Read bahnar Mar 9 Bible Online

Mar 9 - bahnar bible

Mar 9

¹Inh khan kơ iĕm tơpă, đei lăm lu iĕm âu mơ'nah ưh tam lôch ôh, lu sư gô 'bôh tơdrong 'Bok Kei-Dei pơgơ̆r hăm tơdrong mơsêh mơyang Sư.

²Tơdrâu năr đơ̆ng rŏng kơ năr noh, Yêsu anhăk Pêtrôs, Yakơ hăm Yôhan lu sư tŏk tơ kông kơjung kơdrô̆ dôm lu sư âu. Na Yêsu tơwir akâu Sư kơdih 'bơ̆t anăp lu đe pêng 'nu noh.

³Ao Yêsu jing rang kok tôch tơdrong kok.

⁴Đơ̆ng noh 'bôh blư kơ Môis păng Êli jur pơma dơnuh hăm Yêsu.

⁵Na Pêtrôs khan kơ Yêsu: “Ơ 'Bok Thây, bơ̆n oei tơ âu hiôk dêh. Lê̆ kơ nhôn pơm kơ bơ̆n pêng tŏ bơsŭn; minh pôm pơm kơ Ih, minh pôm pơm kơ Môis, minh pôm pơm kơ Êli.”

⁶Pêtrôs sư pơma thoi noh yua kơ sư ưh pă gơh pơma thoi yơ boih kơlih kơ lu sư hli dêh.

⁷Klaih kơ noh 'bôh glĭp kơ hơmơ̆l jur gom lu sư. Păng đei nơ̆r 'Bok Kei-Dei pơma đơ̆ng lăm hơmơ̆l ei khan: “Sư âu Kon Inh mă 'mêm kơeng tơpă. Na iĕm ling-lang athei chu yom kơ Sư.”

⁸Lu sư kơtơ̆ng nơ̆r pơma thoi noh hloi chă hue-huo lăng ră jua ưh kơ 'bôh bu dơ̆ng hơdai păng Yêsu dơ̆ng, pă minh 'nu Sư đĕch oei 'bơ̆t ei.

⁹Klaih kơ noh lu sư jur đơ̆ng kông noh na Yêsu khă lu sư thoi âu: “Iĕm 'nĕ chă roi kơ đe hŏ dôm tơdrong iĕm 'bôh hei, đơ̆ng dang ei truh Inh Kon Bơngai iung arih đơ̆ng lôch ning-mônh.”

¹⁰Thoi noh na lu sư ôn tơdrong 'noh tơtăm lu sư kơdih. Mă-lei lu sư ưh kơ băt ôh akâu Yêsu gô lôch iung arih noh, na lu sư jet tơduă lu sư wă kơ băt tơdrong Yêsu khan: “Truh Inh Kon Bơngai iung arih đơ̆ng lôch ning-mônh.”

¹¹Na lu sư jet Yêsu: “Lơliơ lu thây bơtho tơdrong juăt đe Juđê khan Êli gô jur tơ teh hơdrol kơ 'Bok Krist?”

¹²Yêsu khan kơ lu sư: “Trŏ boih Êli jur tơ teh hơdrol kơ 'Bok Krist, yua kơ sư hơmet ming tôm tơdrong hơdrol. Na Inh kư̆m wă jet iĕm mơ̆n: Yua kơ kiơ sơ̆p hla bơar 'Bok Kei-Dei chih khan lê̆ hơdrol kơ Inh Kon Bơngai gô đei tơdrong pơmat-tat păng tơdrong đe hil areh kơ Inh?

¹³Inh khan kơ iĕm tơpă, Êli truh boih păng đe pơm kơnê̆ kơ sư kiơ̆ gô mơ̆ng kơ đe wă, kư̆m thoi đe chih roi lê̆ hơdrol gah tơdrong sư lăm sơ̆p hla bơar 'Bok Kei-Dei sơ̆.”

¹⁴Lăp lu sư brŏk tơ lu buăl pơhrăm păng sư wă jê̆ truh boih, na lu sư 'bôh bơngai tơpôl lơ akŭm tăp dăr kơ lu bơngai pơhrăm păng Sư mă oei tơ ei. Đei lu 'bok thây bơtho tơdrong juăt đe Juđê oei pơjah pơjăng păng lu bơngai pơhrăm păng Yêsu mă oei tơ ei.

¹⁵Lăp lu sư 'bôh Yêsu, lu sư kơdrăt na pơm kơdâu năm tơkan tơ Yêsu kơkuh kơ Yêsu.

¹⁶Yêsu jet lu sư: “Iĕm pơjah pơjăng tơdrong kiơ?”

¹⁷Đei minh 'nu lăm bơngai tơpôl ei đĕch tơl wă apinh Yêsu pơklaih kon sư. Sư khan: “Ơ 'Bok Thây, inh đei anhăk kon drŏ-nglo inh tơ Ih. Sư bơngai yang kơnê̆ mơ̆t pơm kơ sư kơmlo.

