Read bahnar Both 20 Bible Online

Both 20 - bahnar bible

Both 20

¹Mưh iĕm năm tơblah ham lu bơngai ayăt kơ iĕm 'bôh aseh, gre aseh păng linh lơ hloh kơ iĕm, 'nĕ kơ hli, yua kơ Kră Yang 'Bok Kei-Dei iĕm Tơ'ngla mă chông iĕm lĕch đơ̆ng dêh Êyiptơ, gô oei hơdai iĕm.

²Mưh wă pơtơm tơblah, 'bok soi gô năm adrol, pơtơm krao linh:

³Na sư khan: Ơ lu bơngai Isơrael mơ̆ng bĕ! Năr âu lu bơ̆n gô năm tơblah hăm lu bơngai ayăt lu iĕm 'nĕ rơdu lêl 'nĕ kơ hli, 'nĕ kơ tơrơ, 'nĕ kơ lăng krưp.

⁴Yua kơ Kră Yang 'Bok Kei-Dei lu iĕm gô năm hơdai hăm lu iĕm, tơblah lu ayăt dŏng lu iĕm păng ăn jei lu iĕm.

⁵Lu yŏng pơgơ̆r linh khan kơ lu linh: Bơngai bu 'nao pơm hnam tam mă et sa pơkeh? Brŏk bĕ tơ hnam sư, kơnh hli kơ lôch lăm năr tơblah, na lê̆ kơ bơngai nai et sa pơkeh.

⁶Bơngai bu hlôi pơm pơtăm minh hlak pơgar hơmu păng tam mă phĕ sa plei? Brŏk bĕ tơ hnam sư, kơnh hli kơ lôch lăm năr tơblah, na lê̆ kơ bơngai nai phĕ sa plei noh.

⁷Bơngai bu hơkơ̆t boih hăm bơngai adruh, tam mă oei? Brŏk bĕ tơ hnam sư, kơnh hli kơ lôch lăm năr tơblah, na lê̆ kơ bơngai nai iŏk oei?

⁸Lu yŏng pơgơ̆r linh khan dơ̆ng hăm lu linh: Bơngai bu hli tơrơ? Brŏk bĕ tơ hnam sư, kơnh jơhngơ̆m 'nhŏng oh wang hơdai hli thoi sư mơ̆n,

⁹Lu yŏng pơgơ̆r linh pơma đang boih hăm lu linh, lu sư chă rơih pơm yŏng pơgơ̆r đĭ-đăng linh.

¹⁰Kơplah wă năm wang blah pơlei ayơ, adrol hloh athei pơma hiôk hăm pơlei noh.

¹¹Tơdah pơlei noh tơl rơngơp păng pơih ăn 'măng jang kơ lu iĕm, lei đĭ-đăng kon pơlei noh gô pơm đĭch păng bơ̆jang kơ iĕm.

¹²Mă-lei tơdah pơlei noh ưh kơ wă pơhiôk hăm iĕm 'maih tơblah hăm iĕm lei athei wang tăp dăr kơ pơlei noh.

¹³Dah Kră Yang 'Bok Kei-Dei pơjao pơlei noh lăm tơpang ti iĕm, lei iĕm athei pơlôch pơđĭ lu bơngai drŏ-nglo pơlei hăm đao gưm.

¹⁴Na iĕm athei rôp iŏk đĭ, lu bơngai drŏ-kăn, lu hơ'lơ̆p, sem dơrong păng đĭ-đăng dôm tơmam kiơ lăm pơlei, noh tơmam blah tơgar iŏk, iĕm gô iŏk yua dôm tơmam đêl blah tơgar iŏk mă Kră Yang ăn boih kơ iĕm.

¹⁵Lu iĕm athei pơm thoi noh mơ̆n hăm lu pơlei mă oei ataih dêh đơ̆ng iĕm, mă ưh kơ trŏ pơlei lu adrĕch 'nâu.

¹⁶Mă-lei lăm pơlei lu adrĕch 'nâu, mă Kră Yang 'Bok Kei-Dei ăn boih kơ iĕm bơ̆jang sa, na iĕm athei pơlôch đĭ sem kiơ dui jơhngơ̆m.

¹⁷Athei pơlôch pơrăm đĭ, kon pơlei Hêtit, kon pơlei Amôrit, kon pơlei Kanaan, kon pơlei Pêrisit, kon pơlei Hêwit, kon pơlei Jêbus, kiơ̆ thoi Kră Yang 'Bok Kei-Dei iĕm đei pơkă boih.

¹⁸Tơdah ưh lu sư gô pơtơm iĕm rok pơm kiơ̆ dôm lu tơdrong kơnê̆ krưp mă lu sư pơm, kơkuh kơ rup yang lu sư, lu iĕm gô pơm yoch hăm Kră Yang 'Bok Kei-Dei lu iĕm.

¹⁹Mưh lu iĕm wang dăr pơlei ayơ đunh wă 'maih tơgar iŏk, 'nĕ kơ iŏk sung kăl lu 'long plei sa pơlei noh, yua kơ lu iĕm gô phĕ sa plei 'long noh 'nĕ kơ kăl tŭk lê̆ lu 'long, yua kơ lu 'long 'nâu chăt lăm mir, ưh kơ bơngai mă lu iĕm wang;

²⁰Lu iĕm athei pơrăm păng kăl lu 'long ưh kơ đei plei sa; yua bĕ lu 'long noh pơm kơđông anih wă tơblah hăm pơlei, dĭng mă lu iĕm gơh mơ̆t blah iŏk.