Read bahnar Luk 20 Bible Online

Luk 20 - bahnar bible

Luk 20

¹Minh năr ei kơplah Yêsu oei bơtho đe tơdrong 'nao 'lơ̆ng tơ lăm hnam akŭm 'Bok Kei-Dei tơm, na lu 'bok soi tih, lu thây bơtho tơdrong juăt, hăm lu đe kră sek tơlang năm jet Yêsu khan: “Apinh Ih roi kơ nhôn bu ăn kơ Ih pơpuh đe mơdro đơ̆ng hnam akŭm âu păng chă bơtho đe lăm hnam akŭm âu mơ̆n?”

³Yêsu khan: “Lei Inh kư̆m wă jet iĕm minh tơdrong mơ̆n. Apinh iĕm roi kơ Inh bu ăn kơ Yôhan pơm kơ đe 'batem noh sơ̆, đơ̆ng 'Bok Kei-Dei ăn dah đơ̆ng kon bơngai ăn đĕch?”

⁴

⁵Na lu sư pơđâu băl khan: “Bơ̆n wă khan kơ Sư thoi yơ? Dah bơ̆n khan đơ̆ng 'Bok Kei-Dei, lei Sư khan: ‘Iĕm kuă kơ kiơ lui kơ Yôhan bơtho?’

⁶Dah bơ̆n khan đơ̆ng kon bơngai, lei hli kơ lu kon pơlei klơ̆m bơ̆n păng tơmo, yua kơ lu sư lui kơ Yôhan bơngai pơtruh nơ̆r 'Bok Kei-Dei tơpă.”

⁷Thoi noh na lu sư khan: “Nhôn ưh kơ băt đơ̆ng bu ăn kơ sư.”

⁸Na Yêsu khan kơ lu sư: “Lei Inh kư̆m ưh kơ roi ăn kơ iĕm bu ăn kơ Inh pơpuh đe păng bơtho đe tơ lăm hnam akŭm âu mơ̆n.”

⁹'Blă kơ noh Yêsu bơtho pơtih gia kơ lu kon pơlei pơla thoi âu: “Đei minh 'nu bơngai pơm mir wă pơtăm plei hơmu. Sư pơtăm đang boih na ăn kơ đe jang mơng, na tơ'ngla sư năm oei tơ dêh nai đunh tơpă.

¹⁰Lăp trŏ kơ bơyan plei hơmu đum boih, na sư wơh minh 'nu đĭch sư năm tơ lu bơngai jang mơng mir hơmu noh wă iŏk plei hơmu mă đei 'măn kơ tơ'ngla sư. Mă-lei lu bơngai jang mơng mir plei hơmu noh rôp tôn teh tơbrŏk sư hoh hoh đĕch.

¹¹Na 'bok tơ'ngla mir noh wơh dơ̆ng minh 'nu đĭch sư, mă-lei lu bơngai jang mơng mir hơmu noh kư̆m oei tôn teh păng pơma kơnê̆ kơ sư, tơbrŏk sư hoh hoh đĕch mơ̆n.

¹²“'Bok tơ'ngla mir hơmu noh wơh dơ̆ng minh 'nu bơngai jang kơ sư mă pêng. Lu bơngai jang mơng mir hơmu noh oei pơm kơnê̆ lei-lăi tôn teh pơjĭ sư, pơpuh sư brŏk hoh hoh đĕch mơ̆n.

¹³Na 'bok tơ'ngla mir hơmu noh khan: ‘Inh wă pơm thoi yơ kih? Inh athei wơh kon tơdăm inh mă 'mêm kơdih, rŏ lăng lu đe noh kư̆m chu yom kơ sư mơ̆n thâu.’

¹⁴Lăp lu bơngai jang mơng mir hơmu noh 'bôh kon 'bok tơ'ngla mir noh truh tơ lu sư na lu sư pơđâu dih băl khan: ‘Bơngai 'noh boih kon 'bok tơ'ngla mir âu, na dang ei bĕ bơ̆n pơlôch sư na mă mir âu jing mir bơ̆n.’

¹⁵Na lu sư rôp hloi kon 'bok tơ'ngla mir hơmu noh hiŏng hơtat tơ jih mir pơlôch hloi. Thoi noh boih na 'bok tơ'ngla mir gô pơm kiơ kơ lu bơngai noh?

¹⁶Sư gô năm pơlôch pơđĭ lu bơngai noh, na sư pơjao ăn kơ lu bơngai nai jang dơ̆ng.” Lăp lu bơngai mơ̆ng Yêsu bơtho kơtơ̆ng thoi noh, na lu sư khan: “Apinh 'Bok Kei-Dei 'nĕ ăn tơdrong noh truh tơ nhôn.”

