Read bahnar Luk 16 Bible Online

Luk 16 - bahnar bible

Luk 16

¹Yêsu khan kơ lu bơngai pơhrăm păng Sư thoi âu: “Đei minh 'nu bơngai mơdrŏng đei minh 'nu đam kơiĕng. Na đe roi kơ bơngai mơdrŏng ei khan: ‘Nhôn 'bôh đam kơiĕng ih pơhuach mŭk ih lah 'bok.’

²Na bơngai mơdrŏng ei krao sư na khan: ‘Đe khan kơ ih đei tơdrong, na mă inh krao ih tơ âu. Inh wă kơ ih jô̆ đĭ dôm tơmam inh, inh ưh pă ăn kơ ih jang pơm đam kơiĕng inh boih.’

³Na đam kơiĕng sư ei tơchĕng lăm to khan: ‘Yŏng inh wă pơpuh inh boih, na inh wă jang tơdrong kiơ dơ̆ng? Inh choh mir kư̆m ưh kơ kĕ ôh. Inh kư̆m mơlâu kơ chă apinh sa đơ̆ng đe mơ̆n.

⁴Ô inh băt boih. Inh gô pơm kơ lơ bơngai lăp đon kơ inh na lăp yŏng inh pơpuh inh boih, na inh đei bôl gô sơng iŏk inh oei tơ hnam sư.’

⁵“Thoi noh na đam kơiĕng sư ei krao đĭ-đăng bơngai mă hre kơ yŏng sư. Sư khan kơ bơngai blŭng-a thoi âu: ‘Ih hre kơ yŏng inh dôm yơ?’

⁶Na bơngai ei tơl: ‘Minh-hrĕng kơthŭng đak rơmă.’ Đam kơiĕng sư ei khan: ‘Âu hla bơar đêl ih hre kơ sư, na dang ei ih jah chih ming pơđăm-jĭt kơthŭng đĕch wăi.’

⁷Đơ̆ng noh sư khan kơ minh 'nu bơngai nai dơ̆ng: ‘Bĭ ih hre kơ yŏng inh dôm yơ?’ Na bơngai ei tơl: ‘Minh-hrĕng lom 'ba.’ Đam kơiĕng sư ei khan: ‘Âu hla bơar đêl ih hre kơ sư. Ih jah chih ming tơhngam-jĭt lom 'ba đĕch wăi.’

⁸Bơngai đam kơiĕng ei pơm ưh kơ tơpăt ră, mă-lei yŏng sư kư̆m ngơnh kơ sư chă gơh găi pơm tơdrong arih akâu, yua kơ lu bơngai ala teh âu, lu sư hơgei hloh kơ bơngai lui gah tơdrong tơgŭm dih băl chă 'me akâu jăn wă kơ arih akâu.

⁹“Na Inh khan kơ iĕm thoi âu: Jên boih tơmam ala teh âu đĕch mă-lei iĕm gơh yua jên mơ̆n wă tơgŭm bơngai dơnuh hin, na lăp jên iĕm ưh pă yua boih ning-mônh, iĕm gô đei bôl buăl lơ sơng iŏk iĕm tơ plĕnh ti.

¹⁰“Bơngai bu pơm tơpăt mă tơdrong iĕ, bơngai noh sư kư̆m gô pơm tơpăt tơdrong tih mơ̆n. Bơngai bu pơm ưh kơ tơpăt đơ̆ng tơdrong iĕ, sư kư̆m ưh kơ tơpăt kơ tơdrong tih.

¹¹Dah iĕm ưh kơ pơm tơpăt tơdrong wei-lăng mŭk tơmam ala teh âu, lei 'Bok Kei-Dei kư̆m ưh kơ wă ăn kơ iĕm wei-lăng mŭk tơmam tơ kơpal plĕnh ti mơ̆n.

¹²Dah iĕm ưh kơ pơm tơpăt wei-lăng mŭk tơmam 'Bok Kei-Dei ăn kơ iĕm yua tơ ala teh âu, lei Sư kư̆m ưh kơ wă pơsư̆ ăn kơ iĕm mŭk tơmam tơ plĕnh ti mơ̆n.

¹³“Minh 'nu đĭch ưh kơ gơh jang kơ 'bar 'nu yŏng ôh, hli kơ sư 'mêm kơ yŏng âu, areh kơ yŏng to; chu yom kơ yŏng to, pơjăm pơjuă yŏng âu. Na mŭk tơmam kư̆m dang pơm yŏng mơ̆n. Dah iĕm băt 'mêm kơ 'Bok Kei-Dei Yŏng iĕm tơpă, lei iĕm ưh kơ 'mêm kơ dôm mŭk tơmam ala teh âu ôh.”

¹⁴Lu bơngai Pharisi kư̆m kơtơ̆ng dôm tơdrong Yêsu bơtho noh mơ̆n, na lu sư pơm hiĕk kơ Yêsu yua kơ lu sư 'mêm kơ mŭk tơmam tơ ala teh âu.

¹⁵Na Yêsu khan kơ lu sư: “Lu iĕm lăp đon kơ đe khan kơ iĕm bơngai 'lơ̆ng ră, mă-lei 'Bok Kei-Dei băt kơ jơhngơ̆m lu iĕm kơnê̆. Tơdrong kon bơngai ala teh âu pơang khan 'lơ̆ng ră, mă-lei 'Bok Kei-Dei lăng kơnê̆ kơ Sư.

