Read bahnar Luk 11 Bible Online

Luk 11 - bahnar bible

Luk 11

¹Minh năr ei Yêsu oei krao khan tơ minh anih ei. Lăp đang kơ Sư krao khan boih đei minh 'nu bơngai pơhrăm păng Yêsu khan kơ Sư: “Ơ 'Bok, sơ̆ Yôhan bơtho lu bơngai pơhrăm păng Sư krao khan. Dang ei nhôn kư̆m 'maih kơ Ih bơtho nhôn lei-lăi thoi noh mơ̆n.”

²Na Yêsu khan: “Iĕm krao khan thoi âu: ‘Ơ 'Bă, ăn anăn Ih jing ư-ang. Ăn kơ dêh char Ih tĕnh truh.

³Apinh Ih ăn kơ nhôn đei sŏng sa mah rim năr.

⁴Apinh Ih 'nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn. Apinh Ih 'nĕ ăn kơ nhôn lui kơ đe pơhlŭ pơlung.’ ”

⁵Yêsu khan dơ̆ng kơ lu sư: “Pơtih gia đei tơmoi truh tơ hnam bơ̆n kơmăng, bơ̆n ưh kơ đei tơmam sa wă pôk ăn kơ sư. Na lăp tŏk-bŏk măng bơ̆n năm tơ buôl juăt bơ̆n apinh: ‘Ơ mih, asong inh pêng tŏ 'bĕng mi 'biơ̆,

⁶yua kơ bôl inh 'nao truh đơ̆ng ataih na inh ưh kơ đei tơmam kiơ wă pôk ăn kơ sư sa.’

⁷Na pơtih gia bôl bơ̆n khan thoi âu: ‘Inh pă gơh tơgŭm ih boih. 'Măng đĭ chơkăl boih, inh oei weng kon inh tep. Na inh ưh kơ gơh iung iŏk ăn kơ ih ôh.’

⁸Mă sư bôl bơ̆n ră sư kuă iung asong kơ bơ̆n 'bĕng. Mă-lei Inh khan kơ iĕm tơpă, dah bơ̆n apinh sư khŏm khŏm lei sư kư̆m iung iŏk ăn kơ bơ̆n dôm tơmam bơ̆n apinh sư noh mơ̆n.

⁹Thoi noh na Inh khan kơ iĕm, krao khan apinh 'Bok Kei-Dei khŏm khŏm na Sư gô asong kơ iĕm. Iĕm nŏng kơ chă khŏm khŏm, Sư gô tơ'bôh kơ iĕm. Iĕm dơdŭ 'măng Sư khŏm khŏm, na Sư gô pơih ăn.

¹⁰Bơngai bu krao khan apinh 'Bok Kei-Dei kiơ kiơ, 'Bok Kei-Dei gô asong. Bơngai bu chă kiơ kiơ, 'Bok Kei-Dei gô tơ'bôh ăn. Bơngai bu dơdŭ 'măng 'Bok Kei-Dei, 'Bok Kei-Dei gô pơih ăn.

¹¹“Bĭ lăm lu iĕm hăm đei bu kon sư apinh sa ka na ăn kơ sư sa 'bih kơep?

¹²Kon sư apinh sa kơtăp iĕr, na ăn kơ sư sa aguăt?

¹³Iĕm bơngai kơnê̆ ră, mă-lei iĕm kư̆m băt chă ăn kơ kon iĕm tơmam sa 'lơ̆ng, pơma kiơ kơ 'Bă bơ̆n tơ plĕnh ti, dah bơ̆n apinh Sư, Sư gô ăn kơ bơ̆n Yang Bơhngol 'Lơ̆ng tơpă.”

¹⁴Đei minh 'nu bơngai yang mơ̆t pơm kơ sư kơmlo. Na Yêsu pơpuh yang kơnê̆ ei lĕch đơ̆ng akâu bơngai noh, na bơngai noh gơh pơma hloi. Lu bơngai tơpôl 'bôh thoi noh na lu sư sơleng kơ đon.

¹⁵Mă-lei đei mơ'nah tơkhan dih băl: “Yua kơ yŏng pơgơ̆r yang kơnê̆, anăn sư Belsêbul, tơgŭm, na Sư gơh pơpuh lu yang kơnê̆ nai.”

¹⁶Đei lu mơ'nah dơ̆ng wă pơlong lăng Sư, athei Sư pơm tơdrong mơsêh mơyang đơ̆ng 'Bok Kei-Dei, mă-lei Yêsu ưh kơ wă pơm ôh.

