Read bahnar Luk 1 Bible Online

Luk 1 - bahnar bible

Luk 1

¹Ơ Theophil, đơ̆ng sơ̆ khơ̆ dang ei đei lơ bơngai chă chih roi gah dôm tơdrong Yêsu oei hơdai păng bơ̆n tơ ala teh âu sơ̆.

²Lu sư chih dôm tơdrong bơ̆n kơtơ̆ng đơ̆ng lu bơngai mă 'bôh tôm tơdrong Yêsu đơ̆ng tơm hmơm sơ̆, khơ̆ Sư tŏk tơ plĕnh. Lu bơngai 'bôh tơdrong Yêsu sơ̆ sư ră roi tơdrong noh kơ bơ̆n.

³Na inh kư̆m chă jet pơnhên đe gah tơdrong Yêsu đơ̆ng tơm hmơm sơ̆, na inh kư̆m wă roi ăn kơ ih mă đơ̆ng tơm truh tơ wĕch,

⁴wă kơ ih băt mă tơpă gah tơdrong Yêsu.

⁵Kơplah pơtao Hêrôt pơgơ̆r dêh char Juđê sơ̆ đei minh 'nu 'bok soi anăn sư Sachari. Sư khŭl 'bok soi mă đe anăn khŭl Abia. Anăn akăn sư Êlisabet. Akăn sư ei kon sâu Arôn mă pơm 'bok soi tơm hmơm sơ̆.

⁶Bre sư pơm 'lơ̆ng tơpăt kơ 'Bok Kei-Dei păng rok kiơ̆ dôm tơdrong juăt 'Bok Kei-Dei pơkă.

⁷Mă-lei bre sư ưh kơ đei hơ'lơ̆p yua kơ Êlisabet bơngai hơwŏng. Bre sư kư̆m kră ngăl boih.

⁸Minh năr ei 'bok Sachari jang tơdrong 'Bok Kei-Dei tơ hnam akŭm 'Bok Kei-Dei tơm tơ Pơlei Jêrusalem yua kơ trŏ năr lu khŭl sư jang tơ noh.

⁹Na lu 'bok soi juăt kơ pơpơn dih băl wă kơ băt bu gơh mơ̆t lăm hnam 'Bok Kei-Dei tơm noh soh 'long pơgang 'bâu phu yua wă kơkuh kơ 'Bok Kei-Dei. Na năr ei đe pơpơn dih băl na trŏ kơ 'bok Sachari gơh mơ̆t soh.

¹⁰Kơplah Sachari mơ̆t soh 'long pơgang lăm hnam 'Bok Kei-Dei na lu kon pơlei pơla oei krao khan tơ 'ngoaih.

¹¹Na blư 'bôh hloi linh jang 'lơ̆ng đơ̆ng 'Bok Kei-Dei jur dơ̆ng gah 'ma kơ chơnang soi soh 'long pơgang 'bâu phu ei.

¹²Sachari 'bôh sư, na hli.

¹³Mă-lei linh jang 'lơ̆ng ei khan kơ sư: “Ih 'nĕ kơ hli. 'Bok Kei-Dei kơtơ̆ng nơ̆r ih krao khan apinh sư wă kơ đei kon. Na akăn ih ning-mônh gô tơpŭ kơ minh 'nu kon drŏ-nglo. Na ih anăn sư Yôhan.

¹⁴Ih gô hiôk tơpă păng kư̆m đei lơ bơngai nai hiôk yua kơ đei sư.

¹⁵Yua kơ ning-mônh sư gô pơm tih 'bơ̆t anăp 'Bok Kei-Dei. Sư ưh kơ gơh et sik dah dôm tơmam kiơ pơm ăn suai. Sư 'bĕnh blai Yang Bơhngol 'Lơ̆ng mă đơ̆ng đe tơpŭ kơ sư truh tơ ning-mônh.

¹⁶Sư gô tơgŭm lơ bơngai Isơrael wih tơ Kră Yang bơ̆n 'Bok Kei-Dei.

¹⁷Kră Yang bơ̆n wă jê̆ jur na kon ih ei gô năm hơdrol kơ Kră Yang. Sư đei Yang Bơhngol 'Lơ̆ng ăn kơ sư jing pran kơtang tơpă kư̆m thoi Êli sơ̆. Sư gô tơgŭm kon pơlei Isơrael 'mêm mơnat kơ lu kon sư. Sư gô tơgŭm lu bơngai ưh kơ lui tơbral kơdih tơdrong yoch na wă kơ đei đon 'lơ̆ng. Yua kơ thoi noh na sư hơmet ming kon bơngai adrol kơ Kră Yang truh.”