¹⁶“'Bok Kei-Dei pơkă ăn kơ bơ̆n tơdrong juăt Sư sơ̆ păng wơh lu bơngai pơtruh nơ̆r Sư lăp truh tơ Yôhan đĕch. Na đơ̆ng Yôhan pơtơm bơtho sơ̆ truh dang ei nhôn bơtho tơdrong 'nao 'lơ̆ng 'Bok Kei-Dei wă pơklaih kon bơngai đơ̆ng tơdrong yoch na pơgơ̆r lu sư, na đĭ-đăng bơngai wă tơpă kơ 'Bok Kei-Dei pơgơ̆r lu sư thoi noh.

¹⁷Mă-lei dôm tơdrong juăt 'Bok Kei-Dei pơkă, ưh kơ layơ hiong mă minh tơdrong iĕ ioch đơ̆ng Sư pơkă, mă truh tơ plĕnh teh hiong tôch ning-mônh, sư oei khŏm khŏm.

¹⁸Mă tơdrong achăng akăn kư̆m lei-lăi, bơngai bu achăng akăn sư na iŏk akăn plơ̆ng, bơngai noh sư yoch boih yua kơ sư kơđang kơ̆l ako pơ'brơh kơ akăn sư. Bơngai bu iŏk akăn mă đơ̆ng đe achăng lê̆ boih, bơngai noh kư̆m yoch mơ̆n.”

¹⁹Yêsu khan dơ̆ng thoi âu: “Sơ̆ đei minh 'nu bơngai mơdrŏng, sư juăt kơ hrŭk ao 'lơ̆ng rŏ păng sŏng sa jơnap ling-lang.

²⁰Na đei minh 'nu bơngai dơnuh hin, anăn sư Lasarơ. Sư jĭ tơ'boch roch jơ̆p kơ akâu sư. Đe juăt kơ tung ba tơ'bĭch sư tơ 'măng hnam 'bok mơdrŏng ei.

²¹Sư wă răp tơmam sa mă đêl rơkah đơ̆ng bơngai mơdrŏng ei sa. Lu kŏ kư̆m liơh jĭ sư mơ̆n.

²²Đơ̆ng rŏng kơ noh bơngai dơnuh ei lôch, na linh jang 'lơ̆ng 'Bok Kei-Dei atŏk sư tơ kơpal plĕnh ti. Sư oei jê̆ Abraham 'bơ̆t lu sư oei sŏng sa tơ plĕnh ti. Bơngai mơdrŏng ei kư̆m lôch mơ̆n na đe 'bŭ sư.

²³Sư oei lăm dơnâu ŭnh tŏ hang tơpă. Na sư ngoi 'bôh Abraham tơ plĕnh ti păng kư̆m 'bôh Lasarơ oei jê̆ Abraham mơ̆n.

²⁴Na 'bok mơdrŏng ei krao pơret Abraham thoi âu: ‘Ơ Abraham, apinh ih mơnat kơ inh 'biơ̆, ih wơh Lasarơ năm djrŭ ti sư tơ đak năm kơtoh kơ 'bơ̆r inh 'biơ̆ bĕ wă klaih rơhing 'biơ̆, yua kơ inh oei lăm dơnâu ŭnh tŏ hang dêh.’

²⁵“Mă-lei Abraham khan kơ sư: ‘Ơ dăm, ih athei 'blŏk mơ̆n kơplah ih oei arih tơ ala teh sơ̆ ih jơnap tơpă, đei tơmam lơ tơpă. Mă-lei Lasarơ ưh kơ đei kiơ păng jĭ ling-lang tăm. Dang ei sư oei tơ âu hiôk dêh, mă-lei ih oei lăm dơnâu ŭnh tŏ hang ling-lang.

²⁶Păng kư̆m đei sơlŭng jrŭ păng să tăm sơlam bơ̆n, na mă nhôn wă năm tơ iĕm ưh kơ gơh păng iĕm wă năm tơ nhôn kư̆m ưh kơ gơh mơ̆n.’

²⁷Na 'bok mơdrŏng ei khan: ‘Inh oei đei pơđăm 'nu 'nhŏng oh oei arih tơ teh. Na ih ăn kơ Lasarơ iung arih thoi đêl năm khan kơ lu 'nhŏng oh inh 'nei 'biơ̆ bĕ,

²⁸wă kơ lu sư tơbral kơdih tơdrong yoch na huay kơ phak lăm dơnâu ŭnh thoi inh âu.’

²⁹Na Abraham khan kơ bơngai mơdrŏng 'nei: ‘Tơ ala teh đe oei bơtho kiơ̆ kơ tơdrong 'Bok Kei-Dei pơkă păng tơdrong lu bơngai pơtruh nơ̆r 'Bok Kei-Dei mơ̆n. Lu 'nhŏng oh ih oei gơh mơ̆ng đe bơtho tơdrong noh mơ̆n.’

³⁰'Bok mơdrŏng ei khan: ‘Ơ Abraham ah, inh băt tơpă lu sư ưh kơ 'maih mơ̆ng ôh kơ đe bơtho. Mă-lei dah đei bơngai iung arih đơ̆ng lôch, lei lu sư gô tơbral kơdih tơdrong yoch tơpă.’

³¹Na Abraham khan: ‘Dah lu sư ưh kơ wă mơ̆ng lu đe bơtho tơdrong 'Bok Kei-Dei pơkă păng tơdrong lu bơngai pơtruh nơ̆r 'Bok Kei-Dei, mă sư 'bôh bơngai iung arih đơ̆ng lôch, sư kư̆m ưh kơ lui 'mơ̆i.’ ”