¹⁷Yêsu băt kơ lu sư jô̆ kơ Yêsu khan yang kơnê̆ tơgŭm na Yêsu khan kơ lu sư: “Dah minh pôm teh đak tơblah dih băl, lei teh đak noh gô pơchah hiong tôch. Dah minh pôm hnam dơnŏ tơblah băl, lei hnam dơnŏ noh kư̆m gô hiong.

¹⁸Thoi noh dah yŏng pơgơ̆r yang kơnê̆ tơblah tơduă yang kơnê̆, dôm tơdrong sư pơgơ̆r gô hiong tôch. Inh khan thoi noh yua kơ iĕm khan yŏng yang kơnê̆ Belsêbul tơgŭm Inh pơpuh tơduă sư yang kơnê̆.

¹⁹Iĕm jô̆ kơ Inh thoi noh lei bĭ buăl iĕm gơh pơpuh yang kơnê̆ noh, sư gơh đơ̆ng yơ? Đơ̆ng yang noh mơ̆n dah đơ̆ng yơ? Bơ̆n băt kơ đơ̆ng 'Bok Kei-Dei tơgŭm lu sư ngăl. Thoi noh na lu buăl iĕm kư̆m băt kơ iĕm pơma kơ Inh kư̆ kă đĕch.

²⁰Mă tơpă đơ̆ng 'Bok Kei-Dei ăn kơ Inh, na Inh gơh pơpuh yang kơnê̆. Thoi noh na iĕm 'bôh ră 'Bok Kei-Dei wă pơgơ̆r tơ ala teh âu boih, mă-lei iĕm ưh kơ băt ôh.

²¹“Pơtih gia dah minh 'nu bơngai pran chĕp tak đao oei gak hnam sư, đe ưh kơ gơh tơtông iŏk tơmam sư ôh.

²²Bơngai noh sư gơnang kơ tak đao sư, mă-lei dah đei bơngai bu pran hloh năm blah iŏk pơjei tak đao sư, na bơngai 'nei gơh iŏk đĭ dôm mŭk tơmam sư đei păng asong kơ lu bôl buăl sư. Inh kư̆m tơblah hăm yang Satan thoi noh mơ̆n.

²³“Iĕm kơchăng hŏ, bơngai bu ưh kơ wă kiơ̆ Inh, bơngai noh dang ayăt kơ Inh. Bơngai bu ưh kơ tơgŭm Inh, sư dang pơrăm tơdrong Inh.

²⁴“Inh pơtih kơ iĕm tơdrong noh thoi âu: Yang kơnê̆ lĕch đơ̆ng akâu bơngai, năm tơ char glă, sư chă anih pơdơh ră, sư chă ưh kơ đei. Na sư tơchĕng khan: ‘Inh brŏk oei tơ bơngai mă đêl inh oei ki đĕch.’

²⁵Lăp sư brŏk, sư 'bôh bơngai đêl sư oei noh thoi hnam đe sơpuih hơmet lê̆ 'lơ̆ng boih mă-lei ưh kơ đei Yang Bơhngol 'Lơ̆ng oei.

²⁶Na sư năm chă pơtơm buăl sư tơpơh 'nu mă kơnê̆ hloh kơ sư dơ̆ng mơ̆t oei tơ bơngai noh. Na bơngai noh sư jing pơmat hloh kơ minh 'nu yang kơnê̆ mơ̆t ki.”

²⁷Yêsu pơma thoi noh boih na đei minh 'nu bơngai drŏ-kăn pơma re khan kơ Yêsu: “Bơngai mă tơpŭ kơ Ih păng rong Ih sơ̆, sư noh hiôk tơpă.”

²⁸Mă-lei Yêsu khan: “Bơngai bu mơ̆ng nơ̆r 'Bok Kei-Dei păng pơm kiơ̆, sư boih hiôk hloh.”

²⁹Lăp kơ'bêl kơ đe akŭm rai lơ na Yêsu Sư khan: “Lu jơhnơr iĕm dang ei kơnê̆ dêh, pơm pơlong Inh pơm tơdrong mơsêh mơyang wă kơ băt kơ Inh đơ̆ng 'Bok Kei-Dei tơpă dah ưh. Mă-lei Inh ưh kơ wă pơm tơdrong mơsêh mơyang thoi iĕm apinh noh ôh. Kơplah Jôna năm bơtho lu bơngai Pơlei Ninêwơ sơ̆, tơdrong 'Bok Kei-Dei dŏng sư đơ̆ng đak dơsĭ kư̆m tơbăt kơ lu kon pơlei ei Jôna đơ̆ng 'Bok Kei-Dei tơpă na lu sư bơngai yoch. Na tơdrong 'Bok Kei-Dei wă dŏng Inh Kon Bơngai ning-mônh kơnh kư̆m wă tơbăt kơ jơhnơr iĕm dang ei Inh đơ̆ng Sư mơ̆n, na iĕm bơngai yoch.