¹⁸Na Sachari jet linh jang 'lơ̆ng ei: “Lơliơ inh gơh băt tơdrong noh gơh sĭt yua kơ inh kră tơpă boih păng ŭnh om inh kư̆m kră mơ̆n?”

¹⁹Linh jang 'lơ̆ng ei khan: “Inh âu boih Gabrel. Inh ling-lang oei hơdai 'Bok Kei-Dei. Sư wơh inh jur pơtruh ăn kơ ih tơdrong noh,

²⁰mă-lei ih khan ưh kơ lui kơ inh. Ning-mônh ih gô 'bôh tơpă. Yua kơ ih ưh kơ lui na ih jing ưh kơ gơh pơma đơ̆ng dang ei truh kơ năr ih 'bôh tơdrong inh roi ăn kơ ih hei.”

²¹Kơplah linh jang 'lơ̆ng ei oei pơma dơnuh kơ sư, na lu kon pơlei pơla chang gô sư lĕch ră. Kơna kon pơlei sơleng kơ đon yua kơ tơdrong kiơ Sachari ngôi lăm hnam 'Bok Kei-Dei đunh dêh.

²²Lăp Sachari lĕch sư ưh kơ gơh pơma kơ đe na lu sư băt kơ Sachari 'bôh tơdrong hlĭch lăm noh. Na sư pơma kơmlo ăn kơ đe đĕch.

²³Lăp trŏ kơ năr sư pơdơh kơ jang lăm hnam 'Bok Kei-Dei boih na Sachari wih tơ hnam.

²⁴Klaih kơ noh akăn sư jing akâu kơhioh, na akăn sư oei lăm hnam pơđăm khei ưh kơ đei lĕch ôh.

²⁵Akăn sư khan thoi âu: “Dang ei Kră Yang 'Bok Kei-Dei tơgŭm inh boih, đe huay pă pơma kơnê̆ kơ inh dơ̆ng boih.”

²⁶Lăp Êlisabet akâu kơhioh tơdrâu khei boih na 'Bok Kei-Dei wơh linh jang 'lơ̆ng Sư, anăn sư Gabrel, jur tơ Pơlei Nasaret lăm dêh Galilê.

²⁷Linh jang 'lơ̆ng ei năm tơ minh 'nu adruh sơkơ̆t boih păng minh 'nu tơdăm, anăn sư Yôsep. Yôsep sư adrĕch adrung pơtao Đawit sơ̆. Na anăn adruh ei Mari.

²⁸Linh jang 'lơ̆ng ei truh tơ Mari khan hloi thoi âu: “Kơkuh kơ ih, duch. 'Bok Kei-Dei wă yua ih păng Sư lăp đon kơ ih boih.”

²⁹Mari kơtơ̆ng thoi noh sư mah chrêu kơ đon yua kơ sư ưh kơ băt wă đei tơdrong kiơ, mah kơkuh kơ sư thoi noh.

³⁰Linh jang 'lơ̆ng ei khan kơ sư dơ̆ng: “Ơ Mari, ih 'nĕ kơ hli yua kơ 'Bok Kei-Dei lăp đon kơ ih tơpă.

³¹Ih gô anăp, klaih kơ noh tơpŭ kơ minh 'nu kon drŏ-nglo. Ih anăn Sư Yêsu.

³²Sư pơm tih păng đe krao Sư Kon 'Bok Kei-Dei Kră Yang mă tih hloh. Kră Yang 'Bok Kei-Dei wă ăn kơ Sư pơm pơtao iĕm, kư̆m thoi 'bok pơtao Đawit iĕm sơ̆.

³³Sư gô pơgơ̆r adrĕch adrung kon sâu Jakôp ling-lang ưh kơ đei layơ tôch.”

³⁴Na Mari khan kơ linh jang 'lơ̆ng ei: “Lơliơ tơdrong noh gơh đei yua kơ inh oei adruh ưh tam đei klo?”

³⁵Linh jang 'lơ̆ng ei khan kơ sư dơ̆ng: “Gô đei Yang Bơhngol 'Lơ̆ng jur tơ ih, tơdrong mơsêh mơyang mă 'Bok Kei-Dei wă ăn kơ ih. Thoi noh na kon nge mă ih tơpŭ noh, Sư Kon 'Bok Kei-Dei mă 'lơ̆ng tơpăt.

³⁶Ih lăng kơtum ih, Êlisabet. Sư kră tơpă boih, na sơ̆ đe khan kơ sư bơngai hơwŏng, mă-lei dang ei sư akâu kơhioh, đei tơdrâu khei boih.

³⁷'Bok Kei-Dei gơh pơm tôm tơdrong.”

