Read bahnar Both 19 Bible Online

Both 19 - bahnar bible

Both 19

¹Layơ Kră Yang 'Bok Kei-Dei iĕm pơlôch pơrăm đĭ boih lu adrĕch adrung mă oei lăm dêh char Kră Yang 'Bok Kei-Dei iĕm ăn mưh iĕm đei pơpuh lê̆ lu sư boih, mơ̆t oei lăm lu pơlei păng lăm hnam lu sư boih,

²Iĕm athei 'măn lê̆ pha pêng tŏ pơlei kơ lăm tŏk-bŏk dêh mă Kră Yang 'Bok Kei-Dei ăn iŏk.

³Iĕm athei pơm trong, klah asong pêng tŏ tơring lăm dêh mă Kră Yang 'Bok Kei-Dei ăn kơ iĕm asong wă bơ̆jang sa; Wă ăn kơ lu bơngai pơlôch đe ôn kơ'nơp tơ noh.

⁴'Nâu boih tơdrong juăt kơ lu bơngai pơlôch bơngai ôn kơ'nơp tơ noh wă kơ gơh pơklaih tơdrong arih sư kơdih, bơngai bu hơch 'bơm pơlôch ưh kơ pơrơ̆ng, ưh kơ đei chă areh băl adrol.

⁵Pơtih gia thoi bơngai noh năm hơdai buăl sư mơ̆t tơ lăm bri kăl 'long ŭnh, ti sư oei kăl 'long ŭnh, na pla sung tơgloh 'bơm buăl sư, lôch hloi, na sư kơdâu ôn kơ'nơp akâu sư minh lăm pêng tŏ pơlei 'nâu, wă pơklaih tơdrong arih sư;

⁶Dah bơngai wă tơiung kơting, blĕk dêh na druh bơngai mă pơlôch đe noh, yua kơ trong ataih dêh, druh tam na koh pơlôch hloi bơngai noh, mă khan bơngai noh ưh tam trŏ pơlôch ră, ưh kơ đei tơdrong đơ̆ng adrol ki sơ̆, sư tam lah chă tơhil areh băl hăm lu rông 'bôt sư.

⁷Yua kơ thoi noh inh bơtho khan kơ iĕm: Klah lê̆ pêng tŏ pơlei âu.

⁸Mưh Kră Yang 'Bok Kei-Dei pơih hơdral teh đak iĕm rai să kiơ̆ thoi Sư đei pơkă pơkăm hăm lu 'bok iĕm, na ăn kơ iĕm đĭ teh đak mă Sư pơkă wă ăn kơ lu 'bok iĕm.

⁹Yua kơ iĕm, pơm kiơ̆ dôm nơ̆r tơtă mă inh bơtho khan ăn kơ iĕm năr âu, athei 'mêm kơ Kră Yang 'Bok Kei-Dei, yak kiơ̆ trong Sư ling-lang, thoi noh iĕm athei lê̆ thim pêng tŏ pơlei plơ̆ng dơ̆ng,

¹⁰wă huay kơ đei tuh pham tơdrong kơ đei lăm char mă Kră Yang 'Bok Kei-Dei ăn boih kơ iĕm jang sa, lei na iĕm huay kơ pŭ yoch tuh pham noh.

¹¹Mă-lei tơdah đei minh 'nu bơngai drŏ-nglo hil areh kơ bơngai rông 'bôt sư, chă đon wă răp pơlôch bơngai noh, bơngai noh lôch, na kơdâu ôn kơ'nơp kơdih lăm minh lu pơlei 'nâu,

¹²Na lu kră pơlei sư wơh athei đe rôp bơngai noh đơ̆ng pơlei ôn kơ'nơp na pơjao ăn kơ lu bơngai pơm 'mong pham pơlôch bơngai noh.

¹³Iĕm 'nĕ lăng khan mơnat kơ bơngai pơlôch đe, mă-lei athei pơlôch lê̆ lu bơngai pơlôch đe ưh kơ pơm yoch đơ̆ng dêh Isơrael, wă kơ lu iĕm đei pŭn hiôk.

¹⁴'Nĕ kơ rĭ 'long pơ̆ng hơdral mă đơ̆ng lu kră sơ̆ đei pơ̆ng wă klah asong teh jang sa, lăm dêh char mă Kră Yang 'Bok Kei-Dei ăn kơ iĕm iŏk.

¹⁵Kơtơ̆ng đơ̆ng minh 'nu bơngai pơm kơdranh ưh tam gơh ôh wă jô̆ kơ bu khan yoch mă khan sư pơm glăi dêh dah sư đei pơm glăi tơdrong kiơ; athei đei 'bar dah pêng 'nu bơngai pơm kơdranh, lei na gơh jô̆ sư glăi.

¹⁶Tơdah đei minh 'nu roi sơlam hơlĕnh wă jâu kư̆ kă kơ minh 'nu khan pơm yoch glăi,

¹⁷'bar 'nu bre bơngai đe jâu, bơngai jâu noh gô năm 'bơ̆t anăp Kră Yang 'bơ̆t anăp 'bok soi păng lu kră sek tơlang oei jang kơplah noh.

¹⁸Lu kră sek tơlang gô apinh lăng hơlen mă hơđăl, tơdah 'bôh bơngai chă sơlam hơlĕnh, pơglăi ăn kơ lu 'nhŏng oh sư,

¹⁹Lei ih athei pơm kơ sư thoi sư đei pơm kơ 'nhŏng oh sư; lu iĕm athei pơm rơgoh tơdrong yoch đơ̆ng lăm kon pơlei iĕm thoi noh.

²⁰Wă kơ lu bơngai kơtơ̆ng tơdrong noh gô hli, ưh pă pơm kơnê̆ chă jâu băl dơ̆ng lăm lu iĕm.

²¹'Nĕ khan mơnat, tơdrong arih 'mong tơdrong arih, măt 'mong măt, hơnĕnh 'mong hơnĕnh, ti 'mong ti, jơ̆ng 'mong jơ̆ng.