei mơ'nah huŏng tơ 'nhĕt jơla. Lăp 'nhĕt jơla kơjung boih jơla krênh 'ba noh, sư ưh kơ đei plei ôh.

⁸Kư̆m đei mơ'nah huŏng tơ teh 'lơ̆ng, na đei plei. Sư chăt kơjung 'lơ̆ng, klaih kơ noh đei plei trem, mơ'nah pêng-jĭt, mơ'nah tơdrâu-jĭt, mơ'nah minh-hrĕng.”

⁹Na Sư khan: “Bu đei đon athei tơchĕng kơdih bĕ.”

¹⁰Lăp lu đe nai wih boih, na lu mơjĭt-'bar 'nu bơngai pơhrăm păng Sư păng lu bơngai nai tam mă wih, oei tăp dăr kơ Yêsu, na lu sư jet tơdrong pơtih gia hei.

¹¹Yêsu khan kơ lu sư: “'Bok Kei-Dei ăn kơ lu iĕm băt gah tơdrong Sư wă pơgơ̆r kon bơngai thoi yơ. Mă-lei Inh bơtho lu bơngai nai tôm tơdrong păng nơ̆r pơjuang ngăl:

¹²‘Wă kơ sư lăng khŏm khŏm ră, mă-lei ưh kơ 'bôh tơdrong kiơ; wă kơ sư mơ̆ng khŏm khŏm ră mă-lei ưh kơ hlôh. Dah sư hlôh kơnh sư gơh tơchĕng kơdih băt wih tơ 'Bok Kei-Dei, 'Bok Kei-Dei gô pơklaih đĭ dôm tơdrong yoch sư.’ ”

¹³Na Sư khan dơ̆ng: “Iĕm ưh kơ hlôh tơdrong Inh pơtih gia 'noh hei hă? Tơ̆ng lei lơliơ iĕm gơh hlôh tôm tơdrong Inh pơtih gia nai?

¹⁴Bơngai mă rei adrĕch 'ba 'noh wă khan bơngai bơtho nơ̆r 'Bok Kei-Dei.

¹⁵Lăp đe bơtho nơ̆r 'Bok Kei-Dei, lu bơngai mơ'nah thoi lĕ kơ găr 'ba đêl đe rei mơ'nah huŏng 'bơ̆t trong. Lu sư kơtơ̆ng ră nơ̆r 'Bok Kei-Dei, na yang Satan yŏng pơgơ̆r yang kơnê̆, sư tơgar iŏk nơ̆r đêl đe bơtho 'noh.

¹⁶Lu bơngai mă thoi lĕ găr 'ba huŏng tơ teh tơmo kư̆m thoi noh mơ̆n. Lu sư kơtơ̆ng đe bơtho nơ̆r 'Bok Kei-Dei, lu sư hưch hanh kư̆m iŏk ră nơ̆r noh mơ̆n.

¹⁷Kư̆m đei ră tơnơm 'ba, mă-lei rơh sư chăt ưh kơ jrŭ, sư jing jô lôch hloi. 'Noh wă khan lu sư dang đei ră đon lui, mă-lei ưh kơ đunh, lu sư jing achăng lê̆ yua kơ đe areh kơ lu sư lui kơ 'Bok Kei-Dei.

¹⁸Đei lu bơngai mơ'nah thoi lĕ kơ găr 'ba huŏng 'bơ̆t 'nhĕt jơla. Lu sư kơtơ̆ng đe bơtho nơ̆r 'Bok Kei-Dei.

¹⁹Mă-lei lu sư wă tơchĕng tơdrong arih sư kăl hloh. Sư wă kơ mơdrŏng; păng 'nhĕng lơ tơdrong âu tơdrong to. Thoi noh na tơdrong 'Bok Kei-Dei ưh kơ gơh wơ̆ păng ưh kơ đei plei.

²⁰Gah lu bơngai mă thoi lĕ kơ găr 'ba huŏng 'bơ̆t teh 'lơ̆ng, lu bơngai 'noh boih kơtơ̆ng nơ̆r 'Bok Kei-Dei, na iŏk hloi kơdih păng kiơ̆ hloi kơjăp, na đei plei, mơ'nah pêng-jĭt, mơ'nah tơdrâu-jĭt, mơ'nah đei plei trem truh tơ minh-hrĕng.”

²¹Yêsu bơtho dơ̆ng kơ lu đe noh, Sư khan: “Bơ̆n tơ̆k ŭnh kơđeng wă kơ hơdah; bơ̆n ưh kơ iŏk reo klơ̆p lê̆, dah 'măn ala rimrôm giơng wă kơ măng mu ôh. Bơ̆n iŏk ŭnh kơđeng noh tơ'băk tơ jrăng.