³⁸Na Mari khan: “Inh âu jơ̆ đĭch đam Kră Yang, inh mơ̆ng kơ Sư ăn kơ inh thoi ih khan kơ inh hei.” Na linh jang 'lơ̆ng ei wih hloi đơ̆ng sư tŏk tơ plĕnh ti.

³⁹Lăp đơ̆ng rŏng kơ noh Mari năm tơ pơlei đe kiơ̆ kơpal groi kông lăm dêh char Juđê.

⁴⁰Na sư mơ̆t tơ hnam Sachari na kơkuh kơ Êlisabet.

⁴¹Lăp Êlisabet 'bôh Mari kơkuh kơ sư, nge lăm klak sư adrŏ hloi. Na Êlisabet hơloh 'bĕnh blai Yang Bơhngol 'Lơ̆ng,

⁴²păng pơma 'bơ̆r re kơ Mari khan: “'Bok Kei-Dei wă ăn kơ ih hiôk hloh kơ đĭ-đăng kơ lu drŏ-kăn đe nai. Sư ăn kơ kon mă ih wă tơpŭ ning-mônh kư̆m hiôk thoi noh mơ̆n.

⁴³Yua kơ kiơ 'Bok Kei-Dei mơnat kơ inh na sư mah athei mĕ Yŏng inh năm ngôi tơ inh?

⁴⁴Lăp inh kơtơ̆ng ih kơkuh kơ inh hei, nge lăm klak inh hiôk dêh na sư mah adrŏ.

⁴⁵Ih hiôk tơpă yua kơ ih lui kơ nơ̆r Kră Yang khan kơ ih gô đei kon.”

⁴⁶Na Mari khan: “Jơhngơ̆m inh bơnê ư-ang kơ Kră Yang dêh,

⁴⁷jơhngơ̆m inh hiôk yua kơ 'Bok Kei-Dei pơklaih inh.

⁴⁸Yua kơ Sư mơnat kơ inh bơngai đam Sư, na đơ̆ng âu tơ anăp ning-mônh đĭ-đăng kơ lu kon bơngai gô khan kơ inh đei pŭn hiôk tơpă.

⁴⁹'Noh yua kơ dôm tơdrong mơsêh mơyang đơ̆ng 'Bok Kei-Dei ăn kơ inh tơpă. 'Bok Kei-Dei pơm tơdrong 'lơ̆ng tơpăt ngăl.

⁵⁰Sư mơnat kơ đĭ-đăng bơngai mă lui yom kơ Sư, mă đơ̆ng sơ̆ khơ̆ ning-mônh.

⁵¹Sư yua tơdrong mơsêh mơyang Sư wă blah pơpuh tŭk lê̆ lu bơngai mă pơang akâu kơdih hăm pơm kơnê̆ kơ đe.

⁵²Sư tơjur tŭk đĭ lu bơngai mă pơm tih sơ̆, na atŏk dơ̆ng lu bơngai mă pơm iĕ hloh kơ đe.

⁵³Sư 'me lu bơngai pơngot rơwĕt tơmam sa 'lơ̆ng, mă-lei lu bơngai mơdrŏng noh Sư tơbrŏk ti hoh đĕch.

⁵⁴Sư tơgŭm lu bơ̆n bơngai Isơrael mă đĭch Sư, yua kơ Sư pơkă đơ̆ng sơ̆ khan wă mơnat kơ lu bơ̆n.

⁵⁵Sư pơkă kơ lu 'bok bơ̆n sơ̆, đơ̆ng Abraham truh kơ lu kon sâu sư ning-mônh, khan wă tơgŭm bơ̆n ling-lang.”

⁵⁶Mari oei hơdai păng Êlisabet dang lăp pêng khei. Đơ̆ng rŏng kơ noh sư brŏk tơ hnam sư kơdih.

⁵⁷Truh kơ khei 'năr Êlisabet boih na sư tơpŭ kơ minh 'nu kon drŏ-nglo.

⁵⁸Lu bôl buăl hăm kon pơlei pơla kơtum kơtŏng 'nhŏng oh sư kơtơ̆ng ang tơdrong 'Bok Kei-Dei mơnat kơ sư tơpă ăn kơ sư kon, na lu sư kư̆m wang hiôk chơt mơ̆n.

⁵⁹Lăp kon sư ei truh tơhngam năr boih na đe năm kăt tơdra akar kon sư kiơ̆ kơ tơdrong juăt lu bơngai Isơrael. Lu 'nhŏng oh đe mĕ 'bă sư wă anăn sư Sachari kư̆m lei-lăi thoi anăn 'bă sư mơ̆n yua kơ sư juăt anăn thoi noh.