³⁰

³¹Truh năr 'Bok Kei-Dei sek tơlang ning-mônh, đei yă pơtao đơ̆ng dêh Sêba jô̆ kơ lu jơhnơr iĕm dang ei bơngai yoch tih, yua kơ sơ̆ sư đơ̆ng dêh ataih kư̆m adrin năm mơ̆ng pơtao Sôlômôn bơtho hơgei. Iĕm âu đei bơngai bơtho hơgei hloh kơ pơtao Sôlômôn bơtho ră mă-lei kuă kơ tơbral kơdih tơdrong yoch.

³²Truh năr 'Bok Kei-Dei sek tơlang ning-mônh lu kon pơlei Ninêwơ kư̆m jô̆ kơ lu jơhnơr iĕm dang ei bơngai yoch mơ̆n, yua kơ lu sư kơtơ̆ng Jôna bơtho athei tơbral kơdih tơdrong yoch, lu sư tơbral hloi. Iĕm âu đei bơngai bơtho hơgei hloh kơ Jôna ră mă-lei kuă kơ tơbral kơdih tơdrong yoch.

³³“Bơ̆n tơ̆k ŭnh kơđeng wă kơ hơdah, bơ̆n ưh kơ lah tơ̆k ŭnh kơđeng 'măn lê̆ tơ rimrôm hnam ôh, dah tơ̆k ŭnh kơđeng iŏk reo klơ̆p lê̆. Bơ̆n juăt kơ atol ŭnh kơđeng tơ kơpal jrăng wă kơ bơ̆n 'bôh hơdah jơ̆p-jang.

³⁴Măt pơm ŭnh kơđeng kơ akâu bơ̆n. Dah măt bơ̆n hơdah 'lơ̆ng, lei tôm tơdrong akâu bơ̆n jang kư̆m 'lơ̆ng mơ̆n. Dah măt bơ̆n kơnê̆, lei tôm tơdrong akâu bơ̆n jang kư̆m ưh kơ 'lơ̆ng, dang bơ̆n oei lăm măng mu đĕch.

³⁵Thoi noh na iĕm athei kơchăng hli kơ ŭnh iĕm păt.

³⁶Dah akâu bơ̆n jang 'lơ̆ng, ưh kơ đei pơm tơdrong kơnê̆ tŏ sĕt, lei akâu bơ̆n dang jing hơdah 'brach, kư̆m thoi ŭnh kơđeng pơchrang hơdah kơ bơ̆n rang achal.”

³⁷Lăp đang kơ Yêsu pơma boih, đei minh 'nu bơngai Juđê khŭl Pharisi pơtơm Yêsu năm sŏng sa tơ hnam sư, na bre sư mơ̆t tơoei wă sŏng sa.

³⁸Bơngai Pharisi ei 'bôh Yêsu ưh kơ ôp ti hơdrol kơ sa kiơ̆ thoi tơdrong juăt đe Juđê pơkă na bơngai Pharisi ei chrêu kơ đon.

³⁹Na Kră Yang Yêsu khan kơ sư: “Lu iĕm bơngai Pharisi hăt hot kơ ôp pơnhan hăm kơchŏk hơdrol kơ sŏng sa khan trŏ tơdrong juăt 'Bok Kei-Dei pơkă, mă-lei lăm to iĕm 'bĕnh kơ tơdrong 'mê̆-'mach, 'bĕnh kơ tơdrong pơgâm.

⁴⁰Ô iĕm bơngai kơhlôh, mă tơ 'ngoaih mă tơ lăm, 'Bok Kei-Dei pơjing iĕm ngăl dah kiơ?

⁴¹Iĕm athei asong ăn kơ lu bơngai dơnuh hin tơmam sa iĕm lăm pơnhan noh na 'Bok Kei-Dei kư̆m lăng tôm tơdrong iĕm rơgoh 'lơ̆ng ngăl.

⁴²“Ơ lu bơngai Pharisi, ning-mônh iĕm pơmat-tat dêh. Iĕm pơm hăt hot tĕch lu tơmam hơi thoi lĕ kơ hla gơsơ̆m, hla hla-kat, dôm hla 'nhot nai, iŏk jên noh pơm pơyơ̆r kơ 'Bok Kei-Dei minh lăm mơjĭt. Mă-lei gah tơdrong kăl hloh thoi lĕ kơ pơm 'lơ̆ng kơ đe păng 'mêm bơnê kơ 'Bok Kei-Dei, tơdrong noh iĕm pơm pơhơi, ưh kơ wă. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei iĕm athei pơm 'lơ̆ng kơ đe păng 'mêm bơnê kơ 'Bok Kei-Dei, 'noh kăl hloh.