¹⁸Mă tơ yơ yơ mưh yang kơnê̆ mơ̆t lăm akâu sư, yang kơnê̆ glơ̆m sư pơ̆k na sư lĕch đak hai djơdjih djơdjah păng tơkăp sơnĕnh kơkrit kơkrat jing arăng jơ'mro. Na inh apinh lu bơngai pơhrăm păng Ih pơpuh yang kơnê̆ lĕch đơ̆ng akâu sư ră lu sư ưh kơ gơh.”

¹⁹Na Yêsu khan kơ lu sư: “Ơ lu iĕm mă oei lui rơdu hơnơ̆ng, iĕm wă kơ Inh oei hơdai iĕm đunh dang yơ 'mơ̆i, na iĕm lui kơjăp? Iĕm wă kơ Inh gleh dang yơ 'mơ̆i na iĕm gơh pơklaih đe?” Na Yêsu khan kơ bơngai ei: “Năm ba kon ih tơ âu năm.”

²⁰Na đe năm ba 'lơ̆p ei tơ Sư. Lăp yang kơnê̆ 'bôh Yêsu, yang kơnê̆ glơ̆m 'lơ̆p ei tơgrŏl hloi akâu sư kơdih. Đak hai sư lĕch djơdjih djơdjah.

²¹Yêsu jet 'Bă sư: “Sư thoi âu tam đunh ưh?” 'Bă sư khan: “Đơ̆ng sư oei iĕ sơ̆.

²²Yang kơnê̆ ngăl glơ̆m sư tơ ŭnh, phŏ lăm đak wă pơlôch sư. Na dang ei dah Ih gơh pơklaih, apinh Ih mơnat kơ nhôn, tơgŭm nhôn 'biơ̆.”

²³Yêsu khan kơ sư: “Dah ih đei đon lui, lei kon ih gô klaih. Bơngai bu đei đon lui, bơngai 'noh sư gơh pơm tôm tơdrong.”

²⁴'Bă bơngai 'lơ̆p yang kơnê̆ mơ̆t ei pơma hloi 'bơ̆r re khan: “Inh lui mơ̆n mă-lei oei rơdu. Apinh Ih pơm ăn kơ inh lui mă kơjăp.”

²⁵Yêsu 'bôh đe tơpôl rĭ rai jê̆ Sư na Sư wă jah keh tơdrong 'noh. Na Sư pơpuh hloi yang kơnê̆ ei khan: “Ơ yang kơnê̆ ngăl pơm kơ đe kơmlo păng klĭk, Inh pơpuh e lĕch jăk đơ̆ng sư âu, 'nĕ pă mơ̆t oei lăm akâu sư dơ̆ng.”

²⁶Yang kơnê̆ hmoi pơret pơm kơ sư pơtơ̆l, na lĕch jăk hloi đơ̆ng akâu bơngai 'lơ̆p ei. Na bơngai 'lơ̆p ei đe lăng sư nhen lôch na đĭ-đăng kơ đe khan: “'Noh sư lôch boih.”

²⁷Klaih kơ noh Yêsu rôp ti sư dui tơiung sư, na sư iung hloi.

²⁸Klaih kơ noh Yêsu mơ̆t tơ hnam, na lu bơngai pơhrăm păng Sư jet Sư kơdrô̆: “Yua kơ kiơ nhôn ưh kơ gơh pơpuh yang kơnê̆?”

²⁹Yêsu khan kơ lu sư: “Yang kơnê̆ thoi âu, dah bơ̆n ưh kơ krao khan kơ Kră Yang 'Bok Kei-Dei hơdrol, mă bơ̆n pơpuh lap đĕch, sư ưh kơ chu kơdâu ôh.”

³⁰Lu sư yak đơ̆ng anih 'noh năm mơ̆t tơ dêh Galilê yak yoh hloi yua kơ Yêsu kuă ăn đe băt,

³¹kơlih kơ Sư bơtho lu bơngai pơhrăm păng Sư khan: “Đe gô rôp pơjao Inh Kon Bơngai tơ ti kon bơngai tơ ala teh âu. Lu đe ei boih pơlôch Inh. Lăp đe pơlôch Inh boih, kơtĕch pêng năr đơ̆ng rŏng Inh iung arih dơ̆ng.”

³²Mă-lei lu sư ưh kơ hlôh ôh Yêsu pơma thoi noh păng ưh kơ pơ̆n jet Sư tăm.

³³Lăp lu sư truh tơ Pơlei Kapernum boih, kơplah Yêsu oei lăm hnam, Sư jet lu bơngai pơhrăm păng Sư: “Iĕm pơma pơjah pơjăng băl tơdrong kiơ kơplah bơ̆n oei năm rok trong hei?”

³⁴Lu sư thĕng ưh kơ pơ̆n roi kơ Sư, yua kơ kơplah rok trong hei lu sư pơma pơjah pơjăng dih băl tơpă, lu sư wă kơ băt bu pơm tih 'biơ̆ kơ tơduă lu sư.

