Read bahnar Luk 7 Bible Online

Luk 7 - bahnar bible

Luk 7

¹Yêsu bơtho kơ lu kon pơlei pơla đang boih, na Sư năm dơ̆ng tơ Pơlei Kapernum.

²Tơ pơlei ei đei minh 'nu 'bok tih linh, sư bơngai Rôm, đei minh 'nu đĭch sư kơeng bơlŏ wă lôch dĕng dĕng.

³Lăp 'bok tih linh kơtơ̆ng ang Yêsu gơh pơklaih bơngai jĭ jăn na sư wơh lu kră pơlei đe Juđê năm krao Yêsu năm tơ sư wă pơklaih jĭ đĭch sư.

⁴Lu sư năm truh tơ Yêsu, lung Yêsu khan: “Apinh Ih khŏm năm pơklaih đĭch 'bok tih linh noh 'biơ̆, yua kơ sư 'mêm tơgŭm kơ lu khŭl Juđê bơ̆n mơ̆n, na sư mah pơm ăn kơ nhôn minh pôm hnam akŭm.”

⁵

⁶Na Yêsu năm kiơ̆ hloi lu đe ei. Lăp lu sư năm wă jê̆ truh tơ hnam 'bok tih linh ei, tơ'bơ̆p hĭ lu bơngai đơ̆ng 'bok tih linh ei wơh na khan kơ Yêsu: “Ơ 'Bok, yŏng nhôn khan Ih huay kơ mah năm truh tơ hnam sư ôh. Sư khan sư ưh kơ hơnhŏ wă tơmơ̆t Ih tơ hnam sư.

⁷Păng sư kư̆m khan sư ưh kơ hơnhŏ wă năm tơ'bơ̆p Ih tơ âu ôh. Sư wă kơ Ih sơkat đơ̆ng âu đĕch na đĭch sư tơ hnam kư̆m klaih mơ̆n.

⁸Sư khan sư kư̆m đei đe pơgơ̆r sư păng sư kư̆m đei pơgơ̆r lu linh mơ̆n. Dah sư khan kơ bơngai âu, mă bơngai to: Năm bĕ, đe năm hloi chu sư. Dah sư bơtho lu đĭch sư jang, mă dôm tơdrong kiơ kiơ, lu sư jang hloi. Na sư kư̆m wă kơ Ih pơm thoi noh mơ̆n. Sư wă kơ Ih sơkat đơ̆ng âu đĕch na đĭch sư tơ hnam kư̆m gô klaih mơ̆n.”

⁹Yêsu kơtơ̆ng sư khan thoi noh, Sư mah hlĭch kơ đon, yua 'bok noh đei đon lui tơpă. Na Sư hue tơ rŏng khan kơ lu bơngai tơpôl mă kiơ̆ Sư ei thoi âu: “Inh khan kơ iĕm tơpă, đơ̆ng sơ̆ Inh tam mă 'bôh ôh khŭl bơngai Juđê lui kơjăp dang bơngai Rôm âu.”

¹⁰Đơ̆ng noh na lu bơngai mă đơ̆ng 'bok tih linh athei năm đih Yêsu ei wih hĭ tơ hnam. Lăp truh tơ hnam 'bôh đĭch mă đêl jĭ hei klaih hloi.

¹¹Đunh 'biơ̆ đơ̆ng noh, Yêsu năm tơ Pơlei Nain, kư̆m đei lơ kon pơlei pơla đơ̆ng nai păng kư̆m đei lu bơngai pơhrăm păng Sư kiơ̆ Sư mơ̆n.

¹²Lăp Sư wă jê̆ truh tơ 'măng jang Pơlei Nain, Sư tơ'bơ̆p hĭ đe tung bơngai lôch. Bơngai ei sư kon pôm yă adro. Kư̆m đei lơ bơngai kiơ̆ năm 'bŭ bơngai ei.

¹³Lăp Kră Yang Yêsu 'bôh mĕ sư ei, 'brơ̆k mơnat, na Sư khan: “Ih 'nĕ pă hmoi.”

¹⁴Na Yêsu hơloh năm pel hơbang, na lu bơngai tung hơbang 'nei dơ̆ng. Yêsu khan kơ bơngai lôch 'nei khan: “Ơ dăm, iung bĕ ih.”

¹⁵Gruih sư iung tơoei păng pơma. Đơ̆ng noh Yêsu pơjao ăn kơ mĕ sư.

¹⁶Đĭ-đăng lu bơngai kiơ̆ ei hli ngăl, na lu sư ư-ang kơ 'Bok Kei-Dei khan: “Bơngai pơtruh nơ̆r 'Bok Kei-Dei mơsêh tơpă năm tơ bơ̆n boih.” Lu sư kư̆m khan dơ̆ng: “Dang ei 'Bok Kei-Dei wă tơgŭm lu bơngai Isơrael tơpă.”

¹⁷Đe ră roi tơdrong Yêsu tơiung arih bơngai ei đơ̆ng lôch jơ̆p kơ dêh Juđê păng kiơ̆ dêh tơmoi hai.

