Read bahnar Both 11 Bible Online

Both 11 - bahnar bible

Both 11

¹Iĕm athei băt 'mêm yom kơ Kră Yang 'Bok Kei-Dei ling-lang păng athei wei răk dôm tơdrong juăt Sư, nơ̆r Sư athei păng nơ̆r Sư tơtă.

²Năr 'nâu, lu iĕm athei băt inh ưh kơ đei pơma bơtho kơ lu kon hơ'lơ̆p iĕm ôh, yua kơ lu sư ưh kơ tam băt păng kư̆m ưh tam 'bôh. Tam mă kơtơ̆ng lu nơ̆r bơtho khan đơ̆ng Kră Yang 'Bok Kei-Dei lu iĕm, tơdrong 'lơ̆ng tơpăt Sư, ti mơsêh pran kơtang tih Sư.

³Dôm tơdrong mơsêh hlĭch păng tơdrong Sư pơm boih kơ dêh Êyiptơ, kơ Pharaôn, pơtao Êyiptơ păng đĭ kon pơlei lăm dêh sư;

⁴dôm tơdrong Sư pơm boih kơ linh Êyiptơ lu hao aseh păng gre aseh Êyiptơ, kơplah lu sư druh 'moi iĕm, na Kră Yang ăn kơ đak dơsĭ 'Brê lơ̆p pơrăm lê̆ lu sư.

⁵Kon sâu lu iĕm kư̆m ưh kơ 'bôh tơdrong Sư pơm boih kơ lu iĕm lăm char glă mă dĭng tơ lu iĕm truh tơ anih 'nâu.

⁶Mă tơdrong Sư pơm kơ Đathan păng Abiram, kon drŏ-nglo Êliap, sâu Rubên kơplah teh hơđang ha luăn bre sư păng hnam dơnŏ sư bơsŭn păng đĭ dôm tơmam kiơ gah lu sư kơplah lu sư oei hơdai lu kon pơlei Isơrael sơ̆.

⁷Mă-lei lu iĕm 'bôh păng măt dôm tơdrong tih mă Kră Yang hlôi pơm boih.

⁸Thoi noh iĕm athei wei răk bĕ dôm nơ̆r tơtă mă inh bơtho ăn kơ lu iĕm năr 'nâu, wă kơ lu iĕm đei jơhngơ̆m pran, mơ̆t iŏk dêh mă lu iĕm wă iŏk tơ pah to Krong Jôrđăn.

⁹Wă kơ lu iĕm arih sot tơ teh đak mă Kră Yang pơkă boih wă ăn kơ lu 'bok iĕm păng ăn kơ adrĕch adrung lu sư, teh đak toh păng đak sut.

¹⁰Dêh mă lu iĕm gô mơ̆t iŏk noh ưh kơ sĭ thoi dêh Êyiptơ, mă anih lu iĕm lĕch sơ̆, yua kơ tơ Êyiptơ mưh iĕm rei adrĕch, iĕm bơ̆ đak 'mơ̆i bơwei nhen thoi pơgar.

¹¹Mă-lei dêh lu iĕm gô năm mơ̆t iŏk noh, jơ̆ minh dêh đei kông groi păng teh dơnă 'lơ̆ng, yua đak 'mi đơ̆ng plĕnh ruh hngôm.

¹²'Noh jơ̆ minh pôm dêh mă măt Kră Yang 'Bok Kei-Dei iĕm bơwei, đơ̆ng sơnăm blŭng-a sơ̆ truh tơ tôch.

¹³Tơdah lu iĕm chu mơ̆ng kiơ̆ dôm nơ̆r tơtă mă inh bơtho ăn kơ lu iĕm năr 'nâu, đĭ jơhngơ̆m klơm klak 'mêm kơ Kră Yang 'Bok Kei-Dei iĕm păng bơ̆jang kơ Sư.

¹⁴Na Sư gô ăn đak 'mi jur trŏ kơ bơyan mă bơyan nê̆-năm mă bơyan puih, lu iĕm gô đei 'ba hơ'bo, sik hơmu 'nao păng đak rơmă plei 'long ôliwơ.

¹⁵Sư kư̆m gô pơm ăn kơ mir tơmăn đei 'nhĕt chăt ăn kơ sem dơrong iĕm; iĕm gô đei sŏng sa phĭ mah rơkah rơkai.

¹⁶Athei kơchăng wă kơ lu iĕm huay lui kơ đe pơhlŭ pơlung, achăng lê̆ Kră Yang, na drap kơkuh kơ yang nai.

