Read bahnar Both 2 Bible Online

Both 2 - bahnar bible

Both 2

¹Thoi noh lu bơ̆n wơ̆t hơlơ̆k na yak năm tơ lăm char glă tơ gah đak Dơsĭ 'Brê, kiơ̆ thoi Kră Yang đei pơkă kơ inh păng lu nhôn năm đunh năr dăr kơ kông groi Seir.

²Kră Yang đei khan kơ inh:

³Lu iĕm năm dăr kơ dêh kông groi âu kư̆m hrăp đunh boih, na năm bĕ tơ gah yă-nơ̆m.

⁴Roi bĕ kơ kon pơlei băt: Lu iĕm năm brih wă jê̆ teh đak lu 'nhŏng oh iĕm, kon sâu Êsâu, lu bơngai oei lăm char Seir, lu sư gô hli kơ lu iĕm na lu iĕm athei kơchăng bĕ.

⁵'Nĕ kơ đei tơblah hăm lu sư, yua kơ Inh ưh kơ ăn kơ lu iĕm char lu sư noh ôh, mă khan minh anih teh đêl tơpang jơ̆ng lu iĕm juă kư̆m ưh kơ ăn 'mơ̆i, yua kơ Inh đei ăn boih kơ Êsâu kông groi Seir âu wă kơ sư bơ̆jang sa.

⁶Lu iĕm gô răt tơmam sa đơ̆ng lu sư hăm jên hu thoi noh lu iĕm đei tơmam sŏng sa, lu iĕm kư̆m gô răt đak nhă đơ̆ng lu sư hăm jên hu na lu iĕm đei đak nhă.

⁷Yua kơ Kră Yang 'Bok Kei-Dei iĕm ăn pŭn hiôk dôm tơdrong jang đơ̆ng tơpang ti iĕm pơm; Sư băt boih kơ tơdrong lu iĕm năm rok char glă să âu, lăm puăn-jĭt sơnăm 'nâu, Kră Yang 'Bok Kei-Dei iĕm oei hăm iĕm boih; huay kơ kơ'bah kiơ ôh.

⁸Thoi noh lu bơ̆n năm hlôi, weh đơ̆ng 'nhŏng oh lu bơ̆n, lu kon drŏ-nglo Êsâu, lu bơngai oei lăm char Seir, Bơ̆n weh đơ̆ng trong Araba, rok wer kơ trong Êlat păng Êsiôn Gêber tŏk đak Dơsĭ 'Brê năm tơpăt rok trong char glă Môap.

⁹Kră Yang khan kơ inh: 'Nĕ kơ ayăt păng 'nĕ kơ tơblah hăm lu kon pơlei Môap; yua kơ Inh ưh kơ đei ăn kơ iĕm ôh dêh âu wă bơ̆jang sa, Inh ăn boih pơlei Ar kơ kon sâu Lot bơ̆jang sa.

¹⁰Adrol sơ̆, kon pơlei Êmim oei tơ noh, jơ̆ minh adrĕch kon pơlei tih, lơ, akâu tih hơbŏ thoi adrĕch bơngai Anakim.

¹¹Đe kư̆m krao kon pơlei âu kon pơlei Rêphaim, a tih hơbŏ thoi adrĕch bơngai Anakim; mă-lei kon pơlei Môap krao lu sư bơngai Êmim.

¹²Kon pơlei Hôrit adrol sơ̆ kư̆m oei tơ char Seir; mă-lei kon sâu Êsâu pơlôch pơrăm đĭ kon pơlei păng oei tơplih kơ lu sư tơ noh, kư̆m thoi bơngai Isơrael pơm kơ dêh mă đơ̆ng Kră Yang ăn kơ lu sư bơ̆jang sa.

¹³Dang ei, iung bĕ năm tŏk thong đak glung Sêret. Thoi noh lu nhôn năm hlôi boih kơ thong đak glung Sêret.

¹⁴Thoi noh, măng năr lu nhôn, lĕch đơ̆ng Kades Barnêa, truh tơ năm hlôi kơ đak glung Sêret, đunh đei pêng-jĭt tơhngam sơnăm đĭ lăm minh chăl dĭng mah đĭ lu bơngai drŏ-nglo mă gơh pơm linh lôch đĭ đơ̆ng lăm kơđông, kư̆m thoi Kră Yang đei pơkă boih.

¹⁵Tơpă, yua kơ đơ̆ng ti Kră Yang hil pơrăm lu sư đơ̆ng lăm kơđông dĭng mah răm đĭ.

¹⁶Đơ̆ng rŏng kơ lu bơngai pơm linh hlôi tôch hiong đĭ boih đơ̆ng kon pơlei;

¹⁷na Kră Yang khan kơ inh:

¹⁸Năr âu, lu iĕm gô năm rok pơlei Ar lăm dêh Môap.

¹⁹Mưh iĕm năm truh jê̆ kon sâu Ammôn, 'nĕ kơ ayăt păng tơblah hăm lu sư hŏ; yua kơ Inh ưh kơ ăn kơ iĕm ôh dêh char đơ̆ng kon sâu Ammôn jing teh iĕm jang sa, đơ̆ng Inh ăn boih dêh noh kơ lu kon sâu Lot bơ̆jang sa.