⁶⁰Mă-lei mĕ sư khan: “Ưh ôh, bơ̆n anăn sư Yôhan đĕch.”

⁶¹Na lu sư khan: “'Nhŏng oh bơ̆n, adrĕch adrung bơ̆n ưh kơ đei bu anăn Yôhan, na liơ bơ̆n gơh anăn sư thoi noh.”

⁶²Na lu sư pơma pơtao păng ti jet 'bă sư wă anăn kon sư bu.

⁶³Na 'bă sư athei lu sư chă gơ'bang iĕ wă chih. Na Sachari chih thoi âu: “Anăn sư Yôhan.” Na đĭ-đăng kơ lu sư sơleng kơ đon.

⁶⁴Na 'bă sư Sachari gơh pơma hloi, na sư ư-ang 'Bok Kei-Dei.

⁶⁵Đĭ-đăng kơ lu bôl buăl păng kon pơlei pơla wang kơtơ̆ng thoi noh na lu sư chrêu kơ đon păng năm chă roi kơ đe dôm tơdrong noh jơ̆p kơ tơring kiơ̆ kông dêh char Juđê ei.

⁶⁶Đĭ-đăng bơngai kơtơ̆ng tơdrong noh pơwao lăm đon sư kơdih khan: “Nge âu ning-mônh sư wă pơm kiơ kơnh?” Lu sư tơchĕng thoi noh yua kơ lu sư 'bôh 'Bok Kei-Dei tơgŭm sư tơpă.

⁶⁷'Bă sư Sachari 'bĕnh blai Yang Bơhngol 'Lơ̆ng na sư roi lê̆ hơdrol thoi âu:

⁶⁸“Bĕ bơ̆n ư-ang kơ 'Bok Kei-Dei, Kră Yang wei-lăng bơngai Isơrael bơ̆n, yua kơ Sư tơgŭm bơ̆n tơpă na Sư huai iŏk bơ̆n.

⁶⁹Sư ăn kơ bơ̆n minh 'nu 'Bok Dŏng Pơklaih mă đei tôm tơdrong mơsêh mơyang. 'Bok 'noh Kon Sâu Đawit mă đĭch đam 'Bok Kei-Dei.

⁷⁰'Bok Kei-Dei ăn kơ lu bơngai pơtruh nơ̆r Sư sơ̆ kư̆m khan thoi noh mơ̆n.

⁷¹'Bok Kei-Dei pơklaih bơ̆n đơ̆ng dôm lu bơngai areh arĕnh ayăt kơ bơ̆n.

⁷²Sư pơm tơdrong noh wă kiơ̆ kơ tơdrong Sư pơkă kơ 'bok kơdră bơ̆n sơ̆, khan gô wă tơgŭm bơ̆n tơpă.

⁷³Na Sư pơkă kơ 'bok Abraham bơ̆n tơdrong noh,

⁷⁴wă kơ pơklaih bơ̆n đơ̆ng dôm lu bơngai mă ayăt kơ bơ̆n. Na Sư wă kơ bơ̆n jang tơdrong Sư huay kơ hli,

⁷⁵păng pơm 'lơ̆ng tơpăt păng Sư păng kon bơngai mơ̆n tơ anăp 'Bok Kei-Dei, mă đơ̆ng sơ̆ khơ̆ ning-mônh.

⁷⁶Ơ dăm, gah ih âu đe gô anăn ih bơngai pơtruh nơ̆r 'Bok Kei-Dei mă Kră Yang Tih Hloh, yua kơ ih gô năm hơdrol kơ Kră Yang wă hơmet ming kon bơngai hơdrol kơ Sư truh.

⁷⁷Na ih gô bơtho lu bơngai mă 'Bok Kei-Dei wei-lăng wă kơ lu sư gơh klaih đơ̆ng tơdrong yoch, wă oei hiôk păng 'Bok Kei-Dei.

⁷⁸Yua kơ Kră Yang mơnat kơ bơ̆n tơpă, na Sư ăn 'Bok Dŏng Pơklaih ei jur tơ bơ̆n. Sư thoi măt 'năr pơchrang tơ'bôh tơdrong hơdah kơ bơ̆n mă bơngai oei lăm măng mu, wă lôch hiong ră, mă-lei Sư gô tơ'bôh ăn kơ bơ̆n tôm tơdrong hiôk-hian.”

⁷⁹

⁸⁰Kon sư ei rai đunh rai wơ̆ păng nuih pran kơtang. Sư oei tơ char glă chơngue truh kơ 'Bok Kei-Dei gơh yua sư chă bơtho kơ lu bơngai Isơrael.