Read bahnar Both 21 Bible Online

Both 21 - bahnar bible

Both 21

¹Tơdah lăm teh mă Kră Yang 'Bok Kei-Dei iĕm ăn kơ lu iĕm iŏk oei, đei 'bôh minh 'nu bơngai đe pơlôch, tơ'bĭch lăm chŭn, ưh kơ băt bơngai bu pơlôch,

²na lu đe kră pơlei păng lu bơngai sek tơlang athei pơtŏ lăng đơ̆ng bơngai lôch noh truh tơ lu pơlei jum dăr noh ataih dang yơ.

³Lu đe kră pơlei oei jê̆ hloh bơngai lôch noh, athei rôp minh pôm rơmo akăn adruh tam mă jang dah tam mă tah tơ 'long ăt,

⁴dui ba rơmo noh truh tơ thŭng, anih mă ưh tam đei bu choh păng đei đak ro tơ noh lu sư gô gơ̆ lê̆ hơko rơmo akăn noh.

⁵Lu 'bok soi, kon drŏ-nglo bơngai Lêwi, gô năm jê̆ tơ noh; yua kơ Kră Yang 'Bok Kei-Dei iĕm rơih iŏk lu sư boih wă jang kơ Sư păng yua anăn Kră Yang sơkat ăn pŭn hiôk athei sek tơlang lu tơdrong pơjah pơjăng păng đei pơjĭ băl.

⁶Đĭ kơ lu kră pơlei mă oei jê̆ hloh bơngai lôch noh, athei ôp ti lu sư tơ kơpal rơmo akăn adruh noh, mă 'nao gơ̆ hơko tơ lăm thŭng noh

⁷păng ti lu nhôn ưh kơ đei pơm kơ pham bơngai âu lĕch; măt lu nhôn ưh kơ đei 'bôh bu pơlôch.

⁸Kơkuh kơ Ih ơ Kră Yang apinh Ih mơnat ăn tơdrong yoch kon pơlei pơla Ih Isơrael mă Ih huai iŏk boih; apinh 'nĕ kơ jô̆ pham ưh kơ đei tơdrong yoch âu kơ kon pơlei Ih! Lei tơdrong yoch tuh pham âu gô huai iŏk.

⁹Lu iĕm gô rơgoh 'lơ̆ng tơpăt 'bơ̆t anăp Kră Yang, na tơdrong tuh pham ưh kơ đei tơdrong yoch 'nâu pă đei tơpŭ kơ iĕm.

¹⁰Mưh layơ iĕm tơblah hăm lu bơngai ayăt kơ iĕm păng Kră Yang 'Bok Kei-Dei iĕm pơjao lu sư lăm ti iĕm păng iĕm rôp lu sư pơm bơnă,

¹¹tơdah lăm lu bơnă đei minh 'nu bơngai adruh 'lơ̆ng păng hưch kơ sư 'maih iŏk sư pơm akăn,

¹²athei chông ba sư brŏk tơ hnam iĕm; adruh ei athei yuă sŏk, kăt tơngiơh ti sư.

¹³Sư gô plôh lê̆ ao bơnă, na oei lăm hnam iĕm nhơ̆m kơ mĕ 'bă sư lăm minh khei. Đơ̆ng noh iĕm gô năm oei kơ sư, pơm klo sư păng sư gô pơm akăn iĕm.

¹⁴Tơdah năr đơ̆ng rŏng ưh pă wă kơ sư dơ̆ng, sư 'maih wă năm tơ yơ, na athei ăn kơ sư năm mơ̆ng kơ sư wă, yua kơ iĕm hlôi iŏk sư pơm akăn, ưh kơ gơh tĕch păng pơm kơ sư thoi đĭch.

¹⁵Tơdah minh 'nu bơngai drŏ-nglo đei 'bar 'nu akăn, akăn 'nâu sư 'mêm, akăn noh sư areh, mă-lei 'bar 'nu noh đei kon ngăl, na kon kơdră drŏ-nglo gah akăn mă sư areh noh, iŏk jô̆ kon kơdră

¹⁶Dah sư klah asong mŭk tơmam ăn kơ lu kon sư lei ưh kơ gơh pơjao ăn kơ kon drŏ-nglo kơdră mă sư 'mêm tơplih kơ kon drŏ-nglo akăn mă sư areh ôh, yua kơ sư noh trŏ kơ kon drŏ-nglo mă kơdră.

¹⁷Bơngai noh athei iŏk kon drŏ-nglo akăn mă sư areh noh pơm kon kơdră, klah asong 'bar gah dôm tơmam sư đei hloh kơ lu kon nai. Kon kơdră drŏ-nglo noh đơ̆ng jơhngơ̆m pran 'bă, na jing kon kơdră noh sư boih.

¹⁸Tơdah bơngai bu đei minh 'nu kon anat kơ bơtho păng kơchu, ưh kơ mơ̆ng kiơ̆ nơ̆r mĕ 'bă, mă khan bơtho pơjĭ ră, sư oei kơchu ưh kơ mơ̆ng nơ̆r,

¹⁹na mĕ 'bă athei rôp dui chông ba sư truh tơ lu kră pơlei, tơ anih 'măng jang pơlei.

²⁰Mĕ 'bă gô roi ăn kơ lu kră pơlei khan: 'Nâu kon lu nhôn kơchu păng arăng kơ̆l dêh, ưh kơ mơ̆ng nơ̆r lu nhôn, bơtho khan, jing bơngai thông kư̆ kă, chă et suai ling-lang.

²¹Đơ̆ng noh đĭ-đăng, lu drŏ-nglo lăm pơlei klơ̆m pơlôch sư păng tơmo; iĕm pơm rơgoh tơdrong kơnê̆ đơ̆ng lăm kon pơlei păng đĭ-đăng kon pơlei Isơrael gô kơtơ̆ng tơdrong noh na hli tơrơ.

²²Tơdah minh 'nu bơngai bu pơm yoch tih trŏ kơ lôch, na đe pơlôch sư hloi păng hrek atol sư tơ 'long gơ̆ng,

²³atâu sư 'nĕ kơ lê̆ kơpal gơ̆ng 'long noh truh minh măng, athei 'bŭ lăm năr noh hloi, yua bơngai đe hrek atol noh Kră Yang 'Bok Kei-Dei hiap pơtê̆ boih, na iĕm 'nĕ kơ pơm 'mê̆-'mach kơ teh đak iĕm mă Kră Yang 'Bok Kei-Dei ăn kơ iĕm jang sa.