³⁵Yêsu tơoei păng krao mơjĭt-'bar 'nu bơngai pơhrăm păng Sư. Na Sư khan: “Dah bu wă pơm yŏng pơgơ̆r lu iĕm, bơngai 'noh athei pơm thoi lĕ đĭch đam kơ đĭ-đăng kơ iĕm.”

³⁶Na Yêsu năm dui iŏk minh 'nu bơngai 'lơ̆p, ăn kơ sư oei tŏk-bŏk lu sư. Yêsu pôk bơngai 'lơ̆p 'noh na khan kơ bơngai pơhrăm păng Sư:

³⁷“Dah bu sơng iŏk bơngai 'lơ̆p âu yua kơ bơngai 'lơ̆p âu lui kơ Inh, sư 'noh dang sơng iŏk Inh. Sư 'noh ưh kơ sĭ sơng iŏk Inh đĕch ôh, sư 'noh dang sơng iŏk 'Bok Kei-Dei mă wơh Inh mơ̆n.”

³⁸Na Yôhan khan kơ Yêsu: “Ơ 'Bok Thây, nhôn 'bôh minh 'nu bơngai gơnang kơ anăn Ih wă pơpuh yang kơnê̆ đơ̆ng đe na nhôn khă sư yua kơ sư ưh kơ jang hơdai bơ̆n.”

³⁹Mă-lei Yêsu khan: “'Nĕ pă khă sư, yua kơ bơngai mă gơnang kơ Inh tơgŭm sư pơm tơdrong mơsêh mơyang, kơplah noh sư ưh kơ bâu roi Inh ôh.

⁴⁰Bơngai bu huay kơ ayăt kơ bơ̆n, bơngai 'noh kiơ̆ đon bơ̆n.

⁴¹Inh khan kơ iĕm tơpă, bơngai bu hơlăng kơ iĕm, asong iĕm minh kơchŏk đak nhă yua kơ iĕm kiơ̆ Inh 'Bok Krist, bơngai 'noh 'Bok Kei-Dei gô apah sư tơpă.

⁴²“Bơngai bu pơtuah bơngai 'lơ̆p mă lui kơ Inh thoi âu boih, pơtih gia đe dah chô̆ ako sư tơ tơpăl tơmo tih sơ̆, hơtat lê̆ sư tơ klŏng đak dơsĭ, lei sư hiôk 'biơ̆ yua kơ sư huay kơ gơh pơtuah lu hơ'lơ̆p dang ei.

⁴³“Dah minh pah ti iĕm pơm kơ iĕm yoch, chơ̆ng lê̆ minh pah ti iĕm 'noh, na oei pă minh pah 'noh iĕm gơh mơ̆t oei păng 'Bok Kei-Dei. 'Noh 'lơ̆ng hloh kơ iĕm oei tôm 'bar pah ti ră, mă-lei wă huŏng lăm dơnâu ŭnh mă ưh kơ layơ păt.

⁴⁴Lăm dơnâu ŭnh ei boih đei hrai mă ưh kơ lôch wă sa lu bơngai mă huŏng lăm dơnâu ŭnh ei; păng ŭnh ei ưh kơ layơ păt hơngăm.

⁴⁵Dah minh pah jơ̆ng iĕm pơm kơ iĕm yoch, chơ̆ng lê̆ minh pah jơ̆ng iĕm 'noh, na oei pă minh pah 'noh iĕm gơh mơ̆t oei păng 'Bok Kei-Dei. 'Noh 'lơ̆ng hloh kơ iĕm oei tôm 'bar pah jơ̆ng ră mă-lei wă huŏng lăm dơnâu ŭnh.

⁴⁶Lăm dơnâu ŭnh ei đei hrai mă ưh kơ lôch wă sa lu bơngai mă huŏng lăm dơnâu ŭnh ei; păng ŭnh ei ưh kơ layơ păt hơngăm.

⁴⁷Dah minh pah măt iĕm pơm kơ iĕm yoch, kuek hŭt minh pah măt iĕm 'noh, na oei pă minh pah 'noh iĕm gơh mơ̆t oei lăm dêh char 'Bok Kei-Dei. 'Noh 'lơ̆ng hloh kơ iĕm oei tôm 'bar pah măt, mă-lei wă huŏng lăm dơnâu ŭnh.

⁴⁸Lăm dơnâu ŭnh ei boih đei hrai mă ưh kơ lôch wă sa lu bơngai mă huŏng lăm dơnâu ŭnh ei; păng ŭnh ei ưh kơ layơ păt hơngăm.

⁴⁹“Đĭ rim 'nu kon bơngai gô đei tơdrong gleh pơmat-tat.

⁵⁰“'Boh tah kơ tơmam sa bơ̆n 'băt 'lơ̆ng păng săt ling-lang. Mă-lei dah 'boh jing sap bơ̆n ưh kơ đei kiơ wă pơm kơ 'boh 'băt dơ̆ng. Bơ̆n băt kơ 'boh tah kơ tơmam sa bơ̆n 'băt 'lơ̆ng, na iĕm athei pơm jơhngơ̆m đon dim hiôk hơiă dih băl ling-lang kư̆m thoi tơmam sa tah 'boh oei săt khŏm khŏm.”