Read bahnar Mar 8 Bible Online

Mar 8 - bahnar bible

Mar 8

¹Hơtai ei đei lơ bơngai năm akŭm tơ Sư dơ̆ng, kư̆m ưh kơ đei tơmam sa mơ̆n. Sư krao lu bơngai pơhrăm păng Sư na khan:

²“Inh mơnat kơ lu bơngai tơpôl âu dêh oei hơdai bơ̆n pêng năr boih, tơmam sa lu sư đĭ pă đei boih.

³Dah bơ̆n tơwih lu sư klak hoh, ưh kơ jor lu sư rơmơ̆n rok trong, yua kơ đei lu mơ'nah đơ̆ng ataih tơpă adrin năm tơ âu.”

⁴Lu bơngai pơhrăm păng Sư khan: “Thoi yơ bơ̆n gơh đei tơmam sa 'me lu sư yua kơ anih kueng chơngue thoi âu?”

⁵Na Yêsu jet lu sư: “Iĕm đei dôm tŏ 'bĕng mi tơ âu?” Lu bơngai pơhrăm păng Sư khan: “Tơpơh tŏ.”

⁶Sư athei lu bơngai tơpôl ei tơoei tơ teh. Sư iŏk tơpơh tŏ 'bĕng mi 'noh, krao khan bơnê kơ 'Bă Sư 'Bok Kei-Dei, phĕ hloi 'bĕng mi noh ăn kơ lu bơngai pơhrăm păng Sư chă asong kơ lu bơngai tơpôl ei; na lu bơngai pơhrăm păng Sư chă asong kơ bôl buăl.

⁷Lu sư kư̆m đei 'bar pêng găr ka iĕ iĕ. Yêsu krao khan bơnê kơ 'Bă Sư 'Bok Kei-Dei, na Sư athei lu sư chă asong kơ bôl buăl.

⁸Na lu bơngai tơpôl ei sa phĭ mah rơkah rơkai boih, na lu sư dônh tah tơ bai 'bĕnh tơpơh tŏ bai 'bĕng mi păng ka rơkah.

⁹Lu bơngai tơpôl ei dang puăn-rơbâu 'nu bơngai. Klaih kơ noh Yêsu tơwih đĭ lu bơngai tơpôl ei brŏk.

¹⁰Na Yêsu tŏk tơ thŏng-nan hơdai păng lu bơngai pơhrăm păng Sư năm tơ tơring Đalmanutha.

¹¹Lu bơngai Pharisi năm tơ ei pơjah pơjăng hăm Yêsu. Lu sư apinh Yêsu pơm tơdrong mơsêh đơ̆ng plĕnh ti. Lu sư khan wă kơ băt Yêsu đơ̆ng 'Bok Kei-Dei tơpă dah ưh. Mă tơpă lu sư wă pơlong Yêsu hăm gơh pơm dah ưh.

¹²Na Yêsu tơhôih păng khan: “Kơlih kơ kiơ jơhnơr iĕm ahrei wă apinh pơlong Inh pơm tơdrong mơsêh? Inh khan kơ iĕm tơpă, Inh ưh kơ wă pơm tơdrong mơsêh thoi iĕm apinh noh ôh.”

¹³Na Yêsu tơklah đơ̆ng lu sư tŏk thŏng-nan tŏk pah to đak hơdai hăm lu bơngai pơhrăm hăm Sư.

¹⁴Lu bơngai pơhrăm păng Sư hiơt kơ chĕp 'bĕng mi, lăm thŏng-nan oei pă minh pôm đĕch 'bĕng mi.

¹⁵Yêsu khan kơ lu sư: “Iĕm athei kơchăng weh ataih kơ 'buih 'bĕng mi pông đe Pharisi păng 'buih 'bĕng mi pông Hêrôt.”

¹⁶Lu sư ưh kơ hlôh tơdrong Sư pơma na chă pơma băl tơduă lu sư: “Sư pơma thoi noh, Sư jô̆ kơ bơ̆n hiơt kơ chĕp 'bĕng mi kơlĕ?”

¹⁷Yêsu băt kơ lu sư pơma gah tơdrong lu sư hiơt kơ chĕp 'bĕng mi, na Yêsu khan kơ lu sư: “Lơliơ iĕm ngêh kơ Inh jô̆ kơ iĕm hiơt kơ chĕp 'bĕng mi? Iĕm ưh tam băt ôh hă Inh gơh pơm 'bĕng mi? Iĕm ưh tam hlôh tơpă dah kiơ? Lơliơ đon iĕm ưh kơ hlôh khŏm khŏm?

¹⁸Iĕm kư̆m đei măt, lơliơ mă ưh kơ 'bôh? Iĕm kư̆m đei đon, lơliơ mă ưh kơtơ̆ng? Iĕm ưh kơ 'blŏk dah kiơ?

¹⁹Inh iŏk 'bĕng mi pơđăm tŏ, phĕ asong kơ pơđăm-rơbâu 'nu bơngai, iĕm dônh 'bĕnh rơkah tah dôm tŏ bai?” Lu sư khan: “Rơkah mơjĭt-'bar tŏ bai.”

