Read bahnar Luk 18 Bible Online

Luk 18 - bahnar bible

Luk 18

¹Klaih kơ noh Yêsu pơma pơtih gia kơ lu sư thoi âu wă kơ lu sư băt kơ krao khan ling-lang huay kơ hăl:

²“Tơ minh pôm pơlei ei đei minh 'nu 'bok sek tơlang, sư ưh kơ chu yom kơ 'Bok Kei-Dei păng ưh kơ hli kơ đe.

³Tơ pơlei 'nei đei minh 'nu yă adro, sư năm tơ 'bok sek tơlang 'nei ling-lang wă kơ 'bok 'nei sek tơlang tơpăt tơdrong đe jâu sư.

⁴Sư năm apinh 'bok sek tơlang 'nei ling-lang ră, mă-lei 'bok 'nei kuă kơ tơdŏng sư. Mă-lei khŏm khŏm 'bok 'nei tơchĕng lăm to thoi âu: ‘Inh ưh kơ chu yom kơ 'Bok Kei-Dei, kư̆m ưh kơ chu kơ đe mơ̆n.

⁵Inh kuă kơ tơdŏng sư ră, mă-lei inh hơhrah kơ sư yua kơ sư apinh inh 'bơ'bel na inh chu tơdŏng sư.’ ”

⁶Na Kră Yang Yêsu khan dơ̆ng: “Iĕm athei tơchĕng lăng deh. 'Bok sek tơlang noh hei, sư ưh kơ 'lơ̆ng ră, mă-lei yua kơ yă adro 'nei apinh 'bơ'bel na sư kư̆m tơdŏng mơ̆n.

⁷Pơma kơ kiơ kơ 'Bok Kei-Dei Sư gô tơdŏng tơpă lu bơngai mă Sư đĭ rơih boih mă oei krao khan kơ Sư măng năr. 'Bok Kei-Dei hăm ngê̆ gô đunh ưh?

⁸Inh khan kơ iĕm tơpă, 'Bok Kei-Dei gô tơdŏng hloi lu sư noh. Mă-lei lăp Inh Kon Bơngai jur dơ̆ng ning-mônh, Inh hăm oei 'bôh lu bơngai lui dơ̆ng ưh kơnh lah?”

⁹Yêsu kư̆m pơma pơtih gia thoi âu dơ̆ng kơ lu bơngai mă ngêh kơdih bơngai 'lơ̆ng mă-lei sư pơjăm đe:

¹⁰“'Bar 'nu bơngai năm tơ hnam akŭm 'Bok Kei-Dei tơm wă krao khan. Minh 'nu 'nei bơngai Pharisi, minh 'nu dơ̆ng bơngai chă iŏk jên thuê̆.

¹¹Na 'bok bơngai Pharisi ei dơ̆ng dơ'nhơ̆ng ngoi tơ plĕnh krao khan lăm to khan: ‘Ơ 'Bok Kei-Dei, inh bơnê kơ Ih yua kơ inh ưh kơ sĭ bơngai thoi đe nai ôh. Inh ưh kơ sĭ bơngai ưh kơ tơpăt, chă pơgâm sa đe ôh. Inh ưh kơ ngôi kư̆ kă ôh. Inh kư̆m ưh kơ sĭ thoi lĕ bơngai chă iŏk jên thuê̆ 'noh ôh.

¹²Rim giĕng inh juăt kơ ơ̆t kơ por 'bar 'măng. Dôm tơmam inh đei inh juăt kơ pơyơ̆r minh lăm mơjĭt.’

¹³“Mă-lei bơngai mă chă iŏk jên thuê̆ noh oei ataih đơ̆ng bơngai Pharisi ei. Sư ưh kơ pơ̆n ngơk muh măt sư tơ plĕnh, mă-lei sư tŭr kơdih kơtơh păng khan: ‘Ơ 'Bok Kei-Dei, apinh Ih mơnat kơ inh 'biơ̆ yua kơ inh bơngai yoch.’ ”

¹⁴Na Yêsu khan dơ̆ng: “Inh khan kơ iĕm tơpă, lăp bơngai mă iŏk jên thuê̆ noh brŏk tơ hnam, 'Bok Kei-Dei jô̆ sư klaih đơ̆ng tơdrong yoch boih. Bơngai Pharisi noh 'Bok Kei-Dei ưh kơ jô̆ kơ sư khan klaih đơ̆ng tơdrong yoch ôh, yua kơ bơngai bu pơang akâu kơdih, sư ei gô mơlâu; bơngai bu pơma sơdrĭ tơ ala kơ 'Bok Kei-Dei, na sư 'nei boih 'Bok Kei-Dei 'brơ̆k mơnat tơiung sư.”

