Read bahnar Both 18 Bible Online

Both 18 - bahnar bible

Both 18

¹Lu 'bok soi bơngai Lêwi păng đĭ lu adrĕch bơngai Lêwi, ưh kơ đei teh bơ̆jang sa hơdai hăm lu bơngai Isơrael, lu sư arih sa đơ̆ng đe pơyơ̆r ăn kơ Kră Yang păng đơ̆ng tơmam Kră Yang.

²Thoi noh, lu sư ưh kơ đei teh bơ̆jang sa, lăm lu 'nhŏng oh sư; Kră Yang boih tơmam lu sư, thoi nơ̆r Sư pơkă boih hăm lu sư.

³'Nâu boih mă tơmam 'măn kơ lu 'bok soi gơh iŏk yua mưh kon pơlei pơyơ̆r tơmam soi minh pôm, rơmo tơno dah triu akăn; minh pah hơngiĕng dah meng tơ'bong păng hlŭng klak.

⁴Iĕm kư̆m gô asong ăn kơ lu sư tơmam soi phe 'ba hle, sik hơmu, đak rơmă 'long ôliwơ mă iĕm yuă blŭng-a lăm bơyan păng sŏk lu kon triu yuă blŭng-a.

⁵Yua kơ Kră Yang 'Bok Kei-Dei hlôi rơih boih lu sư adrĕch Lêwi đơ̆ng lăm lu bơngai Isơrael wă kơ lu sư oei păng bơ̆jang kơ Kră Yang sư păng lu kon drŏ-nglo sư ling-lang ưh kơ layơ tôch.

⁶Tơdah đei minh 'nu bơngai Lêwi wă lê̆ pơlei mă sư oei lăm lu bơngai Isơrael, wă năm tơ anih Kră Yang rơih,

⁷bơngai noh gơh bơ̆jang yua anăn Kră Yang 'Bok Kei-Dei sư, thoi đĭ-đăng lu 'nhŏng oh sư, bơngai Lêwi, oei bơ̆jang 'bơ̆t anăp Kră Yang.

⁸Bơngai noh kư̆m oei đei asong tơmam sa lei-lăi lăm lu 'nhŏng oh sư, mă khan sư đei boih jên đơ̆ng tĕch tơmam hnam dơnŏ sư.

⁹Mưh lu iĕm mơ̆t boih lăm dêh mă Kră Yang 'Bok Kei-Dei iĕm ăn. 'Nĕ kơ pơhrăm pơm rok kiơ̆ dôm lu tơdrong kơnê̆ krưp lu adrĕch adrung noh pơm.

¹⁰Mă-lei iĕm 'nĕ kơ đei bơngai bu pơyơ̆r kon drŏ-nglo kon drŏ-kăn sư 'buh arih pơm tơmam soi, kơ yang, 'nĕ kơ pơm bơngai chă tơng lăng, bơngai mă juăt lăng sơnglŏng khan lê̆ adrol tơdrong wă truh, bơngai pơjâu tơwir,

¹¹bơngai juăt kơ chă hơlĕnh, chă pơma hăm lu yang, chă pơma hăm atâu.

¹²Yua kơ Kră Yang areh păng lăng krưp dêh lu bơngai bu bơ̆jang pơm tơdrong noh păng yua kơ đĭ dôm tơdrong jang kơnê̆ krưp noh, na Kră Yang 'Bok Kei-Dei iĕm pơpuh lê̆ đĭ lu adrĕch adrung lu đe noh đơ̆ng 'bơ̆t anăp iĕm.

¹³Iĕm athei oei sa mă 'lơ̆ng rơgoh 'bơ̆t anăp Kră Yang 'Bok Kei-Dei iĕm.

¹⁴Lu adrĕch adrung mă iĕm gô puh lê̆, noh lu bơngai pơm pơjâu, lu chă hlang lăng lu bơngai chă khan lê̆ adrol; mă gah iĕm Kră Yang 'Bok Kei-Dei iĕm ưh kơ ăn ôh iĕm pơm thoi noh.

¹⁵Đơ̆ng lăm lu iĕm Kră Yang 'Bok Kei-Dei iĕm gô pôk minh 'nu bơngai pơm 'bok khan lê̆ adrol thoi inh; đơ̆ng lăm lu 'nhŏng oh iĕm, lu iĕm athei mơ̆ng kiơ̆ sư!

¹⁶Noh trŏ thoi iĕm krao apinh boih Kră Yang 'Bok Kei-Dei iĕm, tơ Hôrêp lăm năr akŭm tih khan: Nhôn krao apinh 'nĕ pă ăn nhôn kơtơ̆ng nơ̆r Kră Yang 'Bok Kei-Dei ôr dơ̆ng păng 'nĕ pă ăn nhôn 'bôh ŭnh sa khơ̆ng 'nâu dơ̆ng, kơnh nhôn lôch đĭ.

¹⁷Kơplah noh, Kră Yang khan kơ inh: Lu sư pơma trŏ;

¹⁸Inh gô rơih pôk ăn minh 'nu bơngai khan lê̆ adrol thoi ih đơ̆ng, lăm 'nhŏng oh lu sư. Inh gô ăn nơ̆r Inh pơma lăm 'bơ̆r sư, na sư gô pơma ăn kơ lu sư dôm tơdrong Inh tơtă kơ lu sư.

¹⁹Dah bơngai bu ưh kơ wă mơ̆ng nơ̆r Inh, đơ̆ng bơngai mă khan lê̆ adrol noh sư gô yua anăn Inh pơma, na Inh boih gô jô̆ bơngai noh yoch.

²⁰Tơdah đei bơngai khan lê̆ adrol đei jơhngơ̆m pơang yua anăn Inh pơma dôm tơdrong kiơ mă Inh ưh kơ athei sư pơma, dah yua anăn lu yang nai, na lu bơngai thoi noh trŏ kơ pơlôch.

²¹Lu iĕm pơma lăm jơhngơ̆m khan: Liơ lu nhôn gơh băt kơnăl nơ̆r ayơ mă đơ̆ng Kră Yang bơtho khan?

²²Tơdah bơngai khan lê̆ adrol yua anăn Kră Yang na pơma, nơ̆r pơma bơngai noh ưh kơ đei truh păng ưh kơ đei pơsĭt 'blep trŏ, noh ưh kơ nơ̆r Kră Yang mă bơtho khan, bơngai khan lê̆ adrol pơma lĕch đơ̆ng tơdrong sư pơang. 'Nĕ hli kơ sư ôh.