¹⁷Na Yêsu lăng tơ lu sư păng khan: “Tơdrong iĕm kuă kơ Inh noh trŏ thoi đe chih lăm sơ̆p hla bơar 'Bok Kei-Dei sơ̆ thoi âu: Tơmo mă thơ̆ man hnam hŭt lê̆, Jing tơmo man 'bơ̆t mum hnam

¹⁸Tơmo mă iĕm kuă noh dah bơngai bu huŏng hơtat kơ tơmo noh, bơngai noh gô tơgơ̆ jơ̆ng ti sư păng pơchah kơ̆l sư. Dah tơmo noh huŏng 'bơm bơngai bu, akâu bơngai noh gô pơchah hĕch hoch thoi 'mui teh.”

¹⁹Lu thây bơtho tơdrong juăt đe Juđê păng lu 'bok soi tih wă rôp hloi Yêsu kơplah noh ră yua kơ lu sư băt dôm tơdrong Yêsu pơma pơjuang noh hei trŏ hloi kơ lu sư tơpă. Mă-lei lu sư hli kơ lu kon pơlei pơla mă oei mơ̆ng bơtho 'bơ̆t ei, na lu sư jing ưh kơ yĕng kơ rôp Yêsu ôh.

²⁰Lu sư lăng tông Yêsu ling-lang wă chă tơdrong gơh rôp Sư. Lu sư wơh bôl sư năm tơ Yêsu pơm thoi bơngai tơpăt na sư jet pơlong Yêsu. Dah Yêsu pơma khă gah tơdrong juăt teh đak, lu sư wă rôp anhăk pơjao ăn kơ 'bok tih sek tơlang.

²¹Lu bơngai noh khan kơ Yêsu: “Ơ 'Bok Thây, nhôn băt kơ Ih bơtho tơpăt tơpă. Ih ưh kơ hli kơ bu ôh. Ih lăng lu bơngai pơm tih hăm bơngai iĕ kư̆m lei-lăi ngăl păng Ih ling-lang bơtho tơpăt gah tơdrong 'Bok Kei-Dei.

²²Na nhôn apinh Ih khan kơ nhôn, kiơ̆ kơ tơdrong juăt bơ̆n bơngai Juđê, bơ̆n hăm gơh ăn jên thuê̆ kơ Sêsar, pơtao đe Rôm mă pơgơ̆r bơ̆n dah ưh?”

²³Na Yêsu băt kơ lu đe noh wă plĕch-ploch kơ Sư na Sư khan kơ lu đe noh thoi âu:

²⁴“Iĕm ăn kơ Inh minh hlak jên iĕm tơ âu wă kơ Inh lăng.” Lăp đe ei ăn, na Sư jet lu đe ei khan: “Rup bu âu? Anăn bu âu?” Lu sư khan: “'Noh rup Sêsar păng anăn Sêsar mơ̆n.”

²⁵Thoi noh na Yêsu khan: “Jên âu rup Sêsar tơpă na bơ̆n athei thuê̆ kơ sư yua kơ sư pơgơ̆r. Tơmam 'Bok Kei-Dei bơ̆n athei pơyơ̆r kơ 'Bok Kei-Dei yua kơ Sư tơgŭm ăn kơ bơ̆n.”

²⁶Lu sư ưh kơ gơh pơm kơ Yêsu wă kơ Sư pơma yoch 'bơ̆t anăp lu kon pơlei pơla ôh. Na lu sư thĕng pă đei jet dơ̆ng boih yua kơ lu sư mơ̆ng Yêsu pơma tơwih kơ lu sư trŏ tơpă.

²⁷Lu bơngai Juđê mơ'nah lui kơ 'Bok Kei-Dei kiơ̆ kơ tơdrong Sađusê. Lu sư khan kon bơngai lôch ưh kơ iung arih dơ̆ng ôh. Lu sư mơ'nah năm pơjah pơjăng păng Yêsu na lu sư jet Yêsu thoi âu:

²⁸“Ơ 'Bok Thây, Môis chih ată kơ bơ̆n sơ̆ thoi âu: ‘'Nhŏng bu lôch, mi sư adro ưh kơ đei kon, oh sư athei iŏk mi sư pơm akăn na pơjing kon kơ 'nhŏng sư.’

²⁹Na sơ̆ đei minh pôm hnam dơnŏ đei tơpơh 'nu 'nhŏng oh. 'Nhŏng kơdră lu sư iŏk akăn. Lăp 'nhŏng lu sư lôch ưh tam mă đei kon,

³⁰na oh sư mă 'bar iŏk mi sư pơm akăn dơ̆ng. Oh sư mă 'bar lôch kư̆m ưh tam mă đei kon mơ̆n.

³¹Oh sư mă pêng iŏk mi sư pơm akăn dơ̆ng, mă-lei kư̆m ưh kơ đei kon na lôch hĭ. Tơpơh 'nu 'nhŏng oh sư noh iŏk minh 'nu akăn, na lôch hoh-hoy kơ pơjing 'măn lê̆ kon 'biơ̆.