¹⁵Đe anhăk ba lu hơ'lơ̆p tơ Yêsu, wă kơ Yêsu pel kơ̆l krao khan kơ 'Bok Kei-Dei apinh Sư wei-lăng lu sư. Mă-lei lăp lu bơngai pơhrăm păng Sư 'bôh, lu sư khă kuă ăn đe anhăk năm tơ Sư.

¹⁶Na Yêsu krao lu hơ'lơ̆p noh năm tơ Sư păng khan kơ lu bơngai pơhrăm păng Sư: “'Nĕ pă khă lu hơ'lơ̆p, lê̆ lu sư năm tơ Inh, yua kơ bơngai bu lui thoi lu bơngai hơ'lơ̆p âu lui, bơngai noh 'Bok Kei-Dei pơgơ̆r wei-lăng sư ling-lang.

¹⁷Inh khan kơ iĕm tơpă: Dah bu ưh kơ lui thoi lu hơ'lơ̆p âu lui, bơngai noh 'Bok Kei-Dei ưh kơ pơgơ̆r sư ôh.”

¹⁸Đei minh 'nu kră tơring năm jet Yêsu: “Ơ 'Bok Thây, Ih 'lơ̆ng tơpăt, inh pơm thoi yơ wă kơ arih ling-lang hăm 'Bok Kei-Dei?”

¹⁹Yêsu khan kơ sư: “Yua kơ kiơ ih khan Inh bơngai 'lơ̆ng tơpăt? Kon bơngai ưh kơ đei bu 'lơ̆ng tơpăt ôh. Pôm Kră Yang 'Bok Kei-Dei đĕch 'lơ̆ng tơpăt.

²⁰Ih băt boih tơdrong 'Bok Kei-Dei pơkă sơ̆. Sư khan: ‘'Nĕ plah klo kăn đe, 'nĕ pơlôch bơngai, 'nĕ chă tơtông mŭk tơmam đe, 'nĕ kơ pơma hơlĕnh, athei lui yom kơ mĕ 'bă.’ ”

²¹Na 'bok kră tơring noh khan: “Dôm tơdrong noh inh huay ră mă đơ̆ng inh oei iĕ sơ̆ khơ̆ dang ei.”

²²Yêsu kơtơ̆ng thoi noh na Sư khan: “Ih răk ưh kơ tôm oei pă minh tơdrong. Ih athei tĕch đĭ mŭk tơmam ih chă asong kơ lu bơngai dơnuh hin, na kiơ̆ Inh hloi. Thoi noh na ih gô đei mŭk tơmam tơ kơpal plĕnh ti ning-mônh.”

²³'Bok noh kơtơ̆ng Yêsu pơma thoi noh na sư sơ'ngon dêh, yua kơ sư mơdrŏng tơpă.

²⁴Yêsu 'bôh 'bok noh sơ'ngon na Sư khan: “Lu bơngai mơdrŏng wă mơ̆t tơ dêh char 'Bok Kei-Dei pơgơ̆r anat dêh.

²⁵Aseh lăk-đa mơ̆t bơlôh jrŭm 'bônh 'biơ̆ kơ bơngai mơdrŏng wă mơ̆t tơ dêh char 'Bok Kei-Dei.”

²⁶Lu bơngai mă mơ̆ng Sư bơtho tơdrong noh jet Sư khan: “Lei bu gơh mơ̆t tơ dêh char 'Bok Kei-Dei lĕ?”

²⁷Yêsu khan: “Mă dôm tơdrong kiơ kon bơngai ưh kơ gơh pơm, 'Bok Kei-Dei gơh ngăl. Bơngai bu 'Bok Kei-Dei mơnat, bơngai noh gơh mơ̆t.”