⁴³“Ơ lu bơngai Pharisi, ning-mônh iĕm pơmat-tat dêh. Iĕm lăp đon kơ oei tang-dŏ 'lơ̆ng hloh kơ bôl buăl lăm hnam akŭm 'Bok Kei-Dei. Iĕm kư̆m lăp đon kơ đe chă kơkuh kơ iĕm tơ trong kơchơ.

⁴⁴Ning-mônh iĕm pơmat-tat dêh. Iĕm dang lĕ bơsat juơ, đe ưh kơ băt na đe juă 'bơm kơpal noh. Đe lăng iĕm tơ 'ngoaih thoi lĕ kơ 'lơ̆ng ră, mă-lei lăm to iĕm kơnê̆.”

⁴⁵Đei minh 'nu 'bok thây bơtho tơdrong juăt đe Juđê oei 'bơ̆t ei, sư khan kơ Yêsu: “Ơ 'Bok Thây, Ih pơma thoi noh Ih kư̆m dang pơjăm nhôn mơ̆n.”

⁴⁶Na Yêsu khan dơ̆ng: “Ơ lu thây bơtho tơdrong juăt đe Juđê, ning-mônh iĕm kư̆m pơmat-tat dêh mơ̆n. Lu iĕm pơkă kơ đe lơ tơdrong juăt kiơ̆ kơ lu iĕm tơchĕng kơdih, kư̆m dang lĕ iĕm tơpŭ kơ đe tơmam trăp hloh kơ ai tơ̆p pă kĕ gơrŭn, mă-lei iĕm kơdih kư̆m ưh kơ đei tơgŭm sư hơya tŏ sĕt.

⁴⁷Ning-mônh iĕm pơmat-tat dêh. Dang ei iĕm pơm chă pơrŏ hơmet ming lu bơsat lu bơngai mă pơtruh nơ̆r 'Bok Kei-Dei sơ̆, mă-lei lăm to iĕm kư̆m thoi lu đe 'bok iĕm mă pơlôch lu sư sơ̆ mơ̆n.

⁴⁸Lu 'bok iĕm sơ̆ pơlôch lu sư na iĕm dang ei pơm hơmet ming bơsat lu sư dơ̆ng. Thoi noh iĕm kư̆m băt kơ 'bok iĕm pơlôch lu sư mơ̆n sơ̆ păng iĕm dang khan lu 'bok iĕm sơ̆ pơlôch lu sư khan trŏ.

⁴⁹Thoi noh na 'Bok Kei-Dei mă hơgei tôm tơdrong khan thoi âu: ‘Inh gô wơh lu bơngai pơtruh nơ̆r Inh păng lu bơngai jơ̆ng 'bang Inh năm bơtho lu sư, na 'blep kơ lu sư areh pơm kơnê̆ kơ lu sư phŏ kư̆m pơlôch.’

⁵⁰Yua kơ thoi noh na Inh khan kơ iĕm thoi âu: Lu bơngai pơtruh nơ̆r 'Bok Kei-Dei mă lu 'bok iĕm pơlôch sơ̆, đơ̆ng blŭng-a 'Bok Kei-Dei pơjing plĕnh teh truh dang ei,

⁵¹đơ̆ng Kain pơlôch Abel truh lu 'bok iĕm pơlôch Sachari tơ hnam 'Bok Kei-Dei tơm, yua kơ dôm lu bơngai mă 'bok iĕm pơlôch noh 'Bok Kei-Dei kư̆m wă phak iĕm hơgop hăm lu sư mơ̆n.

⁵²“Ơ lu thây bơtho đe Juđê, ning-mônh iĕm pơmat-tat dêh, yua kơ dang ei iĕm ưh kơ wă ăn kơ đe băt tơdrong 'Bok Kei-Dei mă 'blep. Iĕm dang lĕ đei khuă gơh mơ̆t tơ hnam 'Bok Kei-Dei pơhrăm tơdrong Sư, mă-lei iĕm ưh kơ wă pơih 'măng mơ̆t kơdih păng kư̆m kuă ăn đe mơ̆t mơ̆n.”

⁵³Kơplah Yêsu lĕch yak đơ̆ng hnam bơngai Pharisi ei, lu thây bơtho đe Juđê păng lu bơngai Pharisi areh kơ Sư dêh, na chă jet Sư lơ tơdrong,

⁵⁴wă kơ Yêsu pơma ưh kơ trŏ na lu sư wă đei tơdrong gơh jâu Sư.