¹⁸Lu bơngai pơhrăm păng Yôhan, sư roi kơ Yôhan dôm tơdrong mơsêh mă Yêsu 'nao pơm noh.

¹⁹Đơ̆ng noh na Yôhan krao 'bar 'nu bơngai pơhrăm păng sư, wơh bre sư năm tơ Kră Yang Yêsu wă jet Sư thoi âu: “Ih hăm trŏ kơ 'Bok Krist mă Yôhan khan gô truh, dah nhôn oei gô bơngai nai dơ̆ng?”

²⁰Lăp bre sư truh tơ Yêsu na bre sư khan thoi âu: “Yôhan mă pơm 'batem wơh nhi jet Ih: ‘Ih hăm trŏ 'Bok Krist mă sư khan gô truh đơ̆ng rŏng kơ sư, dah nhôn oei gô bơngai nai dơ̆ng?’ ”

²¹Kơplah bre sư oei tơ noh, Yêsu pơklaih lơ bơngai jĭ jăn, thoi lĕ pơpuh yang kơnê̆, pơklaih măt tol gơh 'bôh.

²²Na đơ̆ng noh Yêsu khan kơ bre sư: “Biĕm wih roi kơ Yôhan tơdrong mă biĕm kơtơ̆ng đơ̆ng Inh bơtho, hăm biĕm 'bôh noh bĕ: Lu măt tol gơh 'bôh hơdah, lu jơ̆ng kue mah gơh yak, lu jĭ chin mah klaih, lu klĭk jing hơbăng, lu bơngai lôch mah gơh iung arih, lu bơngai dơnuh hin mah mơ̆ng Inh bơtho tơdrong 'nao 'lơ̆ng.

²³Lu bơngai mă lui kơ Inh khŏm khŏm ưh kơ achăng lê̆ Inh, lu sư hiôk dêh.”

²⁴Lăp lu bơngai pơhrăm păng Yôhan wih boih, na Yêsu pơma kơ tơpôl đe ei gah tơdrong Yôhan: “Iĕm năm tơ Yôhan tơ char glă sơ̆, iĕm chă kiơ? Ưh kơ sĭ iĕm năm chă bơngai ngĭl ngŭl tơchĕng đon 'bar pah thoi lĕ hla kial thu wơ̆t lăk ôh.

²⁵Lei iĕm chă kiơ? Dah iĕm năm lăng bơngai hrŭk hơbĕn ao 'lơ̆ng? Tơ̆ng iĕm wă lăng bơngai hrŭk hơbĕn ao 'lơ̆ng jơnap jơnoi, lei sư oei tơ hnam 'bok pơtao.

²⁶Lei iĕm chă kiơ? Iĕm năm chă bơngai pơtruh nơ̆r 'Bok Kei-Dei hăm trŏ? Trŏ boih iĕm năm chă bơngai pơtruh nơ̆r 'Bok Kei-Dei. Inh khan kơ iĕm tơpă, Yôhan boih sư tih hloh kơ đĭ-đăng lu bơngai mă pơtruh nơ̆r 'Bok Kei-Dei sơ̆.

²⁷Yua kơ Yôhan boih na đe mah chih lăm sơ̆p hla bơar 'Bok Kei-Dei sơ̆ thoi âu: 'Bok Kei-Dei khan: ‘Âu Inh wơh minh 'nu bơngai pơtruh nơ̆r Inh hơdrol, wă kơ sư hơmet trong kơ Ih.’

²⁸Inh khan kơ iĕm tơpă, Yôhan sư tih hloh kơ đĭ-đăng kon bơngai mơ̆n, mă-lei bơngai bu iĕ hloh kơ đe lăm chăl 'nao mă 'Bok Kei-Dei pơgơ̆r dang ei, sư kư̆m hlôh wao tơdrong 'Bok Kei-Dei nhên hloh kơ Yôhan dơ̆ng.”

²⁹Đĭ-đăng lu kon pơlei pơla păng lu bơngai iŏk jên thuê̆ mơ̆ng Yôhan bơtho sơ̆, lu sư khan 'Bok Kei-Dei 'lơ̆ng tơpăt, na lu sư wă kiơ̆ tơdrong 'Bok Kei-Dei bơtho, đơ̆ng noh Yôhan pơm 'batem kơ lu sư hloi.

³⁰Mă-lei lu bơngai Pharisi păng lu 'bok thây bơtho tơdrong juăt đe Juđê ưh kơ wă kiơ̆ thoi 'Bok Kei-Dei bơtho, na lu sư kuă kơ iŏk 'batem ôh.

³¹Lu bơngai ahrei âu phara dêh na Inh wă pơtih gia tơdrong sư thoi yơ?

³²Lu sư dang lĕ hơ'lơ̆p pơchơt ngôi tơ kơchơ, lu sư đei 'bar khŭl. Minh khŭl pơma 'bơ̆r re kơ bôl sư khan: ‘Nhôn hlôm tơgiĕp wă kơ tơdrong chơt, mă-lei iĕm kuă kơ suang pơrŏ. Nhôn hơri tơdrong đe lôch, mă-lei iĕm kuă kơ nhơ̆m hmoi.’