²²Yua kơ tôm tơdrong Inh bơtho pơjuang kơ iĕm dang ei, iĕm gô hlôh nhen.

²³Bơngai bu đei đon, mơ̆ng mă nhên bĕ.”

²⁴Sư khan dơ̆ng kơ lu đe noh: “Mơ̆ng mă nhên hŏ. Iĕm mơ̆ng dang yơ, iĕm gô hlôh dang noh păng 'Bok Kei-Dei gô pơthim ăn kơ iĕm hlôh hloh kơ noh dơ̆ng.

²⁵Bơngai bu hlôh, 'Bok Kei-Dei gô pơthim ăn kơ sư hlôh hloh kơ noh dơ̆ng tơpă. Bơngai bu ưh kơ wă mơ̆ng, bơngai 'noh rai hiong dôm tơdrong sư hlôh.”

²⁶Yêsu khan dơ̆ng: “'Bok Kei-Dei pơgơ̆r thoi âu: Pơtih gia đei bơngai rei adrĕch 'ba tơ mir.

²⁷Klaih kơ noh tơ'ngla sư kơmăng tep kơ'năr iung, adrĕch 'ba 'noh chăt kơjung boih mă-lei tơ'ngla sư ưh kơ pơm ăn kơ sư arih ôh.

²⁸Sư gơh arih kơdih đơ̆ng teh. Blŭng-a sư sơđah chăt hla. Klaih kơ noh sư hnông; klaih kơ hnông, sư huăt đei plei.

²⁹Lăp 'ba đum boih, na tơ'ngla sư wơh đe năm kĕch, yua kơ trŏ bơyan 'ba đum boih.”

³⁰Yêsu bơtho dơ̆ng kơ lu đe noh: “'Bok Kei-Dei pơgơ̆r thoi yơ, bơ̆n chă tơdrong kiơ wă pơtih gia kơ tơdrong noh?

³¹Lu bơngai 'Bok Kei-Dei pơgơ̆r thoi lĕ găr sơ'bei, găr noh iĕ hloh kơ đĭ-đăng găr nai.

³²Mă-lei lăp đe rei boih sư chăt kơjung hloh kơ đĭ-đăng hla 'nhot nai. Sư kư̆m đei dơng na sem kư̆m mah gơh kôp, gơh pơm tơpu tơ hla sư.”

³³Yêsu đei lơ tơdrong pơtih gia nai păng Sư oei bơtho đe nơ̆r 'Bok Kei-Dei, gô mơ̆ng kơ đe hlôh.

³⁴Sư bơtho đe, Sư bơtho pơtih gia ngăl, mă-lei dah Sư oei păng lu bơngai pơhrăm păng Sư, Sư bơtho tơblang tôm tơdrong.

³⁵Lăp 'năr wă mơ̆t kơsơ̆ ei, Yêsu khan kơ lu bơngai pơhrăm păng Sư: “Bĕ bơ̆n tŏk pah to đak.”

³⁶Yêsu oei tơ kơpal thŏng-nan đĕch đơ̆ng hei boih. Na lu bơngai pơhrăm păng Sư tơklah đơ̆ng lu bơngai tơpôl lơ, anhăk Yêsu kiơ̆ lu sư tŏk pah to đak. Păng đei 'bar pêng tŏ thŏng-nan nai năm kiơ̆ lu sư mơ̆n.

³⁷Lu sư oei wơ̆r thŏng-nan yak kơpal đak đei hloi kial hơbŭt tih tơpă. Đak poh-yă tih tơprah mơ̆t tơ lăm thŏng-nan lu sư, pă 'biơ̆ wă jê̆ 'bĕnh.

³⁸Mă-lei Yêsu oei tep akơn tơ rŏng thŏng-nan. Na lu đe ei râu Yêsu păng khan: “Ơ 'Bok Thây, Ih ưh kơ tơchĕng hli kơ bơ̆n lôch hă?”

³⁹Na Sư iung khă hloi kial păng khan kơ đak dơsĭ: “Thĕng bĕ, păt bĕ.” Kial thĕng hloi, đak poh-yă kư̆m pă adrŏ adrĕnh.

⁴⁰Na Sư khan kơ lu đe ei: “Yua kơ kiơ iĕm hli? Iĕm tam băt gơnang kơ Inh hă?”

⁴¹Lu đe ei hli dêh na lu sư apinh băl: “Bu âu kih, kial hơbŭt păng đak dơsĭ poh-yă dang noh mă kư̆m chu yom kơ Sư?”