²⁸Na Pêtrôs khan kơ Yêsu: “Bĭ lu nhôn mă achăng lê̆ hnam dơnŏ nhôn yua kơ kiơ̆ Ih boih lơliơ?”

²⁹Yêsu khan dơ̆ng: “Inh khan kơ iĕm tơpă, kơplah oei ala teh âu bơngai bu achăng lê̆ hnam sư, kon akăn sư, 'nhŏng oh sư, mĕ 'bă sư, yua kơ sư jang tơdrong 'Bok Kei-Dei,

³⁰bơngai noh gô đei tôm tơdrong hloh kơ sư đei sơ̆ dơ̆ng. Păng ning-mônh sư gô arih ling-lang hăm 'Bok Kei-Dei tăm.”

³¹Yêsu anhăk mơjĭt-'bar 'nu bơngai pơhrăm păng Sư weh ataih 'biơ̆ kơ đe na Sư khan kơ lu bơngai pơhrăm păng Sư: “Iĕm mơ̆ng bĕ. Dang ei bơ̆n oei năm tơ Pơlei Jêrusalem. Tơ ei kơnh đe gô pơm kơnê̆ kơ Inh, na 'blep tôm tơdrong lu bơngai pơtruh nơ̆r 'Bok Kei-Dei sơ̆, lu sư chih khan lê̆ hơdrol gah tơdrong Inh Kon Bơngai.

³²Đe gô jao Inh kơ lu bơngai đơ̆ng dêh đe tơmoi. Lu bơngai đơ̆ng dêh đe tơmoi pơma che bơle achơ̆ achĕch kơ Inh, kơsoh pơ'brơh kơ Inh đak hai.

³³Lu sư teh tach pơjĭ Inh păng pơlôch Inh. Mă-lei kơtĕch pêng năr Inh gô iung arih dơ̆ng.”

³⁴Yêsu pơma tơpăt tơdrong Sư gô lôch tơpă, mă-lei lu bơngai pơhrăm păng Sư ưh kơ hlôh tơdrong Sư pơma noh wă khan kiơ.

³⁵Yêsu năm rok trong wă jê̆ truh tơ Pơlei Jêrikô. Tơ anăp Sư đei minh 'nu bơngai măt tol oei ngôi 'bơ̆t cheng trong chă apinh jên đe.

³⁶Lăp sư kơtơ̆ng lơ bơngai yak rok trong brih sư, na sư jet khan: “Đe năm chă kiơ lơlap trong âu?”

³⁷Na đe khan kơ sư: “Đe kiơ̆ Yêsu Pơlei Nasaret yak trong âu.”

³⁸Lăp sư kơtơ̆ng đe khan thoi noh na sư krao pơret Yêsu: “Ơ Yêsu, ơ 'Bok Krist Kon Sâu pơtao Đawit, apinh Ih mơnat kơ inh 'biơ̆ bĕ.”

³⁹Lu bơngai mă yak hơdrol kơ Yêsu khă sư 'nĕ pă krao, mă-lei sư rai krao 'bơ̆r re: “Ơ Kon Sâu pơtao Đawit, apinh Ih mơnat kơ inh 'biơ̆ bĕ.”

⁴⁰Na Yêsu dơ̆ng athei đe chông ba bơngai măt tol năm tơ Sư. Lăp bơngai măt tol truh tơ Sư na Yêsu jet sư khan:

⁴¹“Ih wă kơ Inh pơm kiơ?” Na bơngai măt tol ei khan: “Ơ 'Bok, inh wă kơ Ih pơklaih măt inh gơh 'bôh hơdah.”

⁴²Na Yêsu khan kơ sư: “Dang ei măt ih 'bôh hơdah. Yua kơ ih lui na măt ih klaih.”

⁴³Đang Yêsu pơma thoi noh măt sư 'bôh hơdah hloi. Sư kiơ̆ hloi Yêsu. Sư pơma ư-ang kơ 'Bok Kei-Dei, lu bơngai tơpôl kư̆m pơma ư-ang kơ 'Bok Kei-Dei mơ̆n.