³³Na tơdrong iĕm kuă kơ nhi Yôhan kư̆m thoi noh mơ̆n. Sơ̆ Yôhan ơ̆t kơ por, ưh kơ et sik, na iĕm kư̆m jô̆ kơ sư khan wơnh.

³⁴Na gah Inh Kon Bơngai âu jur tơ teh âu, sŏng sa hơdai lu sư, na iĕm kư̆m jô̆ kơ Inh khan bơngai sa bơlŭk, et dư, tơbôl hăm bơngai iŏk jên thuê̆, lu bơngai yoch mơ̆n.

³⁵Mă-lei dôm lu bơngai kiơ̆ tơdrong 'Bok Kei-Dei tơpă, sư băt kơ 'Bok Kei-Dei pơm trŏ ngăl.”

³⁶Đei minh 'nu bơngai Pharisi wơ̆n Yêsu năm sŏng sa tơ hnam sư. Na Yêsu năm tơ ei sa hơdai sư.

³⁷Tơ pơlei ei đei minh 'nu drŏ-kăn juăt kơ pơm yoch. Sư kơtơ̆ng khan Yêsu oei sŏng sa păng bơngai Pharisi ei, na sư iŏk minh gŏl đak pơgang 'bâu phu.

³⁸Na sư năm nhơ̆m 'bơ̆t jơ̆ng Yêsu, đak măt sư kơtoh tơ jơ̆ng Yêsu. Đơ̆ng noh na sư sut jơ̆ng Yêsu păng sŏk sư kơdih, na chŭm hloi jơ̆ng Yêsu. Đơ̆ng ei na sư tuh đak pơgang 'bâu phu kơ jơ̆ng Yêsu.

³⁹Lăp bơngai Pharisi mă wơ̆n Sư, 'bôh thoi noh na sư tơchĕng lăm to sư kơdih khan: “Tơ̆ng bơngai âu bơngai pơtruh nơ̆r 'Bok Kei-Dei tơpă, lei Sư băt kơ bơngai mă pel Sư 'noh bơngai đi.”

⁴⁰Na Yêsu khan hloi kơ sư: “Ơ Simôn, Inh wă khan kơ ih.” Na Simôn tơl: “Ơ 'Bok Thây, Ih wă khan kiơ kơ inh?”

⁴¹Yêsu khan: “Sơ̆ đei minh 'nu bơngai đei 'bar 'nu hre kơ sư jên. Minh 'nu ei hre kơ sư kiơ̆ kơ jên so sơ̆ pơđăm-hrĕng, gah minh 'nu dơ̆ng hre kơ sư pơđăm-jĭt đĕch.

⁴²Mă-lei tôm kơ bre sư ưh kơ đei jên 'mong ngăl. Yua kơ thoi noh na mă 'bok tơm jên ei pơklaih kơ bre sư đĕch. Thoi noh na 'bar 'nu bre noh, ayơ mă hiôk hloh yua kơ tơ'ngla jên pơklaih hre?”

⁴³Simôn khan: “Rŏ lăng bơngai mă hre lơ 'biơ̆, sư hiôk hloh.” Yêsu khan: “Ih tơl trŏ boih.”

⁴⁴Đơ̆ng noh na Yêsu hue tơ bơngai drŏ-kăn noh khan hloi kơ Simôn: “Ih lăng bơngai drŏ-kăn âu. Lăp Inh mơ̆t tơ hnam ih, ih ưh kơ ăn kơ Inh đak wă ôp jơ̆ng Inh ôh, mă-lei sư âu ôp jơ̆ng Inh păng đak măt sư păng sut pơhrĕng păng sŏk sư kơdih.

⁴⁵Lăp ba tơ'bơ̆p hei, ih ưh kơ đei chŭm 'mêm kơ Inh thoi bơ̆n juăt kơ pơm ôh, mă-lei sư âu oei chŭm jơ̆ng Inh khŏm khŏm.

⁴⁶Ih kư̆m ưh kơ pik đak yâu tơ kơ̆l Inh wă pơhiôk Inh ôh, mă-lei sư âu tuh đak pơgang 'bâu phu tơ jơ̆ng Inh.

⁴⁷Thoi noh na Inh khan kơ ih tơpă, dôm tơdrong yoch sư lơ ră, mă-lei Inh mơnat ăn boih. Thoi noh na sư 'mêm kơ Inh tơpă. Mă-lei bơngai bu ưh kơ gan wă apinh Inh pơklaih tơdrong yoch sư, bơngai noh ưh kơ gan 'mêm kơ Inh dêh ôh.”

⁴⁸Na Yêsu khan kơ bơngai drŏ-kăn ei dơ̆ng: “Tơdrong yoch ih Inh tŭk lê̆ boih.”

⁴⁹Lu bơngai sŏng sa hơdai Yêsu tơ ei kơtơ̆ng thoi noh na lu sư mơmơnh lăm to khan: “'Nâu bơngai bu khan gơh pơklaih yoch đe?”

⁵⁰Na Yêsu khan kơ bơngai drŏ-kăn ei dơ̆ng: “Yua kơ ih lui na ih klaih. Yak kơ ih mă 'lơ̆ng bĕ.”