¹⁷Kơplah noh Kră Yang gô hil mĭl kơ lu iĕm, sư gô tang lê̆ plĕnh, na ưh pă đei đak 'mi dơ̆ng, teh pă đei plei sa: Lu iĕm gô lôch hiong đơ̆ng lăm dêh char 'lơ̆ng, mă đơ̆ng Kră Yang ăn kơ lu iĕm.

¹⁸Lu iĕm, athei chih răk lăm jơhngơ̆m păng lăm kơ̆l 'ngok, dôm nơ̆r inh bơtho iĕm, 'bot sư tơ ti wă kơ iĕm 'blŏk păng pơ̆n sư tơ klĕng iĕm.

¹⁹Athei bơtho dơ̆ng kơ lu kon sâu iĕm, tơ'blŏk mă lu sư oei ngôi lăm hnam dah yak rok trong, kơplah oei tep dah iung đơ̆ng tep.

²⁰Athei chih răk dôm lu nơ̆r âu tơ jrăng 'măng hnam păng tơ 'măng jang iĕm.

²¹Thoi noh măng năr oei đei kơpal teh kơ lu iĕm păng kon sâu lu iĕm gơh oei đei đunh sot lăm dêh mă Kră Yang pơkă boih wă ăn kơ lu 'bok iĕm kư̆m thoi iĕm.

²²Tơdah lu iĕm kơchăng wei răk păng pơm kiơ̆ đĭ dôm nơ̆r tơtă, mă inh bơtho boih kơ lu iĕm athei, 'mêm kơ Kră Yang 'Bok Kei-Dei lu iĕm, yak kiơ̆ trong Sư păng oei pơgơ̆p kơjăp hăm Sư.

²³Lei Kră Yang gô pơpuh lê̆ đĭ lu adrĕch adrung 'nâu đơ̆ng anăp lu iĕm, lu iĕm gô iŏk oei lăm teh đak adrĕch adrung tih păng pran hloh kơ iĕm.

²⁴Tơ anih ayơ tơpang jơ̆ng lu iĕm juă, tơ noh jing anih lu iĕm. Teh hơdral lu iĕm đơ̆ng char glă truh tơ Liban đơ̆ng Krong Ơphrat truh tơ dơsĭ gah bơmơ̆t.a

²⁵Ưh kơ đei bơngai bu kĕ iung dơ̆ng blah 'bơ̆t anăp lu iĕm; Kră Yang 'Bok Kei-Dei lu iĕm gô pơm ăn kơ đe hli tơrơ kơ lu iĕm lăm jơ̆p kơ dêh lu iĕm juă, thoi Sư đei pơkă khan boih kơ lu iĕm.

²⁶Dang ei Inh ăn 'bơ̆t anăp lu iĕm rơih iŏk tơdrong pŭn hiôk păng tơdrong hiap pơtê̆.

²⁷Tơdrong pŭn hiôk, tơdah lu iĕm mơ̆ng pơm kiơ̆ dôm nơ̆r tơtă đơ̆ng Kră Yang 'Bok Kei-Dei lu iĕm, mă inh roi ăn kơ iĕm năr 'nâu.

²⁸Tơdrong hiap pơtê̆, tơdah lu iĕm kuă kơ mơ̆ng păng ưh kơ pơm kiơ̆ ôh dôm nơ̆r tơtă đơ̆ng Kră Yang 'Bok Kei-Dei lu iĕm, mă weh achăng lê̆ nơ̆r tơtă đơ̆ng Kră Yang 'Bok Kei-Dei iĕm, na yak kiơ̆ trong lu yang nai, mă lu iĕm ưh kơ băt.

²⁹Kơplah Kră Yang 'Bok Kei-Dei chông ba iĕm mơ̆t iŏk dêh đêl pơkă na sơkat pŭn hiôk tơ kơpal kông Gêrasim păng tơdrong hiap pơtê̆ tơ kơpal kông Êbal.

³⁰'Bar tŏ kông âu tơ pah to Krong Jôrđăn, gah to kơ trong tih, năm tơ gah măt 'năr mơ̆t jê̆ lu 'long kôih tơ Môre lăm tơring kon pơlei Kanaan oei tơ lăm thŭng Araba, tơ jê̆ pơlei Gilgal jê̆ lu 'long kôih tơ Môre?

³¹Lu iĕm tŏk kơ Krong Jôrđăn, wă mơ̆t iŏk dêh mă Kră Yang 'Bok Kei-Dei lu iĕm ăn kơ lu iĕm. Mưh lu iĕm đei iŏk dêh păng bơ̆jang sa păng oei hloi tơ noh,

³²lu iĕm athei pơkă tơpă pơm kiơ̆ đĭ dôm tơdrong juăt păng nơ̆r tơtă mă inh đei bơtho tơ'bôh kơ lu iĕm năr 'nâu.