²⁰Dêh âu dêh Rêphaim, adrol sơ̆ kon pơlei Rêphaim oei tơ noh, kon pơlei Ammôn krao anăn Samsumim.

²¹Minh adrĕch kon pơlei tih păng lơ, hơbŏ sư tih kơjung thoi adrĕch kon pơlei Anakim, mă-lei Kră Yang pơrăm lê̆ lu sư 'bơ̆t anăp kon pơlei Amôn; kon pơlei Amôn puh tơgar iŏk dêh noh păng oei hloi tơ noh;

²²kư̆m thoi Kră Yang pơm kơ lu kon sâu Êsâu, oei tơ char Seir, kơplah mă Kră Yang pơrăm kon pơlei Hôrit 'bơ̆t anăp lu kon sâu Êsâu; lu sư puh tơgar iŏk dêh kon pơlei Hôrit păng oei hloi tơ noh dĭng truh dang ei.

²³Bĕ gah kon pơlei Awim, oei đơ̆ng lăm lu pơlei iĕ truh tơ pơlei Gasa, kon pơlei Kaptorim, oei đơ̆ng char Kaptôr pơrăm lu sư na oei hloi tơ noh.

²⁴Iung bĕ, yak năm hlôi kơ đak glung Arnôn to;b Inh jao Sihôn, pơtao Hesbôn, bơngai Amôrit, hăm dêh lu sư lăm tơpang ti iĕm; pơtơm iŏk bĕ păng tơblah hăm lu sư.

²⁵Năr âu Inh gô pơm ăn kơ lu kon pơlei pơla mă oei lăm kơpal teh âu gô hli păng krưp dêh đei kơtơ̆ng roi gah iĕm, lu kon pơlei noh gô tơtơ̆ păng hli krưp dêh kơ iĕm.

²⁶Đơ̆ng char glă Kađêmôt, inh wơh bơngai năm roi kơ Sihôn, pơtao Hesbôn, iŏk nơ̆r pơma hiôk hăm lu sư khan:

²⁷Apinh ih ăn kơ nhôn yak năm rok dêh ih. Nhôn yak năm rok kiơ̆ trong tih, nhôn ưh kơ weh tơ 'ma dah tơ 'ngiĕo ôh.

²⁸Ih iŏk jên hu 'nâu tĕch ăn tơmam sa wă kơ nhôn đei sa; iŏk jên hu 'nâu tĕch ăn đak, wă kơ ôn inh đei đak nhă; păng wă kơ inh gơh rok năm hloi.

²⁹Kŭm thoi kon sâu Êsâu mă oei tơ char Seir păng kon pơlei Môap mă oei tơ char Ar hlôi ăn boih kơ inh thoi noh gô dĭng mă nhôn tŏk năm hlôi kơ đak Krong Jôrđăn, wă mơ̆t tơ dêh mă Kră Yang 'Bok Kei-Dei nhôn wă ăn kơ nhôn.

³⁰Mă-lei Sihôn, pơtao Hesbôn, ưh kơ ăn kơ lu nhôn yak năm rok teh đak lu sư ôh; yua kơ Kră Yang 'Bok Kei-Dei pơm jơhngơ̆m kơ̆l pơtao arăng, wă jao sư lăm tơpang ti nhôn, kư̆m thoi năr 'nâu.

³¹Kră Yang khan kơ inh: Âu na dang ei Inh jao ăn kơ iĕm Sihôn păng dêh char sư, iŏk bĕ wă kơ ih gơh oei bơ̆jang sa lăm char sư.

³²Kơplah noh, Sihôn păng đĭ-đăng kon pơlei sư lĕch wă tơ'bơ̆p păng tơblah hăm lu bơ̆n tơ pơlei Jahas.

³³Mă-lei Kră Yang 'Bok Kei-Dei bơ̆n jao sư kơ lu bơ̆n; kon drŏ-nglo hăm đĭ-đăng lu kon pơlei sư tơblah jei bơ̆n.

³⁴Kơplah noh bơ̆n iŏk đĭ lu pơlei tih sư, pơrăm đĭ lu pơlei tih păng pơrăm đĭ-đăng drŏ-nglo, drŏ-kăn păng lu kon hơ'lơ̆p, ưh kơ đei lê̆ minh 'nu bu.

³⁵Lu bơ̆n plah tơgar iŏk sem dơrong păng mŭk tơmam lăm pơlei tih mă đêl blah iŏk jei bơ̆n.

³⁶Đơ̆ng pơlei Arôe; mă oei tơter thong đak glung Arnôn păng lu pơlei tih oei lăm thŭng truh tơ Gileat, ưh kơ đei minh pôm pơlei tih ayơ mă pơm kơjăp dêh 'bơ̆t anăp lu bơ̆n; Kră Yang 'Bok Kei-Dei lu bơ̆n jao đĭ lu pơlei noh ăn kơ bơ̆n.

³⁷Lu bơ̆n ưh kơ gơh năm jê̆ pôm dêh kon sâu Ammôn mă oei jơ̆p tơter đak krong Jabôk, dah lu pơlei tih kơpal kông groi, dah mă anih ayơ Kră Yang 'Bok Kei-Dei lu bơ̆n khă ưh kơ ăn lu bơ̆n tơgar iŏk.