³²Tơpo hơtuch akăn lu sư noh kư̆m lôch kiơ̆ lu sư mơ̆n.

³³Ih khan kon bơngai gô iung arih, na mưh lu sư iung arih đơ̆ng lôch ning-mônh, akăn lu sư 'noh jing akăn bu kơ lu sư mă tơpă, yua kơ tơpơh 'nu drŏ-nglo iŏk minh 'nu drŏ-kăn? Lu khŭl Sađusê pơjah pơjăng păng Sư thoi noh wă kơ Sư thuơ pơma ưh kơ trŏ.”

³⁴Yêsu khan kơ lu sư: “Lu bơngai ala teh âu tơiŏk dih băl,

³⁵mă-lei lu bơngai mă 'Bok Kei-Dei pơklaih sư, ăn sư gơh iung arih ning-mônh, lu sư ưh pă tơiŏk dih băl dơ̆ng boih.

³⁶Lu sư thoi lĕ kơ lu linh jang 'lơ̆ng 'Bok Kei-Dei păng ưh kơ gơh lôch ôh. Lu sư kon 'Bok Kei-Dei, yua kơ 'Bok Kei-Dei tơiung arih sư đơ̆ng lôch.

³⁷Môis kư̆m tơbăt kơ bơ̆n tơdrong kon bơngai iung arih dơ̆ng, kơplah 'Bok Kei-Dei pơma păng sư tơ tơm 'long ŭnh sa sơ̆. Kơplah noh sơ̆ Môis anăn 'Bok Kei-Dei Kră Yang wei-lăng Abraham, Kră Yang wei-lăng Isăk, Kră Yang wei-lăng Jakôp.

³⁸Lu bơngai âu lôch đĭ boih kơplah noh sơ̆, mă-lei bơ̆n băt kơ lu sư gô iung arih đĭ tôm kơ lu sư yua kơ 'Bok Kei-Dei Kră Yang wei-lăng gah tơdrong arih, ưh kơ sĭ Sư wei-lăng gah tơdrong lôch ôh. Dôm lu bơngai lui kơ Sư mă lôch tơ ala teh âu, 'Bok Kei-Dei ăn kơ lu sư iung arih wă pơang anăn 'Bok Kei-Dei.”

³⁹Đei lu thây bơtho tơdrong juăt đe Juđê mơ'nah khan kơ Yêsu: “Ơ 'Bok Thây, Ih drơ̆ng hơgei tơpă.”

⁴⁰Đơ̆ng rŏng kơ noh đe ưh pă pơ̆n jet Yêsu dơ̆ng boih.

⁴¹Yêsu jet lu đe ei khan: “Lơliơ lu 'bok thây bơtho tơdrong juăt đe Juđê khan 'Bok Krist mă 'Bok Kei-Dei wơh pơm Pơtao, Sư kon sâu pơtao Đawit đĕch?

⁴²Mă-lei Đawit khan tơ lăm sơ̆p hla bơar Tơdrong Hơri Sơ̆ thoi âu: ‘Kră Yang 'Bok Kei-Dei khan kơ Yŏng Kơdră inh thoi âu: Ih kư̆ kơ oei gah 'ma kơ Inh pơgơ̆r,

⁴³tơ̆p Inh blah rôp lu bơngai mă ayăt kơ Ih thuơ tơ kơnơl jơ̆ng Ih.’

⁴⁴Đawit krao kơ 'Bok Krist Yŏng Kơdră sư, na lơliơ dang ei khan 'Bok Krist jing kon sâu Đawit đĕch lĕ?”

⁴⁵Yêsu bơtho lu bơngai pơhrăm păng Sư, na đĭ-đăng lu kon pơlei pơla kiơ̆ ei oei mơ̆ng Sư mơ̆n.

⁴⁶Yêsu khan: “Iĕm athei kơchăng kơ lu 'bok thây bơtho tơdrong juăt đe Juđê. Lu sư lăp đon kơ hrŭk ao tai wă kơ pơrŏ na chă ngôi. Păng lu sư lăp đon wă kơ đe kơkuh kơ sư tơ kơchơ. Lu sư lăp đon kơ oei tang-dŏ 'lơ̆ng hloh kơ bôl buăl lăm hnam akŭm 'Bok Kei-Dei păng lăm năr et sa tih.

⁴⁷Lu sư chă pơjĭp iŏk mŭk tơmam lu drŏ-kăn adro, na lu sư kư̆m pơrŏ krao khan kơ 'Bok Kei-Dei đunh wă kơ đe jô̆ kơ sư khan bơngai 'lơ̆ng. Mă-lei 'Bok Kei-Dei gô phak lu sư hloh kơ đe ning-mônh.”