²⁰“Bĭ đơ̆ng rŏng dơ̆ng Inh iŏk tơpơh tŏ 'bĕng mi phĕ asong kơ puăn-rơbâu 'nu bơngai, na iĕm dônh tah 'bĕnh dôm tŏ bai rơkah?” Lu sư khan: “Tơpơh tŏ bai.”

²¹Yêsu khan kơ lu sư: “Iĕm tam mă hlôh 'mơ̆i dah kiơ?”

²²Klaih kơ noh đe Yêsu năm tơ Pơlei 'Betsaiđa. Tơ ei đe năm ba minh 'nu bơngai măt tol tơ Yêsu, lu sư apinh Yêsu pel măt sư athei pơklaih ăn kơ sư.

²³Na Yêsu rôp ti sư chông ba tơ jih pơlei. Yêsu kơsoh đak hai kơ măt sư păng dan ti tơ măt sư na jet: “Ih hăm 'bôh kiơ kiơ ưh?”

²⁴Na sư ngoi khan kơ Yêsu: “Inh 'bôh đe yak mơ̆n, mă-lei akâu lu sư thoi lĕ kơ 'long.”

²⁵Yêsu 'măn ti tơ măt sư minh 'măng dơ̆ng. Bơngai ei lăng 'bloh, măt sư klaih hloi păng 'bôh tôm tơdrong hơdah nhên.

²⁶Klaih kơ noh Yêsu ăn kơ sư wih tơ hnam păng khan kơ sư: “Dang ei ih 'nĕ mơ̆t lăm Pơlei 'Betsaiđa âu dơ̆ng.”

²⁷Klaih kơ noh Yêsu păng lu bơngai pơhrăm păng Sư yak đơ̆ng noh năm tơ jơ̆p pơlei đe tơring Sêsarê Philip. Kơplah lu sư oei rok trong Yêsu jet lu sư: “Đe khan Inh bu?”

²⁸Na lu bơngai pơhrăm păng Sư khan: “Mơ'nah khan Ih Yôhan, bơngai mă pơm 'batem kơ đe. Mơ'nah khan Ih Êli, bơngai mă pơtruh nơ̆r 'Bok Kei-Dei sơ̆. Mơ'nah dơ̆ng kư̆m khan Ih minh 'nu bơngai pơtruh nơ̆r 'Bok Kei-Dei nai sơ̆.”

²⁹Klaih kơ noh Yêsu khan kơ lu sư: “Bĭ iĕm khan Inh bu?” Na Pêtrôs khan: “Ih 'Bok Krist mă 'Bok Kei-Dei wơh pơgơ̆r kon bơngai.”

³⁰Na Yêsu khă lu bơngai pơhrăm păng Sư kuă ăn chă roi kơ đe khan Sư 'Bok Krist.

³¹Na Yêsu khan kơ lu sư: “Inh Kon Bơngai gô đei tơdrong pơmat-tat. Lu đe kră sek tơlang, lu đe 'bok soi tih, lu 'bok thây bơtho tơdrong juăt đe Juđê kuă chu yom kơ Inh na athei đe pơlôch Inh. Mă-lei kơtĕch pêng năr đơ̆ng rŏng Inh gô iung arih dơ̆ng.”

³²Yêsu pơma hơdah tơdrong Sư thoi noh. Na Pêtrôs krao Yêsu weh ataih 'biơ̆ na khan kơ Sư: “Ih 'nĕ kơ pơma thoi noh.”

³³Na Yêsu hue lăng tơ lu bơngai pơhrăm păng Sư na khă hloi Pêtrôs: “Ơ Satan, jăk kơ e mă ataih đơ̆ng âu. E ưh kơ tơchĕng kiơ̆ kơ 'Bok Kei-Dei ôh, e tơchĕng kiơ̆ kơ kon bơngai đĕch.”

³⁴Yêsu krao bơngai tơpôl lơ păng lu bơngai pơhrăm păng Sư mơ̆n năm tơ Sư. Na Sư khan: “Dah bơngai bu wă kiơ̆ Inh, sư athei tŭk đĭ tơdrong sư kơdih păng tôi kơdih 'long pơglang chu lôch yua kơ wă kiơ̆ Inh.

³⁵Bơngai bu ưh kơ chu lôch yua kơ tơdrong Inh, bơngai noh gô lôch hoh hoh đĕch ưh kơ yua kiơ. Bơngai bu chu lôch yua kơ tơdrong Inh păng tơdrong 'nao 'lơ̆ng, sư 'noh gô arih ling-lang.

³⁶Mă bu mơdrŏng đei tôm mŭk tơmam tơ ala teh âu, dah sư ưh kơ arih ling-lang, lei truh sư lôch, ưh pă đei yua kiơ boih.

³⁷Mă sư mơdrŏng kư̆m ưh kơ gơh răt tơdrong arih sư ôh.

³⁸Ning-mônh Inh Kon Bơngai gô jur tơ ala teh âu hơdai păng lu linh jang 'lơ̆ng. Năr 'noh kơnh 'Bă Inh gô ăn kơ Inh mơsêh mơyang 'lơ̆ng rŏ tơpă. Na bơngai bu kiơ̆ Inh boih, mă-lei sư kơdơ̆ mơlâu kơ lu bơngai kơnê̆ tam lui na sư kuă kơ bơtho lu sư tơdrong Inh, năr 'noh kơnh Inh kư̆m kuă kơ sư mơ̆n.”