Read bahnar Both 12 Bible Online

Both 12 - bahnar bible

Both 12

¹'Nâu bơih tơdrong juăt păng nơ̆r tơtă mă lu iĕm athei kơchăng wei răk păng pơm kiơ̆ đĭ chăl arih lu iĕm oei tơ lăm dêh mă Kră Yang 'Bok Kei-Dei 'bok iĕm ăn kơ lu iĕm iŏk oei.

²Pơrăm đĭ lu anih ayơ lu adrĕch adrung, mă lu iĕm gô blah puh lê̆, lu anih kơkuh kơ yang lu sư, tơ kơpal kông kơjung dah tơ kơpal groi dah tơ ala yơ̆p 'long,

³Lu iĕm athei pơrăm chơnang soi teh pơchah lu rup yang tơmo păng soh lu jrăng Asêrim lu sư lăm ŭnh păng teh pơhĕch lu rup man yang lu sư păng sŭt lê̆ đĭ anăn lu rup yang noh lăm anih noh.

⁴Iĕm 'nĕ kơkuh kơ Kră Yang 'Bok Kei-Dei lu iĕm kiơ̆ thoi lu adrĕch noh.

⁵Mă-lei lu iĕm athei chă anih ayơ lăm adrĕch Isơrael, mă Kră Yang 'Bok Kei-Dei lu iĕm gô rơih iŏk pơm anih oei păng 'măn Anăn Sư, lu iĕm akŭm kơkuh.

⁶Chĕp ba tơmam soi 'buh pơyơ̆r tơ noh, lu tơmam soi iŏk minh lăm mơjĭt, tơmam soi pha, lu tơmam soi pơsĭt đêl nơ̆r pơkă, tơmam soi hăm jơhngơ̆m lăp păng lu kon kơdră rơmo triu bơbe tuh blŭng-a.

⁷Tơ noh 'bơ̆t anăp Kră Yang 'Bok Kei-Dei lu iĕm, chơt hiôk sŏng sa hăm hnam dơnŏ, yua kơ dôm tơdrong jang đơ̆ng tơpang ti iĕm kơdih, na đei Kră Yang 'Bok Kei-Dei lu iĕm ăn pŭn hiôk kơ iĕm.

⁸'Nĕ kơ pơm thoi lu bơ̆n oei pơm năr âu tơ âu, noh rim 'nu pơm kiơ̆ kơ đon sư tơchĕng kơdih khan trŏ.

⁹Dang ei lu iĕm tam mă mơ̆t tơ anih pơdơh păng tam mă đei iŏk teh bơ̆jang sa mă Kră Yang 'Bok Kei-Dei iĕm wă ăn.

¹⁰Mă-lei lu iĕm gô tŏk tơ pah to kơ Krong Jôrđăn, oei lăm dêh mă Kră Yang 'Bok Kei-Dei lu iĕm wă ăn bơ̆jang sa. Sư gô ăn hiôk hơđơ̆ng pơdơh, ưh pă đei lu ayăt wang dăr.

¹¹Kơplah noh lu iĕm gô chĕp ba tơmam soi 'buh, tơmam iĕm soi pơyơ̆r iŏk minh lăm mơjĭt, tơmam soi pha, lu tơmam soi 'lơ̆ng hloh, mă lu iĕm drơ̆ng pơkă wă pơyơ̆r ăn kơ Kră Yang tơ anih mă Kră Yang 'Bok Kei-Dei iĕm gô rơih wă ăn Anăn Sư oei.

¹²Tơ noh lu iĕm, kon drŏ-nglo, kon drŏ-kăn, đĭch drŏ-nglo păng đĭch drŏ-kăn lu iĕm lu bơngai Lêwi mă oei lăm pơlei hơdai lu iĕm, lu bơngai mă ưh kơ đei iŏk tơmam dah teh jang sa kơdih gô chơt hiôk 'bơ̆t anăp Kră Yang 'Bok Kei-Dei iĕm.

¹³Thoi noh lu iĕm athei kơchăng ưh kơ gơh pơyơ̆r tơ lu anih nai mă lu iĕm wă.

¹⁴Mă-lei lu iĕm athei pơyơ̆r tơmam soi 'buh tơ anih mă Kră Yang gô rơih minh anih đơ̆ng lăm teh đak lăm minh adrĕch, tơ anih noh lu iĕm athei pơm dôm tơdrong mă inh đei bơtho khan.

¹⁵Mă tơ anih ayơ lăm pơlei lu iĕm kơdih, iĕm gơh koh sa lu sem dơrong mơ̆ng kơ iĕm, kiơ̆ kơ tơdrong pŭn hiôk mă Kră Yang 'Bok Kei-Dei asong ăn kơ lu iĕm; mă bơngai kơnê̆ 'mê̆-'mach dah bơngai 'lơ̆ng rơgoh kư̆m gơh sa 'nhĕm noh thoi iĕm sa 'nhĕm juei păng 'nhĕm kơtŏng jĭl bram.

¹⁶Mă-lei lu iĕm 'nĕ kơ sa pham; athei tuh hŭt lê̆ tơ teh thoi tuh hŭt đak.

¹⁷Lu iĕm ưh kơ gơh sa lăm pơlei iĕm kơdih, lu tơmam iŏk đơ̆ng minh lăm mơjĭt, 'ba, sik hơmu đak rơmă plei ôliwơ, dah lu kon rơmo triu bơbe tuh blŭng-a, dah tơmam kiơ iĕm drơ̆ng pơkă wă pơyơ̆r, dah iĕm pơyơ̆r hăm jơhngơ̆m wă, dah lu tơmam pơyơ̆r nai, lu iĕm ưh kơ gơh sa lăm pơlei iĕm kơdih.

¹⁸Mă-lei iĕm, kon drŏ-nglo, kon drŏ-kăn đĭch drŏ-nglo păng đam drŏ-kăn iĕm, hăm lu bơngai Lêwi oei hơdai lăm pơlei iĕm, athei sa lu kon sem tơmam noh 'bơ̆t anăp Kră Yang 'Bok Kei-Dei iĕm, tơ anih Sư rơih; lu iĕm gô chơt hiôk 'bơ̆t anăp Kră Yang 'Bok Kei-Dei iĕm, dôm tơdrong jang đơ̆ng tơpang ti iĕm kơdih.

¹⁹Đĭ chăl arih iĕm, athei kơchăng, 'nĕ kơ hiơt hŭt lê̆ bơngai Lêwi mă đei lăm dêh noh.

²⁰Kơplah Kră Yang 'Bok Kei-Dei iĕm pơih hơdral rai să ăn kơ iĕm, thoi Sư đei pơkă khan kơ iĕm, yua kơ iĕm hơpơi 'maih sa 'nhĕm na khan: “Inh gô sa 'nhĕm,” iĕm gô sa mơ̆ng kơ iĕm wă sa dôm yơ.

²¹Tơdah anih mă Kră Yang 'Bok Kei-Dei iĕm rơih boih wă dan Anăn Sư, ataih đơ̆ng iĕm oei, iĕm gơh 'bet sa rơmo dah triu lăm khŭl mă Kră Yang iĕm ăn kơ iĕm kư̆m thoi Inh pơkă kơ iĕm; iĕm gơh sa 'nhĕm mơ̆ng kơ wă sa lăm pơlei iĕm kơdih.

²²Lu iĕm gơh sa 'nhĕm thoi sa 'nhĕm kơtŏng păng jĭl bram; đĭ-đăng bơngai yoch kơnê̆ dah bơngai 'lơ̆ng rơgoh kư̆m gơh sa.

²³Mă-lei athei kơchăng, 'nĕ kơ sa pham; yua kơ pham đei tơdrong arih, lei na ưh kơ gơh ôh sa tơdrong arih hơdai hăm 'nhĕm.

²⁴Iĕm ưh kơ gơh sa pham; athei tuh hŭt lê̆ tơ teh thoi đak.

²⁵'Nĕ kơ sa pham, wă kơ iĕm păng kon sâu iĕm gơh đei pŭn hiôk, yua kơ pơm 'lơ̆ng trŏ thoi Kră Yang lăp đon.

²⁶Gah lu sem dơrong mă iĕm 'măn lê̆ 'lơ̆ng rơgoh wă pơyơ̆r păng kiơ̆ thoi đei pơkă boih dah wă pơsĭt đơ̆ng nơ̆r pơkă wă pơyơ̆r, na rôp anhăk ba năm tơ anih mă Kră Yang rơih boih.

²⁷Tơ noh lu iĕm pơyơ̆r 'nhĕm păng pham pơm tơmam soi 'buh kơpal chơnang soi Kră Yang 'Bok Kei-Dei iĕm; mưh wă pơyơ̆r tơmam nai, iĕm tuh dan pham kơpal chơnang soi Kră Yang 'Bok Kei-Dei iĕm, na 'nhĕm noh iĕm gơh sa.

²⁸Athei bơwei păng mơ̆ng răk kiơ̆ dôm tơdrong 'nâu mă inh đei bơtho pơkă kơ iĕm 'nâu, wă kơ iĕm păng kon sâu iĕm gơh đei pŭn hiôk ling-lang, yua kơ pơm dôm tơdrong 'lơ̆ng trŏ thoi noh Kră Yang 'Bok Kei-Dei lăp đon.

²⁹Kră Yang 'Bok Kei-Dei iĕm gô pơlôch lu adrĕch adrung mă iĕm wă blah iŏk, na oei hloi tơ lăm dêh lu sư.

³⁰Na iĕm athei kơchăng bĕ đơ̆ng rŏng kơ lu sư lôch đĭ kơnh ih 'leh lăm hơđong, 'nĕ chơchă wă kơ băt yang lu sư, na khan: Lu adrĕch adrung âu bơ̆jang kơkuh kơ yang lu sư thoi yơ kih? Lu bơ̆n gô pơm kiơ̆ thoi noh.

³¹'Nĕ kơ bơ̆jang kơkuh kơ Kră Yang 'Bok Kei-Dei iĕm thoi noh, yua kơ lu sư đei pơm boih dôm tơdrong kơnê̆ krưp Kră Yang areh hloh kơ noh đơ̆ng lu sư soh pơyơ̆r kon drŏ-nglo kon drŏ-kăn lu sư kơdih tơ ŭnh pơm tơmam soi 'buh arih kơ yang kơnê̆.

³²Lu iĕm athei kơchăng; pơm kiơ̆ mă trŏ thoi noh 'nĕ kơ hŭt dah pơthim kiơ.