Read bahnar Both 23 Bible Online

Both 23 - bahnar bible

Both 23

¹Bơngai drŏ-nglo krĕo, kăt trong hơyô dah pơchah bŏng ưh kơ gơh mơ̆t lăm khŭl kon pơlei Kră Yang ôh.

²Bơngai mă mĕ sư pơm kư̆ kă pŭ kon pôm ưh kơ gơh ăn mơ̆t tơ lăm khŭl kon bơngai Kră Yang ôh, mă khan truh tơ kon sâu mơjĭt jơhnơr kư̆m ưh kơ gơh ăn mơ̆t.

³Bơngai Ammôn kư̆m thoi bơngai Môap kư̆m ưh kơ gơh mơ̆t lăm khŭl kon pơlei Kră Yang, mă khan truh tơ kon sâu mơjĭt jơhnơr kư̆m ưh kơ gơh ôh.

⁴Yua kơ kơplah lu iĕm lĕch hlôi đơ̆ng dêh Êyiptơ, lu sư ưh kơ năm ba 'bĕng tơmam sa păng đak nhă sơng iŏk lu iĕm mă rai krao apah Balaam kon drŏ-nglo Bêôr oei tơ pơlei Pêthôr char Aram Naharaim, a năm hiap lu iĕm.

⁵Mă-lei Kră Yang 'Bok Kei-Dei lu iĕm ưh kơ wă mơ̆ng Balaam, na tơplih lê̆ tơdrong hiap pơtê̆ jing tơdrong sơkat pŭn hiôk ăn kơ lu iĕm, yua kơ Kră Yang 'Bok Kei-Dei lu iĕm 'mêm mơnat kơ lu iĕm.

⁶'Nĕ kơ layơ pơgơ̆p hơdai hăm 'bar khŭl adrĕch 'nâu.

⁷'Nĕ kơ hil areh kơ bơngai Eđôm yua kơ lu sư 'nhŏng oh iĕm, kư̆m 'nĕ kơ areh kơ bơngai Êyiptơ, yua kơ lu iĕm đêl oei lăm dêh char sư.

⁸Kon sâu lu sư jơhnơr mă pêng ăn gơh mơ̆t lăm khŭl kon pơlei Kră Yang.

⁹Kơplah iĕm năm tơblah hăm lu bơngai ayăt kơ iĕm, athei kơchăng kơ tơdrong kơnê̆ 'mê̆-'mach.

¹⁰Tơdah đei minh 'nu bơngai drŏ-nglo bu lăm lu iĕm đei đak lĕch kơmăng, athei tơlĕch sư đơ̆ng lăm kơđông, sư ưh kơ gơh mơ̆t lăm kơđông linh dơ̆ng.

¹¹Truh 'năr kơsơ̆ bơngai noh athei hum lăm đak mưh 'năr mơ̆t boih gơh mơ̆t lăm kơđông linh dơ̆ng.

¹²Lu iĕm athei đei minh anih tơ 'nguaih kơ kơđông linh noh anih chă bơyơ̆ng.

¹³Rim 'nu athei đei minh pơm 'long hăm tơmam hơmăt akâu tơdah wă năm tơ 'nguaih chă bơyơ̆ng athei iŏk 'long 'nâu na sir đang kơ chă bơyơ̆ng, athei 'bŭ lê̆.

¹⁴Yua kơ Kră Yang 'Bok Kei-Dei iĕm năm lăng kơđông linh iĕm wă dŏng pơklaih lu iĕm đơ̆ng lu bơngai ayăt iĕm, kơđông iĕm athei rơgoh 'lơ̆ng, wă kơ Sư huay kơ 'bôh tơdrong kơnê̆ 'mê̆-'mach, na mah weh achăng lê̆ lu iĕm.

¹⁵Tơdah đĭch kơdâu ôn đơ̆ng yŏng tơ'ngla sư truh tơ hnam iĕm, 'nĕ kơ năm ba pơdrâu ăn kơ yŏng sư dơ̆ng,

¹⁶Bơngai 'noh gơh oei hơdai hăm iĕm tơ lăm anih ayơ mă bơngai 'noh rơih, lăm minh pôm pơlei ayơ bơngai 'noh sư 'maih oei; iĕm 'nĕ kơ pơjuă pơđep bơngai 'noh.

¹⁷Lăm lu kon drŏ-kăn dah drŏ-nglo bơngai Isơrael; 'nĕ kơ đei bơngai bu pơm pơyô kư̆ kă tơ anih rup yang.

¹⁸Iĕm 'nĕ iŏk jên đơ̆ng mơdro akâu mă đơ̆ng drŏ-kăn dah drŏ-nglob chĕp ba tơmơ̆t lăm hnam Kră Yang 'Bok Kei-Dei iĕm, pơsĭt đêl nơ̆r pơkă yua kơ 'bar tơdrong noh krưp dêh kơ Kră Yang 'Bok Kei-Dei iĕm areh lăng krưp dêh.

¹⁹Lu iĕm 'nĕ kơ iŏk jên kiĕng đơ̆ng lu 'nhŏng oh iĕm tŏk iŏk tơmam sa, dah jên kăk dah tơmam kiơ nai.

²⁰Lu iĕm gơh iŏk kiĕng đơ̆ng lu bơngai 'nguaih, mă-lei 'nĕ kơ iŏk kiĕng đơ̆ng lu 'nhŏng oh iĕm kơdih, Isơrael, lei na Kră Yang 'Bok Kei-Dei iĕm ăn pŭn hiôk kơ iĕm lăm dôm tơdrong iĕm jang sa lăm dêh mă iĕm wă mơ̆t iŏk.

²¹Mưh lu iĕm pơkă pơkăm hăm Kră Yang 'Bok Kei-Dei iĕm, 'nĕ kơ pơhiơ̆ gô đunh, athei pơm pơkeh hloi, yua kơ Kră Yang 'Bok Kei-Dei lu iĕm athei iĕm pơm pơkeh tơdrong iĕm pơkă pơkăm ei; dah iĕm ưh kơ pơm pơkeh hloi, lei iĕm gô pŭ tơdrong yoch.

²²Mă-lei tơdah iĕm ĕnh ưh kơ pơkă pơkăm, lei iĕm huay kơ pŭ yoch ôh.

²³Mưh 'bơ̆r iĕm hlôi pơkă pơkăm boih hăm Kră Yang 'Bok Kei-Dei iĕm, na iĕm athei pơm pơkeh đơ̆ng 'bơ̆r iĕm pơma noh.

²⁴Kơplah iĕm mơ̆t lăm pơgar hơmu lu bôl buăl iĕm, na gơh phĕ sa plei hơmu, kiơ̆ kơ hơlŏng iĕm sa hrăp, mă-lei ưh kơ gơh phĕ tah ba lăm kơdŭng iĕm.

²⁵Kơplah iĕm mơ̆t lăm chŭn mir 'ba mi lu bôl buăl iĕm, na ti lu iĕm gơh broch 'ba; mă-lei 'nĕ kơ iŏk săng